Far West

Far West, xb’aan laj Al Rounds

11–17 octubre

Tzolʼlebʼ ut Sumwank 115–120

“Lix mayej q’axal loq’aq wi’chik choq’ we chiru lix k’iijik”

Sik’ xb’eresihom li Musiq’ej re naq taataweb’ li na’leb’ neke’raj ru li kok’al. Naru nakataweb’ chaab’il na’leb’ sa’eb’ li kok’ k’anjel reheb’ li kok’al toj ka’ch’ineb’ xyu’am malaj reheb’ li ak’ ninqeb’.

Tz’iib’a li nakak’oxla

reetalil li wotzok

Xkanab’ankileb’ chi wotzok

Chi jo’q’ehatq, naru natenq’an wi nakat-aatinak rik’in xna’ malaj xyuwa’ junaq reheb’ li kok’al ut taapatz’ reheb’ naq te’xtenq’a lix yum malaj lix rab’in re naq taawulaq sa’ li tzoleb’aal chi kawresinb’il re xwotzb’al k’a’ruhaq xtzol sa’ kab’l. Li ch’ina al naru naxb’eresi junaq ch’ina k’anjel xb’aanu sa’ kab’l rik’in lix junkab’al.

reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

Tzol’leb’ ut Sumwank 115:4–5

Laa’in komon sa’ lix Iglees li Jesukristo reheb’ laj Santil Paab’anel sa’ Roso’jikeb’ li Kutan.

Chan ru naru nakatenq’aheb’ li kok’al chixk’eeb’aleb’ reetal li osob’tesihom neke’chal rik’in li wank choq’ komon re lix Iglees li Jesukristo?

Kok’ k’anjel naru chi b’aanumank

• Patz’ ma wan junaq reheb’ li kok’al li naxnaw xk’ab’a’ li Iglees chi tz’aqal. K’ut chiruheb’ li reetalil li Iglees (sa’ junaq puktesinb’il hu xb’aan li Iglees malaj chiru lix placa junaq misioneer), tz’iib’a lix k’ab’a’ chiru li pizarron malaj yaab’asi sa’ Tzol’leb’ ut Sumwank 115:4. Patz’ reheb’ naq te’xyaab’asi xk’ab’a’ li Iglees aawik’in naq taak’ut chawuq’ li junjunaq chi aatin. Aatinan chirixeb’ li aatin aajeleb’ ru ut tenq’aheb’ chixtawb’al ru k’a’ut naq aajeleb’ ru (chi’ilmanq “Ch’ol 43: Li Jesukristo naxk’e xk’ab’a’ lix Iglees,” Eb’ li Esilal sa’ li Tzol’leb’ ut Sumwank, 164).

• B’ichahomaq sa’ komonil “Lix Iglees li Jesukristo” (B’ichleb’aal choq’ reheb’ li Kok’al, 48), ut wotz rik’ineb’ li kok’al k’a’ru nakaweeka chirix naq laa’at komon sa’ lix Iglees li Jesukristo. Kanab’eb’ chixwotzb’al li neke’reek’a a’an chirix li Iglees.

• B’oqeb’ li kok’al chi xaqliik naq taaye li aatin “waklinqex” li wan sa’ Tzol’leb’ ut Sumwank 115:5. B’oqeb’ chixyu’b’aleb’ li ru’uj ruq’ jo’ xsaqen li saq’e naq taawil ru li aatin “lemtz’unqex.” B’ichahomaq sa’ komonil jun li b’ich li na’aatinak chirix li wank jo’ jun saqen choq’ reheb’ li qas qiitz’in, jo’ “Chanchanin laaʼin jun chahim” (B’ichleb’aal choq’ reheb’ li Kok’al, 84). Jultika reheb’ naq li qasaqen nachal rik’in li Jesukristo ut tenq’aheb’ chixk’oxlankil chan ru naru “neke’lemtz’un.”

Tzol’leb’ ut Sumwank 117:6

Li Jesukristo kixyo’ob’tesi li ruchich’och’ ut chixjunil li k’a’ru wan chi sa’.

Re xwaklesinkil xch’ool laj William Marks ut laj Newel K. Whitney re naq te’xmayeja li k’a’ru reheb’ ut te’nume’q chi wank aran Missouri, li Qaawa’ kixjultika reheb’ naq a’an kiyo’ob’tesink re chixjunil li k’a’aq re ru wan sa’ li ruchich’och’. Chan ru naq xnawb’al li yaal a’an naru narosob’tesiheb’ li kok’al?

