jun junkab’al rik’in lix xe’xtooneb’ li wankeb’ sa’ li ruchich’och’ reheb’ li musiq’ej

Laa’o rik’ineb’, ut eb’ a’an qik’in, xb’aan li xCaitlin Connolly

1–7 noviembre

Tzolʼlebʼ ut Sumwank 125–128

“Jun xyaab’ xkux li sahil ch’oolejil choq’ reheb’ li yo’yo ut eb’ li kamenaq”

Wi nakatzoleb’ li kok’al toj ka’ch’ineb’ xyu’am ut nakawaj xkomon aatenq’ankil, sik’ sa’ “Xb’aanunkil li nak’anjelak choq’ reheb’ li kok’al li toj ka’ch’ineb’ xyu’am” li natawman sa’ xtiklajik li hu a’in.

Tz’iib’a li nakak’oxla

reetalil li wotzok

Xkanab’ankileb’ chi wotzok

Tenq’aheb’ li kok’al chixk’oxlankil k’a’ruhaq xe’xtzol sa’ li xamaan a’in sa’ kab’l malaj sa’ li Tzoleb’aal reheb’ li Kok’al. K’e junjunq k’asal reheb’ re naq te’xyiib’ xjalam-uuch li xe’xk’oxla ut te’xwotz sa’ li tzoleb’aal.

reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

Tzol’leb’ ut Sumwank 126:3

Ninra lin junkab’al.

Chirix naq laj Brigham Young kiq’aj sa’ rochoch chirix xjultikankil li evangelio, li Qaawa’ kixye re naq tixjayali rib’ chirilb’al lix junkab’al.

Kok’ k’anjel naru chi b’aanumank

• Wotz rik’ineb’ li kok’al li esil chirix laj Brigham Young li natawman sa’ li “Ch’ol 50: Eb’ laj Santil Paab’anel sa’ Nauvoo” (Eb’ li Esilal sa’ li Tzol’leb’ ut Sumwank, 184) malaj k’os ru Tzol’leb’ ut Sumwank 126 rik’in laa waatin. Chirix a’an yaab’asi Tzol’leb’ ut Sumwank 126:3 ut taach’olob’ li ch’ol aatin “yalb’ilaq aaq’e chirilb’aleb’ laa junkab’al.” K’a’ru naraj naxye rilb’aleb’ li qajunkab’al? Tenq’aheb’ li kok’al chixk’oxlankil chan ru naru neke’xk’ut xrahom choq’ reheb’ lix junkab’al.

• Rub’elaj li tzolok, patz’ reheb’ li kok’al naq te’xk’am junaq xjalam-uuch lix junkab’aleb’ (malaj patz’ reheb’ naq te’xyiib’ xjalam-uuch). Chirix a’an patz’ reheb’ naq te’xwotz k’a’ruhaq nawulak chiruheb’ sa’ lix junkab’aleb’. Wotz junaq xjalam-uuch laa junkab’al ut ye ajwi’ k’a’ru nawulak chawu. Ch’olob’ k’a’ut naq li qaChoxahil Yuwa’ naraj naq te’qil li qajunkab’al. B’ichahomaq jun li b’ich li naxk’ut li yaal a’an, jo’ “Naq yooko chi tenqʼank” (B’ichleb’aal choq’ reheb’ li Kok’al, 108).

Tzol’leb’ ut Sumwank 128:5, 12

Chixjunileb’ li ralal xk’ajol li Dios neke’raj ru naq te’kub’eeq xha’.

Rik’in ajwi’ xtenq’ankileb’ li kok’al chixkawresinkileb’ rib’ re te’ok sa’ li sumwank re li kub’iha’, k’ut chiruheb’ naq naru naqatenq’aheb’ li ke’kam chi ink’a’ kub’sinb’ileb’ xha’ chixk’ulb’aleb’ li osob’tesihom a’an.

Kok’ k’anjel naru chi b’aanumank

• Wotz rik’ineb’ li kok’al jun esil chirix junaq kristiaan nakanaw ru ut kikam chi ink’a’ kikub’e xha’ (jo’ junaq reheb’ laa xe’ aatoon). Yaab’asi Tzol’leb’ ut Sumwank 128:5, ut patz’ reheb’ naq te’xk’e xhoonaleb’ chirib’ileb’ rib’ chixchapb’al xjalam-uuch jun li kub’sib’aal ha’ re li santil ochoch (chi’ilmanq li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al). Ch’olob’ xyaalal naq li qaChoxahil Yuwa’ naxk’e qahoonal re naq taakub’eeq qaha’ sa’ li ruchich’och’ ruuchileb’ li kristiaan kamenaqeb’. Chi jo’kan naq chixjunileb’ li ralal xk’ajol li Dios naru neke’kub’e xha’ ut neke’ok sa’ sumwank rik’in a’an.

