Li santil ochoch re Kirtland, xb’aan laj Al Rounds

30 agosto–5 septiembre

Tzol’leb’ ut Sumwank 94–97

“Choq’ re xkolb’al Sion”

Sik’ aamusiq’ankil re xnawb’al k’a’ru li na’leb’ reheb’ li tasal 94–97 taak’ut. Naru nakawoksiheb’ li kok’ k’anjel reheb’ li kok’al toj ka’ch’ineb’ xyu’am re xtzolb’aleb’ li kok’al ak ninqeb’ ut chixka’pak’alil.

Tz’iib’a li nakak’oxla

Xkanab’ankileb’ chi wotzok

K’ut chiruheb’ li kok’al xjalam-uuch jun santil ochoch, ut patz’ reheb’ naq te’xwotz k’a’ru neke’xnaw chirix li santil ochoch. Naru ajwi’ neke’aatinak chirix k’a’ru neke’reek’a naq neke’ril junaq santil ochoch.

Xk’utb’al li tzol’leb’: Kok’al toj ka’ch’ineb’ xyu’am

Tzol’leb’ ut Sumwank 95:8; 97:15–16

Li santil ochoch a’an rochoch li Qaawa’.

Eb’ li kok’al aran Kirtland ke’tenq’an ajwi’, chi b’ab’ay a’b’an chi nim xyaalal, chixkab’lankil li santil ochoch re Kirtland. Tenq’aheb’ li kok’al chixkawob’resinkil lix rahom choq’ re lix santil ochoch li Qaawa’.

Kok’ k’anjel naru chi b’aanumank

• K’ut junaq xjalam-uuch li santil ochoch re Kirtland (chi’ilmanq li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al). Oksiheb’ ch’ol aatin re Tzol’leb’ ut Sumwank 95:8 re aatinak rik’ineb’ li kok’al chirix lix taqlahom li Qaawa’ re xkab’lankil li santil ochoch a’an. Kanab’eb’ li kok’al chixk’eeb’aleb’ xhoonal chirib’ileb’ rib’ re xchapb’al li jalam-uuch ut xyeeb’al “Li santil ochoch a’an rochoch li Qaawa’.”

  

  Eb’ laj santil paab’anel ke’xkab’la jun santil ochoch re te’reek’a naq nach’ li Dios rik’ineb’.

• Ye reheb’ li kok’al naq chiru li junjunq chi santil ochoch tz’iib’anb’il “Santilal re li Qaawa’. Li rochoch li Qaawa’.” Wi naru, k’ut chiruheb’ jun xjalam-uucheb’ li aatin a’in chiru jun santil ochoch. K’a’ut naq li santil ochoch a’an jun na’ajej loq’? Yaab’asiheb’ li ch’ol aatin sa’ Tzol’leb’ ut Sumwank 97:15–16 li neke’xk’ut naq li santil ochoch a’an rochoch li Qaawa’, ut wotz laa week’ahom chirix li santil ochoch.

• Kanab’eb’ li kok’al chixk’oxlankil naq yookeb’ chi tenq’ank chixkab’lankil jun santil ochoch (setok che’, t’ojok klawx, b’onok tz’ak, ut wan chik xkomon). Ch’olob’ jo’ k’ihal x’aajelil ru li santil ochoch choq’ re li Qaawa’, jo’ k’ihal xkawil ke’k’anjelak laj santil paab’anel re xkab’lankil li santil ochoch re Kirtland, ut jo’ k’ihal li mayejak ke’xb’aanu choq’ re a’an (chi’ilmanq Santos, 1:210).

• B’ichahomaq sa’ komonil jun li b’ich re xtenq’ankileb’ li kok’al chireek’ankileb’ roxloq’ choq’ re li rochoch li Qaawa’, jo’ “Saʼ li santil ochoch” (B’ichleb’aal choq’ reheb’ li Kok’al, 99). Kanab’eb’ li kok’al chixwotzb’al li reek’ahomeb’ chirix li santil ochoch.

Tzol’leb’ ut Sumwank 97:8

Naru ninwan chi maak’a’ inb’alaq’.

Sa’ Tzol’leb’ ut Sumwank 97:8, li Qaawa’ kixch’olob’ naq lix maak’a’il li b’alaq’ a’an jun chaab’ilal reheb’ li “k’ulub’anb’ileb’ inb’aan.”

