“Ritembwa 20–26. Kiritimati: Ana Bwaintituaraoi Natin te Atua Ae Akea Kabotauana,” Nakomai, Iriirai—Ibukiia Aomata n Tatabemaniia ao Utu: Reirei ao Berita aika Tabu 2021 (2020)
“Ritembwa 20–26. Kiritimati,” Nakomai, Iriirai—Ibukiia Aomata n Tatabemaniia ao Utu: 2021
Rongorongon rikin Iesu i Copper ao Umber, iroun J. Kirk Richards
Ritembwa 20–26
Kiritimati
Ana Bwaintituaraoi Natin te Atua Ae Akea Kabotauana
Teuana te kawai ae ko na iangoa raoi riki iai te Tia Kamaiu n te Kritimati aei bon man kamatebwaian “Te Kristo ae Maiu: Aia Koaua Abotoro.” Te kamatata aei e anganiko kawai aika ko kona ni karaoa iai te koaua ni burabeti aei bwa mwakoron am kamatebwai n te euangkerio n am kouru ao am utu.
Korea Am Namakin
N te 1838, te Burabeti Iotebwa Timiti e katanoata, “Reirei aika kakawaki n ara aro bon aia kakoaua Abotoro ma Burabeti, iroun Iesu Kristo, bwa E mate, e taunaki, e manga uti n te kateniua ni bong, ao e waerake nako karawa: ao bwaai ni kabane ake a irekereke ma ara ekaretia a mwanga nako mai iai. ”(Aia Reirei Beretitenti n te Ekaretia: Iotebwa Timiti, 49). N ririki ake imwiina, Beretitenti Russell M. Nelson e kunea bwa “ai bon tibwa aio ana rongorongo te burabeti are e katauraoia 15 burabeti, taan mamata, ao taan kaotioti bwa a na anga ao n tiaaina aia koaua ni kauringa bungiakin a na ka 2,000 n ririki te Uea. Rongongon te koaua anne e aranaki bwa ‘Te Kristo ae Maiu.’ A mwaiti membwa a tia ni kamatenanoa te koaua aei. Tabeman e aki bati aia atatai bwa bon iai. Ngkana ko ukoukoria riki ni kan ata Iesu Kristo, I kaumaki ngkami bwa kam na kamatebwaia ‘Te Kristo ae Maiu’” (“Drawing the Power of Jesus Christ into Our Lives,” Ensign ke Riaona, Meei 2017, 40).
Ngkai ngaira Aika Itiaki ni Boong aika Kaitira, ti kimwareirei man te kakabwaia n te kaotioti rinanoia burabeti ao abotoro n taai aikai. Ti kakaitau ibukin aia taeka n reirei, kauring, ao kaunganano aika kairaki mai ieta. Ma iaon bwaai nako, ti kakabwaiakaki man aia koaua ae korakora iroun Iesu Kristo—n tain te Kiritimati ao n te ririki. A raka riki nakon ae ti aia taeka taan koroboki aika rabakau ke taan taetae nakoia aomata ke atatai aika nano mairouia taan rabakau ni booki aika tabu. Bon aia taeka aomata are te Atua, e rineia, weteia ao e angania te kariaia bwa “taan kakoauaa aran Kristo aika onoti ni kabuta te aonaaba” (Reirei ao Berita aika Tabu 107:23).
Iango ibukin te Kamatebwai i bon Iroum ni Koroboki aika a Tabu
“Akea riki ae korakora ana kairoro.”
Tera iango aika roko nakoim ngkai ko wareka Ruka 2:10–11 n irianaki ma te moan barakarabe n “Te Kristo ae Maiu”? Tera ae ko na taekinna ni boutoka te rongorongo are “akea riki ae korakora riki ana kairoro [n aron Iesu Kristo] i aoia naake a tia ni maeka ao ake a na maeka n taai aika na roko iaon te aba”? Ukorii koaua n “Te Kristo ae Maiu” are kabwarabwara ana kairoro ae korakora te Tia Kamaiu. E kanga ni kairoroko ao n uota nakoim te “kimwareirei ae korakora”? (Ruka 2:10).
“E waerake man te ruanimate.”
Inanon “Te Kristo ae Maiu,” a kaoti aia koaua Abotoro n ni Manga utin te Tia Kamaiu, n taekin teniua kaotin te Uea ae rierake (taraa barakarabe nimaua). Iangoa warekan taekan mwananga aikai inanon Ioane 20–21; 3 Nibwaai 11–26; ao Iotebwa Timiti—Rongorongo 1:14–20. Tera ae ko reiakinna ibukin te Tia Kamaiu man Ana taeka ao Ana mwakuri n tain kaotina aikai?
“Ana nakoanibonga ao Ana Ekaretia a tia ni kaokaki.”
N am tai ni kamatebwaia Reirei ao Berita aika Tabu n te ririki aei, e reke am tai n reiakina riki aron kaokan ana nakoanibonga te Tia Kamaiu ao Ana Ekaretia.” Tera koaua ao reirei aika a tia ni kaokaki aika uaana riki nakoim? Iangoia n rinanon tabeua koroboki aika tabu aikai ake a reirei taekan Kaokan bwaai: Reirei ao Berita aika Tabu 1:17–23; 13; 20:1–12; 65; 110; 112:30–32; 124:39–42; 128:19–21. Iangoia bwa a kanga koaua n te euangkerio ae kaokaki ni buokiko n ata ao n taromauria Iesu Kristo (taraa Reirei ao Berita aika Tabu 93:19).
