eb’ li winq rik’ineb’ li b’eleb’aal

C. C. A. Christensen (1831–1912), Lix Teepal Sion, c. 1878, tempera en muselina, 78 × 114 pulgadas. Museo de Arte, Universidad de Brigham Young, jun maatan k’eeb’il xb’aaneb’ li ri laj C. C. A. Christensen, 1970

13–19 septiembre

Tzolʼlebʼ ut Sumwank 102–105

“Chirix xnumsinkil naab’al li rahilal … nachal li osob’tesink”

Li tzolok sa’ Tzol’leb’ ut Sumwank 102:5 aajel ru re xkawresinkil aawib’ re k’utuk. K’e aach’ool chixk’eeb’al reetal li musiq’ejil na’leb’ chirix chan ru taatenq’aheb’ li kok’al chixtawb’aleb’ ru chi us li loq’laj hu.

Tz’iib’a li nakak’oxla

reetalil li wotzok

Xkanab’ankileb’ chi wotzok

Tenq’aheb’ li kok’al chixsik’b’al ru jun li b’ich li tixjultika reheb’ k’a’ruhaq yookeb’ chixtzolb’al sa’ kab’l malaj sa’ li iglees.

reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

Tzol’leb’ ut Sumwank 103:9

Naru ninwan choq’ “saqen chiru li ruchich’och’.”

Chan ru naru nakawaklesi xch’ooleb’ li kok’al chixwotzb’al lix saqen li evangelio reheb’ li kristiaan wankeb’ chixsutam?

Kok’ k’anjel naru chi b’aanumank

• Yaab’asi Tzol’leb’ ut Sumwank 103:9 reheb’ li kok’al ut kanab’eb’ chixchapb’aleb’ xjalam-uuch junaq b’omb’iiy, junaq kandeel, malaj junaq chik k’a’aq re ru nak’ehok saqen. Patz’ reheb’ naq te’xk’ut li jalam-uuch chiru junaq chik komon sa’ li tzoleb’aal. Ye reheb’ chan ru naq chanchaneb’ chik jun saqen choq’ reheb’ li ras riitz’in naq neke’xtaaqe li Jesukristo.

• B’ichahomaq sa’ komonil jun li b’ich chirix wank jo’ jun eetalil, jo’ “Kristo taaraj naq tinlemtzʼunq” malaj “Chanchanin laaʼin jun chahim” (B’ichleb’aal choq’ reheb’ li Kok’al, 38, 84). Tenq’aheb’ chixk’oxlankileb’ eek’asink-ib’ li te’xk’am rib’ rik’in li raatinul li b’ich. Chan ru naru nokowan choq’ saqen, malaj chaab’il eetalil, choq’ reheb’ li kristiaan wankeb’ sa’ qasutam?

  kandeel lochlo

  Naru ninwan choq’ saqen chiru li ruchich’och’.

Tzol’leb’ ut Sumwank 104:42

Li Qaawa’ tinrosob’tesi wi tinpaab’eb’ lix taqlahom.

Sa’ li tasal 104, li Qaawa’ naxyeechi’i k’iila sut “jun xk’ihanik li osob’tesink” reheb’ li neke’paab’ank reheb’ lix taqlahom. Chan ru taatenq’aheb’ li kok’al chireek’ankil naq a’an naraj qosob’tesinkil chi naab’al?

Kok’ k’anjel naru chi b’aanumank

• B’oqeb’ li kok’al chireek’asinkileb’ rib’, jo’ reek’asinkileb’ li ru’uj ruq’, rajlal sut naq te’rab’il li aatin “osob’tesink” naq yooqat chixyaab’asinkil Tzol’leb’ ut Sumwank 104:42. Seraq’i reheb’ chan ru naq li qaChoxahil Yuwa’ nakatrosob’tesi xb’aan xpaab’ankileb’ lix taqlahom. Patz’ reheb’ naq te’xwotz chan ru naq neke’osob’tesiik a’an. B’oqeb’ chi junjunqal chixwotzb’al junaq taqlahom li neke’ru chixpaab’ankil.

• Re xtenq’ankileb’ li kok’al chixtawb’al ru k’a’ru naraj naxye li aatin “xk’ihanik,” yiib’ junaq sirso chiru li pizarron malaj chiru junaq hu. Patz’ reheb’ naq tate’xtenq’a chixk’ihankileb’ li sirso—rik’in xyiib’ankil wiib’, chirix a’an kaahib’, waqxaqib’, waqlaju, ut chi jo’kan—toj reetal naq nujenaqaq li pizarron chi sirso. Rajlal sut naq te’xyiib’ junaq sirso, tenq’aheb’ chixk’oxlankil jun osob’tesihom xk’ehom li qaChoxahil Yuwa’ reheb’. Ch’olob’ naq “jun xk’ihanik li osob’tesink” naraj naxye naq li Qaawa’ tixnujob’resi li qayu’am rik’in osob’tesihom wi naqapaab’eb lix taqlahom.

