laj Jose Smith nak’utuk sa’ Nauvoo

Laj Jose Smith sa’ Nauvoo, 1840, xb’aan laj Theodore Gorka

8–14 noviembre

Tzolʼlebʼ ut Sumwank 129–132

“Naq naqak’ul junaq osob’tesink rik’in li Dios, a’an xb’aan ab’ink chiru jun chaq’rab’ ”

Wankeb’ k’iila xchaq’al ru na’leb’ sa’eb’ li tasal 129–32, a’ut yal junjunq reheb’ neke’k’utman sa’ li tusleb’ aatin a’in. K’a’ chik li yaalil na’leb’ nakataw laa’at?

Tz’iib’a li nakak’oxla

Laj Brigham Young kixye a’in chirix laj Jose Smith, “A’an kiru chixk’osb’al ru li choxahil na’leb’ re naq tawb’ilaq ru xb’aan li ruchich’och’il winq” (Sa’ Enseñanzas de los Presidentes de la Iglesia: Jose Smith, 499–500). Tz’aqal yaal a’in chirixeb’ lix k’utum li Profeet sa’ Nauvoo sa’eb’ li chihab’ chirix 1840, ut junjunq reheb’ tz’iib’anb’ileb’ resil sa’ Tzol’leb’ ut Sumwank 129–32. Chan ru li Kolonel? “A’an winq jo’ laa’o.” Chan ru li choxa? “Li komonil ajwi’ li wan sa qayanq arin taawanq sa’ qayanq aran” (Tzol’leb’ ut Sumwank 130:1–2), ut li qaraarookil komonil wanko wi’ sa’ li qajunkab’al arin, wi taatz’ape’q sa’ junajil xb’aan lix wankil li Dios, “taawanq tz’aqal xwankil” sa’ li yu’am chalel (Tzol’leb’ ut Sumwank 132:19). Li na’leb’ jo’ a’in naru naxk’e chiqeek’a naq moko najt ta li choxa—q’axal nim xloq’al, a’ut naru xtawb’al.

A’b’an, wan naq li Dios naxpatz’ qe naq taqab’aanu k’a’ruhaq jwal ch’a’aj, ut chanchan naq ink’a’ naru xb’aanunkil. Choq’ reheb’ naab’aleb’ laj santil paab’anel, a’an li sumlaak rik’in numenaq jun li sum aatin. Li taqlahom re sumlaak rik’in xkomoneb’ chik li ixaqilb’ej kixyal rix xpaab’aal laj Jose Smith, li xEmma Smith, ut lix k’ihaleb’ li ke’k’uluk re. Re xkuyb’al xnumsinkil li yale’k-ix a’in, ink’a’ yal ki’ajman naq chaab’il neke’reek’a chirix li evangelio k’ojob’anb’il wi’chik; ki’ajman b’an xpaab’aaleb’ chirix li Dios li jwal nim wi’chik chiru yalaq rajom lix ch’ooleb’. Ink’a’ chik taqlanb’ilo chi jo’kan anajwan, a’b’an toj naru taqil lix tiikil b’aanuhomeb’ li ani ke’taqlaak chixb’aanunkil. Ut a’an naxwaklesi qach’ool laa’o naq patz’b’il qe naq taqaq’axtesi “li qamayejahom sa’ ab’ink chiru li k’a’ru yeeb’il qe” (Tzol’leb’ ut Sumwank 132:50).

reetalil li tzolok aajunes

Li na’leb’ re xtzolb’aleb’ li loq’laj hu aajunes

Tzolʼlebʼ ut Sumwank 130–31

Laj Jose Smith kixk’utb’esi yaalil na’leb’ chirix li Roxichal li Dios ut “li ruchich’och’ chalel.”

