eb’ laj santil paab’anel neke’eelelik chiru jun ch’uut chi aj rahob’tesinel

C. C. A. Christensen (1831–1912), Eb’ laj santil paab’anel neke’isiik chaq sa’ li Condado Jackson, Missouri, c. 1878, tempera en muselina, 77 ¼ × 113 pulgadas. Museo de Arte, Universidad de Brigham Young, jun maatan k’eeb’il xb’aaneb’ li ri laj C. C. A. Christensen, 1970

6–12 septiembre

Tzol’leb’ ut Sumwank 98–101

“Ch’anch’o chexwanq, ut chenaw naq laa’in li Dios”

K’a’ru li na’leb’ neke’raj ru rab’inkil li kok’al sa’ li xamaan a’in? Chan ru naru neke’tenq’aak xb’aaneb’ li na’leb’ wankeb’ sa’ Tzol’leb’ ut Sumwank 98–101 chi chaab’ilo’k jo’ xtzolom li Jesukristo?

Tz’iib’a li nakak’oxla

reetalil li wotzok

Xkanab’ankileb’ chi wotzok

Waklesi xch’ooleb’ li kok’al chixwotzb’al k’a’ruhaq xe’xtzol sa’ Tzol’leb’ ut Sumwank sa’ kab’l malaj sa’ li tzoleb’aal reheb’ li kok’al. Patz’ reheb’ b’ar xcha’al li neke’xtzol sa’ Tzol’leb’ ut Sumwank mas nawulak chiruheb’.

reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

Tzol’leb’ ut Sumwank 98:39–40

Naru ninkuyeb’ xmaak li ani ink’a’ chaab’ileb’ xch’ool wik’in.

Li Qaawa’ kixpatz’ reheb’ laj santil paab’anel li yookeb’ chaq chi tawasiik sa’ li Condado Jackson, Missouri, naq te’xkuyeb’ xmaak li xe’rahob’tesink reheb’. Naq yooqat chi aatinak rik’ineb’ li kok’al chirix lix aajelil ru li kuyuk maak, k’e reetal naq te’xtaw ajwi’ ru naq wi wan ani narahob’tesink reheb’, tento te’xye re junaq kristiaan ak nim li neke’xnaw ru.

Kok’ k’anjel naru chi b’aanumank

• Re xtenq’ankileb’ li kok’al re naq te’xtaw ru li ch’a’ajkilal ke’xnumsi laj santil paab’anel sa’ Sion, wotz rik’ineb’ li “Ch’ol 34: Li Dios naxtijeb’ li tenamit re Sion” (Eb’ li Esilal sa’ li Tzol’leb’ ut Sumwank, 128–31, malaj li video sa’ ChurchofJesusChrist.org). Yaab’asi Tzol’leb’ ut Sumwank 98:39–40, ut patz’ reheb’ li kok’al naq te’rab’i k’a’ru kixpatz’ li Qaawa’ reheb’ laj santil paab’anel naq te’xb’aanu naq eb’ li ke’tawasink reheb’ te’xpatz’ xkuyb’al xmaak. K’a’ut naq li Jesus naraj naq te’qakuy xmaak li kristiaan, us ta ink’a’ chaab’ileb’ xch’ool qik’in?

• K’e junaq xjalam-uuch uhej sa’ xch’ool sa’ li tzoleb’aal ut jun chik re uhej josq’ junpak’al. Wotz rik’ineb’ li kok’al jalan jalanq seraq’ b’ar wi’ anihaq moko chaab’il ta xch’ool (naru nakataweb’ kok’ seraq’ sa’ li Liahona). Ye k’a’ru naru naqab’aanu sa’eb’ li hoonal a’an, ut tenq’aheb’ li kok’al chixsik’b’al ru wi te’saho’q raj xch’ool malaj te’raho’q raj xch’ool rik’in a’an. B’oqeb’ chixk’utb’al chi ru’uj ruq’eb’ li uhej wankeb’ chiru tz’ak.

Tzol’leb’ ut Sumwank 101:16

Li Jesukristo naru naxk’e intuqtuukilal.

Naq eb’ laj santil paab’anel yookeb’ chi rahob’tesiik, li Qaawa’ kixk’ojob’ xch’ooleb’ naq kixye reheb’, “Ch’anch’o chexwanq, ut chenaw naq laa’in li Dios.” K’oxla chan ru naq li na’leb’ a’in naru narosob’tesiheb’ li kok’al.

