laj Jose Smith nak’utuk sa’ Nauvoo

Laj Jose Smith sa’ Nauvoo, 1840, xb’aan laj Theodore Gorka

8–14 noviembre

Tzolʼlebʼ ut Sumwank 129–132

“Naq naqak’ul junaq osob’tesink rik’in li Dios, a’an xb’aan ab’ink chiru jun chaq’rab’ ”

Li Elder David A. Bednar kixye: “Ka’ajwi’ li aatinak ut li seraq’ink moko a’an ta k’utuk. Xjultikankil li evangelio jo’ naraj li Qaawa’ naraj ru li ilok, ab’ink, ut tz’ilok-ix” (Llegar a ser un misionero según Predicad mi Evangelio,” Liahona, octubre 2013, 50). K’a’ru naxk’ut chawu li Musiq’ej naq nakawileb’ ut nakawab’iheb’ li kok’al nakatzoleb’?

Tz’iib’a li nakak’oxla

reetalil li wotzok

Xkanab’ankileb’ chi wotzok

Sik’ ru junaq na’leb’ sa’eb’ li tasal 129–132 ut patz’ reheb’ li kok’al naq te’xye k’a’ru neke’xnaw chirix li na’leb’ a’an. Qayehaq, k’a’ru neke’xnaw chirix li qaChoxahil Yuwa’ malaj li Roxichal li Dios? chirix li sumlaak chi junelik? chirix li choxahil awa’b’ejihom?

reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

Tzol’leb’ ut Sumwank 130:20–21; 132:5

Li osob’tesihom neke’chal xb’aan li ab’ink chiru li Dios.

Laj Jose Smith kixk’ut naq eb’ li rosob’tesihom li Dios neke’chal xb’aan ab’ink chiruheb’ lix chaq’rab’. Chan ru naru nakak’ut li na’leb’ a’an re naq eb’ li kok’al te’xtaw ru?

Kok’ k’anjel naru chi b’aanumank

• Wotz junaq ch’ina na’leb’ rik’ineb’ li kok’al li tixk’ut x’aajelil ru xb’aanunkil li nach’olob’aman; qayehaq, aatinaheb’ chirix li k’a’ru nab’aanuman sa’ xyiib’ankil junaq xtib’el wa, sa’ junaq b’atz’unk malaj sa’ xkab’lankil k’a’ruhaq. K’a’ru nak’ulman wi ink’a’ naqab’aanu jo’ ch’olob’anb’il? (Maare wan junaq aanumsihom li naru nakawotz.) Il ru Tzol’leb’ ut Sumwank 130:21, ut juntaq’eetaheb’ li ch’olob’ahom a’an rik’ineb’ li taqlahom li tento te’qataaqe re xk’ulb’aleb’ li rosob’tesihom li qaChoxahil Yuwa’.

• Patz’ reheb’ li kok’al ma najultiko’ reheb’ junaq hoonal b’ar wi’ xe’xpaab’ junaq reheb’ lix taqlahom li Dios. K’a’ru xe’reek’a? B’ichahomaq sa’ komonil junaq li b’ich na’aatinak chirix li paab’ank, jo’ “Paabʼebʼ li taqlahom” (B’ichleb’aal choq’ reheb’ li Kok’al, 68–69), ut yehomaq k’a’ru li osob’tesihom naxk’e li paab’ank jo’ naxye li b’ich. Aatinanqex chirix junjunq k’a’aq re ru nokoxtaqla li Dios chixb’aanunkil. Chan ru nokorosob’tesi li Dios naq naqapaab’eb’ li taqlahom a’an?

Tzol’leb’ ut Sumwank 130:22

Li qaChoxahil Yuwa’ ut li Jesukristo wankeb’ xjunxaqalil li ink’a’ nakam.

Naq naqataw ru naq li Dios Yuwa’b’ej ut li Jesukristo wankeb’ xjunxaqalil jo’ li qajunxaqalil laa’o, naqeek’a naq nokonach’ok rik’ineb’ a’an ut li qawanjik rik’ineb’ a’an nakawu.

Kok’ k’anjel naru chi b’aanumank

• K’ut chiruheb’ li kok’al jun xjalam-uuch li Jesukristo, ut patz’ reheb’ naq’ te’xk’ut chi ruq’ xsa’ li ru, li xtz’uumal re, ut xkomon chik xcha’al lix junxaqalil. Chirix a’an patz’ reheb’ naq te’xaqliiq ut te’xk’ut ajwi’ chi ruq’ li cha’alil a’an sa’ xjunxaqalileb’. Yaab’asi Tzol’leb’ ut Sumwank 130:22: “Li Yuwa’b’ej wan jun xxaqalil li tib’ ut b’aq okenaq … ; jo’kan ajwi’ li K’ajolb’ej.” Wotz xnawom aach’ool chirix naq li qajunxaqalil chanchan ajwi’ xjunxaqalil li qaChoxahil Yuwa’ ut li Jesukristo.

