jun na’ajej rik’ineb’ li chunleb’aal

9–15 agosto

Tzolʼlebʼ ut Sumwank 88

“Xaqab’omaq … rochoch li Dios”

Sa’ Tzol’leb’ ut Sumwank 88:118 nak’eeman qe li na’leb’ a’in, “K’utumaq cherib’il eerib’ li aatin re chaab’il na’leb’.” B’ar wankeb’ li “aatin re chaab’il na’leb’ ” neke’tawman sa’ Tzol’leb’ ut Sumwank 88 li maare mas taawanq xyaalal choq’ reheb’ li kok’al nakatzoleb’?

Tz’iib’a li nakak’oxla

reetalil li wotzok

Xkanab’ankileb’ chi wotzok

Ye reheb’ li kok’al naq li qaChoxahil Yuwa’ ut li Jesukristo neke’raj naq yooqo chi tzolok chiru chixjunil li qayu’am. Chirix a’an kanab’eb’ chixwotzb’al k’a’ru yookeb’ chixtzolb’al sa’ kab’l, sa’ li eskweel, malaj sa’ li iglees.

reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

Tzol’leb’ ut Sumwank 88:63

Li Dios naraj naq tinnach’oq rik’in a’an.

K’a’ru naru nakab’aanu re xtenq’ankileb’ li kok’al chireek’ankil li Dios sa’ lix yu’ameb’?

Kok’ k’anjel naru chi b’aanumank

• Naq yooqat chirilb’al ru Tzol’leb’ ut Sumwank 88:63, kanab’eb’ li kok’al chixk’utb’esinkil junjunqeb’ li aatin te’rab’i. Qayehaq, naru neke’xk’utb’esi chanchan naq yooqeb’ chixsik’b’al k’a’ruhaq malaj naq yookeb’ chixtoch’b’al junaq li okeb’aal.

• Kanab’eb’ li kok’al chixchapb’al chi kutankil jun xjalam-uuch li Jesus sa’ li tzoleb’aal ut lix komoneb’ chik xaqxooqeb’ sa’ xmaril li tzoleb’aal. Kanab’eb’ li kok’al chixk’eeb’al jun yokb’ chi uub’ej rajlal sut naq taaye k’a’ruhaq li naru naqab’aanu re toonach’oq rik’in li Kolonel, ut chixk’eeb’al jun yokb’ chi ixb’ej rajlal sut naq taaye k’a’ruhaq li nokoxnatojb’resi rik’in a’an. Wotz lix nawom aach’ool chirix naq wi naqayal nach’ok rik’in li Qaawa’, a’an nanach’ok qik’in.

Tzol’leb’ ut Sumwank 88:118

Lin Choxahil Yuwa’ naraj naq tintzoloq.

“Li tzolok a’an jun x’aajelil ru xcha’alil lix k’uub’anb’il na’leb’ li qaChoxahil Yuwa’ re aatenq’ankil chi wulak jo’ a’an. … Li tzolok taab’aanu nimaq xwankil choq’ aawe chiru laa yu’am sa’ ruchich’och’ ut sa’ li yu’am chalel” (Choq’ re Xkawilaleb’ li Saaj, 9).

Kok’ k’anjel naru chi b’aanumank

• K’ut xjalam-uuch jun eskweel malaj yiib’ xjalam-uuch chiru li pizarron, ut kanab’eb’ li kok’al chixch’olob’ankil k’a’ru li eskweel ut k’a’ru nak’ulman aran. Seraq’i reheb’ li kok’al chirix jun eskweel kixk’uub’ ru laj Jose Smith (chi’ilmanq “Ch’ol 31: Li aatin re Chaab’il Na’leb’,” Eb’ li Esilal sa’ li Tzol’leb’ ut Sumwank, 119–122). K’ut chiruheb’ li kok’al xjalam-uuch jun ochoch, jun iglees, ut jun santil ochoch, ut patz’ reheb’ chan ru naq eb’ li na’ajej a’an, a’aneb’ ajwi’ eskweel.

• B’ichahomaq jun li b’ich na’aatinak chirix li tzolok, jo’ “Tintzol, tink’oxla, tintijoq” (B’ichleb’aal choq’ reheb’ li Kok’al, 66). Patz’ reheb’ li kok’al k’a’ru nawulak chiruheb’ xtzolb’al.

• Il ru Tzol’leb’ ut Sumwank 88:118, ut jultika li ch’ol aatin “k’utumaq cherib’il eerib’.” Wotz jun chaab’il na’leb’ li xak’ul laa’at rik’ineb’ li junjunq chi kok’al sa’ li tzoleb’aal, ut kanab’eb’ chixwotzb’al li chaab’il na’leb’ xe’xk’ul a’an.

  eb’ li kok’al yookeb’ chixtzolb’aleb’ li loq’laj hu

  Tento taqasik’ chaab’il na’leb’ ut nawom.

