jun li junkab’al

13–19 diciembre

Li Junkab’al: Jun Jek’inb’il Aatin choq’ re li Ruchich’och’

“Li junkab’al q’axal aajel ru sa’ lix k’uub’anb’il na’leb laj Yo’ob’tesinel”

B’ar wan reheb’ li na’leb’ neke’tawman sa’ “Li Junkab’al: Jun Jek’inb’il Aatin choq’ re li Ruchich’och” nakaweek’a naq taawotz rik’ineb’ li kok’al? Naq yooqat chixkawresinkil aawib’ re k’utuk, tz’iib’a li na’leb’ taak’ul rik’in li Musiq’ej.

Tz’iib’a li nakak’oxla

reetalil li wotzok

Xkanab’ankileb’ chi wotzok

Patz’ reheb’ li kok’al naq te’xk’am malaj te’xyiib’ xjalam-uuch lix junkab’aleb’ re xk’utb’al sa’ li tzoleb’aal. Patz’ reheb’ naq te’xwotz k’a’ruhaq mas nawulak chiruheb’ sa’ lix junkab’aleb’ malaj k’a’ruhaq xe’xtzol chirix li junkab’al chiru li xamaan a’in.

reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

Eb’ li junkab’al aajeleb’ ru sa’ lix k’uub’anb’il na’leb’ li qaChoxahil Yuwa’.

Chan ru naru nakawoksi li jek’inb’il aatin chirix li junkab’al re xtenq’ankileb’ li kok’al chixtawb’al ru x’aajelil ru li junkab’al sa’ lix k’uub’anb’il na’leb’ li Dios?

Kok’ k’anjel naru chi b’aanumank

• Tenq’aheb’ li kok’al chixk’oxlankileb’ k’a’aq re ru aajeleb’ ru li neke’raj xyeeb’al reheb’ chixjunil li kristiaan. K’ut chiruheb’ “Li Junkab’al: Jun Jek’inb’il Aatin choq’ re li Ruchich’och,” ut ch’olob’ naq eb’ li profeet ut eb’ li apostol ke’tz’iib’ank re, re xyeeb’al re chixjunil li ruchich’och’ x’aajelil ru li junkab’al choq’ re li qaChoxahil Yuwa’. Patz’ reheb’ k’a’ut neke’xk’oxla naq li junkab’al aajel ru choq’ re li qaChoxahil Yuwa’. Wotz k’a’ruhaq re li jek’inb’il aatin li nakak’oxla naq chixjunil li ruchich’och’ tento naq tixnaw.

• K’ut chiruheb’ li kok’al xjalam-uuch jun santil ochoch ut xjalam-uuch jun junkab’al. Kanab’eb’ chixchapb’aleb’ li jalam-uuch naq yooqat chixyaab’asinkil li ch’ol aatin sa’ xraqik li rox ch’ol re li jek’inb’il aatin chirix li junkab’al. Patz’ reheb’ naq te’xk’ut chi ruq’ li jalam-uuch a’ yaal wi taayaab’asi li aatin “santil ochoch” ut “junkab’al.” Ch’olob’ xyaalal naq sa’ xk’ab’a’eb’ li k’ojob’anb’il k’anjel re li santil ochoch, li qajunkab’al naru nawan chi ch’utch’u chi junelik. B’ichahomaq sa’ komonil jun li b’ich chirixeb’ li junelikil junkab’al, jo’ “Saʼ li santil ochoch” (B’ichleb’aal choq’ reheb’ li Kok’al, 99), ut tenq’aheb’ li kok’al chirab’inkileb’ li aatin jo’ “santil ochoch” ut “junkab’al.”

• Patz’ reheb’ li kok’al k’a’ru naru naqab’aanu re xkawob’resinkil junjunq li k’a’aq re ru, jo’ li ruuch-e, li tib’elej, malaj junaq nimla kab’l. K’a’ru naru naqab’aanu re xkawob’resinkil li qajunkab’al? Tenq’aheb’ chixtawb’aleb’ ru li na’leb’ neke’k’amok sa’ li sahil ch’oolejil sa’ li wank sa’ junkab’al, li neke’tawman sa’ li xwuq raqal re li jek’inb’il aatin chirix li junkab’al (chi’ilmanq ajwi’ li perel re kok’ k’anjel re li xamaan a’in). Tenq’aheb’ chixk’oxlankil chan ru naru neke’xkawob’resi lix junkab’aleb’.

  jun li junkab’al neke’k’uub’an xtib’el wa

  Eb’ li na’b’ej yuwa’b’ej tento te’xk’iresiheb’ li ralal xk’ajol rik’in rahok ut tiikilal.

Laa’in jun “raab’il musiq’ejil alalb’ej malaj rab’inb’ej chiru choxahil na’b’ej yuwa’b’ej.”

Li jek’inb’il aatin chirix li junkab’al naxk’ut naq laa’o ralal xk’ajoleb’ choxahil na’b’ej yuwa’b’ej ut naq wanko arin sa’ li ruchich’och’ re wulak jo’eb’ a’an.

