“Nobembwa 15–21. Reirei ao Berita aika Tabu 133–134: ‘Katauraoingkami ibukin Rokon te Tia Iein,’” Nakomai, Iriirai—Ibukin te Moanrinan: Reirei ao Berita aika Tabu 2021 (2020)
“Nobembwa 15–21. Reirei ao Berita aika Tabu 133–134,” Nakomai, Iriirai—Ibukin te Moanrinan: 2021
Noria te Tia Iein, iroun Elizabeth Gibbons
Nobembwa 15–21
Reirei ao Berita aika Tabu 133–134
“Katauraoingkami ibukin rokon te Tia Iein”
Iangoa kainnanoia ataei ake ko reireiniia—naake a kamatebwai ao n reirei inanon mweengaia ao naake a aki. Ko na kanga ni buokiia n reireiniia i bon irouia ni bwaai ake a reiakin?
Korei Am Namakin
Kaungaa te Tibwatibwa
Kaota te tamnei are ko a tia ni kabongana n am reirei ae ai bon tibwa ngkai naba n te Moanrinan, ao kaoiia ataei bwa a na tibwaua are a uringnga man te reirei.
Reirei te Reirei: Ataei aika a Uarereke
Reirei ao Berita aika Tabu 133:19–21, 25
Iesu Kristo e na manga roko.
Ni mwakoro 133, te Uea e kabwarabwara Manga Okina ao ni kaoiia Ana aomata bwa a na katauraoiia ibukin tai ae mimitong aei. Ko na kanga ni buokiia ataei ni kakantaninga okin te Tia Kamaiu?
Waaki ni Kakukurei aika a Kona ni Karaoaki
-
Karabaa tamnein Kauaokin te Tia Kamaiu iakuun te kunnikai, kanga te kunnikai ae te keeten (ko kona ni kabongana te tamnei inanon te kamataata n te wiiki aei inanon Nakomai, Iriirai—Ibukiia Aomata n Tatabemaniia ao Utu ke Bokin Tamnein te Euangkerio, nambwa. 66). Kaoiia ataei bwa a na ikaruoruo ni kakamwakura te “keeten” ni kaukia aongkoa are a taraa tinaniku man te wintoo. Tuangiia bwa a na tibwauaia bwa e kanga aron aia namakina ngke arona bwa a taraa tinaniku man te wintoo ao a noora Iesu n ruorikaaki mai karawa. Wareka te kibuntaeka “naako ngkami bwa kam na butimwaia” (te kibu 19), ao bukiia ataei ni kaokioka te kibuntaeka.
-
Iaan aia kaintekateka ataei n tatabemaniia, karabaa te tamnei ae kaota te bwai ae ti kona ni karaoia ni katauraoira ibukin Kauoakin te Tia Kamaiu (n aron warekan booki aika tabu, tibwaua te euangkerio, ke ni beku ibukiia ara utu). Anganiia ataei bwa a na kakaei tamnei, ao maroroakinna a kanga bwaai aikai ni buokiira ni katauraoira ni butimwaea te Tia Kamaiu ngkana E a oki.
-
Ikotaki anenea te kuna iaon Manga Okin te Tia Kamaiu, n aron“When He Comes AgainAia Boki n Anene Ataei, (82-83). Tibwaua am tangira ibukin te Tia Kamaiu ao am namakin ibukin Okina nako aon te aba. Kaoiia ataei bwa a na tibwaua naba aia namakin.
Reirei ao Berita aika Tabu 133:52–53
Iesu Kristo e tangira ao n akoi.
Kiibu aikai a kabwarabwarai tabeua mwaitin kawai ake e a tia ni kaota iai Ana “tangira n akoi” nakoia Ana aomata. Tera ae ko kona ni karaoia ni buokiia ataei n namakina ana tangira te Tia Kamaiu ibukiia?