Tzol’leb’ ut Sumwank 128:18

Lin Choxahil Yuwa’ naraj naq tintzoloq chirix li resilal lin junkab’al.

Eb’ li kok’al naru neke’tz’aqon chi k’iila paay ru sa’ li k’anjel re resilal li junkab’al. Tenq’aheb’ chireek’ankil xrahomeb’ choq’ reheb’ lix xe’ xtooneb’.

Kok’ k’anjel naru chi b’aanumank

• Yiib’ jun kadeen rik’in hu chi tz’iib’anb’il xk’ab’a’eb’ laa junkab’al chiru (chi’ilmanq li perel re kok’ k’anjel re li xamaan a’in), ut k’am re xk’utb’al chiruheb’ li kok’al. Aatinan b’ayaq chirixeb’ li kristiaan tz’iib’anb’ileb’ xk’ab’a’ chiru li kadeen. Yaab’asi Tzol’leb’ ut Sumwank 128:18 reheb’ li kok’al, ut ch’olob’ naq laj Jose Smith kixk’ut naq wan jun “junajinel b’ak’leb’ li te’junajiiq wi’ li yuwa’b’ej ut li alal k’ajolb’ej.” Tenq’aheb’ li kok’al chixyiib’ankil lix kadeeneb’ a’an ut patz’ reheb’ naq te’xk’am sa’ kab’l ut te’xpatz’ reheb’ lix na’ xyuwa’ naq te’xtenq’aheb’ chixtz’iib’ankil xk’ab’a’ lix xe’ xtoon chiru.

• Patz’ reheb’ li kok’al naq te’xwotz k’a’ruhaq chirix jun reheb’ lix mama’ malaj li rixa’an. Seraq’i k’a’ruhaq mas nawulak chawu chirixeb’ laa na’ aayuwa’ malaj aamama’ ut aawixa’an. K’uteb’ xjalam-uuch, wi naru. Waklesi xch’ooleb’ li kok’al chixsik’b’al xkomon esil chirixeb’ lix mama’, rixa’an, ut xkomoneb’ chik lix xe’ xtooneb’.

reetalil li k‘utuk

Xk’utb’al li tzol’leb’: Kok’al ak ninqeb’

Tzolʼlebʼ ut Sumwank 126

Naru nintenq’an chirilb’al lin junkab’al.

Chan ru naru nakatenq’aheb’ li kok’al chi k’anjelak chiruheb’ lix junkab’al?

Kok’ k’anjel naru chi b’aanumank

• Ilomaq ru Tzol’leb’ ut Sumwank 126:3 sa’ komonil. K’a’ut naq li qaChoxahil Yuwa’ kixpatz’ re laj Brigham Young naq “yalb’ilaq xq’e chirilb’aleb’ lix junkab’al”? Chan ru naru naqab’aanu ajwi’ a’an sa’ li qajunkab’al? Tz’iib’ahomaq li k’a’aq re ru naru naqab’aanu re k’anjelak chiruheb’ li qajunkab’al. Chan ru naq xb’aanunkil li k’a’aq re ru a’an tooxtenq’a chi wulak mas wi’chik jo’ li qaChoxahil Yuwa’?

• Wotz rik’ineb’ li kok’al li seraq’ kixwotz li Hermana Carole M. Stephens chirix laj Porter, li rimam (chi’ilmanq “Tenemos gran motivo para regocijarnos,” Liahona, noviembre 2013, 115). K’a’ru kixb’aanu laj Porter re rilb’al lix junkab’al? Chan ru naru naqataaqe lix b’aanuhom a’an?

Tzol’leb’ ut Sumwank 128:1, 15–18

Li kub’iha’ choq’ reheb’ li kamenaq naxyo’ob’tesi jun “junajinel b’ak’leb’ ” rik’ineb’ lix xe’ intoon ut laa’in.

Laj Jose Smith kixk’ut naq li kub’iha’ choq’ reheb’ li kamenaq nokoxjunaji rik’ineb’ li qaxe’ qatoon jo’ li kadeen. Chan ru naru nakatenq’aheb’ li kok’al chireek’ankil li sahil ch’oolejil na’eek’aman sa’ xsik’b’al esil chirixeb’ li qaxe’ qatoon ut xk’eeb’al reetal naq taab’aanumanq li k’anjel re li santil ochoch choq’ reheb’?

