“20–26 septiembre. Tzol’leb’ ut Sumwank 106–108: “Naq taateeliiq li choxa chiruheb’,” ” Kim, Taaqehin—Choq’ reheb’ li komon ut li junkab’al: Li Tzol’leb’ ut Sumwank 2021 (2020)

“20–26 septiembre. Tzolʼlebʼ ut Sumwank 106–108,” Kim, Taaqehin—Choq’ reheb’ li komon ut li junkab’al: 2021

Jalam-uuch

li saq’e chirixeb’ li choql

20–26 septiembre

Tzolʼlebʼ ut Sumwank 106–108

“Naq taateeliiq li choxa chiruheb’ ”

Li Elder Ulisses Soares kixye, “Tento tookanaaq rik’in li Jesus rik’in saho’k sa’eb’ li loq’laj hu rajlal, rik’in xtzolb’al lix k’utum, ut rik’in xyalb’al qaq’e chixb’eresinkil qayu’am jo’ chanru li Jesus” (“Chan ru naq tintaw xyaalal?” Jolomil ch’utub’aj-ib’ re abril 2017). Naq nakatzol Tzol’leb’ ut Sumwank 106–108, tz’iib’a k’a’ru naru taab’aanu re xyu’aminkil li na’leb’ nakataw.

Tz’iib’a li nakak’oxla

Maare taak’oxla naq Tzol’leb’ ut Sumwank 107 ka’ajwi’ na’aatinak chirix xk’uub’ankileb’ li opiis re li tijonelil re xjolominkil lix Iglees li Qaawa’. Relik chi yaal, naq kipuktesiman li k’utb’esinb’il na’leb’ a’in, ak yookeb’ chi k’ihank li komon re li Iglees, jo’kan naq ke’ajman ru xkomoneb’ chik laj jolominel re xb’eresinkileb’. Jo’kan naq aajel ru xch’olob’ankil lix k’anjel ut lix teneb’ankil li Xb’eenil Awa’b’ejil, lix Molameb’ li Kab’laju, eb’ li Setanta, eb’ li obiisp, ut eb’ li awa’b’ejil reheb’ li molam. Li tasal 107 ink’a’ yal naxch’olob’ chan ru xk’uub’ankileb’ li opiis ut molam sa’ li tijonelil; naxk’utb’esi aj b’an wi’ naab’al li choxahil na’leb’. Arin li Qaawa’ nokoxtzol chirix li najteril k’anjelil re li tijonelil li “kitikib’aman sa’ xkutankil laj Adan” (raqal 41). Chalen chaq xtiklajik, lix k’anjel a’an xk’eeb’al chi uxmank naq chixjunil li ralal xk’ajol li Dios—ut jo’kanat ajwi’ laa’at—te’xk’ul li k’ojob’anb’il k’anjel re li kolb’a-ib’ sa’ li evangelio, ut naq te’saho’q xch’ool rik’in “chixjunil li musiq’ejil osob’tesink re li iglees—naq taak’eemanq reheb’ xk’ulb’al li muqmuukil na’leb’ re li awa’b’ejihom re choxa ut naq taateeliiq li choxa chiruheb’ ” (eb’ li raqal 18–19).

Chi’ilmanq “La restauración del antiguo orden,” Revelaciones en Contexto, 208–12.

Jalam-uuch

reetalil li tzolok aajunes

Li na’leb’ re xtzolb’aleb’ li loq’laj hu aajunes

Tzolʼlebʼ ut Sumwank 106; 108

Li Qaawa’ naxk’e xna’leb’, naxwaklesi xch’ool, ut naxtenq’a li ani naxb’oq chi k’anjelak.

Sa’ Tzol’leb’ ut Sumwank 106 ut 108, li Qaawa’ kixk’e li na’leb’ ut li yeechi’ihom reheb’ wiib’ li komon li ke’b’oqe’ chi k’anjelak sa’ li Iglees. K’a’ru naxye li k’utb’esinb’il na’leb’ a’in li naxwaklesi aach’ool ut naxk’e aana’leb’ chirix laa k’anjel sa’ li rawa’b’ejihom li Dios? Wahe’ wiib’ li na’leb’:

Chan ru xak’ul “li usilal ut xk’ojob’ankil laa ch’ool” re taaruuq tatwanq “chi xaqxo”? (Tzol’leb’ ut Sumwank 106:8).
Chan ru naq “q’axal wi’chik taawil aawib’ chalen anajwan sa’ xpaab’ankil laa yeechi’ihom,” malaj laa sumwank? (Tzol’leb’ ut Sumwank 108:3).

