li santil ochoch re Kirtland

Li santil ochoch re Kirtland, xb’aan laj Jon McNaughton

27 septiembre–3 octubre

Tzolʼlebʼ ut Sumwank 109–110

“A’an laa wochoch, xna’aj laa santilal”

Re naq te’wanq aamusiq’ejil numsihom naq nakatzol Tzol’leb’ ut Sumwank 109–110 rik’ineb’ li kok’al, xb’een wa yal aaq’e chixtawb’al aamusiq’ejil numsihom laa’at rik’in xtzolb’aleb’ li raqal a’in reheb’ li loq’laj hu aajunes.

Tz’iib’a li nakak’oxla

reetalil li wotzok

Xkanab’ankileb’ chi wotzok

K’uteb’ jalam-uuch li tixtenq’aheb’ li kok’al chixjultikankil ut chixwotzb’al k’a’ruhaq xe’xtzol chirixeb’ li na’leb’ malaj li k’a’ru nayeeman sa’ Tzol’leb’ ut Sumwank 109–110. Qayehaq, naru nakak’ut jun jalam-uuch re li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al.

reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

Tzol’leb’ ut Sumwank 109:12–13; 110:1–7

Li santil ochoch a’an rochoch li Qaawa’.

Tz’il rix chan ru taatenq’aheb’ li kok’al chireek’ankil roxloq’ihomeb’ chirix li rochoch li Qaawa’ ut chiroyb’eninkil chi saheb’ xch’ool li kutan naq te’ruuq chi ok sa’ “xna’aj lix santilal” (Tzol’leb’ ut Sumwank 109:13).

Kok’ k’anjel naru chi b’aanumank

• Patz’ reheb’ li kok’al naq te’xye k’a’ru mas nawulak chiruheb’ sa’ li rochocheb’. K’ut chiruheb’ jun xjalam-uuch li santil ochoch re Kirtland ut oksi Tzol’leb’ ut Sumwank 109:12–13; 110:1–7 re xseraq’inkil reheb’ resilal li kutan naq li santil ochoch a’an ki’osob’tesiik ut ki’ok choq’ rochoch li Qaawa’ (chi’ilmanq ajwi’ li “Ch’ol 39: Nak’ojob’aak li Santil Ochoch re Kirtland,” Eb’ li Esilal sa’ li Tzol’leb’ ut Sumwank, 154). Re xk’utb’al naq li santil ochoch a’an rochoch li Qaawa’, il ru li aatin a’in na’el chaq sa’ li rosob’tesinkil li santil ochoch kixb’aanu laj Jose Smith: “A’an laa wochoch, xna’aj laa santilal” (Tzol’leb’ ut Sumwank 109:13). Patz’ reheb’ li kok’al naq te’xwotz k’a’ruhaq mas nawulak chiruheb’ chirix li santil ochoch.

• K’e re li junjunq chi kok’al xjalam-uuch jun santil ochoch, malaj kanab’eb’ chixyiib’ankil xjalam-uuch junaq li santil ochoch. B’ichahomaq sa’ komonil jun li b’ich chirix li santil ochoch, jo’ “Saʼ li santil ochoch” (B’ichleb’aal choq’ reheb’ li Kok’al, 99). B’oqeb’ li kok’al chixtaqsinkil lix jalam-uucheb’ rajlal sut naq taaye li aatin “santil ochoch.” Jultika xkomoneb’ chik li aatin sa’ li b’ich li neke’xk’ut k’a’ruhaq aajel ru chirix li santil ochoch. Ye reheb’ k’a’ru nakaweek’a laa’at chirix li santil ochoch ut chan ru nakanaw naq a’an rochoch li Qaawa’.

Tzolʼlebʼ ut Sumwank 110

Lix laawil li tijonelil li aajel ru re xk’eeb’al chi uxmank lix k’anjel li Dios natawman sa’ li Iglees anajwan.

Li santil ochoch re Kirtland k’a’jo’ x’aajelil ru sa’ li resilal li Iglees. Aran kixk’utb’esi rib’ li Jesukristo, rochb’eeneb’ xkomoneb’ chik li najteril profeet. Eb’ li profeet a’an ke’xk’e lix laawil li tijonelil re laj Jose Smith li aajeleb’ ru re xb’aanunkil lix k’anjel li Dios sa’ roso’jikeb’ li kutan.

Kok’ k’anjel naru chi b’aanumank

• Oksi li perel re kok’ k’anjel re li xamaan a’in malaj li “Ch’ol 40: Eb’ li k’utb’esink sa’ li Santil Ochoch re Kirtland” (Eb’ li Esilal sa’ li Tzol’leb’ ut Sumwank, 155–157) re aatinak rik’ineb’ li kok’al chirixeb’ li choxahil kristiaan ke’ula’anin sa’ li santil ochoch. Wotzeb’ ch’ol aatin re Tzol’leb’ ut Sumwank 110 li nakate’xtenq’a laa’at ut eb’ li kok’al chixtawb’al ru lix loq’alil li k’a’ru kik’ulman.

