“Nobembwa 1–7. Reirei ao Berita aika Tabu 125–128: ‘Te Bwanaa n Kukurei ibukiia ake a Maiu ao ake a Mate,’” Nakomai, Iriirai—Ibukiia Aomata n Tatabemaniia ao Utu: Reirei ao Berita aika Tabu 2021 (2020)
“Nobembwa 1–7. Reirei ao Berita aika Tabu 125–128,” Nakomai, Iriirai—Ibukiia Aomata n Tatabemaniia ao Utu: 2021
Ngaira ma Ngaiia ao Ngaiia ma Ngaira, iroun Caitlin Connolly
Nobembwa 1–7
Reirei ao Berita aika Tabu 125–128
“Te Bwanaa n Kukurei nakoia ake a Maiu ao ake a Mate”
Uringnga n korei am namakin ngkai ko kamatebwaia Reirei ao Berita aika Tabu 125–28 bwa ko aonga n manga tarai ao n tibwai nakoia tabeman.
Korea Am Namakin
N Aokati 1840, Jane Neyman ae rawawata e ongora nakon te Burabeti Iotebwa n taetae n taunimatean raoraona ae Seymour Brunson. Natin Jane ae kairake ae Cyrus e a bon tibwa mate naba tabeua te tai n nako. E a korakora riki rawawatana ibukina bwa e tuai bwabetitoaki Cyrus, ao e raraoma Jane bwa tera uotan aio nakon tamneina ae akea tokina. Iotebwa e ataa are namakinna, e a bon tia naba n titiraki te bwai anne ibukin tarina ae tangiraki ae Alvin, are e mate naba imwain bwabetitoana. Ngaia are e motikia te Burabeti bwa e na tibwatibwa nakon Jane, ao nakoia ake n te botaki n taunimate, te bwai are e a tia n kaotia nakoina te Uea ibukiia naake a mate n aki karekei ana otenanti te euangkerio—ao tera ae ti kona ni karaoia ni buokiia.
Reirein te bwabetito ibukiia maate e kakukureia Aika Itiaki; aia iango e rairaki ngkekei naba nakoia kaaro, tiibu, ao tabeman riki kaain te utu ake a tia ni mate. Ngkai ai iai te kantaninga ibukiia! Iotebwa e reita kimwareireia, ao e kabongai taeka aika kakukurei man maiu n kaota are reireinna te Uea ibukin kamaiuaia maate: Ke a tatakaruaea te kimwareirei maunga, ao ngkami mwarua taetae n takarua; ao ni kabane ngkami marawa ao aaba aika a mwau taekini ana mwakuri aika kamimi ami Uea ae Akea Tokina!” (Reirei ao Berita aika Tabu 128:23).
Tara Aika Itiaki, 1:415–27; “Reta iaon Bwabetito ibukiia Maate,” Revelations in Context, 272–76.
Iango ibukin te Kamatebwai i bon Iroum ni Koroboki aika a Tabu
Reirei ao Berita aika Tabu 126
E tangirai te Uea bwa na taben nanoia au utu.
Imwin okina nako mwengana man ana mition tabeua i Engiran, Bringham Young e karekea te nakoa ae kakaawaki mairoun te Uea—te “tabeakinia n ae onoti [ana] utu” (kibu 3), are a tia ni maraki n akeana. Ngkai ko iangoia bwa e anga aei ao reirei ake tabeua n mwakoro 126 n kaineti nakoim, iangoi taeka aikai mairoun Beretitenti Bonnie L. Oscarson, Beretitenti ni Kabuta Ngkoa Kairake n Ataeinnaine:
“Uringnga bwa tabeua kainnano aika a korakora a kona n reke irouia naake i matam. Moana am ibuobuoki man mweengam ao inanon am utu. Aikai reitaki aika akea tokiia. E ngae ngkana—tao riki—aro nako n am utu e karako kororaoia, ko kona ni kakaai kawai ni ibuobuoki, ni kabebete, ao ni kakorakora. Waaki moa man are ko mena iai, tangiriia n aroia, ao katauraoi ibukin am utu are ko tangiria ni karekea n taai aika a na roko” (“Kainnano aika i Matara,” Ensign ke Riaona, Nobembwa. 2017, 27).
