Li santil ochoch re Kirtland

Li santil ochoch re Kirtland, xb’aan laj Al Rounds

30 agosto–5 septiembre

Tzol’leb’ ut Sumwank 94–97

“Choq’ re xkolb’al Sion”

K’a’ru li na’leb’ nakak’e reetal naq nakatzol Tzol’leb’ ut Sumwank 94–97? Tz’iib’a li nakak’oxla.

Tz’iib’a li nakak’oxla

Naq li Qaawa’ kixtaqla laj Moises chixkab’lankil jun li muheb’aal, a’an kixye re naq “tixb’aanu chixjunil jo’ tz’aqal xk’utb’esiik chaq chiru sa’ li tzuul” (Hebreos 8:5; chi’ilmanq ajwi’ Exodo 25:8–9). Li muheb’aal taawanq raj sa’ xyi lix na’ajeb’ laj Israelita sa’ li yamyookil ch’och’ (chi’ilmanq Numeros 2:1–2). Moqon, li Dios kixtaqla laj Salomon ut lix tenamit chixkab’lankil jun li santil ochoch a’ yaal li eetalil li k’utb’esinb’il xb’aan (chi’ilmanq 1 Kronikas 28:12, 19).

Naq li Qaawa’ kixk’ojob’ wi’chik lix tz’aqalil li evangelio, kixtaqla laj Jose Smith chixkab’lankil li santil ochoch a’ yaal li eetalil li k’utb’esinb’il. “Chikab’lamanq li ochoch, moko jo’ chanru ta li nab’aanuman sa’ li ruchich’och’,” kixye li Qaawa’. “Chikab’lamanq jo’ chanru li tink’ut” (Tzol’leb’ ut Sumwank 95:13–14; chi’ilmanq ajwi’ 97:10). Jo’ chanchan li muheb’aal sa’ li yamyookil ch’och’, li santil ochoch taawanq raj jo’ xch’oolil li tenamit Kirtland (chi’ilmanq Tzol’leb’ ut Sumwank 94:1).

Anajwan naru xtawb’aleb’ li rochoch li Qaawa’ chiru chixjunil li ruchich’och’. Us ta ink’a wankeb’ jo’ xch’oolil jun li tenamit, naru te’wanq jo’ xch’oolil li qayu’am. Us ta jalan jalanq neke’k’utun li santil ochoch, chi sa’ li junjunq naqatzol jun ajwi’ li choxahil eetalil—jun choxahil na’leb’ re qasutq’isinkil chiru li rilob’aal li Dios. Eb’ li loq’laj ut junelikil k’ojob’anb’il k’anjel nokohe’xtenq’a chixkawob’resinkil li qayu’am ut li qajunkab’al, “moko jo’ chanru ta li nab’aanuman sa’ li ruchich’och’,” jo’ b’an li eetalil k’utb’esinb’il chiqu xb’aan li Dios.

Chi’ilmanq Santos, 1:172–173; ““Una Casa a nuestro Dios”,” Revelaciones en contexto, 176–185.

reetalil li tzolok aajunes

Li na’leb’ re xtzolb’aleb’ li loq’laj hu aajunes

Tzol’leb’ ut Sumwank 94; 97:15–17

Li Qaawa’ naru taawanq wik’in sa’ inyu’am wulaj wulaj.

Li na’leb’ li wan sa’ Tzol’leb’ ut Sumwank 94 ut 97 kik’eeman sa’ li 2 re agosto, 1833. Li tasal 97 na’aatinak chirix li santil ochoch li k’uub’anb’il naq taakab’lamanq sa’ li Condado Jackson, Missouri, ut li tasal 94 na’aatinak chirixeb’ li jolomil kab’l sa’ Kirtland, Ohio. Maare taak’e reetal naq wan li k’a’ru juntaq’eet naxye li Qaawa’ chirixeb’ wiib’ paay chi kab’l a’in (chi’ilmanq Tzol’leb’ ut Sumwank 94:2–12; 97:10–17). Naq nakak’oxla li na’leb’ a’in, k’oxla k’a’ru naru taab’aanu re xk’ulb’al lix loq’al ut lix wanjik li Qaawa’ chi kok’ aj xsa’, sa’ li iglees jo’ ajwi’ wulaj wulaj sa’ laa yu’am.

Tzolʼlebʼ ut Sumwank 95

Li Qaawa’ naxq’useb’ li ani naxraheb’.

Ak numenaq oob’ po chalen chaq naq sa’ enero re 1833 li Qaawa’ kixtaqlaheb’ laj santil paab’anel sa’ Kirtland chixkab’lankil jun rochoch li Dios ut chixb’oqb’al jun li ch’utlajik re tiik ruhil k’a’uxlej (chi’ilmanq Tzol’leb’ ut Sumwank 88:117–19). Naq li k’utb’esinb’il na’leb’ li tz’iib’anb’il sa’ li tasal 95 kik’ehe’ sa’ junio re 1833, toj maji’ neke’ok chixb’aanunkil li taqlanb’il. K’a’ru nakatzol rik’in chan ru naq li Qaawa’ kixq’useb’ laj santil paab’anel sa’ li k’utb’esinb’il na’leb’ a’an? Ma wankeb’ li taqlahom malaj li na’leb’ li toj maji’ nakab’aanu? K’a’ru nakaweek’a naq tento taab’aanu?

Chi’ilmanq ajwi’ D. Todd Christofferson, “ Yo reprendo y disciplino a todos los que amo,” Liahona, mayo 2011, 97–100.

Tzol’leb’ ut Sumwank 95:8, 11–17; 97:10–17

Sa’ li santil ochoch li Dios narosob’tesiheb’ lix tenamit.

