Iotebwa e nooria tamana, tinana, ao tarina n te abanuea are te tiretio (Joseph Smith’s Vision of the Celestial Kingdom, Robert Barrett).

Nobembwa 29–Ritembwa 5

Reirei ao Berita aika Tabu 137-138

“Te Mii ni Burabeti Ibukin Kamauaia Maate”

Tarai reirei man kaotioti aikai ake a na taraa ni kakaawaki ibukiia ataei ake ko reireiniia. Ko na kanga ni buokiia bwa a na mataata n reirei aikai?

Korei Am Namakin

Kaungaa te Tibwatibwa

Kaota tamnein Iesu Kristo n te aba n tamnei, n aron are n te kabwarabwara n te wiiki aei n Nakomai, Iriirai—Ibukiia Aomata n Tatabemaniia ao Utu. Kaoiia ataei bwa a na tibwa aia atatai iaon te aonaaba n tamnei.

Reirei te Reirei: Ataei aika a Uarereke

Reirei ao Berita aika Tabu 137:1–5

E a tia te Atua n anganai te kawai n raoniia au utu n aki toki.

N te mii, Iotebwa Timiti e nooriia kain ana utu n ikotaki n te abanuea are te tiretio. Ko na kanga ni kabongana miina n reireiniia ataei bwa utu a kona n ikotaki n aki toki?

Waaki ni Kakukurei aika a Kona ni Karaoaki

• Kaota tamnein temanna n am utu, ao marooro bwa mwaitira tangiran kan raonakin teuanne ke neienne n te abanuea are te tiretio. Kabwarabwara bwa tarin Iotebwa Timiti ae Alvin e mate ngke te ataeinimwaane ao Iotebwa e rangi n tangiria ni kan nooria. Wareka Reirei ao Berita aika Tabu 137:1, 5, ao titirakiniia ataei bwa antai are e nooria Iotebwa Timiti ni miina n te abanuea are te tiretio (taraa naba Karaki man Reirei ao Berita aika Tabu, 152–53). Kaoia ataei bwa a na katangainai baia ni kaota aron tangirakiia aia utu, ao anganiia bwa a na tibwaia bwa bukin tera a tangiria ni kan raoniia aia utu n te abanuea are te tiretio.

• Kabongana Reirei ao Berita aika Tabu 137:1–5 ao te iteraniba ni waaki ni kakukurei n te wiiki aei ni buokiia ataei bwa a na kunei kabwarabwaraan miin Iotebwa Timiti n te abanuea are te tiretio. Kaoia bwa a na korea tamneia ao aia utu iaon te iteraniba ni waaki ni kakukurei ngkai ko katanga ke n anenea te kuna iaon te utu, n aron “Families Can Be Together Forever” (Aia Boki n Anene Ataei, 188).

Reirei -Ao Berita -Aika a Tabu 138:6, 11

Te Tamnei ae Raoiroi e kona ni buokai ni kaotaai ni booki aika tabu.

Koroboki aika a tabu n tabetai e kona n rang kaangaanga bwa kona ota iai, riki irouia ataei. Reirei -Ao Berita -Aika a Tabu 138:11 e reirei bwa te Tamnei ae Raoiroi e kona ni kauki “matan ota[ra].”

Te Tamnei ae Raoiroi e kona ni buokai ni kaotaira ni booki aika tabu.

Waaki ni Kakukurei aika a Kona ni Karaoaki

• Kaota tamnein Beretitenti Joseph F. Smith (taraa Gospel Art Book, no. 127). Kabwarabwara bwa ngaia te kaonoman ni Beretitenti n te Ekaretia, ao n te bong teuana e wareware ni koroboki aika a tabu ao n iangoi (iangoia taekana bwa tera ae a kananonaaki iai). Ngkai ko wareka Reirei ao Berita aika Tabu 138:6, 11, kaoia ataei bwa ai aongkoa ngaiia Beretitenti Smith ao ni karaoi kaina aika a na nakoraoi ma taekaia.

• Tuangiia ataei taekan te tai are ko iangoa iai te bwai teuana man koroboki aika a tabu ao te Tamnei ae Raoiroi e buokiko ni kamataatako iai. Anenea te korana te kuna iaon te reirei, n aron “Search, Ponder, and Pray” (Aia Boki n Anene Ataei, 109). Tera ae taekinna te kuna aei ae ti riai ni karaoia bwa ti na mataata iai n koroboki aika a tabu?

Reirei ao Berita aika Tabu 138:18–35

Ni kabane natin Tamara arei Karawa e na reke aia tai n ongo taekan te euangkerio.

Imwiina ngke e tia ni tauraki Iesu Kristo, E kawariia aika Itiaki n te aonaaba n tamnei. E tuangiia bwa a na reirei taekan te euangkerio nakoia naake a tuai ni karekea.

Waaki ni Kakukurei aika a Kona ni Karaoaki

• Kaota tamnein te ruanimate (taraa Gospel Art Book, nos. 58, 59 ke tamnein te Baibara, nambwa. 14), ke korea tamnein te ruanimate iaon te burakibooti. Kaota tamnein te Tia Kamaiu n te aba n tamnei ngkai rabwatana e mena n te ruanimate (n aron ae teuana n bwaai aika a kakaawaki n te wiiki aei inanon Nakomai, Iriirai—Ibukiia Aomata n Tatabeman ao Utu). Ngkai ko karaoia, anga titiraki ni buokiia ataei bwa a na atai kiing ake a kabwarabwaraaki inanon Reirei ao Berita aika Tabu 138:18–19, 23–24, 27–30, n aron antai ae e kawariia Iesu, tera aia namakin, ao tera ae e tuangiia bwa a na karaoia.

