Karabuti ae Carthage

Nobembwa 22–28

Reirei ao Berita aika Tabu 135–136

“E “a Tia n Kamatoaa Ana Mition ao Ana Mwakuri n Oin Raraana”

Ngkai ko kamatebwaia Reirei ao Berita aika Tabu 135–36, e kona te Uea n anganiko iango n buokiko ni kuaea am wareware. Ngkana e riki anne, korea te bwai are E reireiniko.

Korea Am Namakin

Bwakantaain Tuun 27, 1844, a manga rin naba Iotebwa ao Hyrum Smith n te karabuuti, n raonaki irouia John Taylor ao Willard Richards. A kakoauaa bwa akea te tua ae a urua, ma a kariaia katikaia, n te kantaninga bwa a na totokoa te iowaawa nakoia Aika Itiaki i Nauvoo. Bon tiaki aio te moan tai are ana kairiribai te Ekaretia a karina te Burabeti Iotebwa Timiti n te karabuuti, ma n te tai aei e taraa n ataia ae e nang toki maiuna. Ngaia ao raoraona a kataia n karau nanoia imarenaia man warekan ana Boki Moomon ao anenean anene n taromauri. Imwina a ongo reben katii, ao inanon tabeua te miniti maiua ae mamate Iotebwa Timiti ao tarina ae Hyrym e a roko n tokina.

Ma tiaki anne tokin te waaki ae tabu are a tia n mwaneia. Ao bon tiaki tokin Kaokan ana euangkerio Iesu Kristo. E bati riki ae na karaoaki ao e bati riki te kaotioti ae na kawaaka rake te Ekaretia. Tiringan te Burabeti e aki kona n tiringa ana mwakuri te Atua.

Tara Aika Itiaki, 1:521–52.

Iango ibukin te Kamatebwai i bon Iroum ni Koroboki aika Tabu

Reirei ao Berita aika Tabu 135; 136:37–39

Iotebwa ao Hyrum Smith a kamatoaa aia koaua ma raraaia.

Katamneia bwa e na tera am namakin ngke arona bwa ko maeka i Nauvoo ngke a tiringaki Iotebwa ma Hyrum Smith. (taraa Aika Itiaki, 1:554–55). E na kanga aron am taratara n te kangaanga ae kananokawaki aei? Reirei ao Berita aika Tabu 135, e moan boretiaki n ae kan reke teniua te namwakian imwin te tiritiri n iowaawa, e na kona n ibuobuoki. Ko kona n mwaakeni taeka ao mwakoro n taeka ae na uota nakoim te oota ao te raunnano. Tera ae kona taekinna nakon temanna ae titiraki, “Bukin tera te Atua e kariaia Ana Burabeti bwa e na tiringaki?”

Taraa naba Reirei ao Berita aika Tabu 5:21–22; 6:29–30; “Remembering the Martyrdom,” Revelations in Context, 299–306; Teachings of Presidents of the Church: Joseph Smith, 522–23, 529–40; M. Russell Ballard, “Shall We Not Go On in So Great a Cause?” Ensign ke Riaona, Meei 2020, 8–11.

Reirei ao Berita aika Tabu 135:3

E a tia Iotebwa Timiti n karaoa ae mwaiti riki ibukin kamaiuara nakon riki temanna irarikin Iesu Kristo.

Iangoi kakabwaia ake ko a tia ni karekei ngkai te membwa ngkoe n ana Ekaretia Iesu Kristo. Iraua mai buakona ae roko man ana mition are tokanikai iai te Burabeti Iotebwa Timiti? Reirei ao Berita aika Tabu 135:3 e kaoti tabeua bwaai aika korakora ake e karaoi Iotebwa Timiti inanon 24 te ririki imwin te Moan Kaotioti. A kanga bwaai aikai n rootiko ao am reitaki ma Tamara are i Karawa ao Iesu Kristo? Iangoa korean am koaua iroun te Burabeti Iotebwa Timiti. Antai ae kainnanoa ongoraean am koaua?

Reirei ao Berita aika Tabu 136

Te Uea e anganai kairau inanon “mwananga” ni maiu.

Imwin kakionakoaia mai Nauvoo, Aika Itiaki a kaitara ma te mwananga ae abwabwaki nako Sal Lake Valley, ao te moan bubua n kiromiita e bon karaurau man kangaanga. Bringham Young, are e kaira ngkai te Ekaretia bwa te Beretitenti n te Kooram n Abotoro n te Tengaun ma Uoman, e raraoma bwa a na kanga Aika Itiaki n maiu inanon te mwananga. E barongaa te tabo n tataninga ae aranaki bwa Winter Quarters ao e bubuti te kairi. N kaeka, te Uea e anganna te kaotioti, are e ataaki ngkai bwa mwakoro 136. Ibuakon bwaai tabeua, te kaotioti aei e kauringiia Aika Itiaki “bwa aroia n te mwananga e titebo kakaawakina ma tokiia” ao “e buoka bitakin te mwamwananga nako maeao man te kangaanga ae riai nakon te atatai n tamnei ae rietata man kakaawaki are a reitaki inanona” (“This Shall Be Our Covenant,” Revelations in Context, 308).

