Li tzʼalam sa’ Carthage

22–28 noviembre

Tzol’leb’ ut Sumwank 135–136

“A’an xtz’ap chaq lix taqlanb’il k’anjel ut lix b’aanuhom rik’in tz’aqal lix kik’el”

Naq yooqat chixkawresinkil aawib’ re xk’utb’al Tzol’leb’ ut Sumwank 135–136, sik’eb’ li na’leb’ neke’xmusiq’a laa yu’am. K’oxla chan ru naq li k’a’ru wan sa’ li tusleb’ aatin a’in naru naxtenq’aheb’ li kok’al chixtzolb’al ut chixk’anjelankileb’ li na’leb’ a’an.

Tz’iib’a li nakak’oxla

Xkanab’ankileb’ chi wotzok

Patz’ reheb’ li kok’al naq te’xwotz k’a’ruhaq najultiko’ reheb’ naq xe’xtzol chiru li chihab’ a’in chirix laj Jose Smith ut li k’a’ru kixb’aanu. K’uteb’ jalam-uuch re li chihab’ a’in sa’ Kim, Taaqehin—Choq’ reheb’ li komon ut li junkab’al malaj eb’ li perel re kok’ k’anjel.

Xk’utb’al li tzol’leb’: Kok’al toj ka’ch’ineb’ xyu’am

Tzol’leb’ ut Sumwank 135:1–2

Laj Jose Smith ut laj Hyrum Smith ke’xk’e lix yu’am sa’ xk’ab’a’ lix evangelio li Jesukristo.

Li seraq’ chirix lix kamikeb’ laj Jose ut laj Hyrum Smith naru nak’anjelak re naq eb’ li kok’al te’reek’a xb’antioxihom chirix lix ch’olob’ahomeb’ ut lix mayejeb’ li xninqal ru winq a’in.

Kok’ k’anjel naru chi b’aanumank

• Oksi li “Ch’ol 57: Nakamsiik li Profeet” (Eb’ li Esilal sa’ li Tzol’leb’ ut Sumwank, 201–205) re xseraq’inkil reheb’ li kok’al chan ru naq kikam li profeet aj Jose Smith ut laj Hyrum Smith, li riitz’in. Malaj ut, kanab’ jun reheb’ li kok’al chixyeeb’al li seraq’. Ch’olob’ xyaalal naq laj Jose Smith kiwan jo’ jun tz’aqal profeet ut kixk’e lix yu’am sa’ xk’ab’a’ li Qaawa’ ut lix evangelio.

• Wotz rik’ineb’ li kok’al junjunq li ch’ol aatin re lix Hu laj Mormon kiril ru laj Hyrum Smith rub’elaj naq kik’ame’ sa’ li tz’alam re Carthage, li wankeb’ sa’ Tzol’leb’ ut Sumwank 135:5. Aatinanqex chirix chan ru naq li raqal a’an maare kik’anjelak choq’ re xk’ojob’ankil xch’ool laj Hyrum. Wotzeb’ raqal reheb’ li loq’laj hu li neke’xk’e xk’ojob’ankil aach’ool rajlal sut naq na’ok aak’a’uxl malaj naraho’ aach’ool.

Tzol’leb’ ut Sumwank 135:3

Laj Jose Smith a’an jun xprofeet li Dios.

Chiru li chihab’ a’in, eb’ li kok’al xe’tzolok chirix k’a’ru kixk’utb’esi li Qaawa’ chiru li profeet aj Jose Smith. Naru nakatenq’aheb’ chixjultikankil ut chixb’antioxinkil chan ru naq lix k’anjel laj Jose Smith narosob’tesi lix yu’ameb’ a’an.

Kok’ k’anjel naru chi b’aanumank

• K’uteb’ k’a’aq re ru li neke’reetali xk’anjel li profeet aj Jose Smith, jo’ jun lix Hu laj Mormon, jun Tzol’leb’ ut Sumwank, malaj xjalam-uucheb’ misioneer malaj junaq santil ochoch. Rik’in roksinkileb’ ch’ol aatin re Tzol’leb’ ut Sumwank 135:3, wotz rik’ineb’ li kok’al junjunqeb’ k’a’aq re ru kixb’aanu li Qaawa’ rik’in laj Jose Smith choq’ re li qakolb’al. Patz’ reheb’ naq te’xsik’ ru jun reheb’ li k’a’aq re ru a’an, ut te’xye k’a’ut naq neke’xb’antioxi a’an.

• Naq eb’ li kok’al yooqeb’ chixb’onb’al li perel re kok’ k’anjel re li xamaan a’in, b’ichahomaq malaj ab’ihomaq li b’ich neke’aatinak chirix laj Jose Smith, jo’ “Nimanbʼilaq li kiʼilok re Jehova” (Eb’ li B’ich, 16). Wotz laa week’ahom chirix li profeet.

