21-27 Sune

Tokāteline mo e Ngaahi Fuakava 67–70

“[Mahuʻinga … Ange he Ngaahi Koloa ʻo e Māmaní Kotoa]”

Kimuʻa peá ke lau ʻa e ngaahi fokotuʻu ʻi he fokotuʻutuʻu fakalēsoni ko ʻení, ako e Tokāteline mo e Ngaahi Fuakava 67–70, pea hiki e ngaahi ongo fakalaumālie ʻokú ke maʻú. ʻE tokoni e ngaahi ongo ʻokú ke maʻú ke ke faʻu ha palani kuo ueʻi fakalaumālie. Hili iá pea fakalahi atu ki he palani ko iá ʻaki ha ngaahi fakakaukau mei he fokotuʻutuʻu fakalēsoni ko ʻeni mei he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí pe mei he ngaahi makasini ʻa e Siasí.

Lekooti Hoʻo Ngaahi Ongó

Fakaafeʻi e Feʻinasiʻakí

Fakaafeʻi e fānaú ke nau tā ha fakatātā ʻo ha meʻa ne nau ako mei heʻenau ako folofola ʻi ʻapí pe ʻi he Palaimelí. Kapau ʻoku faingataʻa ke nau fakakaukau ki ha meʻa ke nau tā, te ke lava ʻo fakamanatu kiate kinautolu ha niʻihi ʻo e ngaahi tefito ʻi he Tokāteline mo e Ngaahi Fuakava 67–70, hangē ko e papitaisó, maʻu ha fakamoʻoni ki he ngaahi folofolá, pe ko ha mātuʻa ʻokú na akoʻi e ongoongoleleí ki he fānaú.

Akoʻi e Tokāteliné: Fānau Iiki Angé

Tokāteline mo e Ngaahi Fuakava 67

ʻOku ʻi he Tokāteline mo e Ngaahi Fuakavá ha ngaahi fakahā mei he ʻOtuá.

ʻI Nōvema 1831, naʻe fakakaukau e kau taki ʻo e Siasí ke fakatahaʻi e ngaahi fakahā ʻa Siosefa Sāmitá ʻi ha tohi, ke lau ʻe he tokotaha kotoa pē. Kuo paaki he ʻahó ni ʻa e ngaahi fakahā ko iá ʻi he Tokāteline mo e Ngaahi Fuakavá.

Ngaahi ʻEkitivitī ʻe Ala Fakahokó

• Fakamatala ki he fānaú kau ki he founga ne paaki ai e ngaahi fakahā ʻa Siosefa Sāmitá ʻi ha tohí (vakai, “vahe 23: Tokāteline mo e Ngaahi Fuakavá,” Ngaahi Talanoa ʻo e Tokāteline mo e Ngaahi Fuakavá,” 90–92, pe ko e vitiō ʻi he ChurchofJesusChrist.org). Vahevahe hoʻo fakamoʻoní ʻoku ʻi he Tokāteline mo e Ngaahi Fuakavá ha ngaahi fakahā te nau lava ke tokoniʻi kitautolu he kuongá ni. Vahevahe ha taha ʻo e ngaahi potufolofola ʻokú ke saiʻia taha ai mei he Tokāteline mo e Ngaahi Fuakavá.

• Fakaʻaliʻali tahataha ki he fānaú e ngaahi tohi folofola kuo fakamafaiʻí, pea ʻi hoʻo puke hake kinautolú, vahevahe e founga ne tau maʻu ai kinautolú (vakai ki he fakamatala ki he tohi takitaha ʻi he Ko e Fakahinohino ki he Ngaahi Folofolá). ʻI he taimi ʻokú ke puke hake ai ʻa e Tokāteline mo e Ngaahi Fuakavá, vahevahe mo e fānaú ʻa e meʻa ʻokú ne ʻai ke makehe ai ʻa e tohi folofola ko ʻení, (hangē ko ʻení, ʻoku ʻi ai e ngaahi fakahā ne fai mai ʻi hotau kuongá).

Tokāteline mo e Ngaahi Fuakava 68:25–28

ʻE lava ke papitaiso au ʻi hoku taʻu valú.

ʻI he Tokāteline mo e Ngaahi Fuakava 68: 25–28, naʻe fakahā ʻe he ʻEikí kia Siosefa Sāmita ʻoku totonu ke ako e fānaú ke tui kia Sīsū Kalaisi, fakatomala, pea papitaiso ʻi he taimi ʻoku nau taʻu valu aí. Naá Ne toe folofola foki ʻoku totonu ke nau ako ke lotu mo tauhi e ngaahi fekau ʻa e ʻOtuá.

