“1–7 noviembre. Tzolʼlebʼ ut Sumwank 125–128: “Jun xyaab’ xkux li sahil ch’oolejil choq’ reheb’ li yo’yo ut eb’ li kamenaq,” ” Kim, Taaqehin—Choq’ reheb’ li komon ut li junkab’al: Li Tzol’leb’ ut Sumwank 2021 (2020)

“1–7 noviembre. Tzolʼlebʼ ut Sumwank 125–128,” Kim, Taaqehin—Choq’ reheb’ li komon ut li junkab’al: 2021

Jalam-uuch

jun junkab’al rik’in lix xe’xtooneb’ li wankeb’ sa’ li ruchich’och’ reheb’ li musiq’ej

Laa’o rik’ineb’, ut eb’ a’an qik’in, xb’aan li xCaitlin Connolly

1–7 noviembre

Tzolʼlebʼ ut Sumwank 125–128

“Jun xyaab’ xkux li sahil ch’oolejil choq’ reheb’ li yo’yo ut eb’ li kamenaq”

Chijultiko’q aawe xtz’iib’ankil li nakaweek’a naq nakawil Tzol’leb’ ut Sumwank 125–128 re naq naru taak’oxla aaweek’ahom ut taawotz rik’ineb’ laa komon.

Tz’iib’a li nakak’oxla

Sa’ agosto re 1840, li xJane Neyman kirab’i li profeet aj Jose chi aatinak sa’ xmuqlajik li ramiiw, aj Seymor Brunson. Lix yum li xJane, laj Cyrus xk’ab’a’, toje’ xkam ajwi’. Naraho’ ajwi’ xch’ool xb’aan naq laj Cyrus maajun wa kikub’e xha’, ut li xJane ink’a’ kixnaw k’a’ru taak’ulmanq rik’in li raam. Laj Jose ak naxnaw ru li yoo chireek’ankil; a’an kixk’oxla ajwi’ a’an chirix laj Alvin, li ras, li kikam ajwi’ chi ink’a’ nakub’e xha’. Li profeet kixk’e xch’ool naq tixwotz rik’in li xJane, ut rik’ineb’ chixjunil li wankeb’ sa’ li muquk, k’a’ru li kixk’utb’esi li Qaawa’ chiru chirixeb’ li ani kamenaqeb’ chi ink’a’ xe’xk’uleb’ li k’ojob’anb’il k’anjel re li evangelio—ut k’a’ru li naru taqab’aanu re xtenq’ankileb’.

Li tzol’leb’ a’in chirix li kub’iha’ choq’ reheb’ li kamenaq k’a’jo’ naq kixsahob’resi xch’ooleb’ laj santil paab’anel; sa’ junpaat ke’ok chixk’oxlankileb’ lix na’ xyuwa’eb’ ut chixjunileb’ chik lix komon ak kamenaqeb’. Anajwan chik wan xyo’onihomeb’! Laj Jose kireek’a ajwi’ xsahileb’ xch’ool, ut kiroksi utz’u’ujinb’il aatin re xyeeb’al li k’a’ru kixk’ut li Qaawa’ chiru chirix xkolb’aleb’ li kamenaq: “Che’xjap re li tzuul xb’aan xsahileb’ xch’ool, ut chejunilex ru taq’a, japomaq eere chi kaw xyaab’ eekux, ut chejunilex palaw ut chaqi ch’och’ yehomaq resil li sachb’a-ch’oolejil re lee Junelikil Rey!” (Tzol’leb’ ut Sumwank 128:23).

Chi’ilmanq Santos, 1:423–436; “Las cartas en cuanto al bautismo por los muertos,” Revelaciones en Contexto, 291–295.

Jalam-uuch

reetalil li tzolok aajunes

Li na’leb’ re xtzolb’aleb’ li loq’laj hu aajunes

Tzolʼlebʼ ut Sumwank 126

Li Qaawa’ naraj naq tinwil chi us lin junkab’al.

