Iotebwa Timiti i Nauvoo, 1840, iroun Theodore Gorka

Nobembwa 8–14

Reirei ao Berita aika Tabu 129–132

“Ngkana Ti Karekea Te Kakabwaia mairoun te Atua, Bon man te Ongotaeka”

Unimwaane David A. Bednar e kabwarabwara: “N tii te taetae ao te karaki bon tiaki te angareirei. Tataekinan ana euangkerio te Uea n ana kawai e raona te taratara ao te kakauongo ao karaoana” (“Becoming a Preach My Gospel Missionary,” New Era, Okitobwa. 2013, 6). Tera ae e reireiniko te Tamnei ngkai ko tarataraia ao n ongora nakoia ataei ake ko reireiniia?

Korei Am Namakin

Kaungaa te Tibwatibwa

Rinea atuun te rongorongo man mwakoro 129–32, ao anganiia ataei bwa a na tuangko te bwai are a tia n reiakinna man atuun te reirei anne. Te katooto, tera ae e a ataia n taekan Tamara are i Karawa ke taian Atua? ibukin te mare ae akea tokina? ibukin te abanuea are te tiretio?

Reirei te Reirei: Ataei aika a Uarereke

Reirei ao Berita aika Tabu 130:20; 132:5

Kakabwaia a roko man te ongotaeka iroun te Atua.

Iotebwa Timiti e reirei bwa kakabwaia ni kabane mairoun te Atua e boboto iaon ongotaekara nakon Ana tua. Ko na kanga n reirei iaon te reirei aei n te aro are a na ota iai ataei?

Waaki ni Kakukurei aika a Kona ni Karaoaki

• Taekina te kabotau ae beebete nakoia ataei are e kaota aron kakaawakin irakin te kaetieti, te katooto, marooro ma ngaiia iaon mwaneka are ti riai n irii ni katauraoi amwarake ke n takakaro ke ni katea te bwai teuana. Tera ae e na riki ngkana ko aki ira te kaetieti? (Tao iai te bwai ae ko tia n rinanona are ko kona n tibwaia.) Wareka Reirei ao Berita aika Tabu 130:21, ao kabotaui kaetieti nakon tuua ake ti riai n irii ni kareki kakabwaia mairoun Tamara are i Karawa.

• Tuangiia ataei ngkana a kona n iangoa te tai are a ongotaeka iai n ana tua te Atua teuana. Tera ae a namakinna? Ikotaki n anenea te kuna iaon te ongotaeka, n aron “Keep the Commandments” (Aia Boki n Anene Ataei, 146–47), ao taekini kakabwaia iaon te ongotaeka are e taekinaki n te kuna. Maroroakin tabeua bwaai ake e a tia ni tuangiira te Atua bwa ti na karaoi. E kanga ni kakabwaiaiira te Atua ngkana ti kawakin tuua akanne?

Reirei ao Berita aika Tabu 130:22

Tamara are i Karawa ao Iesu Kristo iai rabwataia ae aki mamate.

Ngkana ti mataata bwa te Atua te Tama ao Iesu Kristo iai rabwataia n ai arora, ti namakina te kaan riki Nakoia, ao ara reitaki ma Ngaiia e kakorakoraaki.

Waaki ni Kakukurei aika a Kona ni Karaoaki

• Kaotia nakoia ataei tamnein Iesu Kristo, ao kaoiia bwa a na kotea matana, wiina, ao mwakoron rabwatana riki tabeua. Imwiina kaoiia bwa a na tei ao a kotei rabwataia naba n aekakina naba. Warekia man Reirei ao Berita aika Tabu 130:22: “Te Tama iai rabwatana ae te iriko ao te rii …; ao te Nati naba.” Kakoaua bwa rabwatara bon aekakin rabwatan te Atua ao Iesu Kristo.

• Ikotaki anenea te kuna ae ibukin rabwatara, n aron “Atu, Angau, Bubuan Waeu, Tabon Rangau” (Aia Boki n Anene Ataei, 275), ao kaoia ataei bwa a na karaoa naba anne are e airi ma taekana. Tuangiia ataei bwa a na karakini nakoim bwaai tabeua ake a kona ni karaoia ma rabwataia. Kaota am kakaitau ibukin te rabwata are e a tia n anganiko te Atua. Ti na kanga ni kaotia bwa ti karabwarabwa ibukin te bwaintangira ae onoti aei?

• Kaoia ataei bwa a na korei tamneia Tamara are i karawa, Iesu Kristo ao bon ngaira. Buokiia n nooria bwa e kanga rabwatara n titebo ma rabwatan Tamara are i Karawa ao Iesu.

Reirei ao Berita aika Tabu 132:19

Tamara are i Karawa e karekea bwa e na kona te utu n ikotaki n akea tokina.

Rinanon mwaakan te Uea ni kabaebae ao otenanti n te tembora, ara reitaki n ara utu e kona n reitinako n akea tokina ngkana ti kawakin ara berita aika tabu.

Waaki ni Kakukurei aika a Kona ni Karaoaki

• Buokiia ataei n iangoi katotoon bwaai ake a karaoi aika aki tiku n aki toki—amwarake ake a buakaka, uee ake a rai, ao a mwaiti riki. Kaota tamneia am utu, ao tibwaia bwa e kanga am namakin ibukiia. Kakoaua bwa te Uea e a tia ni karaoia bwa e na kona, rinanon otenanti n te tembora, ibukiia utu bwa a na teimatoa n aki toki.

• Kauka Reirei ao Berita aika Tabu nakon mwakoro 132, ao tuangiia ataei bwa aio te kaotioti nakon Iotebwa Timiti n taekan te mare ao utu. Kaota nakoia kibu 19, ao kotei taeka “rinanon ae akea tokina” ngkai ko wareki taekaia. Kaoia ataei bwa a na wareki taeka aikai ma ngkoe.

