Karabuti ae Carthage

Nobembwa 22–28

Reirei ao Berita aika Tabu 135–136

E “A Tia ni Kamatoa Ana Mition ao Ana Mwakuri ma Oin Raraana”

Ngkai ko katauraoi n anga reirei iaon Reirei ao Berita aika Tabu 135–36, tarai reirei are e a tia n anaaki iai nanom inanon maium. Iangoia a kanga iango inanon te kamataata aei ni buokiia ataei n reiakina ao ni maiuakin reirei aikai.

Korei Am Namakin

Kaungaa te Tibwatibwa

Kaoiia ataei bwa a na tibwaua te bwai are a uringnga are a reiakinna n te ririki aei ae taekan Iotebwa Timiti ao tera are e a tia ni kakoroa bukina. Kaoti tamnei man te ririki aei Nakomai, Iriirai—Ibukiia Aomata n Tatabemaniia ao Utu ke man iteraniba n te waaki ni kakukurei ake mai imwaina ibukin buokaia.

Reirei te Reirei: Ataei aika a Uarereke

Reirei ao Berita aika Tabu 135:1–2

Iotebwa Timiti ao Hyrum Smith a anga maiuia ibukin ana euangkerio Iesu Kristo.

Rongorongon tiringakin Iotebwa ao Hyrum Smith e kona ni buokiia ataei n namakina te kakaitau ibukin aia koaua ao aia anganano mwaane aika a kakannato aikai.

Waaki ni Kakukurei aika a Kona ni Karaoaki

• Kabongana “Mwakoro 57: E a Tiringaki te Burabeti” (Karaki man Reirei ao Berita aika Tabu, 201–5) n tuangiia ataei bwa a kanga ni mate te Burabeti Iotebwa Timiti ao tarina ae Hyrum Smith. Ke angan temanna te ataei bwa e na karaki. Kaota am koaua ae Iotebwa Timiti bon te burabeti ae koaua ao e anga maiuna ibukin te Uea ao Ana euangkerio.

• Tibwauaia ma ataei tabeua kibuntaeka man kibun ana Boki Moomon ae Hyrum Smith e wareware imwain nakona nakon te Karabuti ae Carthage, ae koreaki n Reirei ao Berita aika Tabu 135:5. Maroroakinna bwa e kanga te kibu aei ni karaua nanon Hyrum. Tibwauai kiibu are anganaiko te kamanoaki ngke ko raraoma ke n nanokawaki.

Reirei ao Berita aika Tabu 135:3

Iotewa Timiti bon ana Burabeti te Atua.

Rinanon te ririki, a tia n reiakinaki ataei te bwai are e kaotia te Uea rinanon te Burabeti Iotebwa Timiti. Ko kona ni buokiia n uringnga ao ni kakaitau bwa e kanga ana mwakuri Iotebwa ni kakabwaiai maiuia.

Waaki ni Kakukurei aika a Kona ni Karaoaki

• Kaoti bwaai ake a tei ibukin ana mwakuri te Burabeti ae Iotebwa, n aron ana Boki Moomon, Reirei ao Berita aika Tabu, ke tamneia mitinare ke te tembora. Kabonganai kibuntaeka man Reirei ao Berita aika Tabu 135:3, tibwauaia ma ataei tabeua bwaai ake e karaoi te Uea rinanon Iotebwa Timiti ibukin kamaiuakira. Kaoiia ataei bwa a na rinea teuana mai ibuakon bwaai aikai ao n tibwauaia bukin tera ngkai a kakaitau ibukina.

• Ngkai ataei a karani iteraniba ibukin waaki ni kakukurei n te wiiki aei, anene ke katanga kunan Iotebwa Timiti, n aron “Neboa Teuare” (Anene n Taromauri, nambwa 27). Tibwaua am namakin ibukin te Burabeti.

