Nakoia ni Kabane Membwa aika a Tau aika Mwaane, iroun Emma Allebes

Ritembwa 6–12

Te Taekan te Onimaki ao Katanoata ae Kariaiakaki 1 ao 2

“Ti kakoaua”

Ngkai ko kamatebwai n te wiiki aei ao ni karaoi babaire n angareirei, iangoia bwa kona kanga ni buokiia ataein am kiraati ni kakorakora aia koaua ni koauan te euangkerio ae beebete.

Korei Am Namakin

Kaungaa te Tibwatibwa

Kakiba te booro nakon te ataei, ao tuangnga bwa e na tibwa te bwai are teuanne ke neienne e kakoaua ibukin Iesu Kristo ke Tamara are i Karawa. Kaokiokia ni karokoa e reke aia tai ataei n tatabemaniia n tibwatibwa.

Reirei te Reirei: Ataei aika a Uarereke

Te Taekan te Onimaki

I kakoaua ana euangkerio Iesu Kristo.

Ko kona ni kabongana Taekan te Onimaki n rinanona ma ataei tabeua koaua aika a beebete n ana Ekaretia Iesu Kristo. Bukin tera e kakaawaki bwa ataei ake ko reireiniia a kakoauai koaua aika a beebete aikai?

Waaki ni Kakukurei aika a Kona ni Karaoaki

• Rinei tabeua taekan te onimaki ake ko namakinna bwa a kakaawaki ibukiia ataei ake ko reireiniia. N tatabeua Taekan Te Onimaki, tibwa te tamnei (taraa te iteraniba n te waaki ni kakukurei ibukin te wiiki aei) ke te karaki (man koroboki aika a tabu ke ni maium) are e kabwarabwara te koaua are e taekinaki n taekan te onimaki anne. Tuangiia ataei bwa bukin tera te koaua anne e kakaawaki iroum, ao anganiia bwa a na tibwaia bwa bukin tera e kakaawaki ibukiia.

• Kakaai anene n taromauri ke aia anene ataei are e kona n ibuobuoki nakoia ataei te korana ke e mwaiti riki man taekan te onimaki. Tao a kona ni buokiko ataei n rineia. Ikotaki n anene, ao buokiia ataei n nooria bwa e kanga te anene n irekereke ma taekan te onimaki.

Taekan te Onimaki 1:9; Katanoata ae Kariaiakaki 1 ao 2

Te Uea E kaira Ana Ekaretia rinanon Ana burabeti.

Ngkai kain te Ekaretia a kaitara ma kakaewenako aika a kakaokoro, ti kona ni karekea te rau n ataia bwa Tamara are i Karawa e tauraoi nanona ni katauraoi kaotioti aika a na kairiira. Buokiia ataei ake ko reireiniia ni kakorakora aia onimaki are te Atua e kaira te Ekaretia rinanon te burabeti ae maiu.

Tamara are i Karawa e kairiira rinanoia ana burabeti.

Waaki ni Kakukurei aika a Kona ni Karaoaki

• Kaoti koroboki aika a tabu aika bwanin ao tamnein te burabeti ae maiu (ke te maungatabu ae tibwa karaoaki n te Ensign ke Riaona). Buokiia ataei n rineia bwa tera te kanoa are e irekereke ma te kibuntaeka are “nikabane ake e a tia ni kaoti te Atua” ao te kanoa raa are e irekereke ma te kibuntaeka “ni kabane ake E na kaoti ngkai” (Taekan te Onimaki 1:9).

• Tiringa te taura, ao katoka tamnein Iesu Kristo iaon te burakibooti. Kaota te tooti iaon te tamnei ni kabwarabwara aron te burabeti, n aron te tooti, ni buokiira n noora te Tia Kamaiu n ae itiaki riki.

• Kakaai kawai aika a beebete ni karaoan te bwai teuana, n aron te amwarake ke te bwai n takakaro. Irii kaetieti ma ataei, ao kabwarabwara bwa rinanon te burabeti, Tamara are i Karawa e anganiira kaetieti bwa a na buokiira n okiria ni maiu ao ni maeka ma Ngaia. Tera bwaai tabeua aika e a tia n reireiniira iai te burabeti bwa ti aonga ni kona n oki nakon te Atua?

Reirei te Reirei: Ataei aika a Ikawai Riki

Te Taekan te Onimaki

Te Taekan te Onimaki te reirei koaua aika a beebete iaon koaua tabeua n te euangekerio.

N tabetai te euangkerio e kona n taraa ni bubura ao ni mwaiti, riki nakoia ataei. Te Taekan te Onimaki e kona ni buokiia ataei n ataia, inanon te kawai ae beebete, tabeua koaua aika beebete ti kakoauai ngkai ngaia Aika Itiaki ni Boong aika Kaitira.

Waaki ni Kakukurei aika a Kona ni Karaoaki

• Kaoia ataei n tatabemaniia bwa a na rinea kingin te taeka ke te kibuntaeka man teuana taekan te onimaki ao n tibwaia ma te kiraati. Imwiina anganiia tabeman ataei bwa a na keetinna (ke ni kakaea) taekan te onimaki raa are te taeka ke te kibuntaeka e roko mai iai. Tuangiia ataei bwa a na tibwaia bwa bukin tera te taeka ke te kibuntaeka are a rineia e rangi ni kakaawaki.