• Buokiia ataei bwa a na karaoi taore aika beebwa ake a tei ibukiia kain aia utu (taraa te iteraniba ni waaki ni kakukurei n te wiiki aei). Korokorei, ao karini n te tinaniku ke kanimwi n ikoti n te beebwa kiribi bwa e na tei ibukin te mwaaka ni kabaebae are e na karikiia ara utu bwa te utu ae akea tokina.

  

  Otenanti n te tembora e karekeia utu bwa a na ikotaki n akea tokina.

Reirei te Reirei: Ataei aika a Ikawai Riki

Reirei ao Berita aika Tabu 130:18–19

Tamara are i Karawa e tangiriira bwa ti na karekea te ataibwai ao te wanawana.

Bwaai aika a mwaiti ake ti karekei n te maiu aei a na bon aki kona n iriira nakon te maiu are imwina. Ma ara “atatai ao rabakau” e na (Reirei ao Berita aika Tabu 130:19).

Waaki ni Kakukurei aika a Kona ni Karaoaki

• Tuangiia ataei bwa a na tibwa ma ngkoe te bwai are a reiakinna n te reirei ke mai irouia aia karo. Kaoia bwa a na wareka Reirei ao Berita aika Tabu 130:18–19 ni kakaea bwa tera ae e na riki nakon ara atatai ao rabakaura n te maiu are imwiina.

• Tera kibu 19 ae reirei iaon arora ni karekea te ataibwai ao te rabakau? Ti na kanga ni mwakuri korakora ao n ongotaeka ngkai ti ukoukoria n reiakinna? (Ibukin riki iaon te taobiki aei, taraa “Reirei” inanon Ibukin Kakorakoraia Kairake [iteraniba 9–10].)

Reirei ao Berita aika Tabu 130:20–21; 132:5, 21–23

Kakabwaia a roko man te ongotaeka iroun te Atua.

Iangoia bwa e kanga te Uea ni kakabwaiako ngkana ko ongeaba nakon Ana tua. Tera te taneiai ae ko kona n tibwaia ma ataei bwa kona kaunga nanoia iai?

Waaki ni Kakukurei aika a Kona ni Karaoaki

• Anenea te kuna iaon te ongotaeka, n aron “Keep the Commandments” (Aia Boki n Anene Ataei 146–47), ao kaoia ataei bwa a na wareka Reirei ao Berita aika Tabu 130:20–21 ao 132:5. Buokiia ni kakaai taeka ao iango man koroboki aika tabu ake a titebo ma te anene. Ti na kanga ni karekei kakabwaia mairoun te Atua? Kaoiia ataei bwa a na tibwaia bwa a kanga n tia ni kakabwaiaki ibukin aia ongeaba nakon ana tua te Atua.

• Ikotaki wareka Reirei ao Berita aika Tabu 132:21–23, ao kaoia ataei bwa a na korei tamnei bwa a na tei ibukin te bwai are a reiakinna man kiibu aikai. Kaungaiia bwa a na kakauiango, ao ni kaotia bwa a kona ni karini n aia korotamnei ma tuua ke tuua ake a na buokiia n tiku iaon te kawai are e irariki nakon te maiu ae akea tokina.

Reirei ao Berita aika Tabu 131:1–4; 132:15, 19

Tamara are i Karawa e karekea ibukiia utu bwa a na ikotaki n aki toki.

N aki tarai aron ara utu are a mena inanona, ti kona ni karaoi rinerine ngkai bwa ti na tauraoi ni karekei kakabwaia n te utu ae akea tokina n taai aika a na roko.

Waaki ni Kakukurei aika a Kona ni Karaoaki

• Tuangiia tabeman ataei bwa a na wareka Reirei ao Berita aika Tabu 131:1–4 ao tabeman a wareka 132:15. Buokiia bwa a na kunea tera are e reirei iaona kiibu aikai iaon te mare. Rinei kingin kibuntaeka man 132:19 (n aron ae “ngkana e mare te mwaane ma buuna,” “n te berita ae akea tokina ,” “kabaeaki,”kakaonimaki nakon au berita ae tabu,” “e na teimatoa,” ao “n aki totoki”), ao tuangiia ataei bwa a na kakaai kibuntaeka aikai n te kibu. Tera ae a reireiniira kibuntaeka aikai ibukin taekan te mare?

• Anenea “Families Can Be Together Forever” (Aia Boki n Anene Ataei, 188), ke rinanon “Mwakoro 55: Te Kaotioti ibukin te Mare” (Karaki man Reirei ao Berita aika Tabu, 198). Tuangiia ataei bwa a na kakauongo nakon ao ni katauraoi n tibwaia bwa tera are ti riai ni karaoia bwa e aonga ara utu n akea tokina. Kakoaua bwa n aki taraa aron tein ara utu n te tai aei, ti kona ni katauraoira n riki bwa mwakoron te utu ae akea tokina.

Kaungaa te Kamatebwai n te Mweenga

Kaoiia ataei bwa a na tuangiia aia utu mwaitin tangiraia irouia ao n tangiria ni katiteuanaaki bwa te utu ae akea tokina.

Kanakoraoan Ara Anga reirei

Kona kakai namakin nakon aron nako te utu. “Ataei n taai aikai a mena inanon rawawata aika a kakaokoro n aron nako te utu. … [Ti] riai n roko irouia [naake] a namakina te maroa, kitanaki, ke i tinanikun te oo” (Neil L. Andersen, “Whoso Receiveth Them, Receiveth Me,” Ensign ke Riaona, Meei 2016, 49, 52).