Lix yo’lajik li Jesus, xb’aan laj J. Kirk Richards

20–26 diciembre

Li Ralankil

Li maatan li maak’a’ xjuntaq’eetankil li kixk’e chaq li Dios sa’ lix choxahil Alal

Li Ralankil a’an jun kutankil re sahil ch’oolejil choq’ reheb’ naab’al li kok’al. K’oxla chan ru naru taatenq’aheb’ chixjuntaq’eetankil li sahil ch’oolejil naxk’e li Ralankil rik’in li sahil ch’oolejil naxk’e lix evangelio li Kolonel.

Tz’iib’a li nakak’oxla

Xkanab’ankileb’ chi wotzok

Patz’ reheb’ li kok’al naq te’xwotz k’a’ru xe’xb’aanu chiru li xamaan xnume’ re xninq’ehinkil lix yo’lajik li Kolonel.

Xk’utb’al li tzol’leb’: Kok’al toj ka’ch’ineb’ xyu’am

Naru “nink’e lin ch’olob’ahom” re xninq’ehinkil lix yo’lajik li Jesus.

Sa’ “Li Yo’yookil Kristo” (ChurchofJesusChrist.org), li Xb’eenil Awa’b’ejil ut lix Molameb’ li Kab’laju chi Apostol ke’xk’e xch’olob’ahomeb’ chirix li Jesukristo re “xnimankil lix yo’lajik li Kolonel.” K’oxla chan ru taawaklesi xch’ooleb’ li kok’al chixwotzb’al lix nawom xch’ooleb’ rik’ineb’ li ras riitz’in.

Kok’ k’anjel naru chi b’aanumank

• K’ut chiruheb’ li kok’al “Li Yo’yookil Kristo” (chi’ilmanq li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al). Aatinan chirix li aatin Kristo sa’ lix jolomil, ut kanab’eb’ ajwi’ li kok’al chi aatinak. Aatinan ajwi’ chirixeb’ li juch’ wankeb’ sa’ xraqik li perel, ut ye reheb’ li kok’al naq sa’ li chihab’ 2000, li Xb’eenil Awa’b’ejil ut lix Molameb’ li Kab’laju chi Apostol ke’xtz’iib’a lix nawom xch’ooleb’ chirix li Jesukristo, ke’xk’e xjuch’ chiru, ut ke’xpuktesi sa’ chixjunil li ruchich’och’.

• K’ut jun xjalam-uuch li Jesukristo ut patz’ reheb’ li junjunq chi kok’al naq te’xaqliiq ut te’xye k’a’ru neke’xnaw chirix a’an. Wi neke’raj xtenq’, k’uteb’ li yaal chiruheb’ li neke’tawman sa’ “Li Yo’yookil Kristo.” Jultika reheb’ naq rajlal sut naq neke’aatinak rik’ineb’ jalan chik kristiaan chirix li Jesukristo, neke’xwotz lix nawom xch’ooleb’ chirix a’an.

• Seraq’i reheb’ li kok’al chan ru naq xataw lix nawom aach’ool chirix li Jesukristo ut k’a’ru nakab’aanu re naq junelik kaw. Tenq’aheb’ chixk’oxlankil junjunq na’leb’ chan ru naru neke’xkawob’resi lix nawom xch’ooleb’, ut patz’ reheb’ naq te’xsik’ ru junaq reheb’ re te’xb’aanu.

Li qaChoxahil Yuwa’ kixtaqla chaq li Ralal jo’ jun sii maatan choq’ qe laa’o.

Sa’ naab’al tenamit sa’ li ruchich’och’, na’ux k’ehok ut k’uluk maatan sa’ Ralankil. Li maatanik a’an tento raj tooxtenq’a chixjultikankil lix sii maatan li Dios “li maak’a’ xjuntaq’eetankil li kixk’e chaq sa’ lix choxahil Alal” (“Li Yo’yookil Kristo”)

Kok’ k’anjel naru chi b’aanumank

• Patz’ reheb’ li kok’al naq te’aatinaq chirix maatan, li xe’xk’ul malaj xe’xk’e. Yaab’asi choq’ reheb’ lix ch’otojik li ch’ol re “Li Yo’yookil Kristo,” ut patz’ reheb’ naq te’rab’i k’a’ru li sii maatan kixk’e qe li Dios. (Wi na’ajman ru, tenq’aheb’ chixtawb’al ru naq li aatin “maak’a’ xjuntaq’eetankil” naraj naxye “maajun chik jwal chaab’il chiru a’an.”) K’a’ut naq li Ralal li Dios, a’ li Jesukristo, a’an li tz’aqal chaab’il maatan?