Tzol’leb’ ut Sumwank 88:119

Li santil ochoch a’an rochoch li Dios.

K’oxla chan ru taatenq’aheb’ li kok’al chireek’ankil xrahom choq’ re li santil ochoch ut rajomeb’ re xloq’oninkil li Qaawa’ naq kawresinb’ilaqeb’.

Kok’ k’anjel naru chi b’aanumank

• K’ut chiruheb’ li kok’al chan ru xyiib’ankil junaq “ru’uj” li santil ochoch rik’in xtaqsinkileb’ lix tel ut xch’utub’ankileb’ li ru’uj ruq’eb’. Il ru Tzol’leb’ ut Sumwank 88:119, ut patz’ reheb’ naq te’xyiib’ jun ru’uj li santil ochoch rajlal sut naq taaye li aatin “ochoch.” Ch’olob’ naq li qaChoxahil Yuwa’ kiraj naq laj Jose Smith ut eb’ laj santil paab’anel te’xkab’la jun santil ochoch, malaj jun “rochoch li Dios.” K’ut xjalam-uuch jun li santil ochoch wan chi nach’ naq yooqat chi aatinak chirixeb’ lix jalanil li santil ochoch rik’ineb’ li ch’utleb’aal re li Iglees.

• Wotz lix nawom aach’ool chirix li santil ochoch ut b’ichahomaq sa’ komonil jun li b’ich chirix li santil ochoch, jo’ “Sa’ li santil ochoch” (B’ichleb’aal choq’ reheb’ li Kok’al, 99). Kanab’eb’ li kok’al chixyiib’ankil xjalam-uucheb’ naq yookeb’ chi xik sa’ li santil ochoch.

reetalil li k‘utuk

Xk’utb’al li tzol’leb’: Kok’al ak ninqeb’

Tzol’leb’ ut Sumwank 88:68, 74

Li Jesukristo naru naxsaqob’resi wu chiruheb’ li maak.

Santob’resink-ib’ naraj naxye wulak chi wank chi ch’ajb’il ut chi saq. Chan ru naru nakatenq’aheb’ li kok’al chixtawb’al ru naq naru neke’santob’resiik naq neke’xtaaqe li Jesukristo?

Kok’ k’anjel naru chi b’aanumank

• Kanab’ jun ch’ina al chirilb’al ru Tzol’leb’ ut Sumwank 88:68 chi kaw xyaab’ xkux ut jun chik taaril ru li raqal 74. Patz’ reheb’ li kok’al naq te’rab’i wiib’ li ch’ol aatin juntaq’eeteb’ li neke’tawman sa’ li wiib’ chi raqal a’an. Chan ru “naqasantob’resi” qib’? (Wi na’ajman ru, tenq’aheb’ li kok’al chixtawb’al li aatin “Santob’resink” sa’ li K’utul Raqal reheb’ li Loq’laj Hu). Yiib’ xjalam-uuch jun aamej, jun uq’ej, ut jun oqej chiru li pizarron. Tenq’aheb’ li kok’al chixk’oxlankil k’a’ raj ru naraj naxye “xsaqob’resinkil” ut “xch’ajob’resinkil ru” li qaam, eb’ li quq’, ut eb’ li qoq. Chan ru naq li Kolonel nokoxtenq’a chixb’aanunkil a’an? Chan ru naru naqoksi li qaam, eb’ li quq’, ut eb’ li qoq re wulak jo’ li Jesus?

• Ch’olob’ naq li Qaawa’ kiraj naq lix tenamit te’xsantob’resi rib’ rub’elaj naq te’ok sa’ li santil ochoch. K’oxla xk’eeb’al xb’oqb’al jun saaj winq malaj jun saaj ixq li wan xch’ina hu re ok sa’ li santil ochoch re taawulaq sa’ li tzoleb’aal. Patz’ re naq tixk’ut chiruheb’ li kok’al lix recomendacion, taa’aatinaq chirix k’a’ru naxb’aanu re wank chi k’ulub’ej choq’ re a’an, ut tixwotz k’a’ut naq aajel ru naq taawanq li recomendacion, us ta moko nach’o ta rik’in junaq santil ochoch.

Tzol’leb’ ut Sumwank 88:77–80, 118

Lin Choxahil Yuwa’ naraj naq tintzoloq.