Kok’ k’anjel naru chi b’aanumank

• K’ameb’ malaj yiib’eb’ xjalam-uuch li k’a’ru yo’ob’tesinb’il li yeeb’il sa’ Tzol’leb’ ut Sumwank 117:6 li kixye li Qaawa’ naq a’an kiyiib’ank re (malaj b’oqeb’ li kok’al chixyiib’ankileb’ xjalam-uuch). Patz’ reheb’ naq te’xtaqsi malaj te’xk’uteb’ li jalam-uuch naq yooqat chixyaab’asinkil li raqal. Ye reheb’ k’a’ut naq aajel ru choq’ aawe xnawb’al naq li Jesukristo kixyo’ob’tesiheb’ li k’a’aq re ru a’an.

• B’ichahomaq sa’ komonil jun li b’ich li na’aatinak chirixeb’ lix yo’ob’tesihom li Dios, jo’ “Raabʼilin xbʼaan li Dios saʼ choxa” (B’ichleb’aal choq’ reheb’ li Kok’al, 16). Kanab’eb’ li kok’al chi aatinak chirix junjunq li k’a’aq re ru kixyo’ob’tesi li Dios li natenq’ank reheb’ chireek’ankil lix rahom.

Tzol’leb’ ut Sumwank 119–20

Li lajetqil natenq’an re naq na’uxman lix k’anjel li Dios.

Naab’aleb’ reheb’ li kok’al maare mas toj kok’eb’ re k’uluk tumin ut xtojb’al li lajetqil, a’b’an us naq te’xtaw ru chan ru naq li lajetqil natenq’an sa’ li nimla k’anjel naxb’aanu li Iglees sa’ chixjunil li ruchich’och’.

Kok’ k’anjel naru chi b’aanumank

• Ch’olob’ chan ru naq naqatoj li lajetqil ut chan ru na’oksiman (chi’ilmanq “Ch’ol 44: Li lajetqil,” Eb’ li Esilal sa’ li Tzol’leb’ ut Sumwank, 165–166, malaj li video sa’ ChurchofJesusChrist.org). Yiib’ xjalam-uuch lajeeb’ chi kok’ tumin chiru li pizarron ut patz’ reheb’ li kok’al naq tate’xtenq’a chirajlankileb’. Aatinanqex chirix jarub’ reheb’ a’an nak’eeman re li Qaawa’ choq’ lajetqil.

• B’ichahomaq sa’ komonil jun li b’ich chirix li lajetqil, jo’ “Nawaj xkʼeebʼal lin lajetqil” (B’ichleb’aal choq’ reheb’ li Kok’al, 143), ut ye reheb’ li kok’al k’a’ut naq nakatoj li lajetqil. Wi naru, wotz junaq aanumsihom rik’ineb’.

reetalil li k‘utuk

Xk’utb’al li tzol’leb’: Kok’al ak ninqeb’

Tzol’leb’ ut Sumwank 115:4–6

Lin b’aanuhom naru naxtenq’aheb’ li was wiitz’in chi chalk rik’in li Kristo ut xtawb’al xkawileb’ xch’ool.

Eb’ li kok’al maare neke’xnaw ru kristiaan yookeb’ chi nume’k sa’ xkaq-sut-iq’ li yu’am ut neke’raj ru “xmuheb’aal” (raqal 6) naxk’e li Iglees. K’oxla chan ru taamusiq’aheb’ li kok’al “chi wakliik ut chi lemtz’unk” (raqal 5) ut chixwotzb’al lix saqen rik’ineb’ li kristiaan a’an.

Kok’ k’anjel naru chi b’aanumank

• Numsi junaq li pook reheb’ li kok’al, jun xjalam-uuch li saq’e, malaj junaq chik k’a’aq re ru li taareetali lix saqen lix evangelio li Jesukristo. Naq te’tz’aq chixchapb’al li saqen, b’oqeb’ chirilb’al ru Tzol’leb’ ut Sumwank 115:4–5 ut te’xye k’a’ruhaq naru neke’xb’aanu re “te’lemtz’unq” jo’ jun saqen choq’ reheb’ li ras riitz’in (chi’ilmanq 3 Nefi 18:24).

• B’oqeb’ li kok’al chixyiib’ankil junaq jalam-uuch li taareetali Tzol’leb ut Sumwank 115:6. Qayehaq, naru neke’xyiib’ xjalam-uuch junaq kaq-sut-iq’ rik’ineb’ kristiaan neke’xkol rib’ sa’ junaq rochochil li Iglees. K’a’ raj ru naru nareetali li kaq-sut-iq’? Chan ru naq li Iglees a’an jun muheb’aal chiruheb’ li k’a’aq re ru a’an?

Tzolʼlebʼ ut Sumwank 117

Eb’ lin mayej loq’eb’ choq’ re li Qaawa’.

