laj Esteban naril li Dios ut li Jesukristo

Yookin chirilb’al li K’ajolb’ej xaqxo sa’ xnim uq’ li Dios, xb’aan laj Walter Rane

23–29 agosto

Tzolʼlebʼ ut Sumwank 93

“Teek’ul xkomon lix tz’aqalil ru”

Eb’ li kok’al nakatzoleb’ a’aneb’ chaq’al ru ralal ut xrab’in li choxahil na’b’ej yuwa’b’ej, ut ke’wan chaq rik’ineb’ a’an rub’elaj naq xe’chal sa’ ruchich’och’. Chirix naq xatzol Tzol’leb’ ut Sumwank 93, chan ru nakaweek’a naq taatenq’aheb’ li kok’al a’in chi k’iik “sa’ li saqen ut li yaal”? (raqal 40).

Tz’iib’a li nakak’oxla

reetalil li wotzok

Xkanab’ankileb’ chi wotzok

K’uteb’ xjalam-uuch li Kolonel (jo’ li wankeb’ sa’ li Hu reheb’ li Jalam-uuch re li Evangelio malaj sa’eb’ li puktesinb’il hu re li Iglees), ut patz’ reheb’ li kok’al naq te’xwotz k’a’ru neke’xnaw chirix a’an. Eb’ li kok’al ak ninqeb’ naru neke’xwotz junaq raqal re Tzol’leb’ ut Sumwank 93 li xtenq’an reheb’ chi tzolok chirix li Jesukristo.

reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

Tzol’leb’ ut Sumwank 93:2–21

Li Jesukristo a’an li Ralal li Dios.

Aajel ru naq eb’ li kok’al te’xtzol ani li Jesukristo ut k’a’ut naq tento te’xtaaqe. Eb’ li yaal chirix li Jesukristo li neke’tawman sa’ li tasal 93 naru neke’tenq’an.

lemil ventaan

Naqak’ul lix saqen li Jesukristo naq naqap’aab’eb’ lix taqlahom.

Kok’ k’anjel naru chi b’aanumank

• Sik’eb’ ru junjunq reheb’ li yaal xatzol chirix li Kolonel sa’ li tasal 93 li nakate’xmusiq’a. Yaab’asi choq’ reheb’ li kok’al li raqal b’ar wi’ neke’tawman li junjunq chi yaal taasik’eb’ ru, ut taak’e b’ayaq xtenq’eb’ re naq te’rab’i naq yooqat chirilb’al ru. Wotz xnawom aach’ool chirix li Kolonel ut kanab’eb’ li kok’al chixwotzb’al ajwi’ li reheb’. Eb’ li yaal a’in naru neke’xk’e aana’leb’:

  Li Jesukristo kixb’aanu lix k’anjel li Yuwa’b’ej (raqal 5).

  Li Jesuristo a’an xsaqen li ruchich’och’ (raqal 9).

  Li Jesukristo a’an laj yo’ob’tesihom re li ruchich’och’ (raqal 10).

  Li Jesukristo kixk’ul chixjunil li wankilal jo’ sa’ choxa jo’ ajwi’ sa’ ruchich’och’ (raqal 17).

  Li Jesukristo kiwan sa’ xtiklajik rik’in li Dios (raqal 21).

• Patz’ reheb’ li kok’al naq te’rab’i junaq na’leb’ chirix li Kolonel naq taaye chi k’osb’il ruheb’ junjunq li yaal neke’k’utman sa’ li tasal 93. (Naru ajwi’ nakawoksi li “Ch’ol 33: Jun k’utb’esinb’il na’leb’ chirix li Jesukristo” [Eb’ li Esilal sa’ li Tzol’leb’ ut Sumwank, 126–127].)

Tzol’leb’ ut Sumwank 93:23, 29

Kinwan rik’in lin Choxahil Yuwa’ rub’elaj naq xinchal sa’ ruchich’och’.

