li tzʼalam saʼ Liberty.

Li tzʼalam saʼ Liberty sa’ xraqik li hab’alq’e, xb’aan laj Al Rounds

18–24 octubre

Tzolʼlebʼ ut Sumwank 121–123

“At Dios, bʼar wankat laaʼat?”

Naq yooqat chixtzolb’al Tzol’leb’ ut Sumwank 121–123, k’oxla li k’a’ru ak neke’xnaw li kok’al. Tijon re naq taanaw chan ru taatikib’ k’utuk rik’in li ak neke’xnaw.

Tz’iib’a li nakak’oxla

reetalil li wotzok

Xkanab’ankileb’ chi wotzok

Wi xapatz’ reheb’ li kok’al naq te’xwotz reheb’ lix junkab’al k’a’ruhaq xe’xtzol sa’ li tzoleb’aal sa’ li xamaan xnume’, k’eheb’ xhoonal re naq te’xwotz chan ru naq xe’xb’aanu.

reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

Tzol’leb’ ut Sumwank 121:7–8; 122:7

Eb’ li ch’a’ajkilal naru te’wanq choq’ re qachaab’ilal.

Li aatin kixye li Qaawa’ re laj Jose Smith sa’ li tz’alam re Liberty naxk’e jun hoonal reheb’ li kok’al chixnawb’al naq jo’q’ehatq nach’a’ajko’ li yu’am, a’b’an li qaChoxahil Yuwa’ ut li Jesukristo naru nokohe’xtenq’a.

Kok’ k’anjel naru chi b’aanumank

• Patz’ reheb’ li kok’al naq te’rab’i li aatin “tuqtuukilal” naq yooqat chixwotzb’al rik’ineb’ li “Ch’ol 46: Laj Jose Smith sa’ li tz’alam sa’ Liberty” (Eb’ li Esilal sa’ li Tzol’leb’ ut Sumwank, 172–174) malaj Tzol’leb’ ut Sumwank 121:7–8. Tenq’aheb’ li kok’al chixk’oxlankil chan ru naru naqakanab’ qib’ sa’ ruq’ li Qaawa’ jo’ kixb’aanu laj Jose re reek’ankil li tuqtuukilal. Ch’olob’ naq us ta laj Jose kixnumsiheb’ ch’a’ajkilal, li Qaawa’ kiwan rik’in a’an.

• Re xtenq’ankileb’ li kok’al chixtawb’al ru naq eb’ li qach’a’ajkilal “te’wanq choq’ re qachaab’ilal” (Tzol’leb’ ut Sumwank 122:7), aatinaheb’ chirix chan ru naq li qametz’ew naniman naq naqiiqa k’a’ruhaq aal. Patz’ reheb’ naq te’xk’oxla naq yookeb’ chiriiqankil k’a’ruhaq aal malaj yookeb’ chixb’aanunkil junaq kawil trab’aaj. Ch’olob’ naq li nume’k sa’eb’ li ch’a’ajkilal naru nak’anjelak qe re naq taak’iiq li qamusiq’—wi naqasik’ li Qaawa’ re xpatz’b’al qatenq’ankil. Wotz junjunqaq li eetalil li te’xtoch’ xch’ooleb’ li kok’al. Patz’ reheb’ naq te’xka’suti aawiik’in li ch’ol aatin “Chixjunil li k’a’aq re ru a’in … taawanq choq’ re qachaab’ilal.”

Tzol’leb’ ut Sumwank 122:8

Li Jesukristo naxnaw k’a’ru naweek’a.

Sa’ li tz’alam re Liberty, li Jesukristo kixye re laj Jose Smith naq ak kikub’e a’an rub’el chixjunil li k’a’aq re ru (chi’ilmanq Tzol’leb’ ut Sumwank 122:8). A’an naraj naxye naq naxnaw k’a’ru yooko chixnumsinkil ut naq naru naqasik’ lix tenq’ a’an.

Kok’ k’anjel naru chi b’aanumank

• Re xtenq’ankileb’ li kok’al chixtzolb’al xsik’b’al li Kristo rajlal sut naq te’xnumsi ch’a’ajkilal, patz’ reheb’ naq te’xk’utb’esi chan ru nak’utun li ruheb’ naq raheb’ xch’ool malaj naq wankeb’ xxiw. Ani naru natenq’ank qe naq naraho’ qach’ool malaj naq wan qaxiw? Yaab’asi Tzol’leb’ ut Sumwank 122:8, ut ch’olob’ naq a’an naraj naxye naq li Jesukristo naxnaw k’a’ru naqeek’a ut naq a’an naru nokoxtenq’a.

