jun junkab’al naxik sa’ li santil ochoch

2–8 agosto

Tzolʼlebʼ ut Sumwank 85–87

“Xaqlinqex sa’eb’ li na’ajej sant”

Xb’aan naq laa hoonal rik’ineb’ li kok’al mas ka’ch’in, yal aaq’e chixsik’b’al xb’eresihom li Musiq’ej re xnawb’al b’ar wankeb’ li na’leb’ reheb’ li loq’laj hu tento taak’ut. Kanab’ aawib’ sa’ ruq’ li Musiq’ej.

Tz’iib’a li nakak’oxla

reetalil li wotzok

Xkanab’ankileb’ chi wotzok

K’ut chiruheb’ li kok’al junjunqeb’ jalam-uuch malaj li perel re kok’ k’anjel li toje’ xawoksiheb’, ut kanab’eb’ chi aatinak chirix li najultiko’ reheb’ naq xe’xtzol chaq, maare sa’ li tzoleb’aal malaj sa’ kab’l.

reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

Tzol’leb’ ut Sumwank 85:6

Li Musiq’ej na’aatinak rik’in jun li “ch’ina xyaab’ kuxej li q’un na’aatinak.”

Li Elder Richard G. Scott kixye: “Wi ka’ajwi’ texruuq chixtenq’ankileb’ li neketzoleb’ chixk’eeb’al reetal ut chixtaaqenkil li Musiq’ej, ak xerosob’tesiheb’ lix yu’am chi ink’a’ b’isb’il ut chi junelik” (yeeb’il xb’aan xVicki F. Matsumori “Ayudar a los demás a reconocer los susurros del Espíritu”, Liahona, noviembre 2009, 11).

Kok’ k’anjel naru chi b’aanumank

• Il ru choq’ reheb’ li kok’al lix ch’olob’ankil li Musiq’ej kixk’e laj Jose Smith: “Relik chi yaal, jo’ka’in naxye li ch’ina xyaab’ kuxej li q’un na’aatinak” (Tzol’leb’ ut Sumwank 85:6). Kanab’eb’ li kok’al chixyeeb’al xk’ab’a’eb’ junjunq k’a’aq re ru kok’ (k’uteb’ jalam-uuch wi neke’raj ru xtenq’). Kanab’eb’ chixk’achab’ankileb’ rib’ chiru li tz’ak re naq mas ka’ch’inaqeb’ ut ink’a’ te’eeq’anq. Tenq’aheb’ chixk’oxlankil chan raj ru li ch’ina xyaab’ kuxej ut kanab’eb’ chixyalb’al ab’ink ut aatinak rik’in ch’ina xyaab’ kuxej. Seraq’i resileb’ hoonal b’ar wi’ naq li Musiq’ej xatraatina rik’in jun li ch’ina xyaab’ kuxej li q’un na’aatinak.

• K’ut chiruheb’ li kok’al jun li b’ich li na’aatinak chirix li Santil Musiq’ej, jo’ Li Santil Musiq’ej” (B’ichleb’aal choq’ reheb’ li Kok’al, 56). Kanab’eb’ chixb’ichankil aawochb’een sa’ hasb’. K’a’ru naxk’ut li b’ich a’in chirix li Santil Musiq’ej? Tenq’aheb’ li kok’al chixk’eeb’al reetaleb’ li hoonal b’ar wi’ maare xe’reek’a li Musiq’ej (qayehaq, naq neke’tijok, naq neke’b’ichan. malaj naq neke’xtenq’aheb’ li ras riitz’in).

Tzol’leb’ ut Sumwank 86:11

Naru ninwan jo’ jun saqen choq’ reheb’ li was wiitz’in.

Li tasal 86 naxch’olob’ li aajel ruhil k’anjel li naraj li Qaawa’ naq te’xb’aanu lix moos sa’ roso’jikeb’ li kutan a’in. Jun na’leb’ re naq eb’ li kok’al naru neke’tenq’an sa’ li k’anjel a’an, a’an li wank jo’ jun saqen choq’ reheb’ li kristiaan wankeb’ sa’ xsutam.

Kok’ k’anjel naru chi b’aanumank

• Il ru choq’ reheb’ li kok’al li ch’ol aatin a’in natawman sa’ Tzol’leb’ ut Sumwank 86:11: “Osob’tesinb’ilex wi nekexkana sa’ lin chaab’ilal, jun saqen chiruheb’ laj Gentil [malaj chiruheb’ li kristiaan maji’ neke’xnaw ru li evangelio].” Chan ru naq nokorosob’tesi li saqen? K’a’ru nak’ulman naq maak’a’ qasaqen? Chan ru naru nokowan jo’ jun saqen choq’ reheb’ li qas qiitz’in li maji’ neke’xnaw ru li evangelio? Tenq’aheb’ li kok’al chixk’oxlankil chan ru naru neke’xwotz lix chaab’ilal li Jesus rik’ineb’ li ras riitz’in.

