Copper and Umber (Rongorongon Bungiakin Iesu i Copper ao Umber), iroun J. Kirk Richards

Ritembwa 20–26

Kiritimati

Ana Bwaintangira te Atua ae Akea Kabotauana ibukin Natina ae Tabu

Te Kiritimati bon te tai ae kakukurei ibukiia ataei aika mwaiti. Iangoia bwa ko na kanga ni buokiia n reita kakimwareirein te Kiritimati ma kakimwareirein ana euangkerio te Tia Kamaiu.

Korei Am Namakin

Kaungaa te Tibwatibwa

Kaoiia ataei bwa a na tibwauai bwaai ake a tia ni karaoi n te wiiki are e nako ni bukamarua bungiakin te Tia Kamaiu.

Reirei te Reirei: Ataei aika a Uarereke

I kona n “anga [au] koaua” ni bukamarua bungiakin Iesu.

Inanon “Te Kristo ae Maiu” (ChurchofJesusChrist.org), te Moan Beretitentii ao Kooram n Abotoro n te Tengaun ma Uoman a anga aia koaua ibukin Iesu Kristo ni kanuringaea bungiakin Iesu Kristo.” Iangoia ko na kanga ni kaungaia ataei n tibwaua aia koaua ma tabeman.

Waaki ni Kakukurei aika a Kona ni Karaoaki

• Kaotia nakoia ataei katotongan “Te Kristo ae Maiu” (taraa te kamataata n te wiiki aei inanon Nakomai, Iriirai—Ibukiia Aomata n Tatabemaniia ao Utu). Kotea te taeka ae Kristo n atuun te rongorongo, ao tuangiia ataei bwa a na kotea naba te taeka anne. Kotea naba aia tiaaina are mai inano iaon te iteraniba, ao tuangiia ataei bwa inanon 2000, te Moan Beretitenti ao te Kooram n Abotoro n te Tengaun ma Uoman a korea aia koaua ibukin Iesu Kristo, a tiaainai araia iai, ao n tibwauaia ma te aonaaba.

• Kaota tamnein Iesu Kristo, ao kaoia ataei n tatabemaniia bwa a na teirake teuanne ke neienne n tibwaua ana atatai Ibukina. Ngkana a kainnanoa te ibuobuoki, iangoi koaua man “Te Kristo ae Maiu.” Kauringiia ataei bwa ngkana a karakina Iesu nakoia aomata, a bon kaota aia koaua.

• Tuangiia ataei bwa ko kanga ni karekea am koaua ibukin Iesu Kristo ao are ko karaoia ibukin kawakinan am koaua. Buokiia n iangoi kawai are a na kona ni kakorakora aia koaua ibukin Iesu Kristo, ao kaoiia bwa a na rinea teuana te bwai are a na karaoia.

Tamara are i Karawa e kanakoa Natina bwa ana bwaintangira nakoira.

Kanakoan ao karekean taian bwaintangira bon mwakoron katein te Kiritimati ibukiia aomata aika mwaiti. Te katei aei e na buokiira n uringa “ana bwaintangira te Atua ae akea kabotauana ibukin Natina ae tabu” (“Te Kristo ae Maiu”).

Waaki ni Kakukurei aika a kona ni Karaoaki

• Tuangiia ataei bwa a na karakina taekan taian bwaintangira ake a tia n anga ke ni karekei. Wareka nakoia te kabanea n tiententi ibukin “Te Kristo ae Maiu,” ao kaoiia bwa a na ongora ni bwaintangira ake e a tia n anganiira te Atua. (Ngkana e kainnanoaki, buokiia kamataataia bwa “akea kabotauana” nanona “rangi n tamaroa riki nakon akea tabeua.”) Bukin tera ngkai Natin te Atua, Iesu Kristo, te bwaintangira ae kabanea n tamaroa?