Ngaahi ʻEkitivitī ʻe Ala Fakahokó

• Fakaafeʻi e fānaú ke nau lau ki he valú ʻo fakaʻaongaʻi honau ʻuluʻulutuhú. Ko e hā ʻoku makehe ai e hoko e taʻu valú? Tokoniʻi e fānaú ke nau fakatokangaʻi ko e taimi ʻe hoko ai honau taʻu valú, ʻe lava ke papitaiso kinautolu. Fakaʻaongaʻi ha ngaahi foʻi lea pe kupuʻi lea ʻi he Tokāteline mo e Ngaahi Fuakava 68:25–28, vahevahe mo kinautolu ha niʻihi ʻo e ngaahi meʻa ʻoku finangalo ʻa e ʻEikí ke nau ako ki kimuʻa pea nau taʻu valú (vakai foki, Ngaahi Tefito ʻo e Tuí 1:4). Tokoni ke mahino kiate kinautolu ʻa e ngaahi fakakaukau ʻa ia ʻoku ʻikai ke nau alāanga mo iá.

• Hivaʻi fakataha mo e fānaú ha hiva fekauʻaki mo e papitaisó, hangē ko e “Papitaisó” pe “ ʻI Heʻeku Papitaisó” (Tohi Hiva ʻa e Fānaú, 54–55, 53). Kole ki he fānaú ke vahevahe ʻa e ongo ʻoku nau maʻu fekauʻaki mo e papitaisó mo e meʻa te nau lava ʻo fai ke teuteú.

Akoʻi e Tokāteliné: Fānau Lalahi Angé

Tokāteline mo e Ngaahi Fuakava 67:4, 9

ʻOku moʻoni e ngaahi fakahā naʻe fakafou mai ʻia Siosefa Sāmitá.

Ko e konga lahi ʻo e ngaahi fakahinohino ʻi he Tokāteline mo e Ngaahi Fuakava 67–70 ʻoku fekauʻaki ia mo e feinga ko ia ʻa e Kāingalotú ke pulusi e ngaahi fakahā ʻa Siosefa Sāmitá. ʻE lava ke hoko ʻeni ko ha faingamālie ke tokoni ai ki he fānaú ke nau ʻilo ʻi he ngaahi fakahā ko ʻení, ʻa ia kuo pulusi he taimí ni ʻi he Tokāteline mo e Ngaahi Fuakavá, te tau lava ʻo ʻiloʻi ʻa e leʻo ʻo e ʻEikí.

ʻI hoʻo teuteu ke faiakó, te ke lava ʻo toe vakaiʻi ʻa e Kau Māʻoniʻoní, 1:140–43 pe “Vahe 23: Ko e Tokāteline mo e Ngaahi Fuakavá” (Ngaahi Talanoa ʻo e Tokāteline mo e Ngaahi Fuakava 90–92).

Ngaahi ʻEkitivitī ʻe Ala Fakahokó

• Fakaʻaliʻali ki he fānaú ʻa e Tohi Tapú, Tohi ʻa Molomoná, Tokāteline mo e Ngaahi Fuakavá, pea mo e Mataʻitofe Mahuʻingá. Tokoni ki he fānaú ke hiki ha lisi ʻi he palakipoé ʻo e ngaahi meʻa ʻoku makehe ai e tohi folofola takitaha pea mo e ngaahi meʻa ʻoku nau faitatau aí. Kapau ʻoku nau fie maʻu tokoni, vahevahe mo kinautolu e ngaahi fakamatala ʻo e ngaahi tohí ʻi he Fakahinohino ki he Ngaahi Folofolá. Fehuʻi ki he fānaú pe te tau ʻiloʻi fēfē ʻoku moʻoni ʻa e ngaahi folofolá. Ko e hā ʻoku tau ako mei he Tokāteline mo e Ngaahi Fuakava 67:4, 9 fekauʻaki mo e ngaahi fakahā naʻe fai ʻe he ʻEikí kia Siosefa Sāmitá?

• Vahevahe ha veesi mei he Tokāteline mo e Ngaahi Fuakavá, ʻokú ne fakamālohia hoʻo “fakamoʻoni ki hono moʻoni ʻo e ngaahi fekaú ni” (veesi 4). ʻOange ki he fānaú ha ngaahi faingamālie ke vahevahe ha veesi ʻoku nau saiʻia ai. Fakamatalaʻi ange ki he fānaú naʻe fakakaukau ʻa e kau taki ʻo e Siasí he kuonga ko iá ke pulusi ʻenau fakamoʻoni ki he ngaahi fakahā ne maʻu ʻe Siosefa Sāmitá. ʻI he taimi ne nau fai ai iá, ne tohi ʻe he taha ʻo e kau takí, ko Līvai Henikoka ʻi he tafaʻaki ʻo hono hingoá ʻo pehē. “ʻOua naʻa toe toʻo” (vakai “Testimony, circa 2 November 1831,” Revelation Book 1, 121, josephsmithpapers.org). Ko e hā ne fie maʻu ai ʻe Līvai Henikoka ke “ʻoua naʻa toe toʻo” hono hingoá mei he fakamoʻoni ne pulusí? ʻOange ki he fānaú ha faingamālie ke hiki ʻenau fakamoʻoni ʻo e meʻa kuo nau ako ʻi he Tokāteline mo e Ngaahi Fuakavá.

  

  Kuo finangalo ʻa e ʻOtuá ke tau ako e folofolá.

Tokāteline mo e Ngaahi Fuakava 68:3–4

ʻI he taimi ʻoku lea ai hotau kau taki faka-Siasí ʻi he ueʻi ʻa e Laumālié, ʻoku nau lea ʻaki “[e] folofola ʻa e ʻEikí.”