Sa’ li tasal 117, li Qaawa’ kixye re laj William Marks ut laj Newel K. Whitney naq te’xmayeja li k’a’ru wan reheb’ aran Kirtland re naq te’xk’ul xninqal osob’tesiik aran Missouri. Kixb’antioxi ajwi’ li mayejak kixb’aanu laj Oliver Granger. K’a’ru nakak’oxla naq naru neke’xtzol li kok’al sa’eb’ li eetalil a’an?

Kok’ k’anjel naru chi b’aanumank

• B’oqeb’ li kok’al chixk’oxlankil naq wankeb’ jun xnimla k’ay aran Kirtland, jo’ laj Newel K. Whitney. K’a’ raj ru te’reek’a wi ta li Qaawa’ tixpatz’ reheb’ naq te’xkanab’ lix k’ay ut te’xik sa’ junaq chi na’ajej? Yaab’asi Tzol’leb’ ut Sumwank 117:1–11 choq’ reheb’ li kok’al, ut patz’ reheb’ naq te’xye aawe naq taakanab’ rilb’al ru naq te’rab’i k’a’ruhaq naru natenq’ank reheb’ chixtawb’al xpaab’aaleb’ re majeyak ut ab’ink chiru li Qaawa. K’a’ru naqamayeja anajwan re ab’ink chiru li Qaawa’?

• Seraq’i reheb’ li kok’al k’a’ut naq eb’ laj santil paab’anel ke’el chaq Kirtland, malaj kanab’ junaq reheb’ a’an chixseraq’inkil (chi’ilmanq “Ch’ol 41: Li ch’a’ajkilal sa’ Kirtland,” Eb’ li Esilal sa’ li Tzol’leb’ ut Sumwank, 158–160). Ch’olob’ naq li Qaawa’ kixpatz’ re laj Oliver Granger naq taakanaaq aran Kirtland ut tixtoj lix k’as li Iglees. K’a’ut naq a’an jun k’anjel ch’a’aj? K’a’ru kixye li Qaawa’ sa’ Tzol’leb’ ut Sumwank 117:13 li kiru chi tenq’ank re laj Oliver—malaj a’ yaal ani qe laa’o—chi mayejak re ab’ink chiru li Qaawa’?

Tzol’leb’ ut Sumwank 119–120

Li lajetqil natenq’an re naq na’uxman lix k’anjel li Dios.

Tz’il rix chan ru taatenq’aheb’ li kok’al chixtawb’al ru chan ru naq li lajetqil—us ta b’ab’ay li neke’xk’e—natenq’an re xkab’lankil li rawa’b’ejihom li Dios (chi’ilmanq Leales a la Fe, 60–61).

Kok’ k’anjel naru chi b’aanumank

• B’oqeb’ li kok’al chixk’oxlankil naq jun ramiiweb’ naril jun rochochil li Iglees ut naxpatz’: “Chan ru naq laa Iglees naxtoj li kab’l a’an?” Chan raj ru taqach’olob’ li lajetqil chiru li qamiiw a’an? Naq eb’ li kok’al neke’xk’oxla li patz’om a’an, ye reheb’ naq naru neke’xsik’ xtenq’ sa’ Tzol’leb’ ut Sumwank 119:4; 120:1.

• Tenq’aheb’ li kok’al chixk’oxlankil k’a’aq re ru li naru naxb’aanu li Iglees b’antiox re li lajetqil. Chan ru naq li k’a’aq re ru a’an neke’rosob’tesi li qayu’am? Wotz laa week’ahom chirix li chaq’rab’ re li lajetqil ut chan ru naq nakatrosob’tesi.

  ch’ina al naxtoj li lajetqil

  Naq naqatoj li lajetqil, naqak’ut qarahom chiru li Dios ut naqatenq’a lix k’anjel.

reetalil li tzolok

Xb’oqb’aleb’ chi tzolok sa’ kab’l

B’oqeb’ li kok’al chixk’eeb’al reetal li xe’reek’a sa’ li raam malaj eb’ li na’leb’ xwulak sa’ xk’a’uxleb’ sa’ li tzolok anajwan. Waklesi xch’ooleb’ chixwotzb’al li reek’ahomeb’ malaj lix na’leb’eb’ rik’in lix junkab’aleb’.

Xchaab’ilob’resinkil li qak’utum

Tenq’aheb’ li na’b’ej yuwa’b’ej. Sik’ chan ru naru nakat-aatinak rik’ineb’ lix na’ xyuwa’ li kok’al chirix k’a’ru yookeb’ chixtzolb’al sa’ li Tzoleb’aal reheb’ li Kok’al, ut patz’ reheb’ chan ru naru nakatenq’aheb’ sa’ lix k’anjeleb’ jo’ na’b’ej yuwa’b’ej (chi’ilmanq Li k’utuk jo’ li Kolonel, 25).

perel re kok’ k’anjel: li lajetqil natenq’an re naq na’uxman lix k’anjel li Dios