• Ikotaki anenea kunan Iesu Kristo, n aron ae “He Sent His Son” (Aia Boki n Anene Ataei, 34–35). Buokiia ataei n rinea te kibuntaeka man te anene are a tangiria ni kan korea tamneina (n aron “te merimeri ae e a tibwa bungiaki” ke “nakonako ma mwaane”). Ngkai a korotamnei, tuangiia ataei bwa a na tuangko tera aia namakin n te bwai are e a tia ni karaoia Iesu ibukiia. Tibwaua naba am namakin.

Iesu Kristo e kaoai bwa N na ira Ana katooto.

Mwakoron ana “anainano … ae moan te korakora” iaon te aonaaba e a tia n riki bwa Ana katooto ae moan te kororaoi. Kona kanga n anainanoia ataei bwa a na Iriiria?

Waaki ni Kakukurei aika a kona ni Karaoaki

• Man te kauoua ni barakaraba n “Te Kristo ae Maiu,” wareka nakoia ataei tabeua bwaai ake e a tia ni karaoi Iesu. Kaoti tamnei man Maiuna (taraa te iteraniba ni waaki ni kakukurei n te wiiki aei), ao kaoiia ataei ni maroroakinna bwa tera are e karaoia te Tia Kamaiu inanon te tamnei. Buokiia iangoi kawai ake a kona iai n Iriira Ana katooto.

• Rinea “Light the World” te witeo (ComeuntoChrist.org) kaotia nakoia ataei, ke karakina te tai are ngke ko kakabwaiaaki iai man ana mwakuri n ibuobuoki temanna n aron Kristo. Kaoa te ataei bwa e na katea kain te mwakuri n ibuobuoki ae bebete, ao tuangiia ataei ake tabeman bwa a na ketinna bwa tera are e karaoia teuanne ke neienne. Anga ana tai te ataei temanna ma temanna bwa e na karaoia. Buokiia ataei bwa a na iangoa te bwai ae a kona ni karaoia ni beku ibukin temanna n aia utu.

Reirei te Reirei: Ataei aika a Ikawai Riki

“Ti anga ara koaua.”

Aia katooto burabeti ao abotoro ake a korea “Te Kristo ae Maiu” e kona n anaa nanoia ataei n tibwauai aia koaua ibukin Iesu Kristo.

Waaki ni Kakukurei aika a Kona ni Karaoaki

• Korea iaon te burakibooti I ataia bwa Iesu Kristo … ao kaoiia ataei bwa a na tibwauai kawai are a na kabwanina iai te tiententi. Iangoia bwa a na taraa “Te Kristo ae Maiu” ibukin taian iango. Tera ae ti kona ni karaoia ni kakorakora ara koaua ibukin Iesu Kristo? A kanga ni kakabwaiaaki tabeman ngkana ti tibwaua ara koaua?

• Kaotia bwa “Te Kristo ae Maiu” e tiaainaki mairouia te Moan Beretitentii ao Abotoro ake Tengaun ma Uoman. Bootaki ni wareka Reirei ao Berita aika Tabu 21:5. Tera kaokoroia Abotoro “mairouia aobitia tabeman n te Ekaretia”? Rinea tamnein temanna “Te Tia Kakoaua ae Onoti ibukin Kristo” n tibwauaia ma ataei (ChurchofJesusChrist.org). Bukin tera ngkai ti kakaitau n rekeia taan kakoaua aika onoti ibukin Kristo inanon ara bong?

“Bon akea riki temanna ae e a tia ni karekea ana anainano ae moan te korakora.”

Inanon “Te Kristo ae Maiu,” a kabwarabwara burabeti ao abotoro bwa akea temanna ae e a tia ni karekea ana anainano iaoia natin te Atua nakon Iesu Kristo. Iangoia raoi bwa ko na kanga buokiia ataei n reiakina taekan ana anainano ae moan te korakora te Tia Kamaiu iaora ni kabane.

