eb’ li tenamit sa’ li ruchich’och’ reheb’ li musiq’ej

Laj Jose naril lix yuwa’, lix na’, ut li ras sa’ li choxahil awa’b’ejihom (Lix k’utb’esinkil matk’ laj Jose Smith chirix li choxahil awa’b’ejihom, Robert Barrett).

29 noviembre–5 diciembre

Tzolʼlebʼ ut Sumwank 137–138

“Li k’utb’esinb’il matk’ chirix lix tojb’aleb’ rix li kamenaq”

Sik’eb’ na’leb’ sa’eb’ li k’utb’esinb’il na’leb’ a’in li nakak’oxla naq aajeleb’ ru choq’ reheb’ li kok’al. Chan ru naru nakatenq’aheb’ chixtawb’aleb’ ru li na’leb’ a’an?

Tz’iib’a li nakak’oxla

reetalil li wotzok

Xkanab’ankileb’ chi wotzok

K’ut jun xjalam-uuch li Jesukristo sa’ li ruchich’och’ reheb’ li musiq’ej, jo’ li natawman sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al. Patz’ reheb’ li kok’al naq te’xwotz k’a’ru neke’xnaw chirix li ruchich’och’ reheb’ li musiq’ej.

reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

Tzol’leb’ ut Sumwank 137:1–5

Li Dios xk’ut jun b’e chiwu re taaruuq tinwanq rik’in lin junkab’al chi junelik.

Laj Jose Smith kirileb’ lix junkab’al sa’ jun k’utb’esinb’il matk’ chirix li choxahil awa’b’ejihom. Chan ru naru nakawoksi li k’utb’esinb’il matk’ a’an re xk’utb’al chiruheb’ li kok’al naq eb’ li junkab’al naru neke’wan chi ch’utch’u chi junelik?

Kok’ k’anjel naru chi b’aanumank

• K’ut xjalam-uuch junaq komon re laa junkab’al ut aatinan chirix naq mas nakawaj wank rik’in li kristiaan a’an sa’ li choxahil awa’b’ejihom. Ch’olob’ naq laj Jose Smith kiwan jun ras aj Alvin xk’ab’a’ li kikam naq toj saaj chaq, ut laj Jose junelik kixk’oxla. Yaab’asi Tzol’leb’ ut Sumwank 137:1, 5, ut patz’ reheb’ li kok’al ani kiril laj Jose Smith sa’ li k’utb’esinb’il matk’ a’an chirix li choxahil awa’b’ejihom (chi’ilmanq ajwi’ Eb’ li Esilal sa’ li Tzol’leb’ ut Sumwank, 152–153). Patz’ reheb’ li kok’al naq te’xte lix teleb’ re xk’utb’al naq mas neke’xra lix junkab’al, ut patz’ reheb’ naq te’xwotz k’a’ut naq neke’raj wank rik’in lix junkab’al sa’ li choxahil awa’b’ejihom.

• Oksi Tzol’leb’ ut Sumwank 137:1–5 ut li perel re kok’ k’anjel re li xamaan a’in re xtenq’ankileb’ li kok’al chixtawb’al junjunq na’leb’ sa’ lix k’utb’esinb’il matk’ laj Jose Smith chirix li choxahil awa’b’ejihom. Patz’ reheb’ naq te’xyiib’ jun xjalam-uucheb’ a’an ut lix junkab’aleb’ sa’ li perel re kok’ k’anjel naq te’rab’i malaj te’xb’icha jun li b’ich chirix li junkab’al, jo’ “Taaruuq toowanq aran saʼ choxa” (B’ichleb’aal choq’ reheb’ li Kok’al, 98).

Tzol’leb’ ut Sumwank 138:6–11

Li Santil Musiq’ej naru nikinixtenq’a chixtawb’aleb’ ru li loq’laj hu.

Wan naq nach’a’ajko’ xtawb’aleb’ ru li loq’laj hu, mas wi’chik choq’ reheb’ li kok’al. Sa’ Tzol’leb’ ut Sumwank 138:11 nak’utman naq li Santil Musiq’ej naru naxte “li rilob’aal li qanawom.”

ch’ina al yoo chirilb’aleb’ ru li loq’laj hu

Li Santil Musiq’ej naru nokoxtenq’a chixtawb’al ru li naqil ru sa’eb’ li loq’laj hu.

Kok’ k’anjel naru chi b’aanumank

• Seraq’i reheb’ chirix junaq hoonal b’ar wi’ laa’at xatz’il rix k’a’ruhaq sa’ loq’laj hu ut li Santil Musiq’ej xatxtenq’a chixtawb’al ru. B’ichahomaq sa’ komonil jun li b’ich na’aatinak chirix xtzolb’aleb’ li loq’laj hu, jo’ “Tintzol, tinkʼoxla, tintijoq” (B’ichleb’aal choq’ reheb’ li Kok’al, 66). K’a’ru naxye li b’ich a’an naq tento taqab’aanu re xtawb’aleb’ ru li loq’laj hu?