• Kanab’eb’ li kok’al chixk’oxlankil naq jun ramiiweb’ yoo chixyalb’al b’eek sa’ q’ojyin (chupeb’ li lus wi naru natenq’an a’an). K’a’ut naq ch’a’aj b’eek sa’ li q’ojyin? K’a’ru naru naqab’aanu re xtenq’ankil li qamiiw? Ch’olob’ naq sa’ xtaaqenkil li Kolonel, chanchan naq naqak’utb’esi jun saqen li naxk’ut chiruheb’ li qas qiitz’in li b’e tento te’xk’am.

• Sa’ eb’ li Liahona ut li Amigos wankeb’ kok’ seraq’ chirix li kok’al chaab’il xb’aanuhomeb’. Sik’ junaq li naru nakawotz rik’ineb’ li kok’al li tixmusiq’aheb’ chi wank chi chaab’il xb’aanuhomeb’.

Tzol’leb’ ut Sumwank 87

Eb’ li qochoch naru neke’wan jo’ “na’ajej loq’.”

Maajun junkab’al tz’aqal re ru, a’b’an wan k’a’ru naru naqab’aanu re naq eb’ li qochoch a’anaqeb’ santil na’ajej re tuqtuukilal.

Kok’ k’anjel naru chi b’aanumank

• Ch’olob’ chiruheb’ li kok’al naq laj Jose Smith kiwan chaq xk’a’uxl chirix li k’a’ru yoo chaq chi k’ulmank sa’ li ruchich’och’. K’os ru lix jolomil li tasal 87 malaj il ru li “Ch’ol 30: Jun k’utb’esinb’il na’leb’ chirix li pleetik” (Eb’ li Esilal sa’ li Tzol’leb’ ut Sumwank, 117–118; chi’ilmanq ajwi’ li video sa’ ChurchofJesusChrist.org). Patz’ reheb’ li kok’al naq te’xk’e reetal k’a’ruheb’ li k’a’aq re ru ki’ok wi’ chaq xk’a’uxl laj Jose. Re xk’utb’al li kixye li Qaawa’ naq tento taqab’aanu chirixeb’ li ch’a’ajkilal a’an, il ru Tzol’leb’ ut Sumwank 87:8.

• K’ut jun xjalam-uuch li santil ochoch ut wotz k’a’ut naq li santil ochoch a’an jun na’ajej sant. K’ut xjalam-uuch jun ochoch ut tenq’aheb’ li kok’al chixk’oxlankil k’a’ru naru neke’xb’aanu re naq li rochocheb’ taawanq chi sant jo’ li santil ochoch (chi’ilmanq li perel re kok’ k’anjel re li xamaan a’in). K’a’ut naq naqaj wank sa’eb’ li na’ajej sant?

reetalil li k‘utuk

Xk’utb’al li tzol’leb’: Kok’al ak ninqeb’

Tzol’leb’ ut Sumwank 85:6

Li Musiq’ej na’aatinak rik’in jun li “ch’ina xyaab’ kuxej li q’un na’aatinak.”

Sa’ li ruchich’och’ wan naab’al li jalb’ehink li naru naxch’a’ajkob’resi rab’inkil li Musiq’ej. Chan ru taatenq’aheb’ li kok’al chirab’inkil xyaab’ xkux li Musiq’ej?

Kok’ k’anjel naru chi b’aanumank

• Patz’ reheb’ li kok’al k’a’ raj ru te’xye re junaq kristiaan li tixpatz’ chan ru neke’xnaw naq neke’aatinaak xb’aan li Santil Musiq’ej. Kanab’eb’ chirilb’al sa’ Tzol’leb’ ut Sumwank 85:6 chan ru naq laj Jose Smith kixch’olob’ chan ru lix yaab’ xkux li Musiq’ej.

• K’e chi eek’ank chi timil junaq li b’ich malaj jun li b’ich reheb’ li kok’al, ut kanab’ jun reheb’ a’an naq tixq’ehi b’ar wan li b’ich a’an ut eb’ lix komon te’choqinq, rik’in xpoq’b’aleb’ xsa’ ruq’ malaj xtenb’aleb’ lix xaab’ chiru tz’ak. Chirix a’an patz’ reheb’ li kok’al naq te’xkanab’ choqink, ut aatinanqex chirix chan ru naq a’an chanchan rab’inkil li Santil Musiq’ej naq nokonajto’ chiru li jalb’ehink sa’ li qayu’am. Tenq’aheb’ li kok’al chixk’oxlankil li jalb’ehink li naru neke’risi re naq te’reek’a chik chi kok’ aj xsa’ li Musiq’ej.

Tzolʼlebʼ ut Sumwank 86

Naru nintenq’an chixch’utub’ankil lix tenamit li Dios.