• B’ichahomaq sa’ komonil “Joʼ chʼina al li Jesus kiwan” (B’ichleb’aal choq’ reheb’ li Kok’al, 34), ut ch’olob’ xyaalal naq li Jesukristo naru nokoxtenq’a xb’aan naq a’an naxnaw k’a’ru naqeek’a.

  li Jesus sa’ ch’och’ sa’ Getsemani

  Li Jesus naxtaw ru li rahilal naqanumsi. Ink’a’ chi’uxmanq li nawaj laa’in, a’b’an laa wajom laa’at, xb’aan laj Walter Rane.

Tzol’leb’ ut Sumwank 123:17

Li Dios naraj naq tinb’aanu chixjunil li k’a’ru naru chiwu chi sa inch’ool.

Us ta laj Jose Smith wan chaq sa’ tz’alam ut eb’ laj santil paab’anel ke’isiik chaq sa’ li rochocheb’, a’an kixwaklesi xch’ooleb’ chixb’aanunkil “chi sa qach’ool … chixjunil li k’a’aq re ru li naru chiqu.”

Kok’ k’anjel naru chi b’aanumank

• Yaab’asi Tzol’leb’ ut Sumwank 123:17 choq’ reheb’ li kok’al, ut patz’ reheb’ naq te’xaqliiq ut te’xpoq’ xsa’ li ruq’eb’ naq te’rab’i li ch’ol aatin “chi sa qach’ool.” Patz’ reheb’ naq te’xk’oxla naq yookeb’ chixb’aanunkil jalan jalanq k’anjel chi saheb’ xch’ool.

• B’ichahomaq sa’ komonil jun li b’ich na’aatinak chirix li k’anjelak chiru qas qiitz’in, jo’ “Naq yooko chi tenq’ank” (B’ichleb’aal choq’ reheb’ li Kok’al, 108). Tenq’aheb’ li kok’al chixk’oxlankil chan ru naru neke’k’anjelak chi saheb’ xch’ool chiruheb’ lix junkab’al ut eb’ li ramiiw.

reetalil li k‘utuk

Xk’utb’al li tzol’leb’: Kok’al ak ninqeb’

Tzol’leb’ ut Sumwank 121:7–9; 122:7–9

Eb’ lin ch’a’ajkilal naru neke’wan choq’ re lin chaab’ilal.

Jun na’leb’ kiroksi li Qaawa’ re xk’ojob’ankil xch’ool laj Jose Smith naq yoo chaq chixnumsinkil rahilal sa’ li tz’alam re Liberty, a’an xk’utb’al chiru naq “chixjunil li k’a’aq re ru a’in tixk’e aana’leb’, ut taawanq choq’ re aachaab’ilal” (Tzol’leb’ ut Sumwank 122:7). Li yaal a’in naru narosob’tesiheb’ li kok’al sa’ li hoonal naq te’xtaw xch’a’ajkilaleb’.

Kok’ k’anjel naru chi b’aanumank

• Patz’ reheb’ li kok’al naq te’xwotz li neke’xnaw chirix lix numsihom laj Jose Smith sa’ li tz’alam ut lix numsihomeb’ laj santil paab’anel naq ke’isiik chaq aran Missouri (chi’ilmanq li ch’ol 45–47 sa’ Eb’ li Esilal sa’ li Tzol’leb’ ut Sumwank, 167–175). Patz’ reheb’ k’a’ raj ru ke’reek’a wi ta a’aneb’ aj Jose Smith malaj jun reheb’ laj santil paab’anel sa’ li kutankil a’an. Yaab’asi Tzol’leb’ ut Sumwank 121:7–9; 122:7–9 reheb’ li kok’al, ut patz’ reheb’ naq te’xsik’ k’a’ruhaq kixye li Qaawa’ li kixk’e raj xtuqtuukilaleb’. Chan ru naru neke’wan “choq’ re qachaab’ilal” li qach’a’ajkilal?

• Patz’ reheb’ wiib’ li kok’al naq te’xchap xka’pak’alil jun li k’aam li nim roq re naq taanume’q sa’ chixjunil li tzoleb’aal. Patz’ re junaq chik ch’ina al naq tixlotz junaq xcha’al li k’aam. Yaab’asi Tzol’leb’ ut Sumwank 121:7–8, ut ch’olob’ naq li k’aam nareetali li junelik q’e kutan ut naq b’ar lotzlo xb’aan li ch’ina al nareetaliheb’ li chihab’ nokowan sa’ li ruchich’och’. K’a’ru naraj naxye naq eb’ li qach’a’ajkilal sa’ li ruchich’och’ “yal chiru jun ch’ina k’amok taawanq”?

• Tenq’aheb’ li kok’al chixk’oxlankil chan raj ru xnumsinkil kaahib’ po sa’ junaq na’ajej jo’ li tz’alam re Liberty. K’a’ raj ru mas taqak’oxla? K’a’ raj ru taqab’aanu re xnumsinkil li hoonal? K’a’ru kixtzol laj Jose Smith sa’ Tzol’leb’ ut Sumwank 121:7–9; 122:7–9 li kitenq’ank re chixnumsinkil li rahilal a’an? Waklesi xch’ooleb’ li kok’al chixtz’iib’ankil jun li hu choq’ re anihaq li yoo chi nume’k sa’ ch’a’ajkilal, ut ye reheb’ naq te’xk’e chi sa’ junaq na’leb’ re Tzol’leb’ ut Sumwank 121:7–9; 122:7–9.