• K’ut chiruheb’ li kok’al junjunq li laaw ut ch’olob’ k’a’ru neke’xb’aanu. Kanab’eb’ li kok’al chixk’eeb’aleb’ xhoonal chirib’ileb’ rib’ chixchapb’aleb’ li laaw ut te’xk’oxla naq neke’xte jun li okeb’aal rik’in li laaw. Naq yooqeb’ chixb’aanunkil a’an, ch’olob’ naq laj Jose Smith kixk’uleb’ li laaw re li tijonelil sa’ li santil ochoch re Kirtland. Eb’ li laaw a’an neke’xte li wankilal ut eb’ li osob’tesihom neke’tenq’an qe chixb’aanunkil lix k’anjel li Dios sa’ lix Iglees, jo’ xwotzb’al li evangelio ut xb’aanunkil li k’anjel re li santil ochoch.

• Re xtenq’ankileb’ li kok’al chixtawb’aleb’ ru li laaw kixq’axtesi laj Elias re laj Jose Smith, b’ichahomaq sa’ komonil jun li b’ich chirix laj Elias malaj chirix li resilal li junkab’al, jo’ “Jun li resilal li qajunkabʼal” (B’ichleb’aal choq’ reheb’ li Kok’al, 100). Seraq’i junaq aanumsihom li katxtenq’a chixsutq’isinkil laa waam rik’ineb’ laa xe’ aatoon. Patz’ reheb’ li kok’al naq te’xwotz k’a’ruhaq neke’xnaw chirix junaq reheb’ lix mama’ rixa’an malaj junaq chik xxe’ xtooneb’.

reetalil li k‘utuk

Xk’utb’al li tzol’leb’: Kok’al ak ninqeb’

Tzol’leb’ ut Sumwank 109; 110:1–10

Li santil ochoch a’an rochoch li Qaawa’.

Chan ru taawotz rik’ineb’ li kok’al laa rahom choq’ re li rochoch li Qaawa’? K’oxla chan ru taamusiq’aheb’ re naq te’xk’ulub’a li b’oqom kixk’e li Elder Quentin L Cook: “Yalaq b’ar wanko, a’an naq taqil qib’ sa’ li santil ochoch” (“Il aawib’ sa’ li santil ochoch,” Jolomil ch’utub’aj-ib’ re abril 2016).

Kok’ k’anjel naru chi b’aanumank

• Sik’eb’ ru junjunq raqal sa’ li tasal 109 malaj 110 li taaweek’a naq tixjultikaheb’ wi’chik li rosob’tesihom li santil ochoch (nayeeman junjunq sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al). Tz’iib’aheb’ li osob’tesihom a’an chiru li pizarron, ut patz’ reheb’ naq te’xsik’eb’ sa’eb’ li raqal xasik’eb’ ru. Chan raj ru naru naqach’olob’ chiru junaq kristiaan k’a’ut naq aajel ru li santil ochoch choq’ qe?

• Patz’ reheb’ li kok’al naq te’ril ru Tzol’leb’ ut Sumwank 110:1–10 chi ch’anch’o, ut patz’ reheb’ naq te’xwotz k’a’ruhaq xe’xtzol chirix li Jesukristo malaj chirix li santil ochoch sa’eb’ li raqal a’an. B’oqeb’ chixyiib’ankil junaq xjalam-uucheb’ a’an ut li Kolonel sa’ li santil ochoch.

• Patz’ reheb’ li kok’al naq te’xk’oxla junaq ramiiweb’ li yoo chixsik’b’al li rochocheb’ a’an. Chan ru naru naqatenq’a li qamiiw chixnawb’al b’ar wan li qochoch? Chan ru naqanaw naq li santil ochoch a’an rochoch li Qaawa’? Yaab’asi Tzol’leb’ ut Sumwank 109:12–13, ut ye reheb’ li kok’al chan ru naq nakanaw laa’at naq li santil ochoch a’an rochoch li Qaawa’. K’uteb’ xjalam-uuch santil ochoch ut kanab’eb’ li kok’al chixwotzb’al k’a’ru neke’reek’a chirix li santil ochoch.

• B’icha rochb’eeneb’ li kok’al “Lix Musiqʼ li Dios” (Eb’ li B’ich 2), ut ye reheb’ naq li b’ich a’an kib’ichaman sa’ li rosob’tesinkil li santil ochoch re Kirtland ut nab’ichaman ajwi’ sa’ rosob’tesinkileb’ li santil ochoch anajwan. K’a’ut naq chaab’il li b’ich a’an choq’ re li rosob’tesinkil li santil ochoch re Kirtland?

  xsa’ li santil ochoch re Kirtland

  Sa’ xka’pak’alil li santil ochoch wankeb’ xaqleb’aal choq’ reheb’ laj jolominel sa’ li tijonelil.

