“Okitobwa 25–31. Reirei ao Berita aika Tabu 124: ‘Te Auti Nakon Arau,’” Nakomai, Iriirai—Ibukiia Aomata n Tatabemaniia ao Utu: Reirei ao Berita aika Tabu 2021 (2020)
“Okitobwa 25–31. Reirei ao Berita aika Tabu 124,” Nakomai, Iriirai—Ibukiia Aomata n Tatabemaniia ao Utu: 2021
Nauvoo te Tikiraoi, iroun Larry Winborg
Okitobwa 25–31
Reirei ao Berita aika Tabu 124
“Te Auti nakon Arau”
Ngkai ko wareka Reirei ao Berita aika Tabu 124iangoi kakabwaia ngke e kaoia Aika Itiaki te Uea i Nauvoo bwa a na karekei ao kakabwaia aika E angani ngkami.
Korea Am Namakin
E ngae ngke e a tia n rangi ni kaangaanga irouia Aika Itiaki n te maan ae onoua te ririki, a moanna n nakoraoi bwaai n tain te tiburing 1839: Taan birinako Aika Itiaki a tia ni kunea te raunnano ibuakoia kaain Quincy, Illinois. A tia tautia ni kariaia te Burabeti Iotebwa Timiti ao taan kairiiri tabeman n te Ekaretia bwa a na kainaomataaki i Missouri. Ao e a tibwa tia te Ekaretia ni kabooa te aba i Illinois are a kona iai Aika Itiaki ni manga ikotaki iai. E ngae ngke, e aoneinei, te aba ae a kabung iai maninara, ma ni kabotauaki ma kakaewenako aika a tia n tokanikai iaoia Aika Itiaki, e taraa n ae a kona uotaia n aei. Ngaia ae a kanakoa te aoneinei ao ni korea te boraraoi ibukin te kaawa ae boou, are aranna bwa Nauvoo. Nanona “tikiraoi” n te taetae n Ebera, e ngae ngke kabwarakin riki te onimaki nakon etin raoi kabwarabwarakina, n te moan n tai. N te tai aei, te Uea e anganiia Ana Abotoro te iango ae matoatoa. Iai riki Ana koaua ao ana otenanti aika e na kaoki, ao E kainnanoa te tembora ae tabu are a na kona iai Aika Itiaki ni karekei. Ni kawai aika mwaiti, namakin aika ti tebo aikai n te onimaki ao te kawaekoa a kakaawaki n ana mwakuri te Uea n te bong aei.
Ngkai Nauvoo e riki bwa te kaawa ae tikiraoi ma a na tembora ae tikiraoi, a bane ni kamaunaaki ni kauoua. Ma ana mwakuri te Uea ae tikiraoi, man te moantai, bwa e na “bauni ngkami n te karineaki, te aki mamate, ao te maiu ae akea tokina” (Reirei ao Berita aika Tabu 124:55), ao te mwakuri anne e na aki kona n toki.
Taraa Aika Itiaki, 1:399–427; “Organizing the Church in Nauvoo,” Revelations in Context, 264–71.
Iango ibukin te Kamatebwai i bon Iroum ni Koroboki aika Tabu
Reirei ao Berita aika Tabu 124:12–21
I kona n riki bwa ana reirei Iesu are e onimakinna te Uea.
E ngae ngke tabeman taan kairiiri a kitana te Ekaretia n rabanen te 1830, a mwaiti riki membwa aika a teimatoa n onimaki. Ibuakoia Aika Itiaki aika kakaonimaki aikai bon naake a tia n rinanon kangaangan Missouri n raonaki ma naake a tibwa kaaina te Ekaretia. Inanon Reirei ao Berita aika Tabu 124:12–21, te Uea e taekin bwaai aika tamaroa nakoia tabeman mai ibuakoia. Tera atatai aika nano ibukiia ana reirei Iesu aika ko kunei n Ana taeka? Iai te bwai ae kaungako n aroia Aika Itiaki ake a kakaonimaki aikai bwa ko na riki n aekakiia? Ko na bae naba n iangoia bwa e kanga te Uea ni kaota Ana tangira ibukim.