K’a’ut naq aajel ru xtenq’ankileb’ li kok’al chixtawb’al ru naq ke’wan chaq rik’in li qaChoxahil Yuwa’ rub’elaj naq xe’yo’la? Chan ru nakatrosob’tesi xnawb’al li yaal a’in?

Kok’ k’anjel naru chi b’aanumank

• K’iilasutiheb’ li aatin a’in rik’ineb’ li kok’al “Laa’ex ajwi’ kexwan sa’ xtiklajik rik’in li Yuwa’b’ej” (Tzol’leb’ ut Sumwank 93:23). Ch’olob’ naq rub’elaj naq xooyo’la, koowan chaq rik’in li qaChoxahil Yuwa’ sa’ choxa. B’ichahomaq sa’ komonil “Laaʼin jun ralal li Dios” malaj “Saʼ li choxa chaq kinwan” (B’ichleb’aal choq’ reheb’ li Kok’al, 2–3, 139).

• Kanab’eb’ li kok’al chixb’onb’aleb’ li perel re kok’ k’anjel ut chixyiib’ankileb’ xjalam-uucheb’ a’an rik’in li qaChoxahil Yuwa’ ut li Jesukristo sa’ li yu’am naq maji’ nokoyo’la. Ch’olob’ xyaalal naq li Dios nokoxra ut naq chiqajunilo laa’o ralal xk’ajol a’an.

reetalil li k‘utuk

Xk’utb’al li tzol’leb’: Kok’al ak ninqeb’

Tzol’leb’ ut Sumwank 93:2–21

Li Jesukristo a’an li Ralal li Dios.

Naq naniman qanawom chirix li Jesukristo, naniman x’anchalil qach’ool chixloq’oninkil ut chi chalk rik’in li Yuwa’b’ej sa’ xk’ab’a’ a’an (chi’ilmanq Tzol’leb’ ut Sumwank 93:19).

Kok’ k’anjel naru chi b’aanumank

• K’ut junaq xjalam-uuch li Kolonel ut patz’ reheb’ li kok’al k’a’ut naq aajel ru naq taawanq qanawom chirix li Jesukristo. Kanab’eb’ chixsik’b’al xkomon xsumenkil a’an sa’ Tzol’leb’ ut Sumwank 93:19. B’oqeb’ chixk’oxlankil chan ru naru neke’xtaw xkomon xna’leb’ chirix li Jesus chiru li xamaan chal re, ut k’eheb’ xhoonal chixwotzb’al li k’a’ru neke’k’oxla.

• K’oxla chan ru naru nakawaklesi xch’ooleb’ li kok’al chi tzolok chirix li Kolonel sa’ li tasal 93. Naru nakatz’iib’a chiruheb’ kok’ setb’il hu junjunq raqal re li tasal 93 li neke’xk’ut li yaal chirix li Jesukristo (qayehaq, che’ilmanq li raqal 5, 9–10, 17, 21). K’eheb’ li kok’ setb’il hu sa’ jun li sek’ ut patz’ reheb’ li kok’al naq te’xk’e xhoonaleb’ chirib’ileb’ rib’ chixchapb’al junaq ut chixyaab’asinkil li raqal. K’a’ru naqatzol chirix li Jesukristo sa’eb’ li raqal a’in?

Tzol’leb’ ut Sumwank 93:23, 29, 38

Kinwan chaq rik’in lin Choxahil Yuwa’ rub’elaj naq kinchal sa’ ruchich’och’.

Li Kolonel kixye oxib’ sut sa’ li tasal 93 naq koowan chaq rik’in li Dios “sa’ xtiklajik” (eb’ li raqal 23, 29, 38). K’a’ut naq naraj naq taqanaw a’in? Chan ru naq xnawb’al li yaal a’in naru narosob’tesiheb’ li kok’al?

