li tzʼalam sa’ Carthage

22–28 noviembre

Tzol’leb’ ut Sumwank 135–136

“A’an xtz’ap chaq lix taqlanb’il k’anjel ut lix b’aanuhom rik’in tz’aqal lix kik’el”

Naq nakawil ru Tzol’leb’ ut Sumwank 135–36, li Qaawa’ naru tatxmusiq’a chixyu’aminkil li nakawil ru. Naq nak’ulman a’an, tz’iib’a li naxk’ut a’an chawu.

Tz’iib’a li nakak’oxla

Sa’ li ewu re li 27 junio, 1844, ke’wan wi’chik sa’ tz’alam laj Jose ut laj Hyrum Smith, rochb’eeneb’ laj John Taylor ut laj Willard Richards. Ke’xnaw naq maak’a’ xmaakeb’, a’b’an ke’xkanab’ rib’ chi chape’k, re naq maare chi jo’kan ink’a’ chik te’rahob’tesiiq laj santil paab’anel sa’ Nauvoo. Ak kitz’ape’ chaq li profeet aj Jose sa’ li tz’alam junxil xb’aaneb’ aj xik’ ilonel re li Iglees, a’b’an anajwan chanchan kixnaw naq ink’a’ chik taa’elq chi yo’yo. A’an ut eb’ li ramiiw ke’xyal xk’ojob’ankileb’ xch’ool chirib’ileb’ rib’ rik’in rilb’al ru lix Hu laj Mormon ut xb’ichankileb’ li b’ich. Sa’ junpaat ke’ab’iman chi moqk li puub’, ut chirix jun k’amok chik ak raqenaq xyu’am laj Jose Smith ut laj Hyrum, li ras.

A’b’an maawa’ a’an xraqik li choxahil k’anjel ke’k’anjelak wi’. Ut maawa’ a’an xraqik lix k’ojob’ankil wi’chik lix evangelio li Jesukristo. Toj wanq xkomon chik li k’anjel li taab’aanumanq, ut xkomon chik li k’utb’esinb’il na’leb’ li tixb’eresi li Iglees chi uub’ej. Moko naru ta xramb’al lix k’anjel li Dios rik’in xkamsinkil li Profeet.

Chi’ilmanq Santos, 1:521–52.

Li na’leb’ re xtzolb’aleb’ li loq’laj hu aajunes

Tzol’leb’ ut Sumwank 135; 136:37–39

Laj Jose ut laj Hyrum Smith ke’xtz’ap chaq lix nawom xch’ooleb’ rik’in lix kik’eleb’.

K’oxla k’a’ raj ru kaweek’a wi ta katwan Nauvoo naq ke’kam laj Jose ut laj Hyrum Smith (chi’ilmanq Santos, 1:554–55). K’a’ raj ru kab’aanu re xtawb’al xyaalal li rahilal a’an? Tzol’leb’ ut Sumwank 135, li kipuktesiman oxib’ po chirix lix kamikeb’, maare kiru raj chatenq’ankil. Naru taajuch’eb’ li aatin li katxtenq’a raj ut kixk’ojob’ raj aach’ool. K’a’ raj ru taaye re li ani naxpatz’, “K’a’ut naq li Dios kixkanab’ chi kamsiik lix Profeet?”

Chi’ilmanq ajwi’ Tzol’leb’ ut Sumwank 5:21–22; 6:29–30; “Recuerdos del martirio,” Revelaciones en Contexto, 321–328; Enseñanzas de los Presidentes de la Iglesia: José Smith, 556–557, 563–575; M. Russell Ballard, “Ma inkʼaʼ tooxik chi uubʼej saʼ xnimal ru li kʼanjel aʼin?” Jolomil ch’utub’aj-ib’ re abril 2020.

Tzol’leb’ ut Sumwank 135:3

Laj Jose Smith q’axal wi’chik kixb’aanu choq’ re li qakolb’al chiru yalaq ani chik, ka’ajwi’ li Jesukristo naq’axok re.

K’oxlaheb’ li osob’tesink ak xak’ul laa’at jo’ komon sa’ li Iglees li Jesukristo. Jo’ k’ihaleb’ xak’ul xb’aan li k’anjel kixb’aanu li profeet aj Jose Smith? Sa’ Tzol’leb’ ut Sumwank 135:3 wan resil junjunq reheb’ li xninqal ru k’anjel kixb’aanu laj Jose Smith chiruheb’ li 24 chihab’ chirix lix xb’een k’utb’esink. Chan ru naq jalb’il laa yu’am ut laa wanjik rik’in laa Choxahil Yuwa’ ut li Jesukristo xb’aaneb’ li k’anjel a’an? Maare naru taatz’iib’a lix nawom aach’ool chirix li profeet aj Jose Smith. Ma wan ani tento raj taarab’i lix nawom aach’ool laa’at?

Tzolʼlebʼ ut Sumwank 136

Li Qaawa’ naxk’e inna’leb’ choq’ re “lin b’eenik” sa’ inyu’am.