K’a’ chik ru naxtoch’ aach’ool sa’eb’ li tasal 106 ut 108?

Chi’ilmanq ajwi’ Russell M. Nelson, “Rilb’aleb’ li komon rik’in li wankil ut li wankilal k’eeb’il xb’aan li Dios,” Jolomil ch’utub’aj-ib’ re abril 2018; “Warren Cowdery,” Revelaciones en Contexto, 219–23; “Se obró sobre él para buscar revelación,” Revelaciones en Contexto, 224–28.

Tzolʼlebʼ ut Sumwank 107

Li Qaawa’ naxb’eresi lix Iglees rik’in lix wankilal li tijonelil.

Sa’ tzolok chirix lix k’ojob’ankil wi’chik li evangelio, maare xak’e reetal naq chi kok’ aj xsa’, li Qaawa’ ink’a’ naxch’olob’ jun li tzol’leb’ chi tz’aqal sa’ jun ajwi’ li k’utb’esinb’il na’leb’. A’an naxk’utb’esi b’an li k’a’aq re ru “chi junjunqil li raqal” (Tzol’leb’ ut Sumwank 98:12) naq na’ajman ru. Li Qaawa’ ak kixk’e li na’leb’ chirix li tijonelil chalen chaq 1829 (chi’ilmanq li tasal 20 ut 84), a’b’an a’an kixk’e xkomon chik li na’leb’ reheb’ laj santil paab’anel sa’ 1835 chirixeb’ li opiis re li tijonelil li aajeleb’ ru re xjolominkil ut xb’eresinkil lix ketomq li yoo chi k’ihank.

Naq nakattzolok chirixeb’ li opiis a’in re li tijonelil, k’oxla k’a’ru naru taab’aanu re xxaqab’ankil xwankileb’ li ani b’oqb’ileb’ sa’ li k’anjel a’in rik’in “lix kawil aach’ool, laa paab’aal, ut laa tij” (Tzol’leb’ ut Sumwank 107:22).

Li Xb’eenil Awa’b’ejil ut li Awa’b’ej re li Iglees (eb’ li raqal 9, 21–22, 65–66, 91–92)
Li Kab’laju chi Apostol (eb’ li raqal 23–24, 33–35, 38, 58)
Li Setenta (eb’ li raqal 25–26, 34, 93–97)
Li obiisp (eb’ li raqal 13–17, 68–76, 87–88)

Tzol’leb’ ut Sumwank 107:1–20

Eb’ li k’ojob’anb’il k’anjel re li tijonelil neke’rosob’tesi chixjunil li ralal xk’ajol li qaChoxahil Yuwa’ sa’ musiq’ej ut sa’ tib’elej.

Li Elder Neil L. Andersen kixye: “Li tijonelil a’an lix wankil li Dios li k’eeb’il choq’ re xk’olb’aleb’ ut rosob’tesinkileb’ chixjunil—li winq, lixq, ut li kok’al. … Naq k’ulub’ejo, eb’ li k’ojob’anb’il k’anjel re li tijonelil neke’xchaab’ilob’resi li qayu’am ut nokohe’xkawresi choq’ re li k’a’ru yeechi’inb’il sa’ li yu’am chalel” (“Poder en el sacerdocio,” Liahona, noviembre 2013, 92). Naq nakawil Tzol’leb’ ut Sumwank 107:1–20 (q’axal wi’chik li raqal 18–20), ut xtz’aqob’ li raatin li Elder Andersen, k’oxla xtz’iib’ankil li na’leb’ nakak’ul chirix lix wankil li Dios ut chan ru naq naxchaab’ilob’resi laa yu’am ut nakatxkawresi choq’ re li junelik q’e kutan. K’a’ru yookat chixb’aanunkil re xk’ulb’aleb’—ut re xtenq’ankileb’ laa komon chixk’ulb’aleb’—li osob’tesink a’an?