• Kaota tamneia mitinare (taraa Gospel Art Book, nos. 109, 110), ao tuangiia ataei bwa a na tibwaua te bwai are a karaoia mitinare. Ko kona naba ni kaoia bwa a na karaoi kaotioti tabeua iaon bwaai ake a karaoi mitinare. Wareka Reirei ao Berita aika Tabu 138:31–34 nakoia ataei. Kabwarabwara bwa n ai aroia mitinare ake ikai iaon te aba, iai naba mitinare n te aba n tamnei ake a reireiniia aomata ikekei.

Reirei te Reirei: Ataei aika a Ikawai Riki

Reirei ao Berita aika Tabu 137:1–5

Te Atua e a tia n anganai te kawai n raoniia au utu n aki toki.

Iotebwa Timiti e karekea te kaotioti n te abanuea are te tiretio ao e nooria ana karo ao tarina ae Alvin ikekei. Te mii aei e reireiniia bwa ngkana ti raoiroi, ao ara reitaki n ara utu e kona n reitinako nakon te maiu are imwiina.

Waaki ni Kakukurei aika a Kona ni Karaoaki

• Kaoia ataei bwa a na wareka Reirei ao Berita aika Tabu 137:1–5 ao a korea tamnein te bwai are a warekia (taraa naba te iteraniba ni waaki ni kakukurei n te wiiki aei). Tera ae e a tia n namakinna Iotebwa Timiti ngke e noriia kain ana utu n te abanuea are te tiretio?

• Kaota te witeo “Utu a Kona n Ikotaki n Akea Tokina,” (ChurchofJesusChrist.org), ke anenea te kuna iaon taekaia utu, n aron “Families Can Be Together Forever” (Aia Boki n Anene Ataei, 188). Tera ae reireiniira te witeo ke te anene iaon te bwai are ti kona ni karaoi bwa e na teimatoa n akea tokina?

Reirei ao Berita aika Tabu 138:1–11

Ngke I iangoi koroboki aika a tabu, te Tamnei ae Raoiroi e kona ni buokai ni kaotaai iai.

Tera ae a kona n reiakinna ataei man ana banna ni katooto Beretitenti Joseph F. Smith are e na kona ni katamaroa riki aroia ni kamatebwai ni koroboki aika a tabu?

Waaki ni Kakukurei aika a Kona ni Karaoaki

• Kaoia ataei bwa a na wareka Reirei ao Berita aika Tabu 138:1–11, ao buokiia bwa a na korea teuana te tiententi n tiamwarii iaon ana taneiai Beretitenti Joseph F. Smith’. Tera ae e karaoia are e kairia nakon te mii ae moan te tamaroa? Tera ae nanonaki n iango ke n ururing iaon koroboki aika tabu?

• Titirakiniia ataei bwa tera ae a na karaoia ngkana iai aia titiraki iaon taekan te euangkerio. Tibwauan tabeua katooto man koroboki aika a tabu ke man oin maium n te tai are ko iangoi iai koroboki aika a tabu a uota te kamatataaki iroun te Tamnei (taraa, ibukin te katooto, 1 Nibwaai 11:1–6; Reirei ao Berita aika Tabu 76:19–24; Joseph Smith—History 1:11–12).

Reirei ao Berita aika Tabu 138:12–35

Ni kabane natin Tamara arei Karawa e na reke aia tai n ongo taekan te euangkerio.

Beretitenti Joseph F. Smith e a ataia bwa te mwakuri n tataekinan te euangkerio e reitinako n te aba n tamnei. Te mwakuri e kakoaua bwa ni kabane a na reke aia tai ni butimwaea te euangkerio.

Waaki ni Kakukurei aika a Kona ni Karaoaki

• Iaon te burakibooti, korei rinanin kibu tabeua man mwakoro 138. Imwiina karinanii, n teina ae kaokoro, taeka ake a kauarerekei rinanin kiibu akanne. Kaoia ataei bwa a na katoatoai taeka ma kibu aika eti. Kiibu a kona ni kairaki 12–16 (tamnei aika raoiroi a ikotaki n tataninga kaotin Iesu), 18–19 (te Tia Kamaiu e kaoti nakoia tamnei aika raoiroi), 29–30 (Iesu e rineia taan uarongorongo bwa a na tataekina te euangkerio), 31–35 (tamnei aika raoiroi a tataekina te euangkerio), ao a bati riki. Imwiin aia ikatoatoa ataei, tuangiia bwa ana tibwaua te bwai ae a reiakinna man kiibu aikai.

• Tuangiia tabeman ataei bwa a na wareka Reirei ao Berita aika Tabu 138:33 ni kakaei reirein te euangkerio ake a reireinaki iai tamnei ake a tia ni mate. Tuangiia ataei ake tabeman bwa a na wareka te reirei are e taekinaki n Taekan te Onimaki 1:4. Tera bwaai aika titebo inanon kiibu aikai, ao tera ae e kaokoro? Tera ae reireiniira aei ibukin Tamara are i Karawa ao Ana babaire?

Kaungaa te Kamatebwai n te Mweenga

Kaoia ataei bwa a na bairea te tai n te wiiki aei are a na iangoa raoi iai koroboki aika a tabu ake a wareki.

Kanakoraoan Ara Anga reirei

Kaungaa te karinerine. Buokiia ataei bwa a na ataia ae mwakoron te karinerine ae moan te kakawaki bon iangoakin Tamara are i Karawa ao Iesu Kristo. Ko kona ni kauringiia ataei bwa a na karinerine rinanon aia anene n aki kaberoro ke ni katangnga een te anene mani wiia kunan te Moanrinan ke kaotan tamnein Iesu.