Waaki ni Kakukurei aika a Kona ni Karaoaki
-
Kaota te tamnei are e kaotia bwa Iesu e tangira ao man akoi (taraa Bokin Tamnein te Euangkerio, nambwa 42, 47). Tuangiia ataei bwa a na tibwauai tabeua bwaai are e a tia ni karaoia Iesu ni kaota Ana tangira ao ana akoi. Wareka te kibuntaeka “a na taekina ana tangira n akoi aia Uea” (te kibu 52), ao buokiia ataei n iangoi kawai ake a na tuangiia aomata taekan ana tangira te Tia Kamaiu.
-
Ikotaki n anenea te anene ibukin ana tangira te Tia Kamaiu, n aron “Jesus Is Our Loving Friend” (Aia Boki n Anene Ataei,58). Kaota am koaua bwa e kanga ni kaota ana tangira te Tia Kamaiu ibukim.
Reirei ao Berita aika Tabu 134:5
E tangirai te Uea bwa N na ongeaba n te tua.
Ataei aika uarereke n taainako ao iai kaetieti aika a na irii inanon mweengaia, n te reirei, ao taabo nako. Ko kona ni buokiia ni kamataataia bwa e kantaningaira te Uea bwa ti na iri nanon kaetieti ao tuua inanon ara kaomiuniti ao i abara.
Waaki ni Kakukurei aika a Kona ni Karaoaki
-
Kaoiia ataei bwa a na karaoa te takakaro ae bebete n akea te tua ae a iria, ao ngkanne anganiia bwa a na takakaro ma taian tua. A kanga tuua aikai ni buokiira? Kaota am kakaitau ibukin tuan te aba.
-
Buokiia ataei bwa a na kaokioka te katebwi ma uoua n taekan te onimaki. Katuruturui boto n taeka, n aron “ongotaeka, karinea, ao boutoka,” ao maroroakinna ma ataei nanon taeka akanne. Tibwauaia ma ngaiia bukin tera ngkai e kakawaki te ongotaeka nakon te tua.
Reirei te Reirei: Ataei aika a Ikawai Riki
Reirei ao Berita aika Tabu 133:4–5, 14–15
E tangirai te Uea bwa N na itiaki.
Reirei ao Berita aika Tabu 133 e kona ni buokiia ataei ni kamataataia bwa a na kanga ni kawakiniia bwa a na itiaki man ana kairoro te aonaaba are a katobibiaki iai.
Waaki ni Kakukurei aika a Kona ni Karaoaki
-
Kaoiia ataei bwa a na wareka “Bwabera, Bwaburon” n te Kairi nakon Booki aika Tabu (scriptures.ChurchofJesusChrist.org) ni kakaea bwa tera Bwaburon ao e tei ibukin tera. Imwina bootaki n wareka Reirei ao Berita aika Tabu 133:4–5, 14–15. Tera ae nanonaki n “kam na kitana Bwaburon”? (te kibu 5). Baikara taabo ao bwaai ae e tangiria te Uea bwa ti na kararoaira mai iai? Tera ae ti kona ni karaoia n totokoi?
-
Kamenaa te kanikina n iteran te ruu ae kangai “Tion,” ao kamenaa teuana te kanikina n iterana are teuana ae e kangai “Bwaburon.” Iaon mwakoro ni beeba ao korei taekan man Reirei ao Berita aika Tabu 133:4–5, 14–15 are e kabwarabwara tao Tion ke Bwaburon (n aron “buakaka,” “itiaki,” ke “kamaunaaki”), ao kaoiia ataei bwa a na katikui beeba n tatabeua iaan kanikina ae a riai ni mena iai.
Reirei ao Berita aika Tabu 133:19–25, 46–52
Iesu e na tautaeka iaon te aba.
E taku Unimwaane D. Todd Christofferson, “E rangi ni kakaawaki katauraoan te aonaaba imwain Manga Okin te Uea Iesu Kristo” (“Katauraoi imwain Okin te te Uea,” Ensign ke Riaona, Meei 2019, 81). Ko na kanga ni buokiia ataei ni kamataataia aroia ni kona n ira waakin te mwakuri ae moan te kaangaanga aei?