Reirei ao Berita aika Tabu 124:22–24, 60–61
E tangirai te Uea bwa n na butimwaeia ao ni kariaia tabeman.
Iangoa te bwai are a tia ni korakai iai Aika Itiaki i Missouri, a bae n tia ni kaririaki ni kaokoroia ao n aki butimwaia iruwa n rin i Nauvoo. Kaki anne n am iango ngkae ko wareka Reirei ao Berita aika Tabu 124:22–24, 60–61. Tera ae anaa nanom n ana kaetieti te Uea ni katea te “auti n amwarake ao ni maeka”? (kibu 23). Tera ae a reireiniko Ana taeka ibukin taekan ana mition Ana Ekaretia? Iangoia bwa a kanga kaetieti aikai ni kaineti nakoim ao nakon mwengam.
Taraa naba “A Friend to All,” witeo, ChurchofJesusChrist.org.
Reirei ao Berita aika Tabu 124:25–45, 55
E tuangiira te Uea bwa ti na katei tembora bwa ti aonga ni karekei otenanti aika tabu.
E roko n akea te kubanako nakoia Aika Itiaki ni Boong aika Kaitira bwa n te tai are a maeka i Nauvoo, te Uea e anganiia te kaetieti ni katean te tembora—n aron are E anga i Ohio ao Missouri. Tera ae ko kunea inanon Reirei ao Berita aika Tabu 124:25–45, 55 are e buokiko n ataia bwa bukin tera te Uea e kangai, “Ao au aomata aki toki n tuangaki bwa a na katei [tembora] nakon arau ae tabu”? (kibu 39).
Ma imwiin te tai are e kateaki iai te Nauvoo Tembora, e raka iaon 200 tembora ae a tia ni kateaki ke ni katanoataaki. E reirei Beretitenti Russell M. Nelson: “Ti ataia bwa ara tai inanon te tembora e kakaawaki nakon kamaiuakira ao karietatakira ao nakoia ara utu. … Ana waaki n iowawa teuare e buakaka e waekoa n rikirake, n ae korakora ao n ae kakaokoro. Kainnanora n rin n te tembora n tainako e rang korakora riki ngkai” (“Becoming Exemplary Latter-day Saints,” Ensign ke Riaona, Nobembwa 2018, 114). E kanga n tia te tembora ni buokiko ni kaitarai “ana waaki n iowawa te tia kaitara”? Tera te bwai ae ko namakinna bwa ko na karaoia n ira ana reirei Beretitenti Nelson?
Taraa naba Ekaretia History Topics, “Nauvoo Temple,” ChurchofJesusChrist.org/study/church-history.
Iotebwa Timiti n te Nauvoo Tembora, iroun Gary E. Smith
Reirei ao Berita aika Tabu 124:84–118
E tangiria te Uea n anganai kaetieti aika onoti ibukin maiu.
Kiibu 84–118 iai inanona reirei ibukiia aomata aika onoti, ao tabeua aki botau nakon maium. Ma ko kona naba ni kunea te bwai ae ko tangiria ni kan ongo. Iangoa butiian te Uea bwa tera Ana rongorongo nakoim ni kiibu aikai, ao ukoukora ana kairi te Tamnei ni karekea. Ngkanne motikia bwa tera ae ko na karaoia ni mwakuriia. Te katooto, e kanga te nanorinano ni buokiko ni karekea te Tamnei? (taraa kibu 97).
Ko kona naba n iangoi reirei tabeua ake e a tia n anganiko te Uea. Ko kanga ni mwakuriia anne?