Ko e taimi ʻoku lea ai ʻa e kau tamaioʻeiki ʻa e ʻEikí ʻi he mālohi ʻo e Laumālie Māʻoniʻoní, ko ʻenau ngaahi leá ko e finangalo, fakakaukau, folofola mo e leʻo ʻo e ʻEikí” (vakai, veesi 4) ʻOku tokoni hono ʻilo e moʻoni ko ʻení ke fie fakafanongo mo muimui ai e fānaú ki heʻenau ngaahi akonakí.

Ngaahi ʻEkitivitī ʻe Ala Fakahokó

• Fakaafeʻi e fānaú ke lau ʻa e Tokāteline mo e Ngaahi Fuakava 68:3– 4 ʻi ha fanga kiʻi kulupu iiki pea fevahevahe ʻaki ʻa e meʻa ʻoku nau ako mei he ngaahi veesi ko ʻení. Fakaafeʻi e fānaú ke nau tohi ʻi he palakipoé ha meʻa kuo nau ako. Ko e hā ʻoku mahuʻinga ai ke ʻiloʻi e moʻoni mahuʻinga ko ʻení?

• Hili hono lau fakataha e Tokāteline mo e Ngaahi Fuakava 68:3–4 ʻoange ki he fānaú ha tatau ʻo ha ngaahi pōpoaki kimuí ni mai mei he konifelenisi lahí. Fakaafeʻi kinautolu ke kumi ʻi he ngaahi pōpoakí ha ngaahi moʻoni kuo akoʻi kitautolu ki ai ʻe he ʻEikí ʻo fakafou ʻi Heʻene kau tamaioʻeikí.

Tokāteline mo e Ngaahi Fuakava 69:1–2

Te u lava ʻo “angatonu mo falalaʻanga.”

ʻI he taimi naʻe fie maʻu ai ke fononga ʻa ʻŌliva Kautele ki Mīsulí, ne ui ʻe he ʻEikí ʻa Sione Uitemā, ko ha taha naʻe “angatonu mo falalaʻanga” (veesi 1), ke ʻalu mo ia. ʻE lava fēfē ke angatonu mo falalaʻanga e fānaú ʻo hangē ko Sione Uitemaá?

Ngaahi ʻEkitivitī ʻe Ala Fakahokó

• Talaange ki he fānaú ko e taimi ne fekauʻi atu ai ʻe he ʻEikí ʻa ʻŌliva Kautele ki Mīsulí, naʻá Ne folofola ʻoku totonu ke ʻalu ha taha “angatonu mo falalaʻanga” (veesi 1) mo ia, ko ia naʻá Ne fekauʻi atu ai ʻa Sione Uitemā. ʻOku ʻuhinga ki he hā ke angatonu mo falalaʻangá? ʻE lava fēfē ke tau fakapapauʻi ʻoku tau angatonu mo falalaʻanga koeʻuhí ke lava e ʻEikí ʻo ngāue ʻaki kitautolu ke faitāpuekina ai e niʻihi kehé?

• Fakaafeʻi ha niʻihi ʻo e fānaú ke nau fakamatala ki ha taha ʻoku nau ʻiloʻi mo pehē ʻoku nau “angatonu mo falalaʻanga.” ʻOku nau ʻilo fēfē ʻoku angatonu mo falalaʻanga ʻa e tokotaha ko iá? Tokoniʻi kinautolu ke ʻiloʻi naʻe falala ʻa e ʻEikí kia Sione Uitemā he naʻá ne angatonu mo falalaʻanga he taimi ko ʻení (vakai, Tokāteline mo e Ngaahi Fuakava 69:1–2). Hivaʻi fakataha ha foʻi hiva hangē ko e “ ʻOku ou Feinga ke Hangē ko Sīsuú” (Tohi Hiva ʻa e Fānaú, 40–41), ʻokú ne poupouʻi e fānaú ke angatonu mo falalaʻanga ʻo hangē ko e Fakamoʻuí.

Poupouʻi e Ako ʻi ʻApí

Fakaafeʻi e fānaú ke fakamatalaʻi ki ha taha ʻi ʻapi pe ko e hā e Tokāteline mo e Ngaahi Fuakavá, naʻe maʻú mei fē, pea ko e hā ʻoku mahuʻinga ai kiate kinautolú.

Fakatupulaki ʻEtau Founga Akoʻí

Liliu ʻa e ngaahi ʻekitivitií ke feʻunga mo e taʻu motuʻa ʻo e fānau ʻokú ke akoʻí. Mahalo naʻa fie maʻu ʻe he fānau iiki angé ha fakahinohino lahi ange ʻi hono fakaafeʻi ke nau vahevahé. ʻOku maʻu ʻe he fānau lalahi angé ha aʻusia lahi ange pea mahalo ʻe lelei ange ʻenau vahevahe ʻenau ngaahi fakakaukaú. Manatuʻi e ngaahi faikehekehe hangē ko ʻení ʻi he taimi ʻokú ke palani ai e ngaahi ʻekitivitií.