Waaki ni Kakukurei aika a Kona ni Karaoaki
-
Kaota te tamnei man te kamataata n te wiiki aei inanon Nakomai, Iriirai—Ibukiia Aomata n Tatabemaniia ao Utu, ao kaoiia ataei bwa a na korei ni karinani bwaai n aia atatai ibukin Kauaokin Iesu Kristo. Ngkanne, kabongana Reirei ao Berita aika Tabu 133:19–25, 46–52, kaoiia bwa a na karini bwaai nakon baike a korei. Tibwaua am koaua bwa te Kauaoki bon te bong ae kakukurei ibukiia ake a raoiroi.
-
Ni buokiia ataei ni kamataataia te kibu19, taetae nakoia bwa e kanga aron te tia iein te aine ni katauraoi ibukin ana mare (tao temanna ae e a tia ni mare n te tai ae nako e kona n ibuobuoki n te marooro aei). E kanga n ae ti te arona arora ma te tia mare te aine ni katauraoi “ibukin okin te tia Iein te mwaane,” Iesu Kristo? Ngkana ko taku n am iango bwa e ibuobuoki, manga rinanoia ma ataei te taetae ni kaikonaki ibukiia kibono ake tengaun (taraa Mataio 25:1–13). Bukin tera ngkai e kakawaki te katauraoi ibukin Kauoakin te Tia Kamaiu? Tera ae ti kona ni karaoia bwa ti na tauraoi?
Reirei ao Berita aika Tabu 134:1–2
E tangirai te Uea bwa N na ongeaba n te tua.
E ngae ngke a kakaokoro aekakin tautaeka ni katobibia te aonaaba, e tangiriira te Uea bwa ti na “boutokai ao ni kateimatoai … tautaeka ake [ti] maeka iai” (Reirei ao Berita aika Tabu 134:5).
Waaki ni Kakukurei aika a kona ni Karaoaki
-
Kaoiia ataei bwa a na korei ni karinani kaetieti ke tuua ake a ongeaba iai. E na kanga aron te maiu ngke arona bwa akea temanna ae ongeaba n tuua aikai? Wareka Reirei ao Berita aika Tabu 134:1–2 ma ataei, buokiia ni kamataataia taeka ke kibuntaeka nako ake aki ota iai. Bukin tera ngkai e tangiria te Uea bwa e na iai ara tautaeka ao ara tua?
-
Korei taeka ke kibuntaeka n tatabeua nako man te kaitiua ao te katebwi ma uoua n taekan te onimaki ni kaokoroi iaon mwakoro ni beeba. Kamaenakoi taian beeba, ao tuangiia ataei bwa a na uaia ni mwakuri ni katikui raoi ni nneia. Ti kanga ni kaotia bwa ti kakoaua tera ae ti reiakinaki man taekan te onimaki aei?
Kaungaa te Kamatebwai n te Mweenga
Anganiia ataei n tatabemaniia bwa a na titirakiniia kaain aia utu ni mweengaia. N aron te katooto, ngkana ko reiakina taekan Kauaokin te Tia Kamaiu, e kona te ataei n titiraki, “Tera ae ti kona ni karaoia ni katauaoi ibukin manga okin Iesu?”
Kanakoraoan Ara Anga reirei
Ukoukoria bwa kona mataata irouia ataei ake ko reireiniia. Ko kinaia ataei ake ko reireiniia. Iango inanon te kamataata aei a na riai ni bitaki ibukin buokan kainnanoia. Ibukin buokam, tarai ni kabane waaki ni kakukurei ake a karinanaki n te kamataata aei, tiaki tii ake a kaineti nakon aia ririki ataei ake ko reireiniia. (Taraa Reirei n ana Kawai te Tia Kamaiu,7.)