Tzol’leb’ ut Sumwank 138:18–35

Chixjunileb’ li ralal xk’ajol li qaChoxahil Yuwa’ te’wanq xhoonal re rab’inkil li evangelio.

Chirix naq li Jesukristo kik’ehe’ chiru krus, kirula’aniheb’ laj santil paab’anel tiikeb’ chi paab’ank sa’ li ruchich’och’ reheb’ li musiq’ej. Kixch’olob’ chiruheb’ naq te’xk’ut li evangelio reheb’ li ani maji’ neke’k’uluk re.

Kok’ k’anjel naru chi b’aanumank

• K’ut xjalam-uuch junaq muqleb’aal (chi’ilmanq li Hu reheb’ li Jalam-uuch re li Evangelio, 58, 59 malaj Eb’ li jalam-uuch re li na’ajej sa’ li Santil Hu, 14), malaj yiib’ xjalam-uuch junaq muqleb’aal chiru li pizarron. K’ut jun xjalam-uuch li Kolonel sa’ li ruchich’och’ reheb’ li musiq’ej naq lix junxaqalil wan sa’ li muqleb’aal (jo’ li wan sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al). Rik’in ajwi’ a’an, oksiheb’ patz’om li tixtenq’aheb’ li kok’al chixk’eeb’aleb’ reetal li na’leb’ sa’ Tzol’leb’ ut Sumwank 138:18–19, 23–24, 27–30, jo’ aniheb’ li kirula’ani li Jesus, k’a’ru ke’reek’a li kristiaan a’an, ut k’a’ru kixpatz’ reheb’ naq te’xb’aanu.

• K’ut jun xjalam-uucheb’ misioneer (chi’ilmanq li Hu reheb’ li Jalam-uuch re li Evangelio, 109, 110), ut patz’ reheb’ li kok’al naq te’xwotz k’a’ru neke’xb’aanu li misioneer. Naru ajwi’ nakapatz’ reheb’ naq te’xk’utb’esi li neke’xb’aanu li misioneer. Yaab’asi Tzol’leb’ ut Sumwank 138:31–34 reheb’ li kok’al. Ch’olob’ naq jo’ naq wankeb’ misioneer arin sa’ ruchich’och’, wankeb’ ajwi’ misioneer sa’ li ruchich’och’ reheb’ li musiq’ej li neke’xtzoleb’ li kristiaan aran.

reetalil li k‘utuk

Xk’utb’al li tzol’leb’: Kok’al ak ninqeb’

Tzol’leb’ ut Sumwank 137:1–5

Li Dios naxk’ut chiwu chan ru naru ninwan rik’in lin junkab’al chi junelik.

Laj Jose Smith kiril li choxahil awa’b’ejihom sa’ jun k’utb’esinb’il matk’ b’ar wi’ kirileb’ lix na’ xyuwa’ ut laj Alvin, li ras. Li k’utb’esinb’il na’leb’ a’an naxk’ut chiqu naq wi nokowan chi tiik, eb’ li qajunkab’al naru neke’kana chi junelik sa’ li yu’am chalel.

Kok’ k’anjel naru chi b’aanumank

• Patz’ reheb’ li kok’al naq te’ril ru Tzol’leb’ ut Sumwank 137;1–5 ut te’xyiib’ junaq xjalam-uuch li te’ril ru (ch’ilmanq ajwi’ li perel re kok’ k’anjel re li xamaan a’in). K’a’ ta wi’ ru kireek’a laj Jose Smith naq kirileb’ li komon sa’ lix junkab’al sa’ li choxahil awa’b’ejihom?

• K’ut li video “Las familias pueden ser eternas” (ChurchofJesusChrist.org) malaj b’ichahomaq jun li b’ich na’aatinak chirix li junkab’al, jo’ “Taaruuq toowanq aran saʼ choxa” (B’ichleb’aal choq’ reheb’ li Kok’al, 98). K’a’ru naxk’ut chiqu li video malaj li b’ich chirix li k’a’ru naru naqab’aanu re naq li qajunkab’al taawanq chi junelik?

Tzol’leb’ ut Sumwank 138:1–11

Naq nintz’ileb’ rix li loq’laj hu, li Santil Musiq’ej naru nikinixtenq’a chixtawb’aleb’ ru.

K’a’ru naru neke’xtzol li kok’al rik’in li Awa’b’ej Joseph F. Smith li naru natenq’ank reheb’ chixtzolb’aleb’ li loq’laj hu chi chaab’il chik?