• B’ichahomaq sa’ komonil jun li b’ich chirix li Jesukristo, jo’ “Kixtaqla li Ralal” (B’ichleb’aal choq’ reheb’ li Kok’al, 20–21). Tenq’aheb’ li kok’al chixsik’b’al ru junaq li ch’ol aatin sa’ li b’ich li neke’raj xyiib’ankil xjalam-uuch (jo’ “ch’ina k’uula’al” malaj “kixtaqla li Ralal chi b’eek”). Naq yooqeb’ chixyiib’ankil lix jalam-uuch, patz’ reheb’ naq te’xye k’a’ru neke’reek’a chirix li k’a’ru xb’aanu li Jesus choq’ reheb’. Wotz ajwi’ li nakaweek’a laa’at.

Li Jesukristo nikinixb’oq chixb’aanunkil li kixb’aanu a’an.

Xcha’al lix wankilal li Jesukristo “chixtochb’al” li ruchich’och’, a’an lix b’aanuhom tz’aqal re ru. Chan ru naru nakawaklesi xch’ooleb’ li kok’al re naq te’xtaaqe li Kolonel?

Kok’ k’anjel naru chi b’aanumank

• Sa’ li xkab’ raqal re “Li Yo’yookil Kristo,” yaab’asi reheb’ li ko’k’al junjunq li k’a’aq re ru kixb’aanu li Jesus. K’uteb’ xjalam-uuch lix yu’am (chi’ilmanq li perel re kok’ k’anjel re li xamaan a’in), ut patz’ reheb’ li kok’al naq te’aatinaq chirix k’a’ru yoo chixb’aanunkil li Kolonel sa’eb’ a’an. Tenq’aheb’ chixk’oxlankil chan ru naru naqataaqe lix b’aanuhom.

• Sik’ ru jun video re “Ilumina el Mundo” (ComeuntoChrist.org) re xk’utb’al chiruheb’ li kok’al, malaj seraq’i reheb’ chirix junaq hoonal b’ar wi’ xat-osob’tesiik xb’aan jun k’anjel xb’aanu anihaq chik choq’ aawe. Patz’ re jun reheb’ li kok’al naq tixk’utb’esi jun ch’ina k’anjel re tenq’ank, ut patz’ reheb’ xkomon li kok’al naq te’xyal xq’ehinkil k’a’ru yoo chixb’aanunkil. Kanab’eb’ li junjunq chi kok’al chixb’aanunkil ajwi’ a’an. Tenq’aheb’ li kok’al chixk’oxlankil k’a’ruhaq naru neke’xb’aanu re xtenq’ankil anihaq sa’ lix junkab’aleb’.

Xk’utb’al li tzol’leb’: Kok’al ak ninqeb’

“Naqak’e li qach’olob’ahom.”

Lix b’aanuhomeb’ li profeet ut eb’ li apostol li ke’tz’iib’ank re “Li Yo’yookil Kristo” naru naxmusiq’aheb’ li kok’al chixwotzb’al xnawomeb’ xch’ool chirix li Jesukristo.

Kok’ k’anjel naru chi b’aanumank

• Tz’iib’a chiru li pizarron Ninnaw naq li Jesukristo … ut patz’ reheb’ li kok’al naq te’xye chan ru naru te’xtz’aqob’resi ru li ch’ol aatin a’an. Ye reheb’ naq te’xsik’ xna’leb’ sa’ “Li Yo’yookil Kristo.” K’a’ru naru naqab’aanu re xkawob’resinkil lix nawom qach’ool chirix li Jesukristo? Chan ru neke’osob’tesiik li qas qiitz’in naq naqawotz lix nawom qach’ool?

• Ch’olob’ naq li hu “Li Yo’yookil Kristo” juch’b’il xb’aan li Xb’eenil Awa’b’ejil ut lix Molameb’ li Kab’laju chi Apostol. Ilomaq ru Tzol’leb’ ut Sumwank 107:23 sa’ komonil. Chan ru naq jalaneb’ li apostol chiruheb’ “xkomoneb’ chik aj k’anjenel sa’ li Iglees”? Sik’ ru jun reheb’ li video “Testigos especiales de Cristo” re xwotzb’al rik’ineb’ li kok’al (ChurchofJesusChrist.org). K’a’ut naq naqab’antioxi naq wankeb’ aj yehol nawom chirix li Kristo sa’ li kutankil a’in?

“Maajun chik junaq wanjenaq xwankil chixtoch’b’al li qayu’am.”

Sa’ “Li Yo’yookil Kristo,” eb’ li profeet ut li apostol ke’xye naq majun chik junaq wanjenaq xwankil chixtoch’b’al xyu’ameb’ li ralal xk’ajol li Dios jo’ li Jesukristo. Tz’il rix chan ru taatenq’aheb’ li kok’al chi tzolok chirix lix toch’om li Jesukristo sa’ li qayu’am chiqajunilo.