  

  Li profeet aj America, xb’aan laj Del Parson

Tzol’leb’ ut Sumwank 136

Li Dios naxk’eheb’ chaq qe lix taqlahom re qatenq’ankil.

Sa’eb’ li chihab’ chirix lix kamik laj Jose Smith, eb’ laj santil paab’anel ke’xnumsi k’iila ch’a’ajkilal. Chan ru naru neke’tenq’aak li kok’al xb’aan li na’leb’ kixk’e li Qaawa’ reheb’ laj santil paab’anel?

Kok’ k’anjel naru chi b’aanumank

• Wotz rik’ineb’ li kok’al junjunqeb’ li ch’a’ajkilal ke’xnumsi laj santil paab’anel naq ke’el chaq Nauvoo ut ke’xch’utub’ rib’ aran Winter Quarters (chi’ilmanq li Ch’ol 60 ut 62 sa’ Eb’ li Esilal sa’ li Tzol’leb’ ut Sumwank, 211–216, 222–224). K’e jun xjalam-uuch li santil ochoch re Nauvoo sa’ jun xpak’al li tzoleb’aal ut yiib’ junaq muheb’aal junpak’al chik—maare rik’in junaq li isb’ ut junjunqeb’ li chunleb’aal malaj junaq li meex. Patz’ reheb’ li kok’al naq te’xch’utub’ rib’ nach’ rik’in li jalam-uuch, ut ye reheb’ naq jun chihab’ rik’in meer chirix lix kamik laj Jose Smith, eb’ laj santil paab’anel ke’mine’ ru chi elk aran Nauvoo. Patz’ reheb’ naq te’najto’q rik’in li santil ochoch ut te’xch’utub’ rib’ sa’ li muheb’aal re reetalinkil lix b’eenikeb’ re xik aran Winter Quarters.

• Ch’olob’ naq li Qaawa’ kixk’e jun k’utb’esinb’il na’leb’ re laj Brigham Young, li natawman sa’ Tzol’leb’ ut Sumwank 136, re xtenq’ankileb’ laj santil paab’anel sa’ lix b’eenikeb’ toj sa’ li ru taq’a re Lago Salado. Yaab’asiheb’ junjunq li ch’ol aatin re li tasal 136 b’ar wi’ wankeb’ na’leb’ li naru neke’xtaw ru li kok’al toj ka’ch’ineb’ xyu’am, ut patz’ reheb’ naq te’xk’utb’esi malaj te’xyiib’ xjalam-uuch li kixpatz’ li Qaawa’ naq te’xb’aanu laj santil paab’anel sa’ lix b’eenikeb’. Qayehaq, naru neke’xyiib’ xjalam-uucheb’ a’an naq yookeb’ chixq’ajsinkil k’a’ruhaq xe’xpatz’ chi to’ re junaq ramiiweb’, malaj naru neke’xb’icha junaq li b’ich ut te’xajoq chire junaq li tz’ab’b’il xam yal k’oxlanb’il (chi’ilmanq li raqal 25, 28).

Xk’utb’al li tzol’leb’: Kok’al ak ninqeb’

Tzolʼlebʼ ut Sumwank 135

Laj Jose Smith ut laj Hyrum Smith ke’xk’e lix yu’am sa’ xk’ab’a’ lix evangelio li Jesukristo.

Rab’inkil resil lix mayej laj Jose Smith ut laj Hyrum Smith naru naxnimob’resi xpaab’aaleb’ ut rajomeb’ li kok’al chi wank chi tiik sa’ lix nawom xch’ooleb’.

Kok’ k’anjel naru chi b’aanumank

• Patz’ reheb’ li kok’al naq te’xye li neke’xnaw chirix chan ru naq ke’kam laj Jose ut laj Hyrum Smith. Wi neke’raj xtenq’, patz’ reheb’ naq te’ril ru Tzol’leb’ ut Sumwank 135:1 malaj li “Ch’ol 57: Nakamsiik li Profeet” (Eb’ li Esilal sa’ li Tzol’leb’ ut Sumwank, 201–205). Patz’ reheb’ naq te’xk’oxla naq ke’wan chaq aran Nauvoo naq kikam li profeet. Patz’ reheb’ naq te’xye k’a’ raj ru ke’reek’a. Wotz lix nawom aach’ool chirix laj Jose Smith, ut patz’ reheb’ li kok’al naq te’xwotz ajwi’ xnawomeb’ xch’ool a’an.

• K’uteb’ jalam-uuch reheb’ li profeet (chi’ilmanq li Hu reheb’ li Jalam-uuch re li Evangelio, 14, 18, 67). B’ar wankeb’ junjunq li k’a’aq re ru naxpatz’ li Dios reheb’ li profeet naq te’xb’aanu? Ch’olob’ naq li Qaawa’ naxyeechi’i rosob’tesinkileb’ li profeet xb’aaneb’ lix mayej sa’ lix k’anjeleb’ (chi’ilmanq Mateo 10:39).

