li saq’e chirixeb’ li choql

20–26 septiembre

Tzolʼlebʼ ut Sumwank 106–108

“Naq taateeliiq li choxa chiruheb’ ”

Tz’il rix li k’a’ru nakanaw chirixeb’ li kok’al nakatzoleb’. K’a’ paay chi kok’ k’anjel taanach’ob’resinq reheb’ chi us rik’in li Kolonel? Jultikaq aawe naq eb’ li kok’ k’anjel reheb’ li kok’al toj ka’ch’ineb’ xyu’am naru neke’oksiman choq’ reheb’ li ak ninqeb’ ut chixka’pak’alil.

Tz’iib’a li nakak’oxla

reetalil li wotzok

Xkanab’ankileb’ chi wotzok

K’ut chiruheb’ li kok’al xjalam-uucheb’ aj jolominel sa’ li Iglees, jo’ li profeet, eb’ li apostol, li Jolomil Awa’b’ejil re li Tzoleb’aal reheb’ li Kok’al, ut xkomoneb’ chik li Jolomil aj B’eresinel ut aj k’anjel. B’oqeb’ chi aatinak chirix k’a’ru neke’xb’aanu laj jolominel a’an ut k’a’ut naq neke’xb’antioxi naq wankeb’.

reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

Tzol’leb’ ut Sumwank 107:18–20, 42–56

Osob’tesinb’ilin b’antiox re li tijonelil.

Chixjunileb’ li ralal xk’ajol li qaChoxahil Yuwa’ naru neke’xk’uleb’ li osob’tesihom li neke’chal chaq rik’in li tijonelil. K’oxla chan ru naru nakatenq’aheb’ li kok’al chireek’ankil xb’antioxihomeb’ rik’ineb’ li osob’tesihom a’an.

Kok’ k’anjel naru chi b’aanumank

• Yiib’ junaq jalam-uuch chiru li pizarron li taareetali “naq taateeliiq li choxa chiqu” (Tzol’leb’ ut Sumwank 107:19) b’antiox re li tijonelil (jo’ li saqen li nalemtz’un chiruheb’ li choql). K’eheb’ jalam-uuch reheb’ li kok’al li te’reetali li osob’tesihom neke’chal b’antiox re li tijonelil, jo’ li kub’iha’, li loq’laj wa’ak, ut li santil ochoch. B’oqeb’ chixwotzb’al k’a’ut naq neke’xb’antioxi li osob’tesihom wan sa’ li jalam-uuch, ut kanab’eb’ chixk’eeb’al li jalam-uuch chiruheb’ li saqen yiib’anb’ileb’ chiru li pizarron. Ch’olob’ xyaalal naq naru naqak’uleb’ li osob’tesihom a’an b’antiox re naq li qaChoxahil Yuwa’ kixk’ojob’ wi’chik li tijonelil.

• Yiib’ jun li b’e chiru li tz’ak ut k’eheb’ xjalam-uuch k’ojob’anb’il k’anjel re li tijonelil reheb’ li kok’al, li aajeleb’ ru re te’xtaaqe li b’e li nak’amok rik’in li qaChoxahil Yuwa’ (chi’ilmanq Hu reheb’ li Jalam-uuch re li Evangelio, 103–108, 119–120). Tenq’aheb’ li kok’al chixk’eeb’aleb’ li k’ojob’anb’il k’anjel chi tustu sa’ li b’e.

• Ye aniheb’ li komon kixk’ojob’eb’ laj Adan sa’ li tijonelil, jo’ naxye Tzol’leb’ ut Sumwank 107:42–50, ut patz’ reheb’ li kok’al naq te’rajlaheb’ li kristiaan kixk’ojob’eb’. Tenq’aheb’ chixtawb’al ru k’a’ut naq laj Adan kiraj naq chixjunileb’ li komon sa’ lix junkab’al te’xk’ul li tijonelil. B’oqeb’ chi aatinak chirixeb’ li hoonal b’ar wi’ naq eb’ a’an malaj lix junkab’aleb’ ke’xk’ul rosob’tesinkileb’ rik’in li tijonelil.

Tzol’leb’ ut Sumwank 108:7

Naru ninkawob’resiheb’ li was wiitz’in.

Eb’ li kok’al toj ka’ch’ineb’ xyu’am naru neke’xtaaqe li na’leb’ re xkawob’resinkileb’ li ras riitz’in “sa’ chixjunil li raatineb’, sa’ chixjunil lix tijeb’, … ut sa’ chixjunil lix b’aanuhomeb’.”