“N te bong teuana ao E na oki nakon te aonaaba.”
Te Kiritimati bon te tai n tanrikaki nakon te bong are bungiaki iai Iesu Kristo ao n ingainga nakon te bong are E na manga oki iai. Tera ae ko reiakinna ibukin Okina man te kauoua nakon te kabane ni barakarabe n “Te Kristo ae Maiu”? E na kona naba ni kakaongora warekan, anenean, ke te kakauongo nakon anenen te Kiritimati ake a reirei taekan te Kauaoki, n aron “Joy to the World” ke “It Came upon the Midnight Clear” (Boki n Anene, nambwa 201, 207).
“Ngaia bon te oota, te maiu, ao ana kantaninga te aonaaba.”
N te moan ni barakarabe n “Te Kristo ae Maiu,” tarai anuan maiuna ao aara aika koreaki ibukin te Tia Kamaiu. A kona koroboki aika tabu aikai ni buokiko n iangoia bwa e kanga Iesu Kristo n riki bwa “te oota, te maiu, ao ana kantaninga te aonaaba.”: Ruka 2:25–32; 1 I-Korinto 15:19–23; Moronaai 7:41; Reirei ao Berita aika Tabu 50:24; 84:44–46; 93:7–10. E kanga n riki bwa te ota, te maiu, ao te kaantaninga? Tera anuan ke aran te Tia Kamaiu ae kakawaki riki nakoim?
E kanga kamatebwaian “Te Kristo ae Maiu” n roota am onimaki ao am tangira ibukin te Tia Kamaiu?
Otan te Aonaaba, iroun Howard Lyon
Iango ibukin Kamatebwai ni Koroboki aika Tabu n te Utu ao te Bootaki n Utu n te Tairiki
-
Te Kristo ae MaiuNi buoka am utu n ota n taian koaua ake a taekinaki ibukin te Tia Kamaiu inanon “Te Kristo ae Maiu,” ko kona n rinei tabeua kiibu ao n uaia ni mwakuriia ni kakaea ke ni koroi tamnei aika a kabwarabwarai kibu n taeka aikanne. Ko kona ngkanne ni boboti tamnei aikanne ao kibu n taeka nakon te boki.
-
“Ti anga ara koaua.”Tera ae ti reiakinna man “Te Kristo ae Maiu” bwa tera ae nanonaki ni kaotan te koaua? Ko na bae n tangiria ni koroi mwiin am koaua iroun Kristo ni kauringa bungiakin te Tia Kamaiu.
-
“E nakonako ni karaoa ae raoiroi.”A na kanga am utu n ira ana banna ni katooto te Tia Kamaiu n ibuobuoki n te Kiritimati aei? Ko na kanga ni katanoata te “rau ao te raoiroi” n am utu ao am kaomiuniti? Ko na kanga ni uota te “marurung [nakon] te aoraki”? Ko na kunei iango inanon tabeua tamnein te Kiritimati iaon te Gospel Media app ke Gospel Media library (medialibrary.ChurchofJesusChrist.org).
-
“E riai ni kaitauaki te Atua ibukin Ana bwaintangira ae akea kabotauana iroun Natina mai ieta.”Tera bwaintangira aika ti a tia ni karekei ibukin Iesu Kristo? Tao a kona kaain te utu ni karekei kaeka inanon “Te Kristo ae Maiu” ao bwaintangira ake a tia ni batianaki aika a tei ibukin ana bwaintangira te Tia Kamaiu. A kona am utu ni kauki bwaintangira n bongin te Kiritimati ke inanon te wiiki ao ni wareki kiibu aika kaineti nakon teuana ma teuana. Aikai tabeua koroboki aika tabu, e ngae ngkana a kona am utu ni karekei aika mwaiti riki: Ruka 2:10–14; 1 Betero 2:21; Motiaea 3:8; Aramwa 11:42–43; Reirei ao Berita aika Tabu 18:10–12. Ko kona naba n anenea te anene iaon taekan te Tia Kamaiu, n aron “He Sent His Son” (Aia boki n Anene Ataei, 34–35), ni kakaei bwaintangira riki tabeua aika roko mai Irouna.
Ibukin iango riki tabeua iaon reiakinaia ataei, taraa te kamataata n te wiiki aei inanon Nakomai, Iriirai—Ibukin te Moanrinan.
Anene aika katauaki: “Hark! The Herald Angels Sing,” Boki n Anene, nambwa 209.
Kanakoraoan Am Kamatebwai
Katurua am taratara iroun te Tia Kamaiu. “Tataromwaaka ni wareka ‘Te Kristo ae Maiu’ ti tebo ma warekan ana koaua Mataio, Mareko, Ruka, Ioane, ao burabeti n Ana Boki Moomon. E na kakorakora am onimaki iroun te Tia Kamaiu ao ni buokiko ni katurua am taratara Irouna” (M. Russell Ballard, “Oki ao Karekea,” Ensign ke Riaona, Meei 2017, 65).