Chirix naq ke’q’use’ xb’aan naq ink’e’ ke’xkab’la jun rochoch li Dios sa’ Kirtland, eb’ laj jolominel re li Iglees ke’xsik’ ru jun na’ajej sa’ jun awimq trigo b’ar wi’ te’kab’laq. Laj Hyrum Smith, li ras li profeet, koxxok sa’ junpaat jun li ch’iich’ ut ki’ok chixk’alenkil li awimq. “Yooko chixkawresinkil qib’ re xkab’lankil jun li ochoch choq’ re li Qaawa’,” chan, “ut k’eek’o inch’ool naq laa’inaq li xb’een li taatikib’anq re li k’anjel” (sa’ Enseñanzas de los Presidentes de la Iglesia: José Smith [2007], 286, 288). K’oxla lix anchalil xch’ool laj Hyrum naq nakawil Tzol’leb’ ut Sumwank 95:8, 11–17; 97:10–17. K’a’ru nakataw li naxwaklesi x’anchalil aach’ool laa’at chixk’ulb’aleb’ li osob’tesink re li santil ochoch?

chapcho jun li ch’iich’ sa’ ruq’ laj Hyrum Smith

Laj Hyrum Smith naxk’ale li awimq, xb’aan laj Joseph Brickey

Tzol’leb’ ut Sumwank 97:18–28

Sion aʼan “li saqebʼ ru xchʼool.”

Li profeet aj Jose Smith kixye, “Tento raj naq xwaklesinkil li tenamit Sion a’anaq xnimal li qajayalihom” (Enseñanzas: José Smith, 196). Eb’ laj santil paab’anel sa’ 1830 ke’xk’oxla naq li Sion a’an jun li na’ajej, “lix tenamit li qaDios” (Tzol’leb’ ut Sumwank 97:19). A’b’an sa’ li k’utb’esinb’il na’leb’ li wan sa’ li tasal 97, li Qaawa’ kixnimob’resi xnawomeb’. Sion, a’an ajwi’ jun li ch’uut chi kristiaan—“li saqeb’ ru xch’ool” (raqal 21). Naq nakawileb’ ru li raqal 18–28, k’oxla li na’leb’ a’an naq nakawil li aatin “Sion.” Kʼaʼru naraj naxye choqʼ aawe li wank chi saq ru aach’ool? Chan ru naq li santil ochoch natenq’an re taa’uxmanq “xkolb’al Sion”? (raqal 12).

Chi’ilmanq ajwi’ Moises 7:18; Temas del Evangelio, “Sion,” topics.ChurchofJesusChrist.org.

reetalil li tzolok jo’ junkab’al

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Tzol’leb’ ut Sumwank 95:8.Chan ru naq xk’ulb’aleb’ ut xpaab’ankileb’ li sumwank re li santil ochoch naxk’am chaq “li wankilal li nachal chaq taqe’q” sa’ li qayu’am? Maare laa junkab’al naru te’xye k’a’ru neke’reek’a chirix li santil ochoch malaj te’xye jo’q’e xe’osob’tesiik rik’in “li wankilal li nachal chaq taqe’q” xb’aan li loq’onink xe’xb’aanu sa’ li santil ochoch.

Re xtenq’ankileb’ li yookeb’ chixkawresinkil rib’ chi ok sa’ li santil ochoch, naru taawoksiheb’ li video, li jalam-uuch, ut li na’leb’ li wan sa’ temples.ChurchofJesusChrist.org. Re xtenq’ankileb’ li kok’al chi tzolok chirix li santil ochoch, naru taawoksi “Tu sendero al templo” (sa’ Templos de La Iglesia de Jesucristo de los Santos de los Últimos Días [Liahona, octubre 2010], 73–75).

Tzol’leb’ ut Sumwank 95:1–11.K’a’ru naqatzol chirix li q’usuk sa’eb’ li raqal a’in? K’a’ru naqatzol chirix li Qaawa’? Chan ru naq li na’leb’ a’in tixjal chan ru naqak’ul li q’use’k malaj chan ru nokoq’usuk?

Tzol’leb’ ut Sumwank 97:8.Jo’ naxye li raqal a’in, chan ru naru “took’ulub’aaq” xb’aan li Qaawa’? K’a’ru xjalanil a’an rik’in li k’ulub’aak xb’aan li ruchich’och’? K’a’ru naraj naxye “xpaab’ankil li qasumwank rik’in mayejak”? Chan ru ak xqab’aanu a’in?

Tzol’leb’ ut Sumwank 97:10–21.Li profeet aj Jose Smith kixye, “Yalaq b’ar ch’utch’uukeb’ wi’ laj santil paab’anel, a’an Sion, li tixkab’la yalaq winq [malaj ixq] li tiik xch’ool re xk’olb’al rix li ralal xk’ajol” (Enseñanzas: José Smith, 195). Chan ru naru taqakab’la li Sion sa’ li qochoch? K’a’ru li na’leb’ naqataw sa’ Tzol’leb’ ut Sumwank 97:10–21? Jo’ junkab’al, sik’omaq ru jun na’leb’ teejayali wi’ eerib’ chiru li xamaan a’in.

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Sa’ li santil ochoch,” B’ichleb’aal choq’ reheb’ li Kok’al, 99.

Xchaab’ilob’resinkil li tzolok aajunes

Tz’iib’a li nakak’ul. Tz’iib’a resil li k’a’ru xak’ul rik’ineb’ li na’leb’ ut li tzol’leb’ yookat chixtzolb’al. A’an naru taa’ok jo’ xcha’al li resilal laa yu’am li taa’osob’tesinq reheb’ laa walal aak’ajol.

xkab’lankil li santil ochoch re Kirtland

Xkab’lankil li santil ochoch re Kirtland, xb’aan laj Walter Rane