Waaki ni Kakukurei aika a kona ni Karaoaki

• Anganiia ataei n tatabemaniia te kibuntaeka ke te tiententi man “Te Kristo ae Maiu,” ao tuangiia bwa a na korea tamnein te kibuntaeka ke te tiententi anne. Ngkai a kaoti aia tamnei ataei nakoia kaain te kiraati, tuangiia ataei ake tabeman bwa a na ketiina bwa tera are e kamataataki n te tamnei ao kakaea te tiententi are iai rekerekena mangaia inanon “Te Kristo ae Maiu.” Ti kanga ni kakabwaiaaki ibukin maiun Iesu Kristo ao ana mition?

• Buokiia ataei ni kakaei aara aika kakaokoro ke atuun te rongorongo ibukin Iesu Kristo inanon “Te Kristo ae Maiu” ao kanikinaea korea te rain iaana, ngkana e kona (tabeua katooto n raonaki ma te Mesia, Moan nati, te moan ao te kabane, te tia tei ibukira, atibun te maninganinga). Maroroakinna bwa man atuun te rongorongo n tatabeua tera ae ti reiakinaki iai Ibukina. (Tabeua mai buakon atuun rongorongo aikai a kabwarabwaraaki inanon Guide to the Scriptures ke Bible Dictionary.)

“Ngaia bon te oota, te maiu, ao ana kantaninga te aonaaba.”

Te Kiritimati bon te tai ae kakukurei ibukin te kantaninga are e uotaki nakon te aonaaba iroun Iesu Kristo rinanon Ana reirei, katooto, ao ana anga karea ni kamaiu.

Otan te Aonaaba, iroun Howard Lyon

Waaki ni Kakukurei aika a Kona ni Karaoaki

• Kaoiia ataei n tatabemaniia bwa a na korea tamnein te kai ni ka Kiritimati, ke korea teuana iaon te burakibooti. Kaoiia ataei bwa a na katamaroaa te kai ma taekana ke kibuntaeka man “Te Kristo ae Maiu” are e kabwarabwara te bwaintangira are e a tia n anganiira te Tia Kamaiu (n aron “te ota,” “te maiu,” ao “te kantaninga”). Anganiia bwa a na maroroakinna bukin tera ngkai a rinei taeka ke kibuntaeka akanne.

• Buokiia ataei ni kakaei anene ni ka Kiritimati are a taekina te ota, te maiu, ao te kantaninga are e uota bungiakin te Tia Kamaiu nakon te aonaaba—n aron te katooto, “O Little Town of Bethlehem” ke “Hark! The Herald Angels Sing” (Anene n taromauri, nambwa 208–9). Bootaki anenea te kuna, ao tuangiia ataei bwa a na tibwauaia e kanga Iesu ni uotia te ota, te maiu, ao te kantaninga nakon maiuia.

• Tuangiia tabeman ataei bwa a na wareka rongorongoia taan kawakin tiibu n Ruka 2:8–20. Tuangiia tabeman bwa a na wareka rongorongon Timeon n Ruka 2:25–33. Kaoiia bwa a na tibwatibwa imarenaia e kanga aron aia namakin taan kawakin tiibu ao Timeon ngke a kunea bwa e a bungiaki Iesu. Bukin tera ngkai a namakin n te aro aei? Bukin tera ngkai Bungiakina e uota te “kimwareirei ae korakora”?

Kaungaa te Kamatebwai n te Mweenga

Kaoiia ataei bwa a na iangoa temanna ae kaain aia utu are a kona n tibwaua aia koaua nakoina ibukin Iesu Kristo. Buokiia n iangoia bwa tera ae a na taekinna ni kakorakora ana onimaki te aomata anne Irouna.

Kanakoraoan Ara Anga reirei

Katauraoi man kamatebwaian booki aika tabu. “Tataromwaaka ni kamatebwaia ana taeka te Atua bwa e na kaboraoira ma te Tamnei ae Raoiroi. E kona n anainanora ni kaaki inanora baike ti a tia ni kamatebwai ngkai ti anga reirei ni tabekiarake tabeman” (Reirei n ana Kawai te Tia Kamaiu, 12).