“Nobembwa 29–Ritembwa 5. Reirei ao Berita aika Tabu 137–138: ‘Te Mii ni Burabeti ibukin Kamaiuaia Maate,’” Nakomai, Iriirai—Ibukiia Aomata n Tatabemaniia ao Utu: Reirei ao Berita aika Tabu 2021 (2020)
“Nobembwa 29–Ritembwa 5. Reirei ao Berita aika Tabu 137–138,” Nakomai, Iriirai—Ibukiia Aomata n Tatabemaniia ao Utu: 2021
Iotebwa e noora tamana, tinana, ao tarina n te Abanuea ae te tiretio (Ana Mii ni Burabeti Iotebwa Timiti n te Abanuea ae te tiretio, Robert Barrett).
Nobembwa 29–Ritembwa 5
Reirei ao Berita aika Tabu 137–138
“Te Mii ni Burabeti ibukin Kamaiuaia Maate”
E reirei Beretitenti M. Russell Ballard: “I kaoi ngkami bwa kam na wareka raoi ma te iango [Reirei ao Berita aika Tabu 138]. Ngkai ko warekia, ke e kakabwaiako te Uea n oota riki ao n kakaitau n ana tangira te Atua ao Ana babaire ni kamaiu ao ni kukurei ibukiia Natina” (“Te Mii ni Burabeti ibukin Kamaiuaia Maate,” Ensign ke Riaona, Nobembwa. 2018, 73).
Korea Am Namakin
Kaotioti ake a koreaki n Reirei ao Berita aika Tabu 137 ao 138 a maranga n ae raka iaon 80 te ririki ao 1,500 te maire. Mwakoro 137 e karekeaki iroun te Burabeti Iotebwa Timiti n 1836 n te Kirtland Tembora ngke tuai tia, ao mwakoro 138 e karekeaki iroun Joseph F. Smith, te kaonoman n Beretitenti n te Ekaretia, n 1918 i Salt Lake City. Ma n aron kanoaia, e kaotia bwa mii ni burabeti aika uoua aikai a uaia n reitaki. A kaai ni kaekai titiraki ibukin aroia natin te Atua n te maiu ae na roko. Ao ngaia ni kauoman iai rakan riki nanona irouia ngkana ti iangoi aron maiuia burabeti ake a karekei.
Miin Iotebwa Timiti ni burabeti e buokia n ataia bwa e mena ia tarina ae tangiria ae Alvin, are e a tia ni mate onoua te ririki imwain ae kaokaki te kariaia ni bwabetito. Titiraki ibukin maiun Alvin ae akea tokina e tiku iroun Iotebwa man te tai anne. Miin Joseph F. Smith ni burabeti e kaoti koaua aika mimitong ibukin te aba n tamnei—bon te kaotioti ae karaunano nakon temanna ae a tia n rawawata ni mateia aia utu ake a bati n tangiriia. Joseph F. Smith e mate tamana, Hyrum Smith, ngke 5 ana ririki Iotebwa ao tinana, Mary Fielding Smith, e mate ngke 13 ana ririki. N ni miina ni burabeti n 1918, e a tia n rawawata ni mateia 13 naati.
E mwaiti aia titiraki aomata ibukin te maiu imwin te mate ake a kaekaki ni kaotioti aikai. Mwakoro 137 anga te atatai ae nano iaon titiraki akanne, ao mwakoro 138 e karekei atatai aika nano n ae mwaiti riki. Ngkana bootaki, a kakoaua n “te tangira ae korakora ao n rianako tamaroana are kaotaki iroun te Tama ao te Nati” (Reirei ao Berita aika Tabu 138:3).
Iango ibukin te Kamatebwai i bon Iroum ni Koroboki aika a Tabu
Reirei ao Berita aika Tabu 137
Tamnei ni kabane a na karekea te tai n rinea te abanuea ae te tiretio.
Te mataata ae ti teuana irouia Kiritian n 1836 bwa ngkana e mate te aomata n aki bwabetitoaki—n aron tarin Iotebwa Timiti ae Alvin—te aomata anne e aki kona n nako karawa. Ma Iotebwa e noora Alvin n te mii ni burabeti n te abanuea ae te tiretio. Ngkai ko wareka mwakoro 137, iangoi baike ko reiakin ibukin Tamara are i Karawa, Ana babaire ni kamaiu, ao te abanuea ae te tiretio.
Tara naba Aika Itiaki, 1:232–35.
Reirei ao Berita aika Tabu 138:1–11, 25–30
Wawarekan ao iangoan koroboki aika tabu e katauraoai n karekea te kaotioti.
N tabetai e roko te kaotioti e ngae ngke ti aki ukoria. Ma n angin te tai, e roko ibukina bwa ti botumwaaka n ukeuke ao n katauroaoi nako iai. Ngkai ko wareka Reirei ao Berita aika Tabu 138:1–11, 25–30, tara are karaoia Beretitenti Joseph F. Smith ngke “a kaureaki matana [n] noraaba” n oota riki n ana mition te Tia Kamaiu ni kabooira. Ngkanne iangoia bwa ko na kanga ni ira bannan Beretitenti Smith. N aron te katooto, tera bitaki ae ko kona ni karaoi nakon am kamatebwai n koroboki aika tabu n anaa te tai n “iangoi raoi koroboki aika tabu” ao ni kabati riki “iangoan ana mwakuri ni kamaiu ae korakora te [Tia Kamaiu] ”? (kiibu 1–2).
