Nauvoo

Nauvoo li ch’ina-us, xb’aan laj Larry Winborg

25–31 octubre

Tzolʼlebʼ ut Sumwank 124–125

“Jun ochoch choq’ re lin k’ab’a’ ”

B’ar wan reheb’ li na’leb’ neke’tawman sa’ Tzol’leb’ ut Sumwank 124–125 neke’raj ru xtzolb’al li kok’al? Tz’il rix li patz’om a’an naq yooqat chi tzolok chiru li xamaan a’in.

Tz’iib’a li nakak’oxla

reetalil li wotzok

Xkanab’ankileb’ chi wotzok

K’ut junaq xjalam-uuch li santil ochoch nach’ eerik’in. Patz’ reheb’ li kok’al k’a’ru neke’xnaw chirixeb’ li santil ochoch. Kanab’eb’ chixwotzb’al li reek’ahomeb’ chirix li xik sa’ li santil ochoch sa’ jun kutan.

reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

Tzol’leb’ ut Sumwank 124:15, 20

Li Jesus nasaho’ xch’ool naq ninyal xb’aanunkil li us.

Sa’ li k’utb’esinb’il na’leb’ tz’iib’anb’il sa’ li tasal 124, li Qaawa’ kixye naq sa xch’ool rik’in laj Hyrum Smith ut laj George Miller xb’aan naq ke’xyal xq’e chixtaaqenkil a’an. Chan ru taatenq’aheb’ li kok’al chixk’eeb’al reetal naq li Qaawa’ nasaho’ xch’ool rik’ineb’ naq neke’xyal xb’aanunkil li us?

Kok’ k’anjel naru chi b’aanumank

• Tenq’aheb’ li kok’al chixk’oxlankil chaab’il k’a’aq re ru naru neke’xb’aanu. K’uteb’ jalam-uuch chiruheb’ re xk’eeb’aleb’ xna’leb’ (taataweb’ junjunq sa’ li Hu reheb’ li Jalam-uuch re li Evangelio malaj sa’eb’ li puktesinb’il hu re li Iglees). Patz’ reheb’ li kok’al naq te’xye b’ar wankeb’ li chaab’il k’a’aq re ru. Yaab’asi Tzol’leb’ ut Sumwank 124:15 ut patz’ reheb’ li kok’al naq te’rab’i k’a’ru kireek’a li Qaawa’ naq laj Hyrum Smith kixsik’ ru xb’aanunkil li us. K’a’ru nareek’a li Qaawa’ rajlal sut naq naqayal xb’aanunkil li k’a’ru us?

• K’eheb’ kok’ setb’il aamej chiru hu reheb’ li kok’al ut patz’ reheb’ naq chiru a’an te’xyiib xjalam-uucheb’ naq yookeb’ chixb’aanunkil k’a’ruhaq li us. Patz’ reheb’ naq te’xwotz sa’ li tzoleb’aal k’a’ru xe’xyiib’ xjalam-uuch. K’a’ru naqeek’a rajlal sut naq naqab’aanu li us? Ch’olob’ xyaalal naq li Jesus nasaho’ xch’ool naq naqayal xb’aanunkil li us.

• B’ichahomaq sa’ komonil jun li b’ich na’aatinak chirix xb’aanunkil li us naraj li Jesus naq taqab’aanu, jo’ “Kristo taaraj naq tinlemtzʼunq” (B’ichleb’aal choq’ reheb’ li Kok’al, 38–39).

Tzol’leb’ ut Sumwank 124:28–29, 39

Li Jesus naxtaqla lix tenamit chixkab’lankileb’ li santil ochoch.

Eb’ li santil ochoch a’aneb’ xcha’al lix k’uub’anb’il na’leb’ li qaChoxahil Yuwa’ choq’ reheb’ li ralal xk’ajol. Xtawb’al ru a’an tixtenq’aheb’ li kok’al chireek’ankil xnimal roxloq’ihomeb’ rik’in li santil ochoch.

