eb’ laj santil paab’anel neke’eelelik chiru jun ch’uut chi aj rahob’tesinel

C. C. A. Christensen (1831–1912), Eb’ laj santil paab’anel neke’isiik chaq sa’ li Condado Jackson, Missouri, c. 1878, tempera en muselina, 77 ¼ × 113 pulgadas. Museo de Arte, Universidad de Brigham Young, jun maatan k’eeb’il xb’aaneb’ li ri laj C. C. A. Christensen, 1970

6–12 septiembre

Tzol’leb’ ut Sumwank 98–101

“Ch’anch’o chexwanq, ut chenaw naq laa’in li Dios”

Naq nakawil Tzol’leb’ ut Sumwank 98–101, k’e reetaleb’ li k’oxlahom ut na’leb’ nakak’ul. Chan ru naq xk’anjelankileb’ tatxtenq’a chi wulak jo’ li kristiaan naraj li Dios?

Tz’iib’a li nakak’oxla

Eb’ laj santil paab’anel sa’ 1830 ke’xk’oxla naq li tenamit Independence, Missouri a’an li yeechi’inb’il ch’och’. A’an chaq “lix ch’oolil li na’ajej” Sion (chi’ilmanq Tzol’leb’ ut Sumwank 57:3)—lix tenamit li Dios sa’ ruchich’och’—li yookeb’ chaq chixkab’lankil rik’in xnimal li mayejak. Choq’ reheb’, lix ch’utub’ankileb’ laj santil paab’anel aran, a’an li xnimal ru na’leb’ taawanq rub’elaj li xkab’ xk’ulunik li Kolonel. A’b’an jalan xna’leb’eb’ li rech kab’al ak wankeb’ aran. Ink’a’ ke’xpaab’ naq k’eeb’il li ch’och’ a’an reheb’ laj santil paab’anel xb’aan li Dios, ut yookeb’ xk’a’uxl chirix li taak’ulmanq rik’in naq k’a’jo’ xk’ihaleb’ li kristiaan jalaneb’ xpaab’aal li yookeb’ chi wulak sa’ xna’ajeb’ sa’ junpaat. Sa’ junpaat, lix k’a’uxleb’ a’an ki’ok choq’ hob’ok, ut li hob’ok ki’ok choq’ rahob’tesink. Sa’ julio re 1833, kirume’ lix k’anjeleb’aal li Iglees re k’uub’ank hu, ut sa’ noviembre ke’mine’ ru laj santil paab’anel chi elk chaq sa’ rochocheb’ aran sa’ li Condado Jackson, Missouri.

Laj Jose wan chaq sa’ Kirtland, 1300 kiloom xnajtil rik’ineb’, ut ka’ajwi’ kirab’i resil a’in chirix xnumik junjunq li xamaan. A’b’an li Qaawa’ kixnaw k’a’ru yoo chi k’ulmank, ut kixk’utb’esi chiru lix profeet junjunq li na’leb’ chirix li tuqtuukilal ut li kawilal re xk’ojob’ankil xch’ooleb’ laj santil paab’anel—li naru ajwi’ tooxtenq’a laa’o naq rahob’tesinb’ilo, naq ink’a’ na’ux li qatiikil ajom, malaj naq naqaj ru qanawom naq li rahob’tesink naqak’ul sa’ junaq kutan “taak’anjelaq sa’ junajil choq’ re li qachaab’ilal” (Tzol’leb’ ut Sumwank 98:3).

Chi’ilmanq Santos, 1:174–197; “En espera de la palabra del Señor,” Revelaciones en Contexto, 209–215.

reetalil li tzolok aajunes

Li na’leb’ re xtzolb’aleb’ li loq’laj hu aajunes

Tzol’leb’ ut Sumwank 98:1–3, 11–14; 101:1–16

Eb’ lix yalb’al wix naru te’k’anjelaq sa’ junajil choq’ re lin chaab’ilal.