Uringa te boto n iango aei ngkai ko kamatebwaia mwakoro 136. Tera te reirei ae ko kunea are e kona n buokiko n raira te kakatai ae matoa inanon maiu “nakon te atatai … ae tabu man kakaawaki”? Ko kona naba n iangoia bwa e na kanga te reirei anne n buokiko ni karaoa nanon te Uea ni maium, n aron are buokiia Aika Itiaki n taai akekei n karaoa te mwananga ae kangaanga nako Maeao.

Tara naba “E na Riki Aio Bwa Ara Berita ae Tabu,” Revelations in Context, 307–14; Church History Topics, “Succession of Church Leadership,” ChurchofJesusChrist.org/study/history/topics.

Winter Quarters, iroun Greg Olsen

Iango ibukin Kamatebwai ni Koroboki aika Tabu n te Utu ao te Bootaki n te Tairiki

Reirei ao Berita aika Tabu 135:1, 3.N buokiia kaain te utu n oota bwa tera nanon are Iotebwa Timiti e “kamatoaa ana mition ao ana mwakuri n oin raraana,” a kona am utu n mataku n te witeo ae “Koaua n Ana Boki Moomon” (ChurchofJesusChrist.org; tara naba Jeffrey R. Holland, “Te Mauri ibukin te Tamnei,” Ensign ke Riaona, Nobembwa. 2009, 88–90). Tera ae anai nanora n kiibu aikai? Ti na kanga n kakaonimaki nakon ara koaua, e ngae ngke tiaki kataningaki bwa ti na mate ibukiia?

Reirei ao Berita aika Tabu 135:3.N marooroakinna bwa tera nanon te rongorongo are e karaoia Iotebwa Timiti “ae mwaiti riki, irarikin Iesu, ibukin kamaiuaia aomata n te aonaba aei, nakon riki temanna,” iangoa rinanoan baike a reiakini am utu ibukin Iotebwa Timiti n te ririki aei. Kam kona n kabonganai tamnei man te bwai n ibuobuoki aei n buokiia n uringa are a reiakinna ao n kaoiia n tibwauai karaki ake maten nanoia ke reirei. Bukin tera ti kakaitau ibukin te Burabeti Iotebwa Timiti ao ibukin are e karaoia te Uea rinanona? Kam kona n mataku n te witeo “Joseph Smith: The Prophet of the Restoration” (ChurchofJesusChrist.org).

Reirei ao Berita aika Tabu 136.Ngke e kaota te Uea te mwakoro 136, iai mwanangaiia Aika Itiaki imwaia ae abwabwaki, man kangaanga, iaan ana kairiiri Bringham Young (tara mwakoro 58, 60, ao 62 n Karaki man Reirei ao Berita aika Tabu, 206–8, 211–16, 222–24). Ngkai kam bootaki n utu ni wareka te mwakoro 136 iangoi baika a kangaanga ake a kaitarai am utu. Tera reirei aika ti kunei man te kaotioti aei are kona ni buokiira ni karekea ana ibuobuoki ma mwaakan te Uea?

Reirei ao Berita aika Tabu 136:4.Tera ae nanonaki n te “nakonako inanon ana otenanti ni kabane te Uea”? A kanga otenanti ake ti a tia n karekei n roota maiura n te bong koraki?

Ibukin iango riki tabeua ibukin reiakinaia ataei, taraa te kamataata n te wiiki aei inanon Nakomai, Iriirai—Ibukin te Moanrinan.

Te anene ae tamaroa: “Neboa Teuare,” Anene n Taromauri, nambwa 27.

Kanakoraoan Am Kamatebwai

Ukora ana tangira te Atua. E reirei Beretitenti M. Russell Ballard, “[Te] euangkerio bon te euangkerio n tangira—te tangira ibukin te Atua ao te tangira i bon ibukira n tatabemaniira nako” (“Ana Tangira te Atua ibukiia Natina,” Ensign, Meei 1988, 59). Ngkai ko wareki koroboki aika tabu, iangoa korean ke mwaaken kakoauan ana tangira te Atua.

Akea te Aomata ae Korakora Riki Ana Tangira, iroun Casey Childs