Chirix naq kisutq’i chaq sa’ jun xmision sa’ Inglaterra, laj Brigham Young kixk’ul jun chik xb’oqb’al rik’in li Qaawa’—a’an naq “yalb’ilaq xq’e chirilb’aleb’ lix junkab’al” (raqal 3), li ke’xk’ul naab’al li ch’a’ajkilal naq maa’ani wan. Naq yookat chixk’oxlankil chan ru naq a’in ut xkomoneb’ chik li na’leb’ sa’ li tasal 126 wan rilom aawik’in laa’at, k’oxla li raatin li Awa’b’ej Bonnie L. Oscarson, li kiwan junxil jo’ jolomil awa’b’ej reheb’ li Saaj Ixq:

“Chijultiko’q eere naq junjunq reheb’ li k’a’ru jwal ajb’il ru naru naq a’aneb’ li wankeb’ tz’aqal cheru. Chetikib’ k’anjelak sa’ lee rochoch ut sa lee junkab’al. A’an a’an li komonil li naru nakana chi junelik. Us ta ink’a’ jwal chaab’il lee wanjik sa’ lee junkab’al, laa’ex naru neketaw hoonal re k’anjelak, waklesink, ut kawresink. Chetikib’ b’ar wankex, cheraheb’ a’ yaal chankeb’ ru ut chekawresi eerib’ choq’ re li junkab’al nekeraj sa’ jun kutan” (“Li na’ajman ru chiqu laa’o,” Jolomil ch’utub’aj-ib’ re octubre 2017).

Chi’ilmanq ajwi’ “Vela especialmente por tu familia,” Revelaciones en Contexto, 258–265.

Tzol’leb’ ut Sumwank 127:2–4

Li Qaawa’ naxnaw ru xsahil ut xrahil inch’ool.

Xb’aan li b’alaq’il jitok ut li ani ke’raj xtz’apb’al sa’ tz’alam, laj Jose Smith kixmuq wi’chik rib’ sa’ li agosto re 1842. A’ut toj kiwan li yo’onink ut li sahilal sa’ li aatin kixtz’iib’a choq’ reheb’ laj santil paab’anel sa’eb’ li kutan a’an (wan anajwan sa’ Tzol’leb’ ut Sumwank 127). K’a’ru nakatzol sa’eb’ li raqal 2–4 chirix li Dios? chirix chan ru naru nakanumsi li ch’a’ajkilal?

Maare naru taatz’iib’a chan ru naq li Qaawa’ nakatxtenq’a sa’ li “chamal ha’ ” re laa yu’am.

Tzol’leb’ ut Sumwank 127:5–8; 128:1–8

“Yalaq k’a’ru neketz’iib’a resil sa’ ruchich’och’, tz’iib’anb’ilaq resil sa’ choxa.”

Naq nakawil Tzol’leb’ ut Sumwank 127:5–8; 128:1–8, k’e reetal k’a’ut naq li Qaawa’ kixk’ut chiru laj Jose Smith tz’aqal chan ru taatz’iib’amanq resileb’ li kub’iha’ choq’ reheb’ li kamenaq. K’a’ru naxk’ut a’in chawu chirix li Qaawa’ ut lix k’anjel?

Xb’aanunkil lix k’anjeleb’ li qaxe’ qatoon sa’ li santil ochoch naxb’ak’ li qach’ool rik’ineb’ a’an.

Tzolʼlebʼ ut Sumwank 128:5–25

Lix kolb’aleb’ lin xe’ intoon aajel ru choq’ re lin kolb’al.

Saqen ru li na’leb’ kixk’utb’esi li Dios chiru laj Jose Smith chirix k’a’ut naq neke’raj qatenq’ re te’kole’q li qaxe’ qatoon li ink’a’ ke’kub’e xha’ sa’ xyu’ameb’. A’b’an, k’a’ut naq lix kolb’aleb’ li qaxe’ qatoon “na’ajman ut aajel ru choq’ re li qakolb’al laa’o”? (chi’ilmanq Tzol’leb’ ut Sumwank 128:15–18; tiqb’il xkawil li aatin).