Kok’ k’anjel naru chi b’aanumank

• B’oqeb’ li kok’al chireek’asinkileb’ rib’ sa’eb’ lix na’aj. Chirix a’an patz’ reheb’ naq te’xkanab’ reek’asinkil rib’ naq taataqsi junaq xjalam-uuch li Kolonel ut taaye li ch’ol aatin: “Ch’anch’o chexwanq, ut chenaw naq laa’in li Dios” (Tzol’leb’ ut Sumwank 101:16). K’iilasuti li ch’ina k’anjel a’an. Ch’olob’ naq kich’a’ajko’ xyu’ameb’ laj santil paab’anel sa’ xkutankil laj Jose Smith, li Jesus kiraj naq te’wanq chi ch’anch’o ut te’xkanab’ rib’ sa’ ruq’ a’an, ut ink’a’ naq te’ok xk’a’uxleb’. Chan ru naru nokoxtenq’a li Jesus naq naqanumsi hoonal ch’a’aj?

• B’ichahomaq sa’ komonil jun li b’ich chirix li oxloq’ink, jo’ “Tuqtuuko, chʼanchʼooko” (B’ichleb’aal choq’ reheb’ li Kok’al, 11). Tenq’aheb’ li kok’al chixk’eeb’al reetal li eek’ahom re tuqtuukilal li nawan qik’in naq ch’anch’o nokowan ut naqak’oxla li Jesus—qayehaq, rajlal sut naq nokotijok malaj naq nokotz’aqon sa’ li loq’laj wa’ak.

• Tenq’aheb’ li kok’al chixb’aanunkil li perel re kok’ k’anjel re li xamaan a’in. Naq yooqeb’ chi b’onok, seraq’i reheb’ chan ru naq xk’oxlankil li Jesukristo nakatxtenq’a chireek’ankil tuqtuukilal, sa’eb’ tz’aqal li ch’a’ajkil hoonal.

  Jesukristo

  Xcha’al li jalam-uuch re Li Kristo ut li saaj aj b’ihom, xb’aan laj Heinrich Hofmann

reetalil li k‘utuk

Xk’utb’al li tzol’leb’: Kok’al ak ninqeb’

Tzol’leb’ ut Sumwank 98:1–3, 11–14; 101:16

Eb’ lin ch’a’ajkilal naru nikine’xtenq’a chi wulak mas wi’chik jo’ li Jesukristo.

Naq eb’ li kok’al te’xnumsi ch’a’ajkilal chiruheb’ lix yu’am, te’raj ru xpaab’aal chirix naq li Kolonel taaruuq chixtenq’ankileb’ sa’eb’ lix ch’a’ajkil hoonal, ut naq eb’ li ch’a’ajkilal a’an naru “te’k’anjelaq sa’ junajil choq’ re xchaab’ilaleb’ ” (Tzol’leb’ ut Sumwank 98:3).

Kok’ k’anjel naru chi b’aanumank

• Patz’ reheb’ li kok’al naq tate’xtenq’a chixtz’iib’ankil chiru li pizarron junjunqeb’ li ch’a’ajkilal li naru naxnumsi junaq ch’ina al sa’ lix chihab’eb’ a’an. Seraq’i reheb’ junjunq li ch’a’ajkilal ke’xnumsi laj santil paab’anel ke’wan sa’ li Condado Jackson, Missouri, sa’ 1833 (chi’ilmanq li ch’ol 34 ut ch’ol 35 re Eb’ li Esilal sa’ li Tzol’leb’ ut Sumwank, 128–34). K’a’ru li na’leb’ te’xk’e raj re junaq ch’ina al li yoo raj chi nume’k sa’eb’ li ch’a’ajkilal a’an? Patz’ reheb’ li kok’al naq te’ril ru Tzol’leb’ ut Sumwank 98:1–3, 11–14, ut te’xsik’ li na’leb’ kixk’e li Qaawa’. Chan ru naru neke’xtaaqeheb’ li na’leb’ a’an naq neke’wan xch’a’ajkilal jo’ li wankeb’ chiru li pizarron?

• B’oqeb’ li kok’al chi wank chi ch’anch’o ut chi ink’a’ te’aatinaq chiru junjunq k’asal, ut te’ril jun xjalam-uuch li Kolonel malaj te’rab’i junaq li b’ich chirix a’an. Chirix a’an b’oqeb’ chixwotzb’al li xe’reek’a sa’eb’ li hoonal a’an re ch’anch’ookil. Il ru Tzol’leb’ ut Sumwank 101:16. Chan ru naru nokoxtenq’a li wank chi ch’anch’o ut xk’oxlankil li Jesus? Tenq’aheb’ li kok’al chixtawb’al ru lix k’anjel li wank chi ch’anch’o re xkawresinkil qib’ re reek’ankil li Musiq’ej ut xk’oxlankil li Jesus.