• B’ichahomaq sa’ komonil jun li b’ich na’aatinak chirix li tib’elej, jo’ “Jolom, xbʼeen tel, xbʼeen aq, oqej” (B’ichleb’aal choq’ reheb’ li Kok’al, 129), ut patz’ reheb’ li kok’al naq te’reek’asi rib’ jo’ chanru tixk’am rib’ rik’in li b’ich. Patz’ reheb’ naq te’xye aawe junjunq k’a’aq re ru naru neke’xb’aanu rik’in lix tib’eleb’. Wotz aab’antioxihom chiru li Dios xb’aan naq xk’e aajunxaqalil. Chan ru naru naqak’ut qab’antioxihom xb’aan li chaab’il maatan a’an?

• Patz’ reheb’ li kok’al naq te’xyiib’ xjalam-uuch li qaChoxahil Yuwa’, li Jesukristo, ut eb’ a’an ajwi’. Tenq’aheb’ chirilb’al chan ru naq li qajunxaqalil chanchan ajwi’ xjunxaqalil li qaChoxahil Yuwa’ ut li Jesukristo.

Tzol’leb’ ut Sumwank 132:19

Li qaChoxahil Yuwa’ naxk’e chi uxmank naq eb’ li junkab’al te’wanq chi junelik.

Rik’in lix wankil li Qaawa’ re tz’apok sa’ junajil ut eb’ li k’ojob’anb’il k’anjel re li santil ochoch, li qawanjik sa’ junkab’al naru nakana chi junelik wi naqapaab’eb’ li qasumwank.

Kok’ k’anjel naru chi b’aanumank

• Tenq’aheb’ li kok’al chixk’oxlankileb’ k’a’aq re ru ink’a’ neke’wan chi junelik—lix tib’el wa neke’ch’amo’, li utz’u’uj neke’chaqik, wan chik xkomon. K’ut junaq xjalam-uuch laa junkab’al ut wotz li nakaweek’a choq’ re a’an. Ch’olob’ xyaalal naq rik’ineb’ li k’ojob’anb’il k’anjel re li santil ochoch, li Qaawa’ naxk’e chi uxmank naq eb’ li junkab’al te’kanaaq chi junelik.

• Te li hu Tzol’leb’ ut Sumwank sa’ li tasal 132, ut ye reheb’ li kok’al naq a’an jun k’utb’esinb’il na’leb’ kik’eeman re laj Jose Smith chirix li sumlaak ut li junkab’al. K’ut chiruheb’ li raqal 19, ut yaab’asi li ch’ol aatin “chiru anchal li junelik q’e kutan.” Patz’ reheb’ li kok’al naq te’ril ruheb’ li aatin a’an aawochb’een.

• Tenq’aheb’ li kok’al chixyiib’ankileb’ kok’ muñeek rik’in hu li te’reetalil li komon sa’ lix junkab’aleb’ (chi’ilmanq li perel re kok’ k’anjel re li xamaan a’in). Teeseteb’ ut teek’eheb’ sa’ jun li sobre malaj teech’utub’eb’ ru rik’in jun li clip re reetalinkil li wankilal re tz’apok sa’ junajil li naru chixch’utub’ankil li junkab’al chi junelik.

  ixq ut ch’ina xqa’al sa’ xsutam li santil ochoch

  Eb’ li k’ojob’anb’il k’anjel re li santil ochoch neke’xk’e chi uxmank naq li junkab’al te’wanq chi ch’utch’u chi junelik.

reetalil li k‘utuk

Xk’utb’al li tzol’leb’: Kok’al ak ninqeb’

Tzol’leb’ ut Sumwank 130:18–19

Li qaChoxahil Yuwa’ naraj naq tintaw innawom ut inwankil chi k’oxlak.

Naab’al reheb’ li k’a’aq re ru wankeb’ qe sa’ li yu’am a’in moko te’xik ta chiqix sa’ li yu’am chalel. A’b’anan, li “nawom ut li qawankil chi k’oxlak” te’qak’am chiqix (Tzol’leb’ ut Sumwank 130:19).

Kok’ k’anjel naru chi b’aanumank

• Patz’ reheb’ li kok’al naq te’xwotz k’a’ruhaq yookeb’ chixtzolb’al sa’ li eskweel malaj rik’ineb’ lix na’ xyuwa’. Patz’ reheb’ naq te’ril ru Tzol’leb’ ut Sumwank 130:18–19 re xsik’b’al k’a’ru taak’ulmanq rik’in li qanawom ut li qawankil chi k’oxlak sa’ li yu’am chalel.

• K’a’ru naxk’ut li raqal 19 chirix chan ru naq naqataw qanawom ut qawankil chi k’oxlak? Chan ru naru nokowan chi yalb’il qaq’e ut chi ab’ink chiru chaq’rab’ naq yooko chi tzolok? (Re xnawb’al chi us li na’leb’ a’in, chi’ilmanq “Li tzolok” sa’ Choq’ re Xkawilaleb’ li Saaj [9–10]).

Tzol’leb’ ut Sumwank 130:20–21; 132:5, 21–23

Li osob’tesihom neke’chal xb’aan li ab’ink chiru li Dios.