Kok’ k’anjel naru chi b’aanumank

• K’e reheb’ li junjunq chi kok’al jun ch’ol aatin re “Li Yo’yookil Kristo,” ut patz’ reheb’ naq te’xyiib’ xjalam-uuch a’an. Naq li junjunq chi kok’al tixk’ut lix jalam-uuch, patz’ reheb’ lix komon naq te’xyal xq’ehinkil k’a’ru nareetali ut te’xtaw li ch’ol aatin sa’ “Li Yo’yookil Kristo.” Chan ru naq osob’tesinb’ilo xb’aan lix yu’am ut lix k’anjel li Jesukristo?

• Tenq’aheb’ li kok’al chixsik’b’aleb’ k’ab’a’ej ut jolomil aatin neke’oksiman choq’ re li Jesukristo sa’ “Li Yo’yookil Kristo” ut te’xjuch’ rub’el, wi naru (jo’ Mesias, xb’een yo’lajenaq, li xb’een ut lix raqik, aj aatinanel, ut li xnimal ru pek sa’ xxuk). Aatinanqex chirix k’a’ru neke’xk’ut chiqu li k’ab’a’ej a’an chirix li Jesukristo. (Junjunqeb’ reheb’ li k’ab’a’ej a’an neke’ch’olob’aman sa’ li K’utul Raqal reheb’ li Loq’laj Hu).

“A’an lix saqen, lix yu’am, ut lix yo’onihom li ruchich’och’.”

Li Ralankil a’an jun kutankil re sahil ch’oolejil b’antiox re li yo’onihom kixk’am chaq li Jesukristo sa’ li ruchich’och’ rik’ineb’ lix k’utum, lix b’aanuhom, ut lix mayej re tojb’al rix li maak.

Xsaqenkil li ruchich’och’, xb’aan laj Howard Lyon

Kok’ k’anjel naru chi b’aanumank

• Patz’ reheb’ li kok’al naq te’xyiib’ xjalam-uuch jun li che’ re Ralankil, malaj yiib’ li jalam-uuch laa’at chiru li pizarron. Patz’ reheb’ naq te’rutz’u’uji li che’ rik’ineb’ aatin ut ch’ol aatin re “Li Yo’yookil Kristo” li neke’xch’olob’ jun sii maatan xk’e qe li Kolonel (jo’ “saqen,” “yu’am,” ut “yo’onihom”). Kanab’eb’ li kok’al chixyeeb’al k’a’ut naq xe’xsik’ ru li aatin malaj ch’ol aatin a’an.

• Tenq’aheb’ li kok’al chixtawb’aleb’ li b’ich re Ralankil li neke’aatinak chirix li saqen, li yu’am, ut li yo’onihom li kixk’am chaq lix yo’lajik li Kolonel sa’ li ruchich’och’—qayehaq, “At chʼina tenamit Belen” malaj “Abʼihomaq xbʼichebʼ li anjel” (Eb’ li B’ich, 130, 132). B’ichahomaq sa’ komonil li b’ich, ut kanab’eb’ li kok’al chi aatinak chirix chan ru naq li Jesus naxk’am li saqen, li yu’am, ut li yo’onihom sa’ lix yu’ameb’ a’an.

• Patz’ reheb’ junjunq li kok’al naq te’ril ru Lukas 2:8–20 chirixeb’ laj ilol karneer. Patz’ reheb’ lix komon chik naq te’ril ru Lukas 2:25–33 chirix laj Simeon. Patz’ reheb’ naq te’aatinaq chirix k’a’ ta wi’ ru ke’reek’a laj ilol karneer ut laj Simeon naq ke’rab’i resil xyo’lajik li Jesus. K’a’ut naq xe’reek’a chi jo’kan? K’a’ut naq naxk’am chaq “xnimal xsahil ch’oolej” lix yo’lajik?

Xb’oqb’aleb’ chi tzolok sa’ kab’l

Patz’ reheb’ li kok’al naq te’xk’oxla anihaq reheb’ li komon sa’ xjunkab’aleb’ naru neke’xwotz wi’ lix nawom xch’ooleb’ chirix li Jesukristo. Tenq’aheb’ chixk’oxlankil li k’a’ raj ru te’xye re xkawob’resinkil lix nawom xch’ool li kristiaan a’an.

Xchaab’ilob’resinkil li qak’utum

Kawresi aawib’ rik’in xtzolb’aleb’ li loq’laj hu. “Sa’ xtzolb’al li raatin li Dios rik’in tijok naqak’am qib’ rik’in li Santil Musiq’ej. A’an naru nokoxmusiq’a re xjultikankil li k’a’ru naqatzol naq nokok’utuk ut naqawaklesi xch’ooleb’ li qas qiitz’in” (Li k’utuk jo’ li Kolonel, 12).