Maare nakak’e reetal naq jalaneb’ wi’ li tasal 130–31 rik’in li jun ch’ol chik li tasal sa’ li Tzol’leb’ ut Sumwank. Jalaneb’ xb’aan naq eb’ li tasal 130–31 neke’chal rik’in li k’a’ru kixtz’iib’a laj William Clayton, a’an aj tz’iib’ chiru laj Jose Smith, chirix li kirab’i li Profeet chixk’utb’al. Jo’kan naq eb’ li tasal a’in, chanchaneb’ jun raqal li ch’utub’anb’il na’leb’, maawa’ jun ajwi’ li na’leb’ li k’utb’esinb’il chi jun waakaj. A’b’an, toj wankeb’ li na’leb’ neke’wan sa’ komonil. Qayehaq, maare taawileb’ li tasal 130–131 chi wankeb’ li patz’om a’in sa’ aak’a’uxl: K’a’ru nintzol chirix li Dios? K’a’ru nintzol chirix li yu’am chalel? Chan ru naq li na’leb’ a’in naxjal lin yu’am laa’in?

Chi’ilmanq ajwi’ “Sentimos gran regocijo en el corazón al oírle hablar,” Revelaciones en Contexto, 277–80.

Tzol’leb’ ut Sumwank 131:1–4; 132:7, 13–25

B’antiox re li qaChoxahil Yuwa’, li junkab’al naru taawanq chi junelik.

Jun reheb’ li na’leb’ q’axal aj k’ojob’anel ch’oolej li kik’ojob’aak wi’chik rik’in li profeet aj Jose Smith, a’an naq naru taawanq chi junelik li qasumlajik ut li qajunkab’al. Rik’in li profeet aj Jose Smith, li Qaawa’ kixk’ojob’eb’ wi’chik li k’ojob’anb’il k’anjel ut li wankilal li na’ajman ru re xk’eeb’al chi uxmank a’in (chi’ilmanq Tzol’leb’ ut Sumwank 132:7, 18–19). Naq nakawil Tzol’leb’ ut Sumwank 131:1–4; 132:7, 13–15, k’oxla laa junkab’al ak wan aawe malaj li taawoyb’eni naq taawanq moqon. Chan ru naq eb’ li raqal a’in neke’xjal li nakak’oxla chirix li junkab’al a’in?

Wan naq li na’leb’ chirix li junelikil junkab’al ink’a’ jwal sa—maare naka’ch’ino’ malaj naraho’ qach’ool xb’aan naq wankeb’ k’iila ch’a’ajkilal sa’ li junkab’al wanko wi’. Naq yoo chaq xk’a’uxl li Awa’b’ej Henry B. Eyring chirix lix junkab’al, a’an kixk’ul xna’leb’ rik’in jun komon sa’ lix Molameb’ li Kab’laju chi Apostol: “Yal tatwanq chi k’ulub’ej re wank sa’ li choxahil awa’b’ejihom, ut k’a’jo’aq wi’chik xchaab’ilal lix wanjik laa junkab’al chiru li naru taak’oxla” (sa’ “Jun ochoch b’ar wi’ nawan lix Musiq’ li Qaawa’,” Jolomil ch’utub’aj-ib’ re abril 2019). Chan ru tat-osob’tesiiq sa’ li wankat wi’ rik’in laa junkab’al wi taataaqe li na’leb’ a’in?

jun winq ut jun ixq chirix li santil ochoch re Accra Ghana

Li wank sa’ junkab’al naru nakana chi junelik rik’ineb’ li k’ojob’anb’il k’anjel re li santil ochoch.

Tzol’leb’ ut Sumwank 132:1–2, 29–40

Li sumlaak rik’in numenaq jun li sum aatin ka’ajwi’ k’ulub’anb’il wi li Dios naxtaqla.

Anihaq li ak xril ru li Najter Chaq’rab’ maare naxpatz’ k’a’ut naq laj Abraham, laj Jakob, ut laj Moises ke’sumla rik’in numenaq jun li ixq. Ma muxuk sumsu li ke’xb’aanu li chaab’il winq a’in? Malaj ma k’ulub’anb’il lix b’aanuhomeb’ xb’aan li Dios? Sik’ lix sumenkil a’an sa’ Tzol’leb’ ut Sumwank 132:1–2, 29–40.