Kok’ k’anjel naru chi b’aanumank

• B’ichahomaq sa’ komonil “Laa’in jun ralal li Dios” (B’ichleb’aal choq’ reheb’ li Kok’al, 2–3). Chirix a’an kut jun li b’olotz’ malaj junaq k’a’aq re ru q’un re jun reheb’ li kok’al ut ye, “Ninnaw ru jun ralal malaj xrab’in li Dios laj [ye xk’ab’a’ li ch’ina al malaj li ch’ina xqa’al] xk’ab’a’.” Patz’ re li ch’ina al a’an naq tixkut li k’a’aq re ru re jun chik li ch’ina al ut tixye ajwi’ li ch’ol aatin ut tixye xk’ab’a’. K’iilasuti li ch’ina k’anjel a’an toj reetal naq te’tz’aqonq chixjunil. Ch’olob’ xyaalal naq li junjunq chi kok’al a’an jun “raab’il musiq’ejil alalb’ej malaj rab’inb’ej chiru choxahil na’b’ej yuwa’b’ej.”

• K’oxla chan ru naru nakak’utb’esi naq rik’in naq laa’o ralal xk’ajol choxahil na’b’ej yuwa’b’ej, naru nokowulak jo’eb’ a’an. Qayehaq, k’uteb’ xjalam-uuch li xul rik’ineb’ li ral malaj aajalam-uuch laa’at rik’ineb’ laa na’ aayuwa’, ut tenq’aheb’ li kok’al chirilb’al xjuntaq’eetileb’. Ch’olob’ xyaalal naq jo’ naq eb’ li kok’al neke’k’i ut neke’wulak jo’eb’ lix na’ xyuwa’, laa’o naru nokowulak sa’ jun kutan jo’eb’ li qachoxahil na’ qayuwa’.

reetalil li k‘utuk

Xk’utb’al li tzol’leb’: Kok’al ak ninqeb’

Li junkab’al aajel ru sa’ lix k’uub’anb’il na’leb’ li qaChoxahil Yuwa’.

Li jek’inb’il aatin chirix li junkab’al kitz’iib’aman re xch’olob’ankileb’ li junelik yaal chirix li junkab’al. K’oxla chan ru taatenq’aheb’ li kok’al chixchamob’resinkil lix nawom xch’ooleb’ chirixeb’ li yaal a’an.

Kok’ k’anjel naru chi b’aanumank

• Patz’ reheb’ li kok’al ma neke’xnaw ani kitz’iib’ank re li jek’inb’il aatin chirix li junkab’al. (Sa’ li raatin, “Li k’uub’anb’il na’leb’ ut li jek’inb’il aatin” [Jolomil ch’utub’aj-ib’ re octubre 2017], li Awa’b’ej Dallin H. Oaks kixch’olob’ chan ru naq kitz’iib’aman.) Tenq’aheb’ li kok’al chixtawb’al ru k’a’ru naraj naxye li ch’ol aatin “naqach’olob’ chi tiik li qaatin” li natawman sa’ xtiklajik li raqal. Patz’ reheb’ naq te’xwotz xna’leb’eb’ chirix k’a’ut naq eb’ li profeet ut eb’ li apostol neke’raj “xch’olob’ankil chi tiik” li yaal chirix li junkab’al sa’eb’ li kutankil a’in.

• Wotz junjunqeb’ li ch’ol aatin re li jek’inb’il aatin chirix li junkab’al li wankeb’ xyaalal choq’ aawe. Patz’ reheb’ li kok’al naq te’xwotz k’a’ru neke’reek’a chirixeb’ li yaal a’an. Chan raj ru naq jalanaq raj li qayu’am wi maak’a’eb’ raj li k’a’aq re ru a’an qik’in? B’ichahomaq sa’ komonil jun li b’ich li wan rilom rik’ineb’ li yaal neke’tawman sa’ li jek’inb’il aatin, jo’ “Tintaaqe li kixkʼuubʼ choqʼ we” malaj “Taaruuq toowanq aran saʼ choxa” (B’ichleb’aal choq’ reheb’ li Kok’al, 86–87, 98).

• K’ut chiruheb’ li kok’al jalam-uuch li te’reetali li yaal neke’tawman sa’ li jek’inb’il aatin chirix li junkab’al (malaj patz’ reheb’ naq te’xyiib’ xjalam-uuch junjunq). Naru neke’xyiib’ xjalam-uuch li santil ochoch, jun junkab’al yookeb’ chi tijok malaj chi b’atz’unk, malaj jun sumal li yookeb’ chi sumlaak. Patz’ reheb’ naq te’xsik’ ch’ol aatin sa’ li jek’inb’il aatin chirix li junkab’al li wankeb’ rilom rik’ineb’ li jalam-uuch. K’a’ru neke’xk’ut chiqu li ch’ol aatin a’an?