Tzol’leb’ ut Sumwank 110:11–16

Lix laawil li tijonelil li aajel ru re xk’eeb’al chi uxmank lix k’anjel li Dios natawman sa’ li Iglees anajwan.

Li Elder Gary E. Stevenson kixye, “Tz’aptz’ookeb’ li k’ojob’anb’il k’anjel aj kolonel re lix evangelio li Jesukristo chiru chixjunileb’ li ralal xk’ajol li qaChoxahil Yuwa’—toj reetal naq jun loq’laj k’ojob’ank wi’chik ki’uxman [rik’in laj Moises, laj Eliyah ut laj Elias]” (“B’ar wankeb’ xlawil ut xwankilal li tijonelil?” Jolomil ch’utub’aj-ib’ re abril 2016).

Kok’ k’anjel naru chi b’aanumank

• B’oqeb’ li kok’al chixsik’b’al sa’ Tzol’leb’ ut Sumwank 110:11–16 xk’ab’a’eb’ li oxib’ chi najteril profeet ke’xk’utb’esi rib’ sa’ li santil ochoch re Kirtland. Chirix a’an tenq’aheb’ chixtawb’aleb’ aatin sa’eb’ li raqal a’an li te’xch’olob’ k’a’ru “kixq’axtesi”, malaj kixk’e, li junjunq chi profeet re laj Jose Smith ut re laj Oliver Cowdery. Naru nakataw jun chaab’il ch’olob’ank sa’ li “Ch’ol 40: Eb’ li k’utb’esink sa’ li Santil Ochoch re Kirtland” (Eb’ li Esilal sa’ li Tzol’leb’ ut Sumwank, 155–157).

• Wotz li ch’olob’ank kixb’aanu li Awa’b’ej Russell M. Nelson chirix lix laawil li tijonelil: “Sa’ xb’oolx lee wex maare wankeb’ xlaawil lee b’eleb’aal ch’iich’ malaj lee rochoch. Lix laawil li tijonelil, moko neke’ru ta chi ch’e’e’k ut ink’a’ neke’ilman. Ut neke’xte choq’ qe lix wankilal li tijonelil” (“La responsabilidad del sacerdocio en forma personal,” Liahona, noviembre 2003, 45–46). Re xk’utb’esinkil lix aajelil ru lix laawil li tijonelil, tz’ileb’ rix li ch’a’ajkilal rik’ineb’ li kok’al li neke’chal naq neke’tz’eqman lix laawil li ochoch malaj li b’eleb’aal ch’iich’. Chan ru naq chanchan ajwi’ a’an xtz’eqb’al lix laawil li tijonelil? Tenq’aheb’ li kok’al chixtawb’al ru ani neke’k’amok re lix laawil li tijonelil sa’eb’ li qakutankil ut chan ru neke’oksiman re xteeb’aleb’ li osob’tesihom choq’ reheb’ chixjunil li ralal xk’ajol li Dios (chi’ilmanq “Llaves del sacerdocio,” Leales a la Fe, 166–167).

• Re xch’olob’ankil chi us li na’leb’ chirixeb’ li laaw ke’k’ojob’aman wi’chik sa’ li santil ochoch re Kirtland, k’ut li video “Por la mano de Elías el Profeta” (ChurchofJesusChrist.org). Aatinanqex chirix k’a’ru naqab’aanu re tz’aqonk sa’ li k’anjel kixte li laaw kixk’am chaq laj Elias. Malaj k’ut li video “Recogedores en el Reino” (ChurchofJesusChrist.org) ut aatinanqex chirix chan ru naru nokotenq’an chixch’utub’ankileb’ li ralal xk’ajol li qaChoxahil Yuwa’ re naq te’q’ajq rik’in a’an.

reetalil li tzolok

Xb’oqb’aleb’ chi tzolok sa’ kab’l

B’oqeb’ li kok’al chiroksinkil li perel re kok’ k’anjel re li xamaan a’in malaj junaq jalam-uuch xe’xyiib’ sa’ li tzoleb’aal re xk’utb’al chiruheb’ lix junkab’al junaq na’leb’ xe’xtzol chirixeb’ li santil ochoch malaj lix laawil li tijonelil.

Xchaab’ilob’resinkil li qak’utum

K’ojob’ junaq na’ajej re rahok ut oxloq’ink. “Chan ru naq nakatwan sa’ laa yu’am k’a’jo’ naq wan xwankil sa’ lix na’leb’eb’ li kok’al. … K’ut chiruheb’ rik’in aatin ut b’aanuhom naq nakara li evangelio ut naxik aak’a’uxl chirix lix musiq’ejil chaab’ilaleb’ a’an” (Li k’utuk jo’ li Kolonel, 15).

perel re kok’ k’anjel: ke’k’ojob’aman wi’chik lix laawil li tijonelil sa’ li santil ochoch re Kirtland