Iango ibukin Kamatebwai ni Koroboki aika Tabu n te Utu ao te Bootaki n te Tairiki
-
Reirei ao Berita aika Tabu 124:2–11.Ngkana e tuanga am utu te Uea “ni karaoa te katanoata ae e nene n au euangkerio” nakoia “uean te aonaaba” (kiibu 2–3), tera ae na taekinna am katanoata? Iangoia ni botaki ni karaoa teuana, ao kaoia kaain te utu bwa a na iangoi koauan te euangkerio aika a tangiria ni karin.
-
Reirei ao Berita aika Tabu 124:15.Tera ae nanonaki ni bwainakin te raoiroi? Bukin tera te Uea e kakaawaki irouna te raoiroi? Tera katooto n te raoiroi ae a tia n noria am utu? (Taraa naba Ibukin Kakorakorakiia Kairake 19.)
-
Reirei ao Berita aika Tabu 124:28–29, 40–41, 55.Tera ae ti reiakinna man kibu aikai bwa bukin tera e tuangiira te Uea bwa ti na katei tembora? Ana bae n tangiria am utu ni korea tamnein te tembora ke ni katea teuana man mwakorokoron kaai ke bwaai riki tabeua. Ngkai ko karaoia, ko kona ni maroroakinna bwa bukin tera ko kakaitau ngkai iai ara tembora n te bong aei ao bukin tera ti kainnanoia n taromauri inanona n tainako.
-
Reirei ao Berita aika Tabu 124:91–92.Iai te bwai ae tamaroa ae e karekea am utu man te marooro iaon ana kakabwaia te tamanuea? Kaain te utu ake a tia ni karekea ana kakabwaia te tamanuea a na tibwauaia bwa e kanga aron reken teuana ao e kanga n tia ni kakabwaiaia. Ko kona naba n rinanon “Patriarchal Blessings” (Gospel Topics, topics.ChurchofJesusChrist.org).
Ibukin iango riki tabeua ibukin reiakinaia ataei, taraa te kamataata n te wiiki aei inanon Nakomai, Iriirai—Ibukin te Moanrinan.
Anene aika katauaki: “I Love to See the Temple,” Aia Boki n Anene Ataei, 95.
Bwanaa man Kaokan Bwaai
Te Bootaki n Aine
Tamnein aia botaki kaain te Bootaki n Aine iroun Paul Mann
N te 1842, imwiin katean te Bootaki n Aine i Nauvoo, Illinois, te Burabeti Iotebwa Timiti e taku, “E aki kona te Ekaretia n bobonga kateana ni karokoa a barongaki raoi aine.”1 N aron naba aei, te kamatebwai iaon Kaokan ana Ekaretia te Uea ao Ana nakoanibonga (taraa Reirei ao Berita aika Tabu 107) e aki tabwanin ni karokoa e irianaki ma kamatebwaiakan te Bootaki n Aine, are ngaia bon “kaokan bwaai n taai ake rimoa” n ana reirei Iesu Kristo ae te aine.2
Eliza R. Snow e karaoa te tabe ae kakaawaki ni kaokan bwaai aikanne. E mena ikekei ngke e moan ni kateaki te Bootaki n Aine ao, ngke te tia koroboki n aia bootaki aine, e koroi bwaai ake a maroroakinaki n tain te bowi. E moan kakoaua ae te Bootaki n Aine e kateaki “imwiin ana baeten te nakoanibonga.”3 Aika oti inano bon ana taeka, aika koreaki ngke e beku bwa te Beretitenti ni Kabuta n te Bootaki n Aine, ni buokiia tarina n ataa te mwakuri mai ieta ae a onimakinakinaki iai natin te Atua aine n te berita ae tabu.
N reiakina riki ae bati iaon aron katean te Bootaki n Aine, taraa Aine n Aba n Ueau: Rongorongon ao Ana Mwakuri te Bootaki n Aine (2017), 1–25; Te Moan n Nimabwi n Ririki n te Bootaki n Aine (2016), 3–175.