Tara naba “Karaoa te Tararua ae Onoti nakon Am Utu,” Revelations in Context, 242–49.
Reirei ao Berita aika Tabu 127:2–4
Te Uea e atai kimwareireiu ao rawawatau.
Bukibuki aika kairua ao kakamaku n katikitiki e a manga kairoroa Iotebwa Timiti bwa e na karabaraba inanon Aokati 1842. Ma taeka ake e korei nakoi Aika Itiaki n tai aei (ngkai Reirei ao Berita aika Tabu 127) a onrake n taraan ae tamaroa ao te kimwareirei. Tera ae a reireiniko kiibu 2–4 ibukin te Atua? ao arom ni kaitarai oin kataakim?
Iangoia bwa e kanga te Uea n kateimatoako n te “ran ae nano” n maium.
Reirei ao Berita aika Tabu 127:5–8; 128:1–8
“Ane kam koreia i aonaba e na koreaki i karawa.”
Ngkai ko wareka Reirei ao Berita aika Tabu 127:5–8; 128:1–8, kakaei bukina ngkai te Uea e angan Iotebwa Timiti kaetieti aika onoti ibukin tauan mwin bwabetito ibukiia maate. Tera ae reireiniko aei ibukin te Uea ao Ana mwakuri?
Karaon te mwakuri n te tembora ibukiia ara bakatibu e kabaei nanora nakoia.
Reirei ao Berita aika Tabu 128:5–25
Kamaiuiaia au bakatibu e kakaawaki nakon kamaiuau.
E mataata are e kaotia te Atua rinanon Iotebwa Timiti bwa bukin tera ara bakatibu ake aki bwatitoaki n te maiu aei a kainnanoa ara ibuobuoki ibukin kamaiuaia. Ma ngkoe iroum bukin tera kamaiuaia ara bakatibu e “riai ao e kakaawaki nakon oin kamaiuara”? (tara Reirei ao Berita aika Tabu 128:15–18; italics added).
Kibu 5 e reirei bwa te otenanti ae te bwabetito ibukiia maate e “katauraoaki imwain karikan te aonaba aei.” Tera ae reireiniko te koaua aei ibukin te Atua ao Ana kainibaire? Tera ae anga ana marooro Beretitenti Henry B. Eyring “Bootakin ana Utu te Atua” nakon mataatam? (Ensign ke Riaona, Meei 2017, 19–22).
Iotebwa Timiti e kabonganai taeka n aron “mwaaka n kabaebae,” “toma ae matoa,” and “katiteuanaki ae tamaroa” ngkana ae reirei taekan ana otenanti te euangkerio ao te bwabetito ibukiia maate. Tarai baikai ao taeka n aron akanne ngkai ko wareka Reirei ao Berita aika Tabu 128:5–25. Tera tabeua bwaai are, rinanon Iesu Kristo, a kona ni kabeaki man ana otenanti te nakoanibonga ibukiia maate? Bukin tera “matoa” te taeka ae tamaroa n kabwarabwara reirein kamaiuaia maate? (tara kiibu 9–11).
Tera ae anaa nanom n ana taeka Iotebwa Timiti n kiibu 19–25? A kanga kiibu aikai n roota aron am waaki ibukin te mwakuri n tembora ibukiia am bakatibu? ibukin Iesu Kristo? Tera ae ko kaungaaki bwa ko na karaoia? (tara FamilySearch.org/discovery ibukin iango).
Tara naba 1 I-Korinto 15:29; Dale G. Renlund, “Family History and Temple Work: Sealing and Healing,” Ensign ke Riaona, Meei 2018, 46–49; “Te Anga te Tai” and “Nanoia A Kabaeaki Nakoim,” witeo, ChurchofJesusChrist.org.