Chirix naq ke’isiik chaq laj santil paab’anel sa’ Nauvoo, ke’xchap lix b’e chi najt toj sa’ li ru taq’a Lago Salado, ut q’axal timil ut ch’a’aj lix tiklajik li b’eek a’an. Laj Brigham Young, li nab’eresin chik re li Iglees jo’ li Awa’b’ej re lix Molameb’ li Kab’laju chi Apostol, kiwan xk’a’uxl chirix chan ru naq te’wulaq laj santil paab’anel chi yo’yo chirix li b’eek. A’an kixk’ojob’ jun na’ajej te’wanq wi’, Winter Quarters xk’ab’a’, ut kitijok re xk’ulb’al xb’eresinkil. Re xsumenkil, li Qaawa’ kixk’e jun k’utb’esinb’il na’leb’ re, li wan anajwan sa’ li tasal 136. Li k’utb’esinb’il na’leb’ a’in kixjultika reheb’ laj santil paab’anel naq “li k’a’ru te’xb’aanu sa’ xb’eenikeb’ juntaq’eet xnimal ru rik’in b’ar te’wulaq wi’,” ut “kixtenq’aheb’ chixk’eeb’al reetal naq li b’eek toj sa’ rokeb’aal li saq’e maawa’ jun rahil teneb’ank, a’anaq b’an jun xnimal ru musiq’ejil b’eenik te’xnumsi sa’ komonil” (“Este será nuestro convenio,” Revelaciones en Contexto, 308).

K’oxla li na’leb’ a’in naq nakawil ru li tasal 136. K’a’ru li na’leb’ nakataw li naru tatxtenq’a re naq junaq aach’a’ajkilal taawulaq jo’ “jun xnimal ru musiq’ejil numishom” choq’ aawe? Naru ajwi’ taak’oxla chan ru tatx’tenq’a li na’leb’ a’in chixb’aanunkil li rajom li Qaawa’ sa’ laa yu’am, jo’ chanru naq kixtenq’aheb’ laj santil paab’anel sa’ xb’eenikeb’.

Chi’ilmanq ajwi’ “Este será nuestro convenio,” Revelaciones en Contexto, 307–14; Temas de la historia de la Iglesia, “Sucesión del liderazgo de la Iglesia,” ChurchofJesusChrist.org/study/history/topics.

Winter Quarters, xb’aan laj Greg Olsen

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Tzol’leb’ ut Sumwank 135:1, 3.Re xtenq’ankil laa junkab’al chixtawb’al ru k’a’ru naraj naxye naq laj Jose Smith “xtz’ap chaq lix taqlanb’il k’anjel ut lix b’aanuhom rik’in tz’aqal lix kik’el,” naru teeril li video “Testimonio del Libro de Mormón” (ChurchofJesusChrist.org; chi’ilmanq ajwi’ Jeffrey R. Holland, “Seguridad para el alma,” Liahona, noviembre 2009, 88–90). K’a’ru naxtoch’ li qach’ool sa’eb’ li raqal a’in? Chan ru toowanq chi tiik qapaab’aal chirix lix nawom qach’ool, us ta maare ink’a’ taapatz’manq xq’axtesinkil qayu’am xb’aan a’an?

Tzol’leb’ ut Sumwank 135:3.Re aatinak chirix k’a’ru naraj naxye naq laj Jose Smith “q’axal wi’chik kixb’aanu choq’ re lix kolb’aleb’ li winq, chiru yalaq ani chik chi winq li wanjenaq jun sutaq chi sa’, ka’ajwi’ li Jesus naq’axok re,” naru teek’oxla jo’ junkab’al k’a’ru li xetzol chiru li chihab’ a’in chirix laj Jose Smith. Naru taawoksiheb’ li jalam-uuch sa’ li hu a’in re xtenq’ankileb’ chixjultikankil k’a’ru xe’xtzol, ut taab’oqeb’ chixwotzb’aleb’ li seraq’ malaj k’utum neke’wulak chiruheb’. K’a’ut naq naqab’antioxi li profeet aj Jose Smith ut li k’a’ru kixb’aanu li Qaawa’ rik’in? Naru ajwi’ teeril li video “José Smith: El Profeta de la Restauración” (ChurchofJesusChrist.org).

Tzolʼlebʼ ut Sumwank 136.Naq li Qaawa’ kixk’utb’esi li tasal 136, yookeb’ chaq chixkawresinkil rib’ laj santil paab’anel choq’ re jun li b’eek jwal najt ut jwal ch’a’ajaq, chi b’eresinb’ileb’ xb’aan laj Brigham Young (chi’ilmanq li ch’ol 58, 60, ut 62 sa’ Eb’ li Esilal sa’ li Tzol’leb’ ut Sumwank, 206–8, 211–16, 222–24). Naq nekeril ru li tasal 136 sa’ komonil, k’oxlaheb’ li ch’a’ajkilal maare teek’ul jo’ junkab’al. K’a’ru li na’leb’ sa’ li k’utb’esinb’il na’leb’ a’in li naru tooxtenq’a chixk’ulb’al lix tenq’ ut lix wankilal li Qaawa’?

Tzol’leb’ ut Sumwank 136:4.K’a’ru naraj naxye “b’eek sa’ chixjunil lix k’ojob’anb’il k’anjel li Qaawa’ ”? K’a’ru neke’xb’aanu choq’ qe li k’ojob’anb’il k’anjel ak xe’qak’ul sa’ li qayu’am wulaj wulaj?

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Nimanb’ilaq li ki’ilok re Jehovah,” Eb’ li B’ich, 16.

Xchaab’ilob’resinkil li tzolok aajunes

Xtawb’al lix rahom li Dios. Li Awa’b’ej M. Russell Ballard kixye, “Li evangelio a’an jun evangelio re rahok—rahok choq’ re li Dios ut choq’ re li qas qiitz’in” (“El amor de Dios y sus creaciones,” Liahona, julio 1988, 58). Naq nakawileb’ ru li loq’laj hu, k’oxla xjuch’b’aleb’ li raqal li neke’xk’ut xyaalal lix rahom li Dios.

Maa’ani q’axal narahok, xb’aan laj Casey Childs