Tzol’leb’ ut Sumwank 135:3

Laj Jose Smith a’an jun xprofeet li Dios.

Jo’ chixjunileb’ li profeet, laj Jose Smith kixch’olob’ xyaalal li Jesukristo ut kixk’ut chiqu chan ru li chalk rik’in a’an. Tenq’aheb’ li kok’al chirilb’al chan ru naq laj Jose Smith kixchoy lix k’anjel.

Kok’ k’anjel naru chi b’aanumank

• Ilomaq ru Tzol’leb’ ut Sumwank 135:3 sa’ komonil, ut patz’ reheb’ li kok’al naq te’xk’ut chi ru’uj ruq’ li k’a’ru kixb’aanu laj Jose Smith. Tz’iib’aheb’ chiru li pizarron li k’a’ru te’xtaw. Patz’ reheb’ naq te’xsik’ ru junaq reheb’ li k’a’aq re ru a’an ut te’xye k’a’ut naq neke’xb’antioxi a’an.

• Waklesi xch’ooleb’ li kok’al chixk’oxlankil junaq ramiiweb’ malaj anihaq raaro xb’aaneb’ li ink’a’ mas naxnaw chirix laj Jose Smith. K’a’ raj ru te’xye re li kristiaan a’an wi ta tixpatz’ reheb’: K’a’ut naq mas aajel ru laj Jose Smith choq’ aawe?” Patz’ reheb’ naq te’xk’ut k’a’ raj ru te’xye re li kristiaan a’an.

Tzol’leb’ ut Sumwank 136:4, 10–11, 18–30

Li Qaawa’ naru nikinrosob’tesi rajlal sut naq wanq inch’a’ajkilal.

Chirix lix kamik laj Jose Smith, eb’ laj santil paab’anel ke’isiik chaq aran Nauvoo. Laj Brigham Young kixb’eresiheb’ toj Winter Quarters, b’ar wi’ ke’xkawresi rib’ re jun nimla b’eenik toj sa’ li ru taq’a re Lago Salado.

Kok’ k’anjel naru chi b’aanumank

• K’os ru li k’a’ru ke’xnumsi laj santil paab’anel chirix lix kamik laj Jose Smith (chi’ilmanq li ch’ol 58, 60, ut 62 sa’ Eb’ li Esilal sa’ li Tzol’leb’ ut Sumwank, 206–208, 211–216, 222–224). Patz’ reheb’ li kok’al naq te’xk’oxla k’a’ raj ru te’reek’a wi ta tento te’xkanab’ li rochoch ut te’xsik’ junaq chik na’ajej sa’ yamyookil ch’och’ b’ar wi’ te’wanq. Ch’olob’ naq sa’ Tzol’leb’ ut Sumwank 136, li Qaawa’ kixk’e xna’leb’eb’ laj santil paab’anel re xtenq’ankileb’ sa’ lix b’eenikeb’. K’e reheb’ li junjunq chi kok’al junjunqeb’ li raqal re li k’utb’esinb’il na’leb’ a’in, jo’eb’ li raqal 4, 10–11, 18–30, ut patz’ reheb’ naq te’xsik’ k’a’ruhaq naru nak’anjelak reheb’ re xnumsinkileb’ lix k’a’uxl malaj lix xiweb’.

• Tenq’aheb’ li kok’al chixk’oxlankileb’ ch’a’ajkilal neke’xnumsi li kristiaan sa’eb’ li kutankil a’in. Patz’ reheb’ naq te’xsik’ k’a’ruhaq sa’ li tasal 136 li naru neke’xwotz rik’in anihaq li yoo chi nume’k sa’ junaq ch’a’ajkilal jo’eb’ a’an. Naru ajwi’ neke’xtaw aatin neke’k’ojob’an ch’oolej sa’ “Chalqex, chalqex aj santil paabʼanel” (Eb’ li B’ich, 18). A’an li b’ich ke’xb’icha laj santil paab’anel sa’ lix b’eenikeb’.

Xb’oqb’aleb’ chi tzolok sa’ kab’l

K’e xb’oqb’aleb’ li kok’al chixyeeb’al reheb’ lix junkab’al malaj ramiiweb’ k’a’ut naq wankeb’ xb’antioxihom chiru li profeet aj Jose Smith.

Xchaab’ilob’resinkil li qak’utum

Eb’ li kok’al aj ajeb’ ru. Maare wan naq taaweek’a naq lix ajikeb’ ru li kok’al a’anaq jun ramleb’ re te’tzoloq. A’b’anan, naru nakawoksi lix ajikeb’ ru ut taapatz’ reheb’ naq te’xb’aanu junaq k’utb’esink malaj te’xyiib’ xjalam-uuch junaq li na’leb’ re li evangelio (chi’ilmanq Li k’utuk jo’ li Kolonel, 25–26).