Kok’ k’anjel naru chi b’aanumank

• Il ru Tzol’leb’ ut Sumwank 93:23, 29, 38 rik’ineb’ li kok’al, ut patz’ reheb’ naq te’xsik’ junaq li yaal chirixeb’ a’an li naka’sutiman sa’eb’ li raqal a’in. Patz’ reheb’ li kok’al naq te’xwotz chixjunil li neke’xnaw chirix li qayu’am rik’in li qaChoxahil Yuwa’ rub’elaj naq kooyo’la. K’e reheb’ li junjunq chi kok’al jun reheb’ li raqal a’in ut tenq’aheb’ chixsik’b’al junaq na’leb’ chirix li yu’am naq maji’ nokoyo’la: Jeremias 1:5; Tzol’leb’ ut Sumwank 138:53–56; Moises 3:5; Abraham 3:22–26.

• B’ichahomaq sa’ komonil “Laaʼin jun ralal li Dios” malaj “Saʼ li choxa chaq kinwan” (B’ichleb’aal choq’ reheb’ li Kok’al, 2–3, 139). K’a’ruheb’ li yaal neke’qatzol sa’ li b’ich a’in chirix li rajb’al qachalik sa’ li ruchich’och’ a’in?

Tzol’leb’ ut Sumwank 93:24

Li yaal a’an li nawom chirix li k’a’ru ak kiwan, li wan anajwan, ut li taawanq moqon.

Jalan jalanq neke’xk’oxla li kristiaan chirix k’a’ru li yaal ut chan ru xtawb’al. Chan ru naru nakatenq’aheb’ li kok’al chixtawb’al ru naq li yaal junelik yaal, maak’a’ naxye k’a’ru neke’xye li qas qiitz’in, ut naq li qaChoxahil Yuwa’ naxnaw chixjunil li yaal?

Kok’ k’anjel naru chi b’aanumank

• Tz’iib’a li aatin yaal chiru li pizarron, ut patz’ reheb’ li kok’al naq te’xtz’iib’a chixk’atq k’a’ru naraj naxye. Ilomaq ru sa’ komonil chan ru naq li Qaawa’ kixch’olob’ li aatin sa’ Tzol’leb’ ut Sumwank 93:24. B’icha jun li b’ich chirix li yaal, jo’ “Kʼaʼru peʼ li yaal?” (Eb’ li B’ich, 175), ut patz’ reheb’ li kok’al naq te’xtaw sa’ li b’ich jalan chik xch’olob’ankil li yaal.

• Re xtenq’ankileb’ li kok’al chixk’anjelankileb’ li yaal wankeb’ sa’ Tzol’leb’ ut Sumwank 93, tz’iib’aheb’ junjunq li raqal re li tasal a’in chiruheb’ kok’ setb’il hu. Chiru jun siireb’ chik kok’ setb’il hu, tz’iib’aheb’ li yaal neke’xk’ut li junjunq chi raqal a’in. B’oqeb’ li kok’al chi k’anjelak sa’ komonil re rilb’aleb’ ru li raqal ut te’xjunajiheb’ li yaal rik’ineb’ li raqal. K’a’ut naq naqab’antioxi xnawb’al ru li yaal?

reetalil li tzolok

Xb’oqb’aleb’ chi tzolok sa’ kab’l

Patz’ reheb’ li kok’al naq te’xtz’iib’a malaj te’xyiib’ xjalam-uuch k’a’ruhaq xe’xtzol, ut te’xwotz rik’ineb’ lix junkab’al naq te’wulaq sa’ kab’l.

Xchaab’ilob’resinkil li qak’utum

Tenq’aheb’ li kok’al chixk’eeb’al reetal li Musiq’ej. Naq yooqeb’ chi wank aamusiq’ejil numsihom rik’ineb’ li kok’al (qayehaq, naq nekerileb’ li loq’laj hu, naq nakawab’i xnawom xch’ooleb’, malaj naq nekexb’ichan sa’ komonil), tenq’aheb’ chixk’eeb’al reetal lix hasb’ li Santil Musiq’ej.

perel re kok’ k’anjel: li Jesukristo a’an lix saqen ut lix yu’am li ruchich’och’