• Tabeua te bong imwaina, tuangiia tabeman ataei bwa a na tibwaia inanon te kiraati te rongorongo ae kimototo iaon taekan te onimaki ae a tatangiria. Aia rongorongo e kona n airi ma te tamnei, te anene, te karaki ke te bwai ae a rinanona, ke koroboki aika a tabu tabeua. Kaoia ataei aikai bwa a na tibwaia bwa bukin tera a tatangira taekan te onimaki are a rineia.

• Koreia iaon te burakibooti tabeua titiraki ake aomata a kona n iai aia kakoaua are e kona ni kaekaaki ma teuana taekan te onimaki. Tuangiia ataei bwa a na rinea te titiraki ao ni kakaea taekan te onimaki are e na kaeka. Anganiia bwa a na kataneiaiia ni kaekai titiraki ni kabongana taekan te onimaki.

Katanoata ae Kariaiakaki 1 ao 2

Burabeti a kona ni buokiira n ata ana kantaninga Tamara are i Karawa.

Katanoata ae Kariaiakaki 1 ao 2 bon katooto aika rangi n tamaroa n aroia burabeti ni karekei ao ni karaoi nanon kaotioti mairoun te Atua. Ko na kanga ni buokiia ataei ni karikirakei aia onimaki are te Atua e kaira Ana Ekaretia man te kaotioti?

Waaki ni Kakukurei aika a Kona ni Karaoaki

• Tuangiia ataei bwa a na kakaea taekan te onimaki are e reirei taekaia burabeti ao kaotioti. Kaoia bwa a na tibwauaia bwa bukin tera a kakaitau ngkai iai te burabeti ae maiu. Tibwai tabeua katoto n aron te Atua ae e a tia ni kaira ana Ekaretia rinanon kaotioti, n raonaki mka katooto ake a kabwarabwaraaki inanon Katanoata ae Kariaiakaki 1 ao 2, ao anganiia ataei bwa a na tibwai katooto aika a taneiai ma ngaia (n aron bitaki aika tibwa riki inanon ana burokuraem te Ekaretia ke ana tua).

• Anganiia ataei kiibu man koroboki aika a tabu aikai: 2 Nibwaai 26:33; Iakobwa 2:27. Kaoia bwa a na rineia bwa koroboki raa aika irekereke ma Katanoata ae Kariaiakaki 1 (are e kairi nakon tokin te mare ae mwaiti buuna) ao are e irekereke ma Katanoata ae Kariaiakaki 2 (are e karekea anganakiia aomata ni kabane te nakoanibonga ao te tembora). Kaota am koaua bwa te Uea e kaoti Ana kantaninga nakoia burabeti ake ngkoa ao aika n taai aikai.

• Korei aikai man Katanoata ae Kariaiakaki 1 iaon te burakibooti: “Ko na riki bwa te tia motika taekam.” Tera ae e nanonaki bwa ti na motikitaeka i bon iroura ngkai te burabeti e karekei kaotioti? Ni buokiia ni kaeka te titiraki aei, ko kona n tibwa te motintaeka aei mairoun Beretitenti Russell M. Nelson: “Ko kona n ataia i bon iroum te bwai ae e koaua ao te bwai ae e aki n reiakinakin kinaakin ana wirikiriki te Tamnei” (“Ana Tangira ao Ana Tua te Atua” [Brigham Young University devotional, Sept. 17, 2019], 4, speeches.byu.edu).

• Korea te tamnei ke katekea tamnein te aonaaba iaon te burakibooti. Kaoa temanna te ataei bwa e na warekii uoua barakaraba n te kabanea n ana reta te Moan Beretitentii are e bonginaki n Tuun 8, 1978 are e koreaki inanon Katanoata ae Kariaiakaki 2 (ni moanaki ma “E a tia n ongo ara tataro …”). Tuangiia ataei bwa a na wareki bwa iraua te tai te taeka ae “kakabwaia” ao are e kaoti iai “kakabwaia”. Tera te kakabwaia ae e reke man te euangkerio? Kaoiia ataei bwa a na karinani iaon te burakibooti ni katobibiia te korotamnei ke tamnein te aonaaba. Kaota am koaua are te Atua e tangiriia ni kabane natina ni kabuta te aonaaba ao e tangiria ni kakabwaiaia n Ana euangkerio.

Kaungaa te Kamatebwai n te Mweenga

Buokiia ataei n rinei taekan te onimaki are a kona ni kamatenanoa, ao buokiia ni karaoa te baire bwa a na karaoia.

Kanakoraoan Ara Angareirei

Ataei a tatangiria n tibwai bwaai ake a reiakin. E ngae ngke a tabe n rikirake, ataei a kona ni kakorakora aia onimaki kain aia utu. Kaungaia bwa a na tibwauaia ma aia utu bwaai ake a reiakinii n te Moanrinan. (Taraa Reirei n ana Kawai te Tia Kamaiu,30.)