Wan naq li ch’a’ajkilal naqak’ul sa’ li qayu’am nachal xb’aan li k’a’ru xqasik’ ru xb’aanunkil. Wan naq nachal xb’aan li xsik’ ru xb’aanunkil anihaq chik. Ut wan naq maa’ani xb’aanunk re—wan naq yal nak’ulman li ch’a’ajkilal. Maak’a’ naxye b’ar wi’ nachal chaq, li yale’k-ix naru tixtz’aqob’resi ru li choxahil ajom. Naq nakawil li raatin li Qaawa’ chirix lix yalb’aleb’ rix laj santil paab’anel sa’ Tzol’leb’ ut Sumwank 98:1–3, 11–14 ut 101:1–16, k’a’ru nakatzol li naru tatxtenq’a rik’in lix yalb’al aawix laa’at? Chan ru naq eb’ li raqal a’in neke’xjal chan ru nakawileb’ li ch’a’ajkilal nakak’ul? K’oxla chan ru naq eb’ lix yalb’al aawix xe’k’anjelak sa’ junajil choq’ re laa chaab’ilal ut re xtz’aqob’resinkil ru li rajom li Dios sa’ laa yu’am.

Chi’ilmanq ajwi’ 2 Nefi 2:2; Tzol’leb’ ut Sumwank 90:24.

Tzol’leb’ ut Sumwank 98:23–48

Li Qaawa’ naraj naq tinsik’ li tuqtuukilal jo’ naraj a’an.

Us ta moko chixjunil ta li tz’iib’anb’il sa’ Tzol’leb’ ut Sumwank 98:23–48 taak’anjelaq sa’ laa yu’am, k’a’ru nakataw li naru tixk’am aab’e naq tatrahob’tesiiq xb’aan anihaq chik? Maare naru taajuch’eb’ li aatin malaj raqal li neke’xk’ut k’a’ru kiraj li Qaawa’ naq te’xb’aanu laj santil paab’anel naq ke’xk’ul li rahob’tesiik aran Missouri.

Chi’ilmanq ajwi’ Jeffrey R. Holland, “Li k’anjel re k’amok-ib’ wi’chik sa’ usilal,” Jolomil ch’utub’aj-ib’ re noviembre 2018.

li Jesukristo

Xcha’al li jalam-uuch Li Kristo ut li saaj aj b’ihom, xb’aan laj Heinrich Hofmann

Tzolʼlebʼ ut Sumwank 100

Li Qaawa’ taarileb’ li neke’k’anjelak chiru.

Junjunq xamaan chirix naq laj Jose kirab’i resil li rahob’tesiik aran Missouri, jun li ak’ komon kixpatz’ naq taarochb’eeni toj sa’ Canada re xwotzb’al li evangelio rik’ineb’ li ralal. Laj Jose kixye naq taaxik, us ta yoo chaq xk’a’uxl chirix xkanab’ankil lix junkab’al sa’ xq’ehil li rahob’tesink ut li xib’esink yookeb’ chixk’ulb’al lix junkab’al ut li Iglees. Naq wankeb’ sa’ b’e, laj Jose ut li rochb’een, laj Sidney Rigdon, ke’tijok re naq te’k’ojob’aaq xch’ool, ut li Qaawa’ kixsume xtijeb’ rik’in li aatin li wan sa’ li tasal 100. K’a’ru nakataw sa’ li raatin li Qaawa’ li maare kixk’ojob’ xch’ooleb’ ut kixtenq’aheb’?

Maare laa’at ak xak’ul chi jo’kan, naq yookat chixk’oxlankil laa junkab’al jo’ ajwi’ li teneb’anb’il sa’ aab’een sa’ li Iglees. Chan ru naq li raatin li Qaawa’ sa’ li tasal 100 naru tatxtenq’a rik’in a’an?

Chi’ilmanq ajwi’ “Una misión a Canadá,” Revelaciones en Contexto, 216–222.

Tzol’leb’ ut Sumwank 101:43–65

Xtaaqenkil lix na’leb’ li Dios naxkol wix.