Kok’ k’anjel naru chi b’aanumank

• Yiib’ xjalam-uuch junaq kristiaan chiru li pizarron ut patz’ reheb’ li kok’al naq te’xye junjunq k’a’aq re ru naru naxb’aanu re xkawob’resinkil xmetz’ew. (Naru yooqat chixnimob’resinkil xmis xtel li kristiaan naq eb’ li kok’al yooqeb’ chixyeeb’al k’a’aq re ru). Il ru Tzol’leb’ ut Sumwank 108:7, ut patz’ reheb’ li kok’al naq te’rab’i chan ru naru “naqak’e xkawilaleb’ li qakomon.” Ch’olob’eb’ li aatin ch’a’aj xtawb’aleb’ ru.

• Tenq’aheb’ li kok’al chixk’oxlankileb’ kristiaan neke’xnaw ru li maare neke’raj ru xkawob’resinkileb’. K’a’ raj ru taqaye reheb’ malaj taqab’aanu raj choq’ reheb’? Sa’ komonil yiib’omaqeb’ kok’ hu choq’ reheb’ li kristiaan a’an, malaj waklesi xch’ooleb’ li kok’al chixjultikankileb’ sa’eb’ lix tij sa’ junesal ut jo’ junkab’al.

reetalil li k‘utuk

Xk’utb’al li tzol’leb’: Kok’al ak ninqeb’

Tzol’leb’ ut Sumwank 107:1–8, 13–14, 18–20

Li tijonelil tinixtenq’a chi q’ajk rik’in li qaChoxahil Yuwa’.

Li Tijonelil re Melkisedek ut li Tijonelil re Aaron ke’k’ojob’aman wi’chik re xtenq’ankileb’ li ralal xk’ajol li Dios chi q’ajk rik’in a’an. Tenq’aheb’ li kok’al chixtawb’aleb’ ru li jalan jalanq k’anjel sa’ li tijonelil ut chan ru nokohe’xtenq’a chi q’ajk rik’in li Dios.

Kok’ k’anjel naru chi b’aanumank

• B’oqeb’ li kok’al chixsik’b’aleb’ aatin ut ch’ol aatin sa’ Tzol’leb’ ut Sumwank 107:1–8, 13–14, 18–20 li taak’eho’q xna’leb’eb’ chirix li tijonelil. K’a’ruheb’ lix teneb’ankil laj k’amol re li tijonelil? Chan ru naq li tijonelil nokoxtenq’a chi q’ajk rik’in li Dios?

• Tz’iib’aheb’ patz’om li naru neke’sumeman sa’ Tzol’leb’ ut Sumwank 107:1–8, 13–14, 18–20, jo’ “K’a’ chik ru xk’ab’a’ li Tijonelil re Melkisedek?” K’eheb’ xhoonal li kok’al re naq te’xtaw xsumenkileb’ li patz’om a’ yaal jarub’ taaruuq chiruheb’. Wotz rik’ineb’ li kok’al li osob’tesihom aak’ulum laa’at rik’in li tijonelil.

• Tzolon rik’ineb’ a’an chirix laj Melkisedek sa’ li K’utul Raqal reheb’ li Loq’laj Hu. K’a’ru naqatzol rik’in a’an chirix li k’a’ru naraj naxye xk’anjelankil xwankilal li tijonelil?

Tzol’leb’ ut Sumwank 107:21–26, 33–35, 65–66

Li moos sik’b’ileb’ ru xb’aan li Qaawa’ neke’xb’eresi lix Iglees.

K’a’ru li numsihom li xkawob’resink re xnawom aach’ool chirixeb’ laj jolominel sa’ li Iglees? Chan ru taatenq’aheb’ li kok’al chixkawob’resinkil lix nawomeb’ xch’ool?

li Awa’b’ej ut li Hermana Nelson rik’in jun ch’ina al

Li profeet naxk’ut chiqu k’a’ru naraj li Dios naq taqanaw.

Kok’ k’anjel naru chi b’aanumank

• K’ut chiru li pizarron xjalam-uucheb’ li Jolomil aj B’eresinel ut eb’ laj k’anjel neke’tawman sa’ li Liahona re li jolomil ch’utub’aj-ib’ toje’ xnume’. Naq eb’ li kok’al yooqeb’ chirilb’al ru Tzol’leb’ ut Sumwank 107:21–26, 33–35, 65–66, b’oqeb’ chixtz’iib’ankil chiru li pizarron li te’xtzol chirixeb’ lix teneb’ankileb’ junjunq laj jolominel. K’a’ut naq naqab’antioxi li qab’eresinkil neke’xk’e? Wotzomaq cherib’il eerib’ chan ru naq xetaw xnawom eech’ool chirixeb’ li profeet ut eb’ li apostol.