• Kawresiheb’ junjunq li patz’om li naru neke’sumeman rik’in li jek’inb’il aatin chirix li junkab’al, jo’: “K’a’ru nareek’a li Dios chirix li sumlaak?” ut “K’a’ru nak’ehok xsahil xch’ool li junkab’al?” Kanab’eb’ li kok’al chixsik’b’al ru junaq reheb’ li patz’om ut tenq’aheb’ chixtawb’al xsumenkil sa’ li jek’inb’il aatin.

• K’e xb’oqb’al jun reheb’ lix na’ xyuwa’eb’ li kok’al re naq te’aatinaq sa’ li tzoleb’aal chirix chan ru naq “jo’ rochb’eeneb’ rib’ chi junaqikeb’ xwankil neke’xtenq’a rib’ chirib’ileb’ rib’ ” sa’ li “loq’laj teneb’ank a’in” sa’eb’ lix junkab’al. Patz’ reheb’ li kok’al naq te’aatinaq chirix k’a’ru neke’xb’aanu anajwan re xkawresinkileb’ rib’ re wank jo’ ixaqilb’ej ut b’eelomej, ut na’b’ej ut yuwa’b’ej tiikeb’.

Eb’ li junkab’al mas saheb’ wi’chik xch’ool wi neke’xtaaqe li Jesukristo.

Li qaChoxahil Yuwa’ naxraheb’ chixjunil li ralal xk’ajol ut a’an naraj naq sahaqeb’ xch’ool. Chan ru naru nakatenq’aheb’ li kok’al chixtawb’al ru naq li tz’aqal xsahil ch’oolejil natawman rik’in xtaaqenkil lix k’utum ut lix b’aanuhom li qaKolonel Jesukristo?

Kok’ k’anjel naru chi b’aanumank

• Yiib’ xjalam-uuch jun nimla aamej chiru li pizarron ut patz’ reheb’ li kok’al naq te’ril ru li xwuq raqal li jek’inb’il aatin. Patz’ reheb’ naq te’xsik’ k’a’aq re ru li naru neke’xb’aanu re xtenq’ankil lix junkab’aleb’ chi wank chi sa xch’ool ut tz’iib’a lix sumehomeb’ sa’ li aamej. Patz’ reheb’ naq te’xsik’ ru k’a’ruhaq naru neke’xb’aanu re naq lix junkab’aleb’ mas sahaq wi’chik xch’ool.

• Patz’ reheb’ li kok’al naq te’xwotz numsihom b’ar wi’ ke’reek’a xrahom junaq komon re lix junkab’aleb’. Tenq’aheb’ li kok’al chixyeeb’aleb’ na’leb’ re li xwuq raqal li jek’inb’il aatin li naru neke’tenq’an re naq eb’ li komon sa’eb’ lix junkab’al te’reek’a naq raab’ileb’. Chan raj ru naru nak’anjelak li qanawom chirix lix evangelio li Jesukristo sa’ li qawanjik rik’in li qajunkab’al?

• Patz’ reheb’ li kok’al k’a’ raj ru te’xye re junaq ramiiweb’ wi tixpatz’ raj reheb’ k’a’ut naq aajel ru li sumlaak ut naq te’wanq li qakok’al. Chan raj ru taqatenq’a li qamiiw a’an chixtawb’al ru x’aajelil ruheb’ li junkab’al choq’ re li qaChoxahil Yuwa’? Tenq’aheb’ li kok’al chixsik’b’aleb’ ch’ol aatin sa’ li jek’inb’il aatin chirix li junkab’al li naru nak’anjelak reheb’; chi’ilmanq ajwi’ li video “¿Cuál es el propósito de la familia?” (ChurchofJesusChrist.org).

reetalil li tzolok

Xb’oqb’aleb’ chi tzolok sa’ kab’l

K’e xb’oqb’aleb’ li kok’al chixk’uub’ankil k’a’ruhaq te’xb’aanu re xkawob’resinkil lix junkab’aleb’. Waklesi xch’ooleb’ chixwotzb’al lix k’uub’anb’il na’leb’eb’ rik’ineb’ lix junkab’aleb’ sa’ kab’l.

Xchaab’ilob’resinkil li qak’utum

Taak’e reetal li taaye. Naq nakak’uteb’ li yaal wankeb’ sa’ li jek’inb’il aatin chirix li junkab’al, b’aanu usilal jultikaq aawe naq naab’aleb’ reheb’ li kok’al neke’k’i sa’eb’ junkab’al li moko mas juntaq’eeteb’ ta rik’in li na’leb’ neke’ch’olob’aman chi sa’. Taak’e reetal naq ink’a’ taaye k’a’ruhaq li naru naxrahob’tesi xch’ooleb’ malaj te’reek’a’ wi’ naq maak’a’eb’ aj-e.

perel re kok’ k’anjel: li junkab’al aajel ru sa’ lix k’uub’anb’il na’leb’ li qaChoxahil Yuwa’