Chi’ilmanq ajwi’ Tzol’leb’ ut Sumwank 84:19–27; Dallin H. Oaks, “Li Tijonelil re Melkisedek ut eb’ li laaw,” Jolomil ch’utub’aj-ib’ re abril 2020.

Tzolʼlebʼ ut Sumwank 107:41–57

Li tijonelil narosob’tesiheb’ li junkab’al.

Laj Adan kiraj naq eb’ li ralal xk’ajol te’osob’tesiiq xb’aan li tijonelil. K’a’ru kiyeechi’iman re? (che’ilmanq li raqal 42, 55). Naq nakawil resil li kixb’aanu laj Adan, k’oxla li rajom aach’ool laa’at naq laa junkab’al taa’osob’tesiiq xb’aan li tijonelil. K’a’ru li eek’asinb’ilat chixb’aanunkil re tenq’ankil laa junkab’al chi osob’tesiik chi jo’kan?

Laj Adan narosob’tesiheb’ li ralal xk’ajol, xb’aan laj Clark Kelley Price

Jalam-uuch

reetalil li tzolok jo’ junkab’al

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Tzol’leb’ ut Sumwank 106:6.K’a’ru naru taqab’aanu jo’ junkab’al re naq taawanq “sahil ch’oolejil sa’ choxa”?

Tzol’leb’ ut Sumwank 107:22.K’a’ru yooko chixb’aanunkil re xxqab’ankil xwankileb’ li qajolominel “xb’aan lix kawil qach’ool, li qapaab’aal, ut li qatij”?

Tzolʼlebʼ ut Sumwank 107:27–31, 85.Eb’ li na’leb’ li neke’xb’eresiheb’ li ch’utam re li Iglees naru ajwi’ toohe’xtenq’a chixk’uub’ankil qana’leb’ jo’ junkab’al. K’a’ruheb’ li na’leb’ sa’ li raqal a’in li naru taqoksi sa’ xk’uub’ankil qana’leb’ jo’ junkab’al? (Chi’ilmanq M. Russell Ballard, “Ch’utameb’ re junkab’al,” Jolomil ch’utub’aj-ib’ re abril 2016.)

Tzol’leb’ ut Sumwank 107:99–100.K’e re jun komon sa’ laa junkab’al chi tz’iib’anb’il jun k’anjel sa’ li ochoch, ut patz’ re naq tixsik’ ru chan ru tixb’aanu: chi k’eek’o xch’ool, rik’in q’emal, malaj chi ink’a’ tixk’e reetal chan ru xb’aanunkil. Kanab’ naq laa junkab’al te’ril a’an chixb’aanunkil li k’anjel ut naq te’xq’ehi chan ru xsik’ ru xb’aanunkil. K’e xhoonaleb’ junjunq chik komon chixb’aanunkil ajwi’ jun li ch’ina k’anjel. K’a’ut naq li Qaawa’ naraj naq taqatzol k’a’ru li teneb’anbil sa’ qab’een ut naq taqab’aanu chi yalb’il tz’aqal qaq’e? (Chi’ilmanq Becky Craven, “Li k’eeb’il reetal chi us ut li ink’a’ k’eeb’il reetal,” Jolomil ch’utub’aj-ib’ re abril 2019.)

Tzol’leb’ ut Sumwank 108:7.Chan ru naru taqakawresi qib’ chiqib’il qib’ sa’ li aatinak? sa’ li tijok? sa’ li q’usuk malaj li waklesink ch’oolej? sa’ chixjunil li naqab’aanu? Naru teesik’ ru jun reheb’ a’in re xchaab’ilob’resinkil jo’ junkab’al.

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Xyaab’ xkux jun li profeet ab’i,” Eb’ li B’ich, 11.

Xchaab’ilob’resinkil li tzolok aajunes

Tz’iib’aheb’ li na’leb’ nakak’ul. Naq nakak’ul junaq musiq’anb’il na’leb’, tz’iib’a. Sa’ xb’aanunkil, nakak’ut chiru li Qaawa’ naq nakab’antioxi lix b’eresihom. (Chi’ilmanq Li k’utuk jo’ li Kolonel, 12, 30.)