Tzol’leb’ ut Sumwank 105:38–40

Naru ninwan choq’ aj k’ojob’ahom re li tuqtuukilal.

Wankeb’ naab’al li na’leb’ naru neke’qatzol rik’in li kik’ulman sa’ lix Teepal Sion. Jun li maare aajelaq raj ru choq’ reheb’ li kok’al, a’an naq li wech’ink-ib’ ut li pleetik neke’xk’am chaq ch’a’ajkilal, ut naq li junajil ut li tuqtuukilal neke’xk’am chaq osob’tesiik.

Kok’ k’anjel naru chi b’aanumank

• Rik’in tz’aqal aawaatin, wotz rik’ineb’ li kok’al jun seraq’ chirix lix Teepal Sion (chi’ilmanq xtikib’ankil li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al; Santos, 1:194–206; malaj “La ofrenda aceptable del Campo de Sion” [Revelaciones en Contexto, 229–234]). Taak’e xyanq laa waatin re naq taak’uteb’ li na’leb’ naru neke’qatzol chirix lix Teepal Sion—qayehaq, naq li Qaawa’ naraj naq taqak’ojob’ li tuqtuukilal ut took’anjelaq sa’ komonil sa’ xna’aj wech’ink-ib’ ut pleetik.

• Il ru Tzol’leb’ ut Sumwank 105:38–40, ut patz’ reheb’ li kok’al naq te’xaqliiq rajlal sut naq te’rab’i li aatin “tuqtuukilal.” Ch’olob’ naq li Qaawa’ kiraj naq eb’ laj santil paab’anel te’xk’am rib’ sa’ usilal rik’ineb’ li kristiaan ke’rahob’tesink reheb’. Tenq’aheb’ li kok’al chixk’oxlankileb’ k’a’aq re ru li naru neke’xb’aanu re wank choq’ aj k’ojob’ahom re li tuqtuukilal, ut kanab’eb’ chixk’utb’esinkil junjunqeb’ reheb’.

• Wotz jun seraq’ chirix laa yu’am laa’at malaj jun seraq’ sa’ li Liahona. B’ichahomaq jun li b’ich chirix xraab’aleb’ li qas qiitz’in, jo’ “Chiqara li qas qiitzʼin” (B’ichleb’aal choq’ reheb’ li Kok’al, 39), malaj tz’aqob’resihomaq ru li perel re kok’ k’anjel re li xamaan a’in.

reetalil li k‘utuk

Xk’utb’al li tzol’leb’: Kok’al ak ninqeb’

Tzol’leb’ ut Sumwank 104:13–18

Li Qaawa’ naraj naq tinwotz li k’a’ru wan we rik’ineb’ li wankeb’ rajom ru.

K’oxla chan ru taatenq’aheb’ li kok’al chixtawb’al ru chan ru naq li Qaawa’ naxk’e li aajel ru choq’ reheb’ lix tenamit sa’eb’ ch’a’ajkil hoonal.

Kok’ k’anjel naru chi b’aanumank

• K’eheb’ xhoonal li kok’al chixtz’iib’ankileb’ li osob’tesihom xk’ehom li Dios reheb’. Waklesi xch’ooleb’ chixtz’iib’ankil chixjunil li neke’ru. Chirix a’an ilomaq ru sa’ komonil Tzol’leb’ ut Sumwank 104:13–18, ut sik’omaq xsumenkileb’ li patz’om jo’eb’ a’in: Ani tz’aqal aj eechal reheb’ li k’a’aq re ru? K’a’ut naq a’an li Qaawa’ nak’ehok qe li k’a’aq re ru? K’a’ru naraj a’an naq taqab’aanu rik’ineb’ li k’a’aq re ru a’an? Tenq’aheb’ li kok’al chixk’oxlankil chan ru naru neke’xwotz li rosob’tesinkileb’ rik’ineb’ li ras riitz’in.

• Wotz junaq aanumsihom b’ar wi’ anihaq xk’e aawe junaq k’a’aq re ru kawaj ru, ut patz’ reheb’ li kok’al naq te’xwotz xnumsihomeb’ ajwi’ a’an. Malaj k’ut jun li video chirix k’anjelak chiruheb’ li qas qiitz’in, jo’ “El abrigo” (ChurchofJesusChrist.org). K’a’ru naqatzol sa’eb’ li numsihom a’an chirix k’anjelak chiruheb’ li qas qiitz’in? B’oqeb’ li kok’al chixk’eeb’aleb’ reetal li wankeb’ rajom ru ut naq te’xsik’ anihaq naru te’k’anjelaq wi’ chiru li xamaan a’in, jo’ anihaq sa’ li eskweel malaj sa’eb’ lix junkab’al.