  

  Te Burabeti mai Amerika, roun Del Parson

Reirei ao Berita aika Tabu 136

Te Atua e anganiira tuua ibukin buokara.

Aika Itiaki a kaitara ma kaangaanga aika rangi ni mwaiti inanon ririki imwiin maten Iotebwa Timiti. E kanga ana reirei te Uea are e anganiia Aika Itiaki ni buokiia ataei ake ko reireiniia?

Waaki ni Kakukurei aika a Kona ni Karaoaki

• Tibwauaia ma ataei tabeua kakaewenako ake a kaitara ma ngaai Aika Itiaki ngke a kitana Nauvoo ao n ikotaki i Winter Quarters (taraa mwakoro 60 ao 62 inanon Karaki man Reirei ao Berita aika Tabu 211–16, 222–24). Kaaki tamnein te Tembora are Nauvoo n iteran te ruu, ao karaoa te tabo ni katantan iaon are iterana—tao ma taian burangketi ao tabeua kaintekateka ke te taibora. Kaoiia ataei bwa a na ikotaki irarikin te tamnei, ao tuangiia bwa teuana ma te iterana te ririki imwin maten Iotebwa Timiti, a kairoroaki Aika Itiaki bwa a na kitana Nauvoo. Kaoiia ataei bwa a na boonako ni kararoaia man te tembora ao n ikotaki n te tabo ni katantan n tei ibukin te mwananga nako Winter Quarters.

• Kabwarabwara ae te Uea e anga te kaotioti nakon Brigham Young, e kuneaki n Reirei ao Berita aika Tabu 136, ni buokiia Aika Itiaki ngkai a mwananga nako Salt Lake Valley. Wareki tabeua kibuntaeka man mwakoro 136 ae iai inanona reirei are a kona ni mataata iai ataei, ao kaoiia bwa a na karaoa te kaotioti ke korea tamnein te bwai are a tuangaki Aika Itiaki iroun te Uea bwa a na karaoia inanon mwanangaia. N aron te katooto, a kona ataei ni korei oin tamneia ngke a kaoka te bwai are a tangoia mairoun raoraoia, ke a kona n anenea kunan te Moanrinan ngkai a mwamwaie ao ngkoa are a katobibia te kaembwaea (tarai kiibu 25, 28).

Reirei te Reirei: Ataei aika a Ikawai Riki

Reirei ao Berita aika Tabu 135

Iotebwa Timiti ao Hyrum Smith a anga maiuia ibukin ana euangkerio Iesu Kristo.

Ongoraeakinan aia anganano Iotebwa Timiti ao Hyrum Smith e kona ni kakorakora aia onimaki ataei ao nanoia ae koaua ibukin aia kakoaua.

Waaki ni Kakukurei aika a Kona ni Karaoaki

• Tuangiia ataei bwa a na tibwaua aia atatai bwa a kanga n tiringaki Iotebwa ao Hyrum Smith. Ngkana a kainnanoa te ibuobuoki, kaota nakoia Reirei ao Berita aika Tabu 135:1 ke “Mwakoro 57: E a Tiringaki te Burabeti” (Karaki man Reirei ao Berita aika Tabu, 201–5). Kaoiia ataei bwa a na iangoia aongkoa are a maeka i Nauvoo ngke e a mate te Burabeti. Tuangiia bwa a na tibwauaia bwa e kanga aron aia namakin. Tibwa am koaua ibukin Iotebwa Timiti, ao kaoiia ataei bwa a na karaoia naba.

• Kaoti tamneiia burabeti (taraa Bokin Tamnein te Euangkerio, nambwa. 14, 18, 67). Tera bwaai tabeua aika a tuangaki burabeti iroun te Atua bwa a na karaoi? Kabwarabwara bwa e berita te Uea bwa e na kakabwaiaia Ana burabeti ibukin aia anganano ake a karaoia inanon Ana mwakuri (taraa Mataio 10:39).