Li jaljookil ru aatin chirix li trigo ut li yib’ aj pim na’aatinak chirix “roso’jik li kutan, anajwan ajwi’ ” (Tzol’leb’ ut Sumwank 86:4). Oksi li jaljookil ru aatin a’an re xtenq’ankileb’ li kok’al chireek’ankil xmusiq’ankileb’ re te’tz’aqonq sa’ li k’anjel re “xch’utub’ankil li trigo” (raqal 7).

Kok’ k’anjel naru chi b’aanumank

• Seraq’i reheb’ li kok’al li jaljookil ru aatin chirix li trigo ut li yib’ aj pim, malaj ut, kanab’ jun ch’ina al chirilb’al ru (chi’ilmanq Mateo 13:24–30). Kanab’eb’ li kok’al chixyiib’ankil xjalam-uuch k’a’ruhaq nayeeman sa’ li jaljookil ru aatin. Chirix a’an ilomaq ru sa’ komonil Tzol’leb’ ut Sumwank 86:1–7, ut kanab’eb’ li kok’al chixtz’iib’ankil chiruheb’ lix jalam-uuch k’a’ru nareetali a’an.

• Kawresiheb’ k’iila jalam-uuch li te’reetali li trigo, ut muqeb’ sa’ li tzoleb’aal. Kanab’eb’ li kok’al chixch’utub’ankileb’ li trigo ut chixtz’iib’ankil chiru xk’ab’a’ anihaq naru “neke’xch’utub’ ” chaq, re naq taachalq rik’in li Jesukristo. K’a’ru naraj naxye xch’utub’ankileb’ li kristiaan re te’chalq rik’in li Jesukristo? Chan ru naru naqab’aanu? K’a’ru naraj naxye “kanaak sa’ lix chaab’ilal li Kolonel” ut chan ru naq a’an nokoxtenq’a chixch’utub’ankileb’ li kristiaan re naq te’chalq rik’in a’an? (Tzolʼlebʼ ut Sumwank 86:11).

Tzol’leb’ ut Sumwank 87

Naru “ninxaqli sa’eb’ li na’ajej sant.”

Eb’ li kok’al te’xnumsi naab’al li xiwxiw sa’ musiq’ej ut sa’ tib’elej chiru lix yu’ameb’. Re xtenq’ankileb’ chixkawresinkileb’ rib’ re xnumsinkileb’ li xiwxiw a’an, naru nakak’ut chiruheb’ xtawb’aleb’ li na’ajej sant ut te’xaqliiq aran.

jun ixq ut jun ch’ina al chire li santil ochoch

Li k’anjel sa’ li santil ochoch a’an jun tenq’ re xch’utub’ankileb’ lix tenamit li Dios.

Kok’ k’anjel naru chi b’aanumank

• Ilomaq ru sa’ komonil Tzol’leb’ ut Sumwank 87:6 re xsik’b’al k’a’ru kixye li Qaawa’ naq taak’ulmanq sa’ roso’jikeb’ li kutan. Kanab’eb’ li kok’al chi aatinak chirixeb’ li ch’a’ajkilal neke’xnumsi li kok’al sa’ lix chihab’eb’ a’an. Kanab’eb’ chixtawb’al sa’ li raqal 8 k’a’ru kixye li Qaawa’ naq tento taqab’aanu sa’eb’ li hoonal re ch’a’ajkilal. Seraq’i reheb’ chirix li na’ajej sant wankeb’ sa’ laa yu’am.

• Tenq’aheb’ li kok’al chixtz’iib’ankil xtusulaleb’ li na’ajej sant, k’oxlahom sant, ut b’aanuhom sant li naru naxtenq’aheb’ chixnumsinkileb’ li musiq’ejil xiwxiw (teetaweb’ eena’leb’ sa’eb’ li video “Permaneced en lugares santos” ut “Permaneced en lugares santos — Florece donde sea que estés,” ChurchofJesusChrist.org). Patz’ reheb’ li kok’al naq te’xk’uula li tusulal xe’xtz’iib’a re te’ril naq te’raj ru.

reetalil li tzolok

Xb’oqb’aleb’ chi tzolok sa’ kab’l

Kanab’eb’ li kok’al chixsik’b’al ru k’a’ruhaq te’xb’aanu re naq li rochocheb’ malaj lix yu’ameb’ a’anaqeb’ “na’ajej sant.”

Xchaab’ilob’resinkil li qak’utum

Oksiheb’ li kok’ chaab’il k’a’uxleb’aal. Maak’oxla naq ka’ajwi’ wankeb’ li kok’ k’anjel li yeeb’ileb’ sa’ li tusleb’ aatin a’in. Oksiheb’ laa na’leb’ laa’at re rajsinkil laa k’a’uxleb’aal. K’oxla k’a’ru raj naru nawulak chiruheb’ li kok’al sa’ laa tzoleb’aal ut k’a’ru li taatenq’anq reheb’ chi tzolok.

perel re kok’ k’anjel: li wochoch naru nawan jo’ jun na’ajej sant