Naru nakatenq’aheb’ li kok’al chixtawb’al ru naq xtzolb’aleb’ li musiq’ejil na’leb’ ut eb’ li re ruchich’och’ naru naxkawresiheb’ chi k’anjelak chiru li Qaawa’.

Kok’ k’anjel naru chi b’aanumank

• Tz’iib’a chiru li pizarron: K’a’ru, K’a’ut ut Chan ru. Kanab’eb’ li kok’al chirilb’al ru Tzol’leb’ ut Sumwank 88:77–79 sa’ ka’kab’il ut te’xtz’iib’a jun xtusulal k’a’ru naraj li Qaawa’ naq taqatzol. Chirix a’an kanab’eb’ chixtz’ilb’al rix li raqal 80 re naq te’xtaw k’a’ut naq naraj a’an naq tootzoloq. Chirix a’an naru neke’xtz’il rix li raqal 118 re xsik’b’al chan ru tento tootzoloq. K’a’ru naqatzol sa’eb’ li raqal a’an chirix chan ru naq li Qaawa’ naril li tzolok?

• K’ut jun reetalil li ruchich’och ut ilomaq ru sa’ komonil Tzol’leb’ ut Sumwank 88:79. K’a’ut naq aajel ru naq tootzoloq chirixeb’ jalan chik tenamit ut chan ru neke’wan? Wi laa’at malaj eb’ li kok’al wanjenaqex sa’ junaq chik tenamit, k’utumaqeb’ k’a’aq re ru li neke’xk’utb’esi lix wanjikeb’ li tenamit a’an ut wotzomaq k’a’ru eetzolom chirix a’an.

Tzol’leb’ ut Sumwank 88:119–126

“Xaqab’omaq … rochoch li Dios.”

Li na’leb’ k’eeb’il xb’aan li Qaawa’ chirix li “rochoch li Dios” naru tooxb’eresi naq yooqo chixkab’lankil li qayu’am ut li qochoch.

Kok’ k’anjel naru chi b’aanumank

• Kanab’eb’ li kok’al chixsik’b’al ru wuqub’ li aatin li tixch’olob’ li rochocheb’ malaj junaq chik ochoch neke’xnaw ru. Chirix a’an kanab’eb’ chirilb’al ru Tzol’leb’ ut Sumwank 88:119, ut te’xtaw wuqub’ aatin li naroksi li Qaawa’ re xch’olob’ankil li rochoch. Tenq’aheb’ chixk’oxlankil chan ru naru neke’xk’e li rochocheb’ jo’ jun “rochoch li Dios.”

• K’e re li junjunq chi kok’al jun ch’ol aatin re Tzol’leb’ ut Sumwank 88:119–126 re naq te’xyiib’ xjalam-uuch. Naq yooqeb’ chixk’utb’al lix jalam-uucheb’ chirib’ileb’ rib’, kanab’eb’ chixtz’ilb’al rixeb’ li raqal re naq te’xq’ehi li ch’ol aatin li neke’reetali li junjunq chi jalam-uuch.

• Tz’iib’a chiru li pizarron b’aanu ut maab’aanu. Kanab’eb’ li kok’al chirilb’al ru Tzol’leb’ ut Sumwank 88:119–126 ut te’xtz’iib’a li k’a’aq re ru kiraj ut li ink’a’ kiraj li Qaawa’ naq te’xb’aanu laj santil paab’anel re xkawresinkileb’ rib’ re tzolok sa’ li santil ochoch. Eb’ li aatin ink’a’ neke’xnaw ru naru neke’xsik’ sa’ jun li tusleb’ aatin. Kanab’eb’ chixsik’b’al ru k’a’ruhaq li te’xtikib’ xb’aanunkil malaj k’a’ruhaq te’xkanab’ xb’aanunkil.

reetalil li tzolok

Xb’oqb’aleb’ chi tzolok sa’ kab’l

Kanab’eb’ li kok’al chixtz’iib’ankil malaj chixyiib’ankil xjalam-uuch jun na’leb’ xe’xtzol ut te’raj xwotzb’al rik’ineb’ lix junkab’al.

Xchaab’ilob’resinkil li qak’utum

Tenq’aheb’ li kok’al toj ka’ch’ineb’ xyu’am chi tz’aqonk sa’ li seraq’ik chirix li evangelio. Maare tento taak’oxlaheb’ aana’leb’ re seraq’ik chirix li evangelio rik’ineb’ li kok’al toj kok’eb’ chi us. Qayehaq, naru nakak’am k’a’ruhaq sa’ li tzoleb’aal li naru neke’xchap li kok’al naq te’aatinaq.

perel re kok’ k’anjel: li santil ochoch a’an rochoch li Dios