Iango ibukin Kamatebwai ni Koroboki aika Tabu n te Utu ao te Bootaki n Utu n te Tairiki
-
Reirei ao Berita aika Tabu 126.Warekan te reirei aei nakon Bringham Young e kona n kaungaia kaan am utu n marooroakina ami waaki n kabanea riki ami tai n karaoa “te tararua ae onoti” (verse 3) i marenami.
-
Reirei ao Berita aika Tabu 128:15–18.Tera tabeua kakabwaia n kamaiu ao n kakororaoi n te mwakuri n kakaean te riki? Ko kona n kunei tabeua iango n te witeo “Berita aika Beritanaki n Rongorongon te Utu” (ChurchofJesusChrist.org) ke n te anene iaon rongorongon te utu, n aron “Family History—I Am Doing It” (Children’s Songbook, 94).
-
Reirei ao Berita aika Tabu 128:18.Iangoa karaoan te beba tiein ao araia kaain te utu ao bakatibu iaon tooma nako n kaotia bwa e kanga kakaean te riki ao te mwakuri n te tembora n karaoa te toma ae matoa n reitira ma ara bakatibu. Tao kam kona n karaoa te kakae iaon FamilySearch.org n kakaeia riki kaain te utu ao n nooria bwa abwakira te raka.
-
Reirei ao Berita aika Tabu 128:19–23.Tao a kona kaain te utu n ukorii kiibu aikai ibukin taeka ake a kaota ingaingan Iotebwa Timiti ibukin ana euangkerio Iesu Kristo ao kamaiuaia maate. A kona kaain te utu n tibwauai atatai ake e anganiia te ingainga ibukin te mwakuri naba aei—ke ko kona n bootaki n ukorii waaki akanne iaon FamilySearch.org/discovery.
Ibukin iango aika a mwaiti riki ibukiia ataei, taraa te kamataata n te wiiki aei n Nakomai, Iriirai—Ibukin te Moanrinan.
Te anene ae kona n aneneaki: “Family History—I Am Doing It,” Aia Boki n Anene Ataei, 94.
Bwanaa aika a Manga Kaokaki
Bwabetito ibukiia Maate, “te Boto n Iango ae Boou man Rietata”
Te korobonna aei e kaota te tabo ni bwabetito n te Nauvoo Tembora n toka iaon tengaun ma uoman kaao mwaane.
Phebe ao Wilford Woodruff
Phebe Woodruff e maeka n kaan ma Nauvoo ngke Iotebwa Timiti e moana ana reirei ibukin te bwabetito ibukiia maate. E korea rongorongona nakon kainnabana, Wilford, are e beku n te mition i Engiran:
“Te tari Joseph … e a tia n reikinna man te kaotioti bwa naake n te ekaretia aei a kona n bwabetitoaki ibukiia aia koraki ake a tia ni mate ao ake e aki reke tibwangaia n ongora te euangkerio, aio naba nakoia natiia, aia karo, tariia, mwaneia, tibuia, ai tamaia, ao ai tinaia. … Bon imwin are a bwabetitoaki a kainaomataaki man te oo ni kaikain ao a kona n butimwaeia n te mangauti ao n uotiia nakon abanuean te teretio—te reirei aei e butimwaeaki raoi iroun te ekaretia ao a waaki nako n te koraki n aomata, tabeman a na bwabetitoaki n mwaitina ae 16 te tai … inanon tebongina.”1
Rimwi Wilford Woodruff e taetae ibukin te reirei aei: “Te tai are I ongo taekana tamneiu e onrake n te kimwareirei. … I waaki nako ao I bwabetitoaki ibukiia au koraki ni kabane ake a tia ni mate ake I kona n uring. … I namakina taekinan areruia ngke e kaoti te kaotioti n kaota nakoira te bwabetito ibukiia maate. I namakinna bwa iai inaomatara n kimwareirei n ana kakabwaia Karawa.”2
Vilate Kimball
N aron Titita Woodruff, Vilate Kimball e ongo taekan te bwabetito ibukiia maate ngke kainnabana, Heber, e raroa nako n tataekina te euangkerio. E koroboki nakoina:
“Beretitenti Timiti e kauka te boto n iango ae boou man mimitong … are e karekea te kaokinano ae bati n te ekaretia. Are bon, te bwabetitoaki ibukiia maate. Bauro e taetae iaona, n te moan I Korinto mwakoro 15 kibu 29. Iotebwa e karekea te kabwarabwara riki ae bwanin man te Kaotioti. … Bon tibwangan te ekaretia aei te bwabetitoaki ibukiia ni kabane utuia nako ake a tia ni mate imwain rokon te Euangkerio aei; rikaaki nakon tibumwamwanuia te Unimwaane ao te Unaine. … N karaon aei, ti mwakuri bwa taan tei ibukiia; ao ti anganiia te kona n ira te teirake n te moan mangauti. E taekinna bwa e na iai te Euangkerio ae na tataekinaki nakoia … ma akea te waaki ae tamnei a bwabetitoaki. … Man te tai are e tataekinaki te kaetieti aei, a teimatoa raan n aki tiku n rau. Inanon te maungatabu iai n tabetai waniman nakon tengaun Unimwaane n te karaanga n te tai anne ae a bwabetito. … I tangiria n bwabetitoaki ibukin Tinau. I tareeia bwa n na tataninga ni karokoa ko roko n te mwenga, ma te kabanea n tai are e taetae Iotebwa ibukin te botoniango anne, e tuangiia aomata ni kabane bwa a na teirake ni mwakuri, ao n kainaomataia raoraoia man te tautoronaki n te tai ae tawe. Ngaia are I taku bwa N na nako n te wiki aei, ngkai e bati kaain rarikiu aika a na nako. Tabeman a tia n bwabetitoaki n te tai ae mwaiti. … Ngaia are ko noria bwa iai aia tai aomata ni kabane. Tiaki aei te reirei ae mimitong?”3
Phebe Chase
N te tai are e bobonga iai te tabo ni bwabetio n te Nauvoo Tembora, bwabetito ibukiia maate a karaoaki ikekei ao ai tiaki te karaanga. Phebe Chase, kaain Nauvoo, e koroboki nakon tinana ibukin te Tembora, n kabwarabwara te tabo ni bwabetito bwa te tabo are “ti kona n bwabetitoaki ibukiia ara mate ao n riki bwa tia kamaiu n Maungan Tion” E reitinako n kabwarabwara bwa n te tabo ni bwabetito aei, “I a tia ni bwabetitoaki ibukin tamau ae tangiraki ao ni kabane raoraou ake a tia ni mate. … Ngkai I tangiria n ataa aran tamam ma tinam bwa I aonga n kainaomataia, bwa I tangiria n kamotirawaia Maate. … E a tia ni manga taetae te Uea ao n kaoka aron te waaki are ngkoa.”4
Sally Randall
N ana koroboki nakoia raoraona ao ana utu ibukin te bwabetito ibukiia maate, Sally Randall e uringa maten natina te mwaane ae George:
“O bon te tai ni kakatai nakoiu ao e teimatoa n taraa n matoa butimwaeana irou, ma … e a tia tamana ni bwabetitoaki ibukina ao bon te waaki ae mimitong bwa ti kakoaua man karekea bwaninin te euangkerio n aron are tataekinaki ngkai ao ti a kona ni bwabetitoaki ibukiia nikabane raoraora ake a tia ni mate ao ni kamaiuia nakon are e kona n reke rongorongoia iroura.
“I tangirai bwa ko na korei araia nikabane irekerekera nako ake a tia ni mate rikaaki nakoia tibura unimwaane ao unaine n aki tianna. Nanou karaoan are I kona ni kamaiuia raoraou ao N na bon rang kukurei ngkana iai iroumi ae roko ao n buokai bwa bon te mwakuri ae korakora ibukin temanna n tii ngaia. … I kataningaia bwa kam na taku bwa bon te reirei ae kamimi ma kam na kunea bwa e koaua.”5
Te nei ni bwabetito n te Ogden Uta Tembora e toka i akuun tengaun ma uoman kaao mwaane.