N ana marooro “Te Mii ni Burabeti ibukin Kamaiuaia Maate” (Ensign ke Riaona, Nobembwa. 2018, 71–74), Beretitenti M. Russell Ballard e anga kawai aika tamaroa are e katauraoi iai Beretitenti Smith n karekea te kaotioti aei. Iangoia bwa tera am katauraoi ibukin atatai ake a reke iroum ke ake a na reke n taai rake.
Tara naba “Ministry of Joseph F. Smith: A Vision of the Redemption of the Dead,” witeo, ChurchofJesusChrist.org.
Joseph F. Smith, iroun Albert E. Salzbrenner
Reirei ao Berita aika Tabu 138:25–60
Te mwakuri ibukin te kamaiu e karaoaki n iteran te rabuna aika uoua.
E reirei Beretitenti Russell M. Nelson, “Ara rongorongo nakon te aonaaba e beebete ao e koaua: ti kaoia ni kabane natin te Atua n iteran te rabuna aika uoua nakon te Tia Kamaiu, bwa a na karekei kakabwaia n te tembora ae tabu, ni karekea te kukurei ae teimatoa, ao ni kona n karekea te maiu ae akea tokina.” (“Waaki Nako,” Ensign ke Riaona, Meei 2018, 118–19). Iangoa te rongorongo aei ngkana ko wareka Reirei ao Berita aika Tabu 138:25–60. Ko kona naba n iangoi titiraki aikai:
-
Tera ae ti reiakinna man kiibu aikai ibukin aron te mwakuri ibukin te kamaiu n karaoaki n te aba n tamnei? Bukin tera e kakaawaki iroum ataakina bwa e waaki te mwakuri aei? A kanga kiibu aikai n kakorakora am onimaki n ana Mwakuri ni Kamaiu te Tia Kamaiu?
-
Tera ae a reireiniira kiibu aikai ibukiia naake a waaki n te mwakuri ibukin te kamaiu n te aba n tamnei? Bukin tera e kakaawaki te mataata bwa te mwakuri ibukin te kamaiu e karaoaki n iteran te rabuna aika uoua?
Tara naba Dallin H. Oaks, “Onimakina te Uea,” Ensign ke Riaona, Nobembwa. 2019, 26–29; “Susa Young Gates and the Vision of the Redemption of the Dead,” Revelations in Context, 315–22.
Iango ibukin Kamatebwai ni Koroboki aika Tabu n te Utu ao te Bootaki n Utu n te Tairiki
-
Reirei ao Berita aika Tabu 137:1–5.Kaoia am utu bwa a na korea tamnein te abanuea ae te tiretio n aron taekana n kiibu aikai. Tera ae ko kunei n kiibu aikai ae buokiko n ingaingai n kan maeka ikekei? Tera ae ti karaoia ngkai n katauraoi n maeka n te abanuea ae te tiretio ma Tamara are i Karawa ao Iesu Kristo?
-
Reirei ao Berita aika Tabu 137:5–10.N reiakinna bwa tera nanon aio ibukin Iotebwa Timiti n nooria tabeman kaain ana utu n bootaki n te abanuea ae te tiretio, a kona am utu n mataku n te witeo ae “Ministry of Joseph Smith: Temples” (ChurchofJesusChrist.org). Tao kam kona n marooroakina temanna ae kam kina are e mate imwain are e bwabetitoaki. Tera ae reireiniira Reirei ao Berita aika Tabu 137:5–10 ibukin te aomata anne?
-
Reirei ao Berita aika Tabu 138:12–24.Tera ae reireiniira Reirei ao Berita aika Tabu 138:12–24 ibukiia aomata ake e kawariia te Tia Kamaiu n te aba n tamnei? Tera kakabwaia ae a karekea? Tera ae ti reiakinna mana aia katooto?
-
Reirei ao Berita aika Tabu 138:38–55.Kiibu aikai a kabwarabwaraia naake e nooria Beretitenti Joseph F. Smith n te aba n tamnei ao kabwarabwaraia ae kimototo. Tao e kona am utu n korei araia ami bakatibu ake n te aba n tamnei, n raonaki ma kabwarabwaran maiuia.
Ibukin iango riki tabeua ibukin reiakinaia ataei, taraa te kamataata n te wiiki aei inanon Nakomai, Iriirai—Ibukin te Moanrinan.
Te anene ae tamaroa: “Search, Ponder, and Pray,” Children’s Songbook, 109.
Kanakoraoan Ara Kamatebwai
Iangoan raoi koroboki aika tabu. Beretitenti David O. McKay e arana te iango bwa “teuana te … kabanea n tabu n mataroa are ti rinanona nakon ana tabo te Uea” (Aia Reirei Burabetin te Ekaretia: David O. McKay [2003], 32).
Te Mwiokoaki, iroun Harold I. Hopkinson. Iesu Kristo e mwiokoia tamnei aika raoiroi n tataekina te euangkerio n te aba n tamnei.