Kok’ k’anjel naru chi b’aanumank

• Ch’olob’ chiruheb’ li kok’al naq li Dios kixk’ut naq wi nokowan chi maak’a’ qab’alaq’, nokoxk’ulub’a (chi’ilmanq Tzol’leb’ ut Sumwank 97:8). Wotz rik’ineb’ a’an junjunq li kok’ seraq’ li taatenq’anq reheb’ chixtawb’al ru k’a’ru naraj naxye li wank chi maak’a’ b’alaq’. Naru naq a’anaq junaq seraq’ chirix laa yu’am, lix yu’am anihaq chik nakanaw ru, malaj junaq seraq’ sa’ li Liahona. Tenq’aheb’ li kok’al chixyeeb’al wi’chik li seraq’ aawe malaj xwotzb’aleb’ seraq’ chirixeb’ lix yu’am.

• Tenq’aheb’ li kok’al chixtawb’al ru li xb’een ch’ol aatin re lix raqalil li paab’aal oxlaju: “Laa’o naqapaab’ naq tento naq maak’a’aq qab’alaq’.” Tenq’aheb’ li kok’al chireetalinkil li wank chi maak’a’ b’alaq’ ut li wank chi wan b’alaq’. Qayehaq, eb’ li kok’al naru neke’xk’utb’esi naq yookeb’ chixchapb’al k’a’ru re junaq ras riitz’in ut neke’xye reheb’ lix na’ xyuwa’ naq ink’a’ xe’xch’e’. Chirix a’an tenq’aheb’ chireetalinkil wi’chik a’an a’b’an neke’xye chik li yaal reheb’ lix na’ xyuwa’. Ch’olob’ naq a’an li wank chi maak’a’ b’alaq’.

Xk’utb’al li tzol’leb’: Kok’al ak ninqeb’

Tzol’leb’ ut Sumwank 95:1–3, 8, 11–17; 97:10–17

Li santil ochoch a’an rochoch li Qaawa’.

K’oxla chan ru naru nakawoksiheb’ li raqal a’in re xtenq’ankileb’ li kok’al chixtawb’al ru x’aajelil ru li santil ochoch choq’ re li Qaawa’—ut naq aajelaq raj ru ajwi’ choq’ qe.

Kok’ k’anjel naru chi b’aanumank

• Patz’ reheb’ li kok’al naq te’aatinaq chirixeb’ li hoonal b’ar wi’ tento raj xe’xb’aanu k’a’ruhaq, a’b’an ink’a’ xe’xb’aanu sa’ junpaat. Tenq’a jun li ch’ina al chirilb’al ru Tzol’leb’ ut Sumwank 95:3, 8, ut patz’ reheb’ k’a’ru li taqlahom kixye li Qaawa’ naq ink’a’ ke’xpaab’ laj santil paab’anel. Ilomaq ru li raqal 11 sa’ komonil. K’a’ raj ru tento ke’xb’aanu laj santil paab’anel re naq te’ruuq chixkab’lankil li santil ochoch? K’a’ru naru naqatzol rik’in lix yeechi’ihom li Qaawa’ choq’ reheb’ a’an?

• Chiruheb’ kok’ hu, tz’iib’aheb’ li na’leb’ chirix li santil ochoch li neke’tawman sa’ Tzol’leb’ ut Sumwank 95 ut 97, rochb’eeneb’ li raqal reheb’ li loq’laj hu, ut k’eheb’ sa’ jun li b’oolx. Qayehaq: Xkab’lankil junaq santil ochoch naraj ru mayejak (Tzol’leb’ ut Sumwank 97:11–12) ut Tento toowanq chi k’ulub’ej re naq tooruuq chi ok sa’ li santil ochoch (Tzol’leb’ ut Sumwank 97:15–17). K’eheb’ li kok’al sa’ ka’kab’il. Kanab’eb’ chixchapb’al jun ch’ina hu wan sa’ li b’oolx ut chirix a’an te’k’anjelaq sa’ wiib’al re rilb’al ru li raqal ut te’aatinaq chirix k’a’ru naraj naxye li na’leb’ a’an choq’ reheb’. Tenq’aheb’ li kok’al chixtawb’al ru li yookeb’ chirilb’al ru wi na’ajman ru.

• K’e xb’oqb’al junaq li saaj re lee teep malaj lee uq’ej li okenaq sa’ li santil ochoch re tixwotz lix numsihom, ut ye reheb’ li kok’al k’a’ru naru neke’xb’aanu re xkawresinkileb’ rib’ re ok sa’ li santil ochoch.