Kok’ k’anjel naru chi b’aanumank

• Tenq’aheb’ li kok’al chixtawb’al ru naq chirix naq laj santil paab’anel ke’xtaw xna’aj aran Nauvoo, li Qaawa’ kixye naq te’xkab’la jun santil ochoch (chi’ilmanq “Ch’ol 50: Eb’ laj Santil Paab’anel sa’ Nauvoo” Eb’ li Esilal sa’ li Tzol’leb’ ut Sumwank, 183–184, malaj li video sa’ ChurchofJesusChrist.org). Patz’ reheb’ naq te’xk’oxla naq yookeb’ chixkab’lankil jun santil ochoch.

• Patz’ reheb’ li kok’al naq te’xtz’aqob’resi ru li perel re kok’ k’anjel re li xamaan a’in re xtenq’ankileb’ chixtawb’al ru naq laa’o lix tenamit li Dios ut naq li Dios junelik naxtaqla lix tenamit chi kab’lank santil ochoch.

reetalil li k‘utuk

Xk’utb’al li tzol’leb’: Kok’al ak ninqeb’

Tzol’leb’ ut Sumwank 124:12–21

Li Qaawa’ nasaho’ xch’ool naq tiikin chi paab’ank.

Sa’ li tasal 124, li Qaawa’ kisaho’ xch’ool rik’ineb’ naab’aleb’ laj santil paab’anel xb’aan xtiikilaleb’. Li raatin a’an naru naxtenq’aheb’ li kok’al chixk’eeb’al reetal k’a’ru li seeb’al te’xchaab’ilob’resi.

Kok’ k’anjel naru chi b’aanumank

• Sik’eb’ ru junjunq li seeb’al neke’yeeman sa’ Tzol’leb’ ut Sumwank 124:12–21, ut tz’iib’aheb’ chiru li pizarron chixk’atq xjalam-uuch li Kolonel. Patz’ reheb’ li kok’al naq te’xtz’il rixeb’ li raqal 12–21 ut te’xsik’eb’ li aatin a’an. Tenq’aheb’ chixtawb’aleb’ ru li aatin li toj maji’ neke’xnaw ru. Jo’ neke’xye li raqal a’an, k’a’ru nareek’a li Qaawa’ chirixeb’ li kristiaan neke’xchaab’ilob’resi li seeb’al a’an?

Tzol’leb’ ut Sumwank 124:28–30, 38–41

Li Jesus naxtaqla lix tenamit chixkab’lankileb’ li santil ochoch.

Eb’ li kok’al moqon taawulaq xchihab’eb’ re ok sa’ li santil ochoch ut tz’aqonk sa’eb’ li k’ojob’anb’il k’anjel neke’uxman aran. K’a’ru naru nakab’aanu re xtenq’ankileb’ chixkawresinkileb’ rib’?

Kok’ k’anjel naru chi b’aanumank

• Tz’ap ru xjalam-uuch junaq santil ochoch. Patz’ reheb’ li kok’al naq te’ril ru Tzol’leb’ ut Sumwank 124:38–41 ut te’xsik’ kok’ na’leb’ chirix li k’a’ru muqmu sa’ li jalam-uuch. Kanab’eb’ chixteeb’al ru li jalam-uuch ut te’aatinaq chirix k’a’ru neke’xk’ut li raqal chirix k’a’ut naq li Qaawa’ naraj naq tookab’lanq santil ochoch.

• Patz’ reheb’ li kok’al naq te’ril ru Tzol’leb’ ut Sumwank 124:28–30 ut te’xsik’ k’a’ut naq li Qaawa’ kixpatz’ re laj Jose Smith naq taakab’lamanq li santil ochoch re Nauvoo. Wotz laa week’ahom chirix li santil ochoch ut junaq aanumsihom sa’ xb’aanunkil li kub’iha’ choq’ reheb’ li kamenaq. Tenq’aheb’ li kok’al chirilb’al jarub’ chihab’ chik ma nawulak xchihab’eb’ re naq te’ruuq chixb’aanunkil li kub’iha’ choq’ reheb’ li kamenaq sa’ li santil ochoch.