Tz’il rix chan ru naq li Qaawa’ nakatrosob’tesi naq nakapaab’eb’ lix chaq’rab’. B’ar wan reheb’ laa numsihom naru nakawotz rik’ineb’ li kok’al re xwaklesinkil xch’ooleb’?

Kok’ k’anjel naru chi b’aanumank

• B’ichahomaq jun li b’ich na’aatinak chirix li paab’ank, jo’ “Paabʼebʼ li taqlahom” (B’ichleb’aal choq’ reheb’ li Kok’al, 68–69), ut patz’ reheb’ li kok’al naq te’ril ru Tzol’leb’ ut Sumwank 130:20–21 ut 132:5. Tenq’aheb’ chixtawb’aleb’ sa’eb’ li raqal aatin malaj na’leb’ li chanchaneb’ li raatinul li b’ich. Chan ru naq naqak’uleb’ li rosob’tesihom li Dios? Patz’ reheb’ li kok’al naq te’xwotz chan ru naq neke’osob’tesiik xb’aan xpaab’ankileb’ lix chaq’rab’ li Dios.

• Ilomaq ru Tzol’leb’ ut Sumwank 132:21–23 sa’ komonil, ut patz’ reheb’ li kok’al naq te’xyiib’ jalam-uuch li te’reetali li te’xtzol sa’eb’ li raqal a’an. Waklesi xch’ooleb’ chiroksinkileb’ lix seeb’aleb’ chi yiib’ank, ut ye reheb’ naq te’xk’e sa’eb’ lix jalam-uuch li chaq’rab’ ut eb’ li taqlahom li nokohe’xtenq’a chi kanaak sa’ li b’e ka’ch’in ru li nak’amok sa’ li junelik yu’am.

Tzol’leb’ ut Sumwank 131:1–4; 132:15, 19

Li qaChoxahil Yuwa’ naxk’e chi uxmank naq eb’ li junkab’al te’wanq chi junelik.

A’ yaal k’a’ru li yoo chixnumsinkil li qajunkab’al, naru naqab’aanu anajwan li k’a’ru tooxkawresi re xk’ulb’aleb’ li osob’tesihom re wank sa’ junkab’al chi junelik moqon.

Kok’ k’anjel naru chi b’aanumank

• Patz’ reheb’ junjunq li kok’al naq te’ril ru Tzol’leb’ ut Sumwank 131:1–4 ut jun siireb’ chik te’ril ru 132:15. Tenq’aheb’ chixk’eeb’al reetal k’a’ru neke’xk’ut li raqal a’an chirix li sumlaak. Sik’eb’ ru ch’ol aatin sa’ 132:19 (jo’ “wi junaq winq taasumlaaq rik’in junaq rixaqil,” “junelikil sumwank,” “tz’apb’il,” “nekexkana sa’ lin sumwank,” “chiru anchal li junelik q’e kutan,” ut “chi junelik q’e kutan”), ut patz’ reheb’ li kok’al naq te’xtaweb’ a’an sa’ li raqal. K’a’ru neke’xk’ut li ch’ol aatin a’an chirix li sumlaak?

• B’ichahomaq “Taaruuq toowanq aran saʼ choxa” (B’ichleb’aal choq’ reheb’ li Kok’al, 98), malaj ilomaq ru li “Ch’ol 55: Jun k’utb’esinb’il na’leb’ chirix li sumlaak” (Eb’ li Esilal sa’ li Tzol’leb’ ut Sumwank, 198). Patz’ reheb’ li kok’al naq te’rab’i ut te’xkawresi rib’ re xwotzb’al li k’a’ru tento taqab’aanu re naq li qajunkab’al taawanq chi junelik. Wotz xnawom aach’ool chirix naq maak’a’ na’ajman re k’a’ru yoo chixnumsinkil li qajunkab’al, naru naqakawresi qib’ re xk’uub’ankil junaq junkab’al taawanq chi junelik.

reetalil li tzolok

Xb’oqb’aleb’ chi tzolok sa’ kab’l

K’e xb’oqb’aleb’ li kok’al re naq te’xye reheb’ lix junkab’al lix rahomeb’ ut naq neke’raj wank chi ch’utch’u jo’ junkab’al sa’ li junelik q’e kutan.

Xchaab’ilob’resinkil li qak’utum

K’e reetal chan ru naq wan xjunkab’al li junjunq. “Eb’ li kok’al sa’ li kutan anajwan wankeb’ sa’ jalan jalanq lix wanjikeb’ sa’ lix junkab’aleb’. Aajel ru naq taqaye’ li quq’ reheb’ li … neke’reek’a naq xjuneseb’, isinb’ileb’, malaj li wankeb’ chixjunpak’al li korral” (Neil L. Andersen, “Ani taak’uluq reheb’, laa’in tinxk’ul,” Jolomil ch’utub’aj-ib’ re abril 2016).

perel re kok’ k’anjel: taaruuq toowanq aran saʼ choxa jo’ junkab’al