• Oksi li hu “Tu sendero al templo” (sa’ Templos de la Iglesia de Jesucristo de los Santo de los Últimos Días [Liahona, octubre 2010]), re xtenq’ankileb’ li kok’al chixtawb’al ru k’a’ru nak’ulman sa’eb’ li santil ochoch ut chan ru naru neke’xkawresi rib’. K’oxla xk’eeb’al reheb’ li kok’al junjunq li raqal re li hu a’an re te’ril ru ut te’xwotz li neke’xtzol.

• K’ut li video “Dos Apóstoles dirigen un recorrido en video por el Templo de Roma, Italia” (ChurchofJesusChrist.org), ut patz’ reheb’ li kok’al naq te’xwotz k’a’ru neke’reek’a chirix li xik sa’ li santil ochoch sa’ junaq kutan.

• B’ichahomaq sa’ komonil jun li b’ich chirix li santil ochoch, jo’ “Saʼ li santil ochoch” (B’ichleb’aal choq’ reheb’ li Kok’al, 99). B’ar wan reheb’ li ch’ol sa’ li b’ich neke’xk’ut chiqu k’a’ut naq li santil ochoch loq’?

Tzol’leb’ ut Sumwank 97:1–2, 8–9, 21

Sion a’an, “li saqeb’ ru xch’ool.”

Tenq’aheb’ li kok’al chixtawb’al ru naq Sion moko yal a’an ta jun na’ajej; a’an b’an ajwi’ “li saqeb’ ru xch’ool” (Tzol’leb’ ut Sumwank 97:21).

Kok’ k’anjel naru chi b’aanumank

• B’oqeb’ li kok’al chirilb’al ru Tzol’leb’ ut Sumwank 97:21, ut patz’ reheb’ k’a’ru naraj naxye li aatin “saqeb’ ru.” Re xk’utb’esinkil, k’ut jun sek’ li ha’ chiruheb’ ut aatinan chirix k’a’ut naq aajel ru naq saqaq ru li ha’. K’e k’a’ruhaq sa’ li ha’ li tixtz’ajni ru (jo’ li ch’och’ malaj li kaxlan q’een). Patz’ reheb’ li kok’al naq te’ril wi’chik ru Tzol’leb’ ut Sumwank 97:21 ut te’xk’e li ru’uj ruq’eb’ sa’ xb’een li aatin “saqeb’ ru.” K’a’ru naraj naxye naq saqaq ru qach’ool? Tenq’aheb’ li kok’al chixtawb’al ru naq li wank chi saq ru li qach’ool ink’a’ naraj naxye naq maajun wa naqak’ul li sachk. K’a’ru naru naqab’aanu re naq taasaqo’q chi us ru li qach’ool? Chan ru nokoxtenq’a li Kolonel?

• Tenq’aheb’ li kok’al chixsik’b’aleb’ li aatin malaj ch’ol aatin sa’ Tzol’leb’ ut Sumwank 97:1–2, 8–9, 21, li te’xch’olob’ chan ru naru nasaqo’ ru li ch’oolej. Patz’ reheb’ naq te’xsik’ ru junaq aatin malaj ch’ol aatin, te’xtz’iib’a chiru jun setb’il hu ut te’xk’e sa’ junaq li sek’. Chap chi junjunqal li kok’ setb’il hu, ut patz’ reheb’ li kok’al naq te’xye k’a’ru naru neke’xb’aanu re roksinkil li na’leb’ a’an sa’ xyu’ameb’. Qayehaq, k’a’ru naru naqab’aanu re “xtawb’al li yaal” (raqal 1) malaj wank chi “maak’a’ qab’alaq’ ” (raqal 8)?

Xb’oqb’aleb’ chi tzolok sa’ kab’l

B’oqeb’ li kok’al chiroksinkil li perel re kok’ k’anjel re li xamaan a’in re xwotzb’al rik’ineb’ lix junkab’al li k’a’ru xe’xtzol chirix li santil ochoch.

Xchaab’ilob’resinkil li qak’utum

Waklesiheb’ xch’ool li kok’al naq te’patz’inq. “Ileb’ li patz’om neke’xb’aanu [li kok’al] jo’ jun chaab’il hoonal, ink’a’ jo’ jun ramleb’ sa’ li tzolok. … Eb’ li patz’om a’an neke’xk’e aana’leb’ jwal aajel ru chirix li neke’xk’oxla, li k’a’ru neke’raj xnawb’al, ut chan ru neke’xk’ul li k’a’aq re ru neke’xtzol. Tenq’aheb’ chirilb’al naq lix sumenkileb’ lix patz’om naru neke’tawman sa’eb’ li loq’laj hu ut sa’eb’ li raatin li yo’yookil profeet (Li k’utuk jo’ li Kolonel, 25–26).