Kok’ k’anjel naru chi b’aanumank

• K’eheb’ li kok’al sa’ wiib’ li ch’uut ut patz’ re li xb’een ch’uut naq te’ril ru Tzol’leb’ ut Sumwank 128:1 ut te’xsik’ k’a’ru li na’leb’ wan sa’ xk’a’uxl laj Jose Smith. Patz’ re li ch’uut jun chik naq te’ril ru li raqal 17 ut te’xsik’ k’a’ru li na’leb’ kixk’oxla naq a’an li “q’axal nim xloq’al.” Kanab’eb’ chixwotzb’al li te’xtaw ut te’aatinaq chirix k’a’ut naq li na’leb’ a’an q’axal nim xloq’al. Wi naru, b’oq junaq saaj winq malaj saaj ixq li ak xb’aanuhom kub’iha’ choq’ reheb’ li kamenaq re naq tixwotz lix numsihom ut tixch’olob’ k’a’ut naq naqab’aanu li k’anjel a’an.

• K’oxla roksinkil junaq k’utb’esink re xk’utb’al naq tento te’qatenq’a li qaxe’ qatoon li ink’a’ ke’kub’e xha’ sa’ xyu’ameb’. Qayehaq, k’ut junaq maatan malaj junaq li kab’, a’b’an k’e chi najt xteram chiru junaq reheb’ li kok’al. Ye re li ch’ina al a’an naq li maatan malaj li kab’ re a’an, a’b’an moko naru ta na’el sa’ lix chunleb’aal. Patz’ re xkomoneb’ li kok’al k’a’ru naru neke’xb’aanu re xtenq’ankil li ch’ina al chixk’ulb’al li maatan malaj li kab’ a’an. Ilomaq ru Tzol’leb’ ut Sumwank 128:15 sa’ komonil, ut aatinanqex chirix chan ru naq li raqal a’an wan rilom rik’in li k’utb’esink.

• Patz’ reheb’ li kok’al chixyiib’ankil junaq kadeen rik’in hu rik’in xk’ab’a’eb’ lix na’ xyuwa’, xmama’, rixa’an, xikin na’, xikin mama’ ut chi jo’kan (chi’ilmanq li perel re kok’ k’anjel re li tzolok a’in). Wi eb’ li kok’al ink’a’ neke’xnaw ani xk’ab’a’eb’ lix xe’ xtooneb’, waklesi xch’ooleb’ chixsik’b’al xk’ab’a’eb’ ut te’xtz’iib’aheb’ chiru li kadeen sa’ kab’l. Ilomaq ru Tzol’leb’ ut Sumwank 128:18 sa’ komonil ut sik’omaq b’ar wan li “junajinel b’ak’leb’ ” li nab’aanun re naq li resilal li qajunkab’al “tz’aqal ut choyb’il.” Wotz’ jun seraq’ chirix jun reheb’ laa xe’ aatoon li nakatxtenq’a chireek’ankil naq junajinb’ilat rik’in a’an.

• K’ut chiruheb’ li kok’al jun recomendacion re li santil ochoch ut ye reheb’ chan ru naq nak’ulman a’an. Tenq’aheb’ chireek’ankil rajomeb’ chixk’ulb’al ajwi’ li recomendacion re naq te’ruuq chi xik sa’ li santil ochoch ut te’kub’eeq xha’ ruuchileb’ lix xe’ xtooneb’.

  jun li saaj rik’in xk’ab’a’eb’ lix xe’ xtoon

  Naru naqataw xk’ab’a’eb’ li qaxe’ qatoon ut taqab’aanu li k’ojob’anb’il k’anjel re li santil ochoch choq’ reheb’.

reetalil li tzolok

Xb’oqb’aleb’ chi tzolok sa’ kab’l

Patz’ reheb’ li kok’al naq te’xpatz’ re anihaq sa’ rochocheb’ naq tixtenq’aheb’ chi k’anjelak sa’ li resilal lix junkab’aleb’. Naru nakapatz’ reheb’ naq te’xseraq’i k’a’ruhaq chirixeb’ lix xe’ xtooneb’ malaj te’roksi FamilySearch.org re xtawb’al xk’ab’a’eb’ lix xe’ xtooneb’ li ink’a’ ke’kub’e xha’.

Xchaab’ilob’resinkil li qak’utum

Tenq’aheb’ li kok’al chiroksinkil lix chaab’il k’a’uxleb’. Naq eb’ li kok’al neke’xkab’la, neke’xyiib’ xjalam-uuch malaj neke’xb’on k’a’ruhaq wan rilom rik’in li seraq’ malaj li na’leb’ yookeb’ chixtzolb’al, naab’al sut neke’xjultika chi chaab’il. Naru ajwi’ neke’roksi li k’a’ru te’xyiib’ re xtzolb’aleb’ jalan chik kristiaan. (Chi’ilmanq Li k’utuk jo’ li Kolonel, 25.)

perel re kok’ k’anjel: li qaChoxahil Yuwa’ naraj naq tink’anjelaq sa’ li resilal lin junkab’al