Tzol’leb’ ut Sumwank 98:23, 39–40

Li Jesus naraj naq tinkuyeb’ xmaak li ani ink’a’ chaab’ileb’ xch’ool wik’in.

Taqlanb’ilo chixraab’al qib’ chiqib’il qib’, chixkuyb’al xmaakeb’ li qas qiitz’in “lajeeb’ xkaak’aal sut chi wuqutq,” ut chixk’eeb’al lix junpak’alil qako (chi’ilmanq Mateo 5:39, 43–44; 18:21–22). Chan ru naru nakawoksiheb’ li raqal a’an re xk’utb’aleb’ li yaal a’an chiruheb’ li kok’al?

Kok’ k’anjel naru chi b’aanumank

• Seraq’i reheb’ li kok’al li rahob’tesiik kik’ulman sa’ li Condado Jackson, Missouri, sa’ 1833 (chi’ilmanq li ch’ol 34 ut 35 re Eb’ li Esilal sa’ li Tzol’leb’ ut Sumwank, 128–134). Patz’ reheb’ li kok’al k’a’ raj ru ke’reek’a wi ta komoneb’ re li Iglees sa’ li kutankil a’an. Kanab’eb’ chirilb’al ru Tzol’leb’ ut Sumwank 98:23, 39–40 re te’xsik’ k’a’ru kiraj li Qaawa’ naq te’xb’aanu laj santil paab’anel. K’a’ut naq maare ch’a’aj xkuyb’al xmaakeb’ li kristiaan li neke’rahob’tesink qe? Chan ru naq noko’osob’tesiik naq naqab’aanu a’an?

Tzol’leb’ ut Sumwank 101:23–32, 36, 38

Rik’in li Jesukristo naru nintaw sahil ch’oolejil.

Moko tento ta naq maak’a’aq li ch’a’ajkilal sa’ li yu’am, a’b’an laa’at naru nakatenq’aheb’ li kok’al chixk’eeb’al reetal naq toj naru neke’xtaw xnimal sahil ch’oolejil rik’in li Jesukristo.

Kok’ k’anjel naru chi b’aanumank

• K’e li ha’ sa’ junaq li sek’. Patz’ reheb’ li kok’al naq te’xye k’a’ruhaq xb’aanuhom li Kolonel choq’ qe re naq naru taawanq xsahil qach’ool, ut kanab’eb’ chixk’eeb’al junaq ch’ina pek sa’ li sek’ rik’in li junjunq chi k’a’aq re ru te’xye toj reetal naq taanujaq. Il ru rik’ineb’ a’an Tzol’leb’ ut Sumwank 101:36, ut patz’ reheb’ naq te’xk’e reetal chan ru nawan xtz’aqalil xsahileb’ xch’ool. B’ar wankeb’ junjunq li k’a’aq re ru naru neke’qab’aanu re “xsik’b’al li rilob’aal li Qaawa’ ” (raqal 38) re naq taqak’ul li sahil ch’oolejil naraj xk’eeb’al qe a’an?

• Ch’olob’ naq sa’ Tzol’leb’ ut Sumwank 101:23–32 nak’utman chan ruhaq li yu’am naq li Jesukristo taak’ulunq wi’chik. Naq yooqex chirilb’aleb’ ru li raqal a’an sa’ komonil, aatinanqex chirixeb’ li k’a’aq re ru neke’xk’oxla li kok’al naq te’xk’am chaq xsahil qach’ool naq taak’ulunq a’an. K’a’ut naq xnawb’aleb’ li k’a’aq re ru a’an natenq’an naq wankeb’ qach’a’ajkilal?

reetalil li tzolok

Xb’oqb’aleb’ chi tzolok sa’ kab’l

Tenq’aheb’ li kok’al chixsik’b’al ru junaq raqal sa’ Tzol’leb’ ut Sumwank 98–101 li neke’raj xwotzb’al rik’in lix junkab’aleb’. Tenq’aheb’ chixk’uub’ankil chan ru te’xwotz li nawulak chiruheb’ sa’ li raqal a’an.

Xchaab’ilob’resinkil li qak’utum

Chaabʼilobʼresi aawibʼ joʼ jun aj kʼutunel chanchan li Kristo. Tz’il rix chan ru naru nakatwulak choq’ aj k’utunel jo’ li Kristo. Kʼoxla roksinkil li patzʼom re xtzʼilbʼal aawix saʼ li perel 37 re Li kʼutuk joʼ li Kolonel re aatenq’ankil chi chaab’ilo’k.

perel re kok’ k’anjel: li Jesus naxk’e intuqtuukilal