Kok’ k’anjel naru chi b’aanumank

• Patz’ reheb’ li kok’al naq te’ril ru Tzol’leb’ ut Sumwank 138:1–11, ut tenq’aheb’ chixtz’iib’ankil junaq esil li tixk’os ru lix numsihom li Awa’b’ej Joseph F. Smith. K’a’ru kixb’aanu a’an re naq kichal li xnimal ru k’utb’esinb’il matk’ a’an? K’a’ru naraj naxye xk’oxlankileb’ malaj xtz’ilb’aleb’ rix li loq’laj hu?

• Patz’ reheb’ li kok’al k’a’ru neke’xb’aanu naq neke’wan xpatz’om chirix li evangelio. Wotz junjunqeb’ eetalil sa’eb’ li loq’laj hu malaj sa’ aayu’am chirix hoonal b’ar wi’ kib’aanuman li tz’ilok-ix ut a’an kixk’am chaq lix ch’olob’ahom li Musiq’ej (chi’ilmanq, jo’ eetalil, 1 Nefi 11:1–6; Tzol’leb’ ut Sumwank 76:19–24; Jose Smith—Resilal 1:11–12).

Tzol’leb’ ut Sumwank 138:12–35

Chixjunileb’ li ralal xk’ajol li qaChoxahil Yuwa’ te’wanq xhoonal re rab’inkil li evangelio.

Li Awa’b’ej Joseph F. Smith kixtzol naq li k’anjel re xjultikankil li evangelio toj yoo chi uxmank sa’ li ruchich’och’ reheb’ li musiq’ej. B’antiox re li k’anjel a’an, chixjunileb’ li kristiaan te’wanq xhoonal re xk’ulb’al li evangelio.

Kok’ k’anjel naru chi b’aanumank

• Tz’iib’aheb’ chiru li pizarron junjunqeb’ li raqal re li tasal 138. Chirix a’an tz’iib’aheb’ ch’ol aatin li te’xk’os ruheb’ li junjunq ch’uut chi raqal chi jek’inb’ileb’ ru. Patz’ reheb’ li kok’al naq te’xk’uliheb’ li ch’ol aatin rik’ineb’ li raqal b’ar wi’ wankeb’. Naru naq a’anaqeb’ li raqal 12–16 (eb’ li musiq’ej tiikeb’ chi paab’ank neke’xch’utub’ rib’ re royb’eninkil naq taawulaq li Jesus), 18–19 (li Kolonel naxk’utb’esi rib’ chiruheb’ li musiq’ej tiikeb’ chi paab’ank), 29–30 (li Jesus naxsik’eb’ aj k’amol esil re xjultikankil li evangelio) 31–35 (eb’ li musiq’ej tiikeb’ chi paab’ank neke’xjultika li evangelio), ut chi jo’kan. Chirix naq eb’ li kok’al te’xk’uliheb’ li raqal rik’ineb’ li ch’ol aatin, patz’ reheb’ naq te’xwotz li neke’xtzol sa’eb’ li raqal a’an.

• Patz’ reheb’ junjunq li kok’al naq te’ril ru Tzol’leb’ ut Sumwank 138:33, ut te’xsik’ k’a’ruheb’ li na’leb’ re li evangelio kik’utman chiruheb’ lix musiq’eb’ li kamenaq. Patz’ reheb’ xkomoneb’ chik li kok’al naq te’rileb’ ru li na’leb’ neke’k’utman sa’ Eb’ lix Raqalil li Paab’aal 1:4. K’a’ru xjuntaq’eetileb’ ut xjalanileb’ li raqal a’an? K’a’ru naxk’ut a’an chiqu chirix li qaChoxahil Yuwa’ ut lix k’uub’anb’il na’leb’?

reetalil li tzolok

Xb’oqb’aleb’ chi tzolok sa’ kab’l

Patz’ reheb’ li kok’al naq te’xk’oxla jo’q’e chiru li xamaan a’in te’xtz’ileb’ rix li raqal sa’eb’ li loq’laj hu li yookeb’ chirilb’al ru.

Xchaab’ilob’resinkil li qak’utum

Waklesiheb’ xch’ool chi oxloq’ink. Tenq’aheb’ li kok’al chixtawb’al ru naq jun na’leb’ aajel ru chirix li oxloq’ink, a’an xk’oxlankil li qaChoxahil Yuwa’ ut li Jesukristo. Naru nakajultika reheb’ li kok’al naq te’oxloq’inq rik’in xb’ichankil malaj xtz’uyinkil jun li b’ich, malaj rik’in xk’utb’al jun xjalam-uuch li Jesus.

perel re kok’ k’anjel: li Dios naxk’ut chiqu chan ru naru nokowan rik’in li qajunkab’al chi junelik