Li raqal 5 naxk’ut naq li kub’iha’ choq’ reheb’ li kamenaq kikawresiman “chalen chaq rub’elaj lix k’ojlajik li ruchich’och’.” K’a’ru naxk’ut li na’leb’ a’in chawu chirix li Dios ut lix k’uub’anb’il na’leb’? K’a’ru naxk’ut chawu li raatin li Awa’b’ej Henry B. Eyring “Xch’utub’ankil lix junkab’al li Dios” (Jolomil ch’utub’aj-ib’ re abril 2017).

Laj Jose Smith kiroksiheb’ li aatin jo’ “wankilal re b’ak’ok,” “junajinel b’ak’leb’,” ut “junajil li tz’aqal” naq kik’utuk chirixeb’ li k’ojob’anb’il k’anjel ut li kub’iha’ choq’ reheb’ li kamenaq. Sik’eb’ li aatin a’in ut xkomoneb’ chik naq nakawil Tzol’leb’ ut Sumwank 128:5–25. K’a’ru junjunq li k’a’aq re ru li naru te’b’aqe’q sa’ junajil, b’antiox re li Jesukristo ut xb’aaneb’ li k’ojob’anb’il k’anjel re li tijonelil choq’ reheb’ li kamenaq? K’a’ut naq “kawil ch’oolejil” a’an jun chaab’il aatin re xch’olob’ankil li tzol’leb’ chirix lix kolb’aleb’ li kamenaq? (che’ilmanq li raqal 9–11).

K’a’ru nawulak chawu chirix li raatin laj Jose Smith sa’eb’ li raqal 19–25? K’a’ru neke’xk’e chaweek’a li raqal a’in chirix li k’anjelak choq’ reheb’ laa xe’ aatoon sa’ li santil ochoch? chirix li Jesukristo? K’a’ru eek’asinb’ilat chixb’aanunkil? (chi’ilmanq FamilySearch.org/discovery re xtawb’al aana’leb’).

Chi’ilmanq ajwi’ 1 Korintios 15:29; Dale G. Renlund, “Li k’anjel re li santil ochoch ut li resilal li junkab’al: Tz’ape’k sa’ junajil ut k’irtesink,” Jolomil ch’utub’aj-ib’ re abril 2018; “Un sacrificio de tiempo” ut “El corazón de ellos está ligado a ustedes,” eb’ li video, ChurchofJesusChrist.org.

Jalam-uuch

reetalil li tzolok jo’ junkab’al

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Tzolʼlebʼ ut Sumwank 126.Maare li na’leb’ k’eeb’il re laj Brigham Young taareek’asi laa junkab’al chi aatinak chirix chan ru naru naq “yalb’ilaq eeq’e” chirilb’al eerib’ cherib’il eerib’ (raqal 3).

Tzol’leb’ ut Sumwank 128:15–18.K’a’ruheb’ li osob’tesink aj tojol-ix ut aj tz’aqob’resihom-u naqak’ul sa’ xb’aanunkil li k’anjel re li resilal li qajunkab’al? Naru teetaw eena’leb’ sa’ li video “Las bendiciones prometidas de la historia familiar” (ChurchofJesusChrist.org) malaj sa’ jun li b’ich chirix li resilal li junkab’al, jo’ “Jun li resilal li qajunkab’al” (B’ichleb’aal choq’ reheb’ li Kok’al, 100).

Tzol’leb’ ut Sumwank 128:18.Naru teeyib’ jun kadeenil hu rik’in xk’ab’a’eb’ lee junkab’al ut lee xe’toonil sa’ li junjunq b’ak’leb’. A’in tixk’ut naq li k’anjel re li resilal li junkab’al ut li santil ochoch na’ok choq’ jun “junajinel b’ak’leb’ ” li nokoxlaq’ab’ sa’ junajil rik’ineb’ li qaxe’ qatoon. Maare naru teeril FamilySearch.org re xtawb’al xkomoneb’ chik lee xe’toonil re naq taanimanq li kadeen xeyiib’.

Tzol’leb’ ut Sumwank 128:19–23.Maare laa junkab’al naru te’rileb’ li raqal a’in re xtawb’aleb’ li aatin li neke’xk’ut lix anchalil xch’ool laj Jose Smith chirix lix evangelio li Jesukristo ut xkolb’aleb’ li kamenaq. Eb’ laa komon naru te’xye resil li ak xe’xk’ul li xnimob’resi li rajom xch’ooleb’ chirix li k’anjel a’in—malaj naru teesik’ xb’aanunkil sa’ komonil sa’ FamilySearch.org/discovery.