• Wi wan laa recomendacion re li santil ochoch, k’ut chiruheb’ li kok’al, malaj b’oq junaq saaj winq malaj saaj ixq re li teep re naq tixk’ut lix recomendacion chiruheb’. Ye reheb’ k’a’ut naq aajel ru li recomendacion re li santil ochoch ut k’a’ru tento taqab’aanu re naq taqak’ul a’an. Waklesi xch’ooleb’ chixkawresinkileb’ rib’ anajwan re naq te’xk’ul lix recomendacion.

  laj Jose Smith ut jun siireb’ li winq sa’ xkab’lankil li santil ochoch re Nauvoo

  Laj Jose Smith chire li santil ochoch re Nauvoo, xb’aan laj Gary E. Smith

Tzol’leb’ ut Sumwank 124:91–92

Jun rosob’tesihom li yuwa’b’ejil aj k’anjel naru naxk’e inb’eresinkil.

Wi ak aak’ulum li rosob’tesihom li yuwa’b’ejil aj k’anjel, il ru wi’chik rub’elaj raatinankileb’ li kok’al chirix li osob’tesiik a’an. K’a’ut naq nakab’antioxi rosob’tesihom li yuwa’b’ejil aj k’anjel? Chan ru taamusiq’aheb’ li kok’al chixkawresinkileb’ rib’ re xk’ulb’al li rosob’tesihom li yuwa’b’ejil aj k’anjel?

Kok’ k’anjel naru chi b’aanumank

• Patz’ re jun li ch’ina al naq taaril ru Tzol’leb’ ut Sumwank 124:91–92, ut patz’ reheb’ lix komon naq te’rab’i k’a’ru li b’oqb’il k’anjel kixk’e li Qaawa’ re laj Hyrum Smith. K’a’ru neke’xnaw li kok’al chirix li rosob’tesihom li yuwa’b’ejil aj k’anjel? Wi ak aak’ulum li rosob’tesihom li yuwa’b’ejil aj k’anjel, k’ut chiruheb’ li kok’al re naq te’ril chan ru a’an. (Jultikaq aawe naq li k’a’ru naxye li rosob’tesihom li yuwa’b’ejil aj k’anjel loq’.) Ch’olob’ naq li rosob’tesihom li yuwa’b’ejil aj k’anjel a’an jun osob’tesihom naqak’ul rik’in jun yuwa’b’ejil aj k’anjel. Eb’ li osob’tesihom a’an nokohe’xtenq’a chixtawb’al xkomon qanawom chiqix ut chirix li k’a’ru naraj li qaChoxahil Yuwa’ naq taqab’aanu.

• K’oxla xb’oqb’al junaq reheb’ lix na’ xyuwa’ malaj raseb’ li kok’al re naq te’xwotz sa’ li tzoleb’aal k’a’ut naq neke’xb’antioxi li rosob’tesihom li yuwa’b’ejil aj k’anjel. Patz’ re li kristiaan a’an naq tixwotz k’a’ut naq kixsik’ ru xk’ulb’al li rosob’tesinkil. Wotz xnawom aach’ool chirix li rosob’tesihom li yuwa’b’ejil aj k’anjel.

reetalil li tzolok

Xb’oqb’aleb’ chi tzolok sa’ kab’l

K’e xb’oqb’aleb’ li kok’al chixwotzb’al rik’in anihaq sa’ lix junkab’aleb’ k’a’ruhaq xe’xtzol chirixeb’ li santil ochoch ut k’a’ut naq neke’raj ok sa’ li santil ochoch sa’ jun kutan.

Xchaab’ilob’resinkil li qak’utum

Eb’ li kok’al naru neke’xnaw ru lix wankil li Musiq’ej. K’ut chiruheb’ li kok’al naq li eek’ahom re tuqtuukilal, li rahok, ut li q’ixnal neke’reek’a naq neke’aatinak malaj neke’b’ichan chirix li Jesukristo ut lix evangelio nachal rik’in li Santil Musiq’ej. Eb’ li eek’ahom a’an naru neke’xwaklesi lix nawom xch’ooleb’.

perel re kok’ k’anjel: li Jesus naxtaqla lix tenamit chi kab’lank santil ochoch