• B’oqeb’ li kok’al chixsik’b’aleb’ junjunq li b’ich sa’ B’ichleb’aal choq’ reheb’ li Kok’al malaj sa’ Eb’ li B’ich li neke’aatinak chirix li k’anjelak chiruheb’ malaj xtenq’ankileb’ li qas qiitz’in (chi’ilmanq li tusleb’aal na’leb’). B’ichahomaq sa’ komonil jun malaj wiib’ li b’ich, ut aatinanqex chirix k’a’ru neke’xk’ut.

Tzol’leb’ ut Sumwank 105:9–19

Naru ninpaab’eb’ lix taqlahom li Qaawa’, us ta ink’a’ nintaw ru k’a’ut naq k’eeb’ileb’ qe.

Lix numsihom lix Teepal Sion naru nak’anjelak re reetalinkileb’ li osob’tesihom neke’chal naq nasik’man xb’aanunkil li naraj li Qaawa’.

Kok’ k’anjel naru chi b’aanumank

• K’ut li jalam-uuch natawman sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al, ut b’oqeb’ li kok’al chixwotzb’al k’a’ru neke’xnaw chirix lix Teepal Sion. Wi neke’raj xtenq’, oksi lix tikib’ankil li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al; Santos, 1:194–206; malaj “La ofrenda aceptable del Campo de Sion” (Revelaciones en Contexto, 229–234). B’oqeb’ chixk’oxlankil naq ke’tz’aqon sa’ lix Teepal Sion ut yookeb’ chixseraq’inkil lix numsihomeb’ reheb’ lix kok’al. K’a’ raj ru te’raj naq eb’ lix kok’al te’xtzol sa’eb’ li numsihom a’an?

• Ilomaq ru sa’ komonil Tzol’leb’ ut Sumwank 105:13–14, ut ch’olob’ naq, sa’ li hoonal naq lix Teepal Sion kiwulak aran Missouri, li Qaawa’ kixye naq ink’a’ te’xyal reechaninkil wi’chik lix ch’ocheb’ laj santil paab’anel. Junjunqeb’ li komon re li teep ke’josq’o’ ut ke’xpatz’ rib’ k’a’ut naq ke’taqlaak chi xik aran. K’a’ru tento taqab’aanu naq ink’a’ naqataw ru k’a’ut naq nak’eeman qe junaq taqlahom? Wotzeb’ junjunq seraq’ re “Eb’ li xyaab’ kuxej re li k’ojob’ank wi’chik: Lix Teepal Sion” (sa’ Kim, Taaqehin—Choq’ reheb’ li komon ut li junkab’al) re xtenq’ankileb’ li kok’al chirilb’al naq eb’ li osob’tesihom neke’wulak naq neke’qapaab’ li taqlahom naxk’e qe li Dios rik’in xtz’uumal reheb’ lix profeet, us ta ink’a’ naqataw ru k’a’ru aj-e.

reetalil li tzolok

Xb’oqb’aleb’ chi tzolok sa’ kab’l

Waklesi xch’ooleb’ li kok’al chixwotzb’al li kik’ulman sa’ lix Teepal Sion rik’in anihaq sa’ rochocheb’, ut jo’kan ajwi’ junaq na’leb’ xe’xtzol sa’eb’ li seraq’ a’an. Malaj b’oqeb’ chixk’oxlankil k’a’ruhaq xe’osob’tesiik wi’ xb’aan li Qaawa’ ut li naru neke’xwotz rik’in junaq kristiaan wan rajom ru.

Xchaab’ilob’resinkil li qak’utum

Yiib’ ru li ch’i’ilenk rik’in rahok. “Wan naq eb’ li kok’al neke’xb’aanu k’a’ruhaq li naxram ru li tzolok sa’ li tzoleb’aal. Naq na’uxman a’in, chiwanq aakuyum, aarahom, ut aanawom chirix li k’a’ru nach’a’ajko’ wi’ li ch’ina al. … Wi li ch’ina al li naxb’aanu li ajtesink-ib’ wan xch’a’ajkilal sa’ xyu’am, aatinan rik’in li especialista en discapacidad sa’ li teep malaj li oqech, malaj ula’ani li perel web [disabilities.ChurchofJesusChrist.org] re xtawb’al chan ru naru taatenq’a” (Li k’utuk jo’ li Kolonel, 26).

perel re kok’ k’anjel: naru ninwan choq’ aj k’ojob’ahom re li tuqtuukilal