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Jun li resilal li qajunkab’al,” B’ichleb’aal choq’ reheb’ li Kok’al, 100.

Jalam-uuch

reetalileb’ li xyaab’ kuxej re li k’ojob’ank wi’chik

Eb’ li xyaab’ kuxej re li k’ojob’ank wi’chik

Li kub’iha’ choq’ reheb’ li kamenaq, “jun na’leb’ ak’ ut q’axal xnimal ru”

Li jalam-uuch a’in naxk’ut li kub’sib’aal ha’ re li santil ochoch re Nauvoo, chi k’ojk’o sa’ xb’een kab’laju chi b’ooyx.

Phebe ut Wilford Woodruff

Li xPhebe Woodruff kiwan rochoch nach’ rik’in Nauvoo naq laj Jose Smith ki’ok chi k’utuk chirix li kub’iha’ choq’ reheb’ li kamenaq. Kixtz’iib’a resil a’an re lix b’eelom, laj Wilford, li wan sa’ xmision aran Inglaterra:

“Xk’utb’esiman chiru li Hermano Jose naq eb’ li komon re li Iglees naru te’kub’eeq xha’ choq’ reheb’ lix xe’toonil li kamenaqeb’ ut ink’a’ ke’rab’i resil li evangelio, choq’ reheb’ lix kok’al, lix na’ xyuwa’, li ras riitz’in, lix mama’ rixa’an, ut xkomoneb’ chik li rech alal. … Naq te’kub’eeq xha’ choq’ reheb’ li ramiiw, eb’ a’an te’ach’ab’aaq sa’ tz’alam ut chi jo’kan naru te’xk’uleb’ sa’ li wakliik chi yo’yo ut te’xk’ameb’ sa’ li choxahil awa’b’ejihom—li tzol’leb’ a’in ak k’ulub’anb’il xb’aan li iglees ut k’a’jo’ xk’ihaleb’ li komon ak yookeb’ chixb’aanunkil; wankeb’ li te’k’ub’eeq xha’ toj 16 sut … chiru jun ajwi’ li kutan.”¹

Moqon laj Wilford Woodruff kixye: “Naq kiwab’i resil a’an, kipisk’ok li waam xb’aan xsahil inch’ool. … Laa’in kikub’e inha’ choq’ reheb’ chixjunileb’ lin xe’ intoon ak kamenaqeb’ li kinru chixk’oxlankil. … Kiwaj xyeeb’al aleluyah naq ki’el chi kutankil li na’leb’ k’utb’esinb’il chirix li kub’iha’ choq’ reheb’ li kamenaq. Kiweek’a naq tento taasaho’q sa’ qach’ool chirix li rosob’tesihom li choxa.”²

Vilate Kimball

Jo’ li Hermana Woodruff, li xVilate Kimball kirab’i resil li kub’iha’ choq’ reheb’ li kamenaq naq laj Heber, lix b’eelom, yoo chaq chixjultikankil li evangelio. A’an kixtz’iib’a re:

“Li Awa’b’ej Smith kixjultika jun na’leb’ ak’ ut q’axal xnimal ru … li xnimob’resi xpaab’aaleb’ naab’aleb’ sa’ li iglees. A’an li kub’iha choq’ reheb’ li kamenaq. Laj Pablo ki’aatinak chirix a’an sa’ 1 Korintios, ch’ol 15, raqal 29. Laj Jose ak xk’ul chi k’utb’esinb’il jun xch’olob’ankil li na’leb’ a’an. … Lix k’anjel li iglees a’in, a’an naq te’kub’eeq xha’ choq’ reheb’ lix junkab’al li ke’kam rub’elaj naq kik’ojob’aman wi’chik li evangelio; chalen chaq lix xikin mama’ rixa’an. … Sa’ xb’aanunkil, noko’ok jo’ ruuchileb’ a’an; ut naqatenq’aheb’ re taaruuq te’tz’aqonq saʼ li xb’een wakliik chi yo’yo. A’an naxye naq taak’utmanq li evangelio chiruheb’ … a’b’an maajun musiq’ej naru nakub’e xha’. … Chalen chaq naq kijultikaman li na’leb’ a’an arin, ink’a’ nakana chi ch’anch’o li ha’. Sa’ xq’ehil li ch’utub’aj-ib’, wan naq wankeb’ waqxaqib’ malaj lajeeb’ chi xb’eenil sa’ li nima’, yookeb’ chi k’ub’sink ha’. … Nawaj xk’ub’sinkil inha’ choq’ re lin na’. Xink’oxla naq ink’a’ tinb’aanu toj reetal naq tatsuq’iiq, a’b’an naq laj Jose ki’aatinak chirix a’in, a’an kixye naq yalb’ilaq qaq’e chiqajunil chixb’aanunkil, ut naq tento rach’ab’ankileb’ li qamiiw chiru li moosil sa’ junpaat. Jo’kan naq tinb’aanu chiru li xamaan a’in, ut wankeb’ li qech kab’al li te’xb’aanu ajwi’. Wankeb’ li ak’ xe’kub’e xha’ junjunq li sut. … Jo’kan naq naru taak’e reetal naq wan xyo’onihom chixjunil li kristiaan. Ma ink’a’ k’a’jo’ xnimal ru li tzol’leb’ a’in?”³

Phebe Chase

Naq kiyaalo’ li kub’sib’aal ha’ sa’ li santil ochoch re Nauvoo, ke’ok chi b’aanumank li kub’iha’ choq’ reheb’ li kamenaq aran ruuchil li nima’. Li xPhebe Chase, a’an aj Nauvoo, kixtz’iib’a resil li santil ochoch re lix na’, ut kixye naq li kub’sib’aal ha’, a’an li na’ajej b’ar wi’ “naru taakub’eeq qaha’ choq’ reheb’ li qakomon li kamenaqeb’ ut too’ok choq’ aj kolonel sa’ li Tzuul Sion.” A’an kixye ajwi’ naq sa’ li kub’sib’aal ha’ a’in, “Laa’in xkub’e inha’ choq’ re inraarookil yuwa’ ut chixjunileb’ chik inraarookil amiiw. … Anajwan nawaj xnawb’al xk’ab’a’eb’ laa na’ aayuwa’ re naq naru tinwach’ab’eb’, xb’aan naq nawaj xk’ojob’ankil xch’ooleb’ li kamenaq. … Li Qaawa’ ak x’aatinak wi’chik ut xk’ojob’ wi’chik li najteril k’anjel a’in.”⁴

Sally Randall

Sa’ xtz’iib’ankil reheb’ li ramiiw ut lix junkab’al resil li kub’iha’ choq’ reheb’ li kamenaq, kijultiko’ re li xSally Randall lix kamik lix yum, laj George:

“Q’axal ch’a’aj li hoonal a’an choq’ we, ut ink’a’ naru xjalb’al li kik’ulman, a’b’anan … lix yuwa’ xkub’e xha’ choq’ re a’an ut k’a’jo’ xnimal ru naq naqapaab’ ut naqak’ul lix tz’aqalil li evangelio jo’ jultikanb’il anajwan, ut naq naru taakub’eeq qaha’ choq’ re chixjunileb’ li qamiiw ak kamenaqeb’ ut naru taqakoleb’ chalen chaq najter wi wan qanawom chirixeb’.

“Nawaj naq teetaqla we lix k’ab’a’eb’ chixjunileb’ li qakomon li kamenaqeb’ toj reetal li qamama’ qixa’an. Tinb’aanu li jo’ k’ihal naru chiwu re xkolb’aleb’ li wamiiw, ut taasaho’q inch’ool wi texchalq chintenq’ankil, xb’aan naq q’axal nim li k’anjel choq’ re jun ajwi’. … Nink’oxla naq teek’oxla naq jwal jalan li tzol’leb’ a’in, a’b’an teek’e reetal naq tz’aqal yaal.”⁵