Li sumlaak chi jun ajwi’ li winq ut jun ajwi’ li ixq, a’an xchaq’rab’il li Dios chirix li sumlaak (chi’ilmanq lix tiklajik li tasal Awa’b’ejil Yehom 1; chi’ilmanq ajwi’ Jakob 2:27, 30). A’b’an, chi jo’q’ehaq li Dios kixtaqlaheb’ li ralal xk’ajol chixb’aanunkil li sumlaak chi numenaq jun li sum aatin.

Chi jo’kan kik’ulman sa’ xtiklajik li Iglees li k’ojob’anb’il wi’chik. Chririx xk’ulb’al li taqlahom a’in, laj Jose Smith ut xkomoneb’ chik laj santil paab’anel ke’xb’aanu li sumlaak chi numenaq jun li sum aatin. Wi taawaj xtzolb’al xkomon chik li na’leb’ chirix li sumlaak chi numenaq jun li sum aatin, chi’ilmanq “Mercy Thompson y la revelación sobre el matrimonio” (Revelaciones en Contexto, 281–93); Santos, 1:290–292, 432–435, 482–492, 502–504; El matrimonio plural en La Iglesia de Jesucristo de los Santos de los Últimos Días” (Temas del Evangelio, topics.ChurchofJesusChrist.org).

reetalil li tzolok jo’ junkab’al

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Tzol’leb’ ut Sumwank 130:2, 18–19; 132:13, 19.Chan ru naru taawoksiheb’ li raqal a’in re xtenq’ankil laa junkab’al chixk’eeb’al x’aajelil ru li k’a’ru naru taawanq chi junelik? Maare naru teek’e sa’ jun li maleet k’a’aq re ru li neke’reetali k’a’ru naru taqak’am qik’in sa’ li yu’am chalel, a’ yaal li naxye sa’ Tzol’leb’ ut Sumwank 130:2, 18–19; 132:19, jo’ jun xjalam-uuch li junkab’al malaj eb’ li loq’laj hu. K’a’ru naqatzol sa’ Tzol’leb’ ut Sumwank 132:13 chirix li k’a’aq re ru re li ruchich’och’? Naru tex’aatinaq chirix xjayalinkil eerib’ rik’in li k’a’ru naru taawanq chi junelik.

Tzol’leb’ ut Sumwank 130:20–21.Naru teeb’icha jun li b’ich chirix li b’antioxink, jo’ “K’e sa’ ajl li k’iila usilal” (Eb’ li B’ich, 153), ut teetz’iib’a chan ru naq xex-osob’tesiik rik’in xpaab’ankileb’ lix chaq’rab’ li Dios. K’a’ruheb’ li osob’tesink naqayo’oni xk’ulb’al? Chan ru naru taqak’uleb’ li osob’tesink a’an?

Tzol’leb’ ut Sumwank 131:1–4; 132:15–19.K’a’ru nareek’a li Qaawa’ chirix li sumlaak? Chan ru taqakawresi qib’—wi ak sumsuuko malaj wi ink’a’—re taawanq qasumlajik chi junelik q’e kutan?

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Taaruuq toowanq aran saʼ choxa,” B’ichleb’aal choq’ reheb’ li Kok’al, 98.

Xchaab’ilob’resinkil li tzolok aajunes

Sik’ li yaal sa’ li evangelio. Wan naq yeeb’ileb’ chi ch’olch’o li na’leb’ re li evangelio; wan naq k’utb’ileb’ sa’ jun jaljookil ru aatin malaj jun li seraq’. Naq nakawil ru li hu, patz’ aawib’, “k’a’ru li junelikil yaal k’utb’il sa’eb’ li raqal a’in?”

li na’ajej re li tz’ape’k sa’ junajil sa’ li santil ochoch re París Francia

Li na’ajej re li tz’ape’k sa’ junajil sa’ li santil ochoch re París Francia.