• Tz’iib’aheb’ chiru li pizarron li aatin xkawil ch’oolej, paab’aal, ut tijok. Patz’ reheb’ li kok’al chan ru naru naqaxaqab’ xwankil li Xb’eenil Awa’b’ejil re li Iglees rik’in xkawil qach’ool, li qapaab’aal ut eb’ li qatij (chi’ilmanq Tzol’leb’ ut Sumwank 107:22) K’a’ut naq aajel ru xxaqab’ankil xwankileb’ li moos sik’b’ileb’ ru xb’aan li Qaawa’?

Tzol’leb’ ut Sumwank 108:3

Lix paab’ankileb’ lin sumwank naxk’am chaq wosob’tesinkil.

K’oxla chan ru naru nakatenq’aheb’ li kok’al chi “q’axal wi’chik rilb’aleb’ rib’ … sa’ xpaab’ankil lix yeechi’ihomeb’,” malaj eb’ lix sumwank. Chan ru naq rik’in xb’aanunkil a’an te’osob’tesiiq anajwan ut sa’eb’ li kutan chalel?

Kok’ k’anjel naru chi b’aanumank

• B’oqeb’ li kok’al chixb’aanunkil k’a’ruhaq li naraj ru xb’aanunkil chi k’eek’o reetal re naq te’xb’aanu chi chaab’il, jo’ xnujob’resinkil junaq li sek’ rik’in ha’ chi ink’a’ te’xhoy. K’a’ru nak’ulman wi ink’a’ naqab’aau chi k’eek’o reetal? Patz’ reheb’ naq te’ril ru Tzol’leb’ ut Sumwank 108:3 ut te’xsik’ k’a’ru kipatz’man re laj Lyman Sherman naq tixb’aanu chi k’eek’o reetal. Tz’iib’ahomaqeb’ li yeechi’ink neke’xb’aanu li kok’al rik’in li qaChoxahil Yuwa’ naq neke’kub’e xha’ ut naq neke’tz’aqon sa’ li loq’laj wa’ak. Tenq’aheb’ chixk’oxlankil chan ru naru naqil qib’ sa’ xpaab’ankileb’ li yeechi’ihom a’an.

• B’ichahomaq junaq li b’ich na’aatinak chirix xpaab’ankileb’ li sumwank, jo’ “Kawaq inchʼool” (B’ichleb’aal choq’ reheb’ li Kok’al, 85). Tenq’aheb’ chixyiib’ankil junaq nimla perel hu rik’in li ch’ol aatin re li b’ich li naxjultika reheb’ xpaab’ankileb’ lix sumwank, ut waklesi xch’ooleb’ chixk’eeb’al sa’ junaq na’ajej sa’ rochocheb’.

• Jek’i reheb’ li kok’al xcha’aleb’ li raatin li Hermana Becky Craven “Li k’eeb’il reetal chi us ut li ink’a’ k’eeb’il reetal” (Jolomil ch’utub’aj-ib’ re abril 2019), ut patz’ reheb’ naq te’xwotz k’a’ruhaq namusiq’ank reheb’ chirilb’aleb’ rib’ sa’ xpaab’ankileb’ lix sumwank.

reetalil li tzolok

Xb’oqb’aleb’ chi tzolok sa’ kab’l

Aatinan jo’q’ehaq rik’ineb’ xna’ xyuwa’ li kok’al re xwaklesinkileb’ xch’ool sa’ xyalb’aleb’ xq’e chixk’utb’al li evangelio sa’ kab’l. Naru nakaseraq’i reheb’ k’a’ruhaq xe’xwotz lix kok’al sa’ li tzoleb’aal chirix li xe’xtzol sa’ kab’l.

Xchaab’ilob’resinkil li qak’utum

Oksiheb’ li kok’ k’anjel re xb’aanunkil li ajb’il ru. Maawileb’ li tusleb’ aatin a’in jo’ li na’leb’ tento taataaqe. Oksiheb’ b’an jo’ jun xyo’leb’aal li na’leb’ li te’tenq’anq aawe chixk’ulb’al aamusiq’ankil naq yooqat chi k’oxlak chirixeb’ li rajom ru li kok’al nakatzoleb’. Wan sut naq naru nakaweek’a naq musiq’anb’ilat chiroksinkil jun ch’ina k’anjel reheb’ li kok’al toj ka’ch’ineb’ xyu’am re xtzolb’aleb’ li kok’al ak ninqeb’, malaj chixka’pak’alil.

perel re kok’ k’anjel: li tijonelil narosob’tesi lin yu’am