Eliza R. Snow
“E ngae ngke te ara ae [Te Bootaki n Aine] aran te bootaki n taai aikai, te bootaki aei e moanaki n taai ake rimoa. Ti tuangaki iroun [Iotebwa Timiti], bwa te aeka ni botaki anne e riki n te ekaretia n taai ake rimoa, kabwarabwaraana a karaoaki inanon tabeua reeta ake a koreaki inanon te Nu Tetemanti, ni kabongana taekan, ‘te aine ae rineaki’ [taraa 2 Ioane 1:1; Reirei ao Berita aika Tabu 25:3].
“Aio te botaki are e aki kona n reke n akean te Nakoanibonga, man te koaua are e karekei ni kabane ana kariaia ao ana kairoro man te bwai n ibuobuoki anne. Ngke e anaaki te Nakoanibonga anne man te aonaaba, te botaki aei n raonaki ma reita ake tabeua ni koauan aron bairean ana Ekatetia Iesu Kristo iaon te aba, e moanna ni bua. …
“Ngke I a tia n roko ni bootakin te ‘Te Bootaki n Aine i Nauvoo,’ … ao ni karekea naba te taneiai ae korakora n te bootaki anne, tao n na tibwauai tabeua iango are e na buokiia natin Tion aine ni kaaina te botaki aei, are e onrake n mwakuri aika rangi ni kakaawaki aikai. Ngkana iai naati aine ao tiina i Iteraera aika a namakina ae aki kona ni karekea te korakora n taian kaangaanga ake a kaitarai, a na kunea ngkai aia tai ae bati ni kabonganai aia konabwai aika a mwaiti. …
E baireaki te Bootaki n Aine n ruun te Titoa te Buriki ae Uraura mai ieta.
“Ngkana e mwemwe te titiraki n te iango, ngkana iai, Tera te kouru n te Bootaki n Aine? N na kaeka—ni karaoa ae raoiroi—ni uota kabonganakin konabwai ni kabane ake iai iroura ibukin karaoan ae raoiroi, tiaki n ti kamaiuakiia aika rarikin ma ni kamaiuakiia naba tamnei. Te katiteuanaki ni mwakuri e na kakoroa nanon ae mwaiti riki nakon are e kona ni kakoroaki bukina man aia mwakuri ae korakora aomata n tatabemaniia. …
“Irarikin are buokaia rarikin, iai taben riki te Bootaki n Aine ae e na karaoi nakon ae ti kamaiuakiia ni kainnanoia n rabwata. Akean te iango ao aorakin te nano, a kainnanoa naba te ibuobuoki; ao te tai ae mwaiti te nano n akoi n—taeka n reirei tabeua, ke bon te kamauri ni kaotan te tangira ao te tabeaianga e na karaoa ae raoiroi riki ao ni butimwaeaki riki nakon te baeki ni koora. …
“Ngkana a roko Aika Itiaki mai aban itinaniku, ana iruwa nakoia aomata ni kabane, ao ni kona ni katinanikuaki irouia aika a kataia ni mwamwanaia aomata, e riai te Bootaki n [Aine] ni waekoa n [tararuaia], ao ni kabwarabwaraia nakoia aomata bwa aonga ni kinaaki ao n nakoraoi, ao iaon bwaai nako ni kakorakoraia n ana koaua te Euangkerio, ao man karaoan aei, a na riki bwa taan n ibuobuoki ni kamaiuakiia aika mwaiti.
“E na kainnanoi booki aika mwaiti are a na kabwarabwarai tabeia, tibwangaia ao aia mwakuri are a iri ma taben te Bootaki n Aine. … Karaoa te mwakuri (iaan ana kaetieti te bitiobi) ma te rau, nanom ni koaua, te marurung, ni inanoi ao n tataro mwaaka, ao te Atua e na kakabwaiai am mwakuri ma te nakoraoi.”4
Te Nauvoo Tembora iroun George D. Durrant