Tzol’leb’ ut Sumwank 121:34–46

Tento naq tiikaq qach’ool re naq taawanq qik’in “lix wankilal li choxa.”

Tenq’aheb’ li kok’al chixjultikankil naq ka’ajwi’ wi tiik qach’ool naru nawan lix wankilal li Dios sa’ li qayu’am.

Kok’ k’anjel naru chi b’aanumank

• Yiib’ junaq li tiikil juch’ rik’ineb’ li aatin wankilal chi naab’al junpak’al ut wankilal chi b’ab’ay junpak’al chik. Yiib’ junaq li tzimaj li taawulaq ka’ajwi’ sa’ xyi li juch’. Sik’eb’ ru junjunq li aatin malaj ch’ol aatin sa’ Tzol’leb’ ut Sumwank 121:34–46 li neke’xk’ut chan ru naq naqanimob’resi malaj naqak’os lix wankilal li choxa sa’ li qayu’am (jo’ “xmuqb’al li qamaak,” “qaq’etq’etil,” “q’unal ch’oolej,” ut “rahok”). Patz’ reheb’ li kok’al naq te’xk’e xhoonaleb’ chirib’ileb’ rib’ chixsik’b’al ru junaq aatin malaj ch’ol aatin, ut te’xye ma nokoxtenq’a chixk’osb’al malaj chixnimob’resinkil li qawankilal, ut naq te’reek’asi li tzimaj jo’ chanru te’xye. Aatinan rik’ineb’ chirixeb’ kristiaan neke’xnaweb’ ru, ut neke’wan choq’ chaab’il tenq’ choq’ reheb’ li ras riitz’in xb’aan naq neke’xtaaqe li na’leb’ naxk’e li Qaawa’ sa’eb’ li raqal a’an.

• Yaab’asi Tzol’leb’ ut Sumwank 121:41–42, 45, ut patz’ reheb’ li kok’al naq te’xye k’a’ru li seeb’al neke’yeeman sa’eb’ li raqal ut li naraj li Qaawa’ naq taawanq choq’ qe. Ch’olob’eb’ li aatin ink’a’ neke’xtaw ru. K’e jun li seeb’al reheb’ li junjunq chi kok’al ut tenq’aheb’ chixk’oxlankil chan ru naru neke’xk’utb’esi a’an. Chirix naq te’tz’aqonq chixjunileb’, patz’ reheb’ naq te’rileb’ ru li raqal 45–46 ut te’xye k’a’ru li osob’tesihom te’xk’ul wi neke’xchaab’ilob’resiheb’ li seeb’al a’an.

• Ilomaq ru Tzol’leb’ ut Sumwank 121:46 sa’ komonil. Chan ru naq li Santil Musiq’ej naru “toorochb’eeni rajlal”? B’ichahomaq sa’ komonil “Li Santil Musiqʼej” (B’ichleb’aal choq’ reheb’ li Kok’al, 56) malaj jalan chik li b’ich na’aatinak chirix li maatan re li Santil Musiq’ej. K’a’ru naxk’ut li b’ich chirix k’a’ut naq naqaj naq li Santil Musiq’ej toorochb’eeni rajlal?

reetalil li tzolok

Xb’oqb’aleb’ chi tzolok sa’ kab’l

Patz’ reheb’ li kok’al naq te’xk’oxla anihaq li yoo chi nume’k sa’ junaq ch’a’ajkilal. Tenq’aheb’ chixyeeb’al k’a’ruhaq kixtzol laj Jose Smith sa’ li tz’alam re Liberty li naru neke’xwotz rik’in li kristiaan a’an.

Xchaab’ilob’resinkil li qak’utum

Xtenq’ankil li tzolok sa’ kab’l. “Eb’ li na’b’ej yuwa’b’ej a’aneb’ laj k’utunel re li evangelio q’axal aajeleb’ ru choq’ reheb’ li ralal xk’ajol—a’aneb’ li teneb’anb’ileb’ jo’ ajwi’ li wankeb’ xnimaleb’ xwankil chixtenq’ankileb’ li ralal xk’ajol (chi’ilmanq Deuteronomio 6:6–7). Naq nakatzoleb’ li kok’al sa’ Iglees, sik’ rik’in tijok chan ru taatenq’aheb’ lix na xyuwa’ sa’ lix k’anjeleb’ li aajel ru” (Li k’utuk jo’ li Kolonel, 25).

perel re kok’ k’anjel: li Jesukristo naxnaw k’a’ru yookin chixnumsinkil