Li jaljookil ru aatin sa’ Tzol’leb’ ut Sumwank 101:43–62 kik’eeman re xch’olob’ankil k’a’ut naq li Qaawa’ kixkanab’eb’ laj santil paab’anel chi isiik chaq sa’ Sion. Naq nakawil li raqal a’in, ma nakawil li k’a’ru chanchanat wi’ eb’ li moos sa’ li jalajookil ru aatin? Maare taapatz’: Ma wan hoonal naq ninwech’ rix lix taqlahom li Dios? Chan ru naq lix lajik lin paab’aal malaj xkawilal inch’ool naru tixk’anab’ “laj xik’ ilonel” chixch’ikb’al rib’ sa’ inyu’am? Chan ru tink’ut chiru li Dios naq “wan inch’ool chi b’eresiik sa’ li b’e tiik ut xk’ulub’ choq’ re lin kolb’al”? (che’ilmanq li raqal 63–65).

reetalil li tzolok jo’ junkab’al

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Tzolʼlebʼ ut Sumwank 98:16, 39–40.K’a’ru sa’eb’ li raqal a’in naru tooxtenq’a chixxaqab’ankil li tuqtuukilal sa’ li qajunkab’al? Naru teeb’icha jun li b’ich chirix li tuqtuukilal malaj li kuyuk maak, jo’ “Eek’anb’il li yaal qab’aan” (Eb’ li B’ich, 177). Eb’ li kok’al maare taawulaq chiruheb’ xk’utb’esinkil chan ru xkuyb’aleb’ xmaak chirib’ileb’ rib’.

Tzolʼlebʼ ut Sumwank 99.Laj John Murdock toje’ wulajenaq chaq sa’ jun mision jwal ch’a’aj chiru jun chihab’ sa’ Missouri naq kib’oqe’ chi elk wi’chik sa’ li rochoch “re xjultikankil lin evangelio li junelik nakana” (raqal 1), (chi’ilmanq “Las misiones de John Murdock en Misuri,” Revelaciones en Contexto, 92–94). K’a’ru naqatzol sa’ li tasal 99 li maare kixtenq’a malaj kixwaklesi xch’ool laj John Murdock? K’a’ru lix na’leb’ li Qaawa’ choq’ qe sa’ li k’utb’esinb’il na’leb’ a’in?

Tzol’leb’ ut Sumwank 100:16; 101:3–5, 18.Chirix rilb’aleb’ li raqal a’in, naru tex’aatinaq chirix junaq aj tenol ch’iich’ ut chan ru naq tento tixtiqwasi li ch’iich’ re risinkil xtz’ajnil ut tixten k’iila sut re xpak’b’al (chi’ilmanq li video “The Refiner’s Fire” sa’ ChurchofJesusChrist.org). Maare teetzol ajwi’ chan ru nasaqob’resiman ru li k’a’aq chik re ru, jo’ li ha’ malaj li atz’am. Maare naru teesaqob’resi ru malaj teerisi xtz’ajnil k’a’ruhaq jo’ junkab’al. K’a’ut naq naqaj naq taasaqob’resiiq qu? K’a’ru neke’xk’ut li na’leb’ a’in chirix chan ru naq lix yalb’al qix naru tooxtenq’a chi ok jo’ “jun tenamit saq ru”?

Tzolʼlebʼ ut Sumwank 101:22–36.Chan ru naq eb’ li raqal a’in maare ke’xtenq’aheb’ laj santil paab’anel li yookeb’ chaq chi rahob’tesiik? Chan raj ru te’xtenq’aheb’ li ani neke’xuwak chirix li wank sa’ li ruchich’och’ sa’ li kutan a’in?

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Chinaatenq’a re tinkuyeb’ lix maak,” B’ichleb’aal choq’ reheb’ li Kok’al, 52.

Xchaab’ilob’resinkil li tzolok aajunes

Sik’eb’ li jolomil na’leb’. Li Elder Richard G. Scott kixye: “Re xsik’b’al li musiq’ejil nawom, sik’eb’ li jolomil na’leb’. … Nujenaqeb’ rik’in li yaal, ut naru te’oksimanq sa’ k’iila hoonal ut na’ajej” (“Cómo adquirir conocimiento espiritual,” Liahona, enero 1994, 101).

jun ch’uut naxrahob’tesiheb’ laj santil paab’anel

Nak’ate’ Missouri, xb’aan laj Glen S. Hopkinson