Reirei ao Berita aika Tabu 135:3

Iotebwa Timiti bon ana Burabeti te Atua.

N aroia burabeti ni kabane, Iotebwa Timiti e kaotiota koauan Iesu Kristo ao n reireniira bwa ti na kanga n Nakoina. Buokiia ataei n nooria bwa e kanga Iotebwa Timiti ni kakoroa nanon ana mition.

Waaki ni Kakukurei aika a Konaa ni Karaoaki

• Bootaki ni wareka Reirei ao Berita aika Tabu 135:3, ao tuangiia ataei bwa a na ataia bwa tera are e a tia ni kakoroa bukina te burabeti. Koroi iaon te burakibooti baike a kunei. Kaoiia ataei bwa a na rinea teuana mai buakon bwaai aikai ao n tibwauaia bukin tera ngkai a kakaitabu ibukina.

• Kaungaia ataei bwa a na iangoa raoraoia ke temanna ae tangiraki irouia are akea ana atatai iaon Iotebwa Timiti. Tera ae a na taekinna ngkana te aomata anne e titiraki, “Bukin tera ngkai e rangi ni kakawaki Iotebwa Timiti iroum?” Kaoiia ataei bwa kataneiaia n te bwai are a na taekinna nakon te aomata aei.

Reirei ao Berita aika Tabu 136:4, 10–11, 18–30

E kona ni kakabwaiaai te Uea ngkana I a rootaki.

Imwin maten Iotebwa Timiti, a kakioaki nako Aika Itiaki mai Nauvoo. A kairaki iroun Brigham Young nako Winter Quarters, ike a katauraoi riki ibukin te mwananga ae moan te abwabwaki nako Salt Lake Valley.

Waaki ni Kakukurei aika a Kona ni Karaoaki

• Kakimototoa taekan te bwai are a rinanona Aika Itiaki imwin tiringakin te Burabeti Iotebwa Timiti (taraa mwakoro 58, 60, ao 62 n Karaki man Reire ao Berita aika Tabu, iteraniba 206–8, 211–16, 222–24). Kaoiia ataei bwa a na iangoia e na kanga aron aia namakin ngke arona bwa a kitani mweengaia ao ni kunea te tabo ae boou ni maeka inanon te rereua. Kabwarabwara bwa n Reirei ao Berita aika Tabu 136, te Uea e anga ana kaetieti ibukin buokaia Aika Itiaki inanon mwanangaia. Katabeia ataei n tatabemaniia tatabeua kiibu man te kaotioti aei, n aron kiibu 4, 10–11, 18–30, ao tuangiia ataei bwa a na kakaea te bwai ae na kona ni buokiia n raoraomaia ke ni maakuia.

• Buokiia ataei n iangoi kaangaanga ake a kaitarai aomata n te bong aei. Kaoiia bwa a na kakaea te bwai inanon mwakoro 136 are a na tibwauaia are e na kaunga temanna are e rinanon te aekaki ni kaangaanga aei. A kona naba ataei ni kunei rongorongo aika kaunganano inanon “Waaki Ngkami, Aika Kam Raoiroi” (Anene n Taromauri, nambwa 30), te kuna are aneneia inanon mwanangaia.

Kaungaa te Kamatebwai n te Mweenga

Kaoiia ataei bwa a na tibwauaia ma aia utu ke raoraoia bukin tera ngkai a kakaitau ibukin te Burabeti Iotebwa Timiti.

Kanakoraoan Ara Anga reirei

Ataei a rangi n takaremwaremwa. N taai tabetai ko na bae n namakinna bwa korakoraia ataei bon te tutuki man aia kamatebwai. Ma ko kona ni karikirakea aroia ni kamwakuri aia iango ni kaoiia bwa a na korotamnei, n anene, ke ni karaoa te kaotioti iaon reirein te euangkerio (taraa Reirei n ana Kawai te Tia Kamaiu, 25–26).