Far West, iroun Al Rounds

Okitobwa 11–17

Reirei ao Berita aika Tabu 115–120

“Ana Karea E na Tabu Riki nako Iu Nakon Rikirakena”

E kan taetae nakoim te Uea. Ngkai ko kamatebwai koroboki aika tabu, tataro ao butiia bwa e na buokiko n karekea Ana rongorongo ibukim.

Korea Am Namakin

Bon iai bukin te taratara ae tamaroa n aia tabo ni bootaki ae boou Aika Itiaki, Far West, MIssouri, n Turai 1838. E baiti n rikirake te kaawa aei, e taraa n mari te aba, ao e kaotaki bwa teutana te raroa nako meang ao e wene Adam-ondi-Ahman, te tabo ae korakora kakaawakina n te maiu n tamnei (tara Reirei ao Berita aika Tabu 107:53–56; 116). Ma, tao e bon kangaanga irouia Aika Itiaki bwa a na mwaninga aia bwai ake a bua. A tia ni kakionakoaki mai Independence, Missouri, te tienta are rineaki ibukin Tion, ao te kona n oki rikaaki n tai ae tawe e taraa n memeere. N reita aei, Aika Itiaki a riai ni kitana Kirtland, Ohio, n kitana aia tembora ae bati tangirana imwin tii uoua te ririki. Ao n te tai aei tiaki tii aiaia i tinanikun te Ekaretia ae karekea te kangaanga—e mwaiti kaain te aro aika kakanato ake a kaitaraa Iotebwa Timiti, n ikotaki ma Taan Kakoaua aika Teniman n Ana Boki Moomon ao aman kaain te Tengaun ma Uoman. Tabeman tao a bon titiraki, E rikirake ni korakora abanuean te Atua, ke e tabe n mamaara?

Ma naake a kakaonimaki a aki kariaia titiraki n aron akanne bwa e na tuukiia. Ma, a waakina katean te tabo ae tabu are boou, n te tai aei i Far West. A karaoi kainibaire ibukin te tembora ae boou. Aman Abotoro aika a boou a weteaki, n ikotaki ma—John Taylor ao Wilford Woodruff—ake n rimwi a na riki bwa Beretitenti n te Ekaretia (tara Reirei ao Berita aika Tabu 118:6). Aika Itiaki a reiakinna bwa ni karaoan ana mwakuri te Atua tiaki nanona bwa ko aki bwabwaka, ma nanona bwa ko na “manga teirake.” Ao e ngae ngke ko na kaki bwaai tabeua, karea akanne a na bon tabu nakon te Atua, ao n “tabu riki … nakon [am raka] (Reirei ao Berita aika Tabu 117:13).

Tara Aika Itiaki, 1:296–99; “Far West ao Adam-ondi-Ahman,” Te Kaotioti n Oi n Iango, 235–41.

Iango ibukin te Kamatebwai i bon Iroum ni Koroboki aika a Tabu

Reirei ao Berita aika Tabu 115:4–6

Aran te Ekaretia e rineaki iroun te Uea.

E taku Beretitenti Russell M. Nelson bwa aran te Ekaretia bon “te bwai ae rang kakaawaki” (“Aran te Ekaretia ae Eti,” Ensign ke Riaona, Nobembwa. 2018, 87). Iangoia bwa bukin tera e koaua aei ngkai ko wareka Reirei ao Berita aika Tabu 115:4–6. Tera irekereken aran te Ekaretia ma ana mwakuri ao ana mition?

Tara naba 3 Nibwaai 27:1–11.

Reirei ao Berita aika Tabu 115:5–6

Tion ao ana titeiki a na anga “te kamanomano man te angibuaka.”

Inanon te karawawata are a kaitara ma ngaai Aika Itiaki n 1838, e teimatoa n iai ana kantaninga te Uea ae rietata ibukia. Kakaei taeka n Reirei ao Berita aika Tabu 115:5–6 ae kabwarabwara te kantaninga are tangiria te Uea bwa e na kakoroaki nanona n Ana Ekaretia ao irouia ana membwa. Te katooto, tera ae ko namakinna bwa ko na karaoia n “teirake ao oota nako”? (kibu 5). Tera angibuaka n tamnei aika ko noori i rarikim, ao ti na kanga ni kareka te “kamanoaki” rinanon te ikotaki? (kibu 6).

Tara naba 3 Nibwaai 18:24.

Reirei ao Berita aika Tabu 117

Au karea a tabu iroun te Uea.

Kitanan Kirtland e bon onoti matoa irouia aomata n aron Newel K. Whitney, are e a tia ni katea arona ae raoiroi ibukia ana utu ikekei. Tera ae ko kunea n Reirei ao Berita aika Tabu 117:1–11 are e a tia ni buokiia ni karaoa te rinerine aei? A kanga kiibu aikai n bita am taratara bwa tera raoi ae kakaawaki?

Te mwakuri are e tuangaki Oliver Granger e kaokoro, e katabeaki iroun te Uea bwa e na tiku i Kirtland ao n katamaroaa ana mwane te Ekaretia. Bon te tabe ae rawawata, e ngae ngke e tei ibukin te Ekaretia ma te itiaki, n tokin te tai e aki bati ae reke irouna. Iangoia bwa e kanga ana taeka te Uea n kiibu 12–15 n kona n kaineti nakon bwaai ake e tua mairoum te Uea.

Tara naba Mataio 6:25–33; Boyd K. Packer, “The Least of These,” Ensign ke Riaona, Nobembwa. 2004, 86–88; “Far West ao Adam-ondi-Ahman,” Revelations in Context, 239–40.

Newel K. Whitney e tuangaki bwa e na mwaing nako Adam-ondi-Ahman, n tameina aei.

Reirei ao Berita aika Tabu 119–20

Man kabwakaan te kabwianibwai, I buoka katean ao “katabuan te aba ae Tion.”

Kaetieti n mwakoro 119 ao 120 a titebo ma te kawai are e mwanenaki iai ana mwakuri te Uea n ara tai. Ngkai, Aomata aika Itiaki a anga “teuana te katebwinanimwakoro man aia raka [e aranaki ngkai bwa te karekemwane] ni katoa ririki” (Reirei ao Berita aika Tabu 119:4), ao mwaane aikai a baireaki iroun te kauntira are kaainaki irouia kaain te Moan Beretitentii, Kooram n te Tengaun ma Uoman, ao te Bitibiriki n Tararua. Iangoi titiraki aikai ngkai ko kamatebwaii mwakoro aikai:

• E kanga kawakinan tuan te kabwianibwai n “katabua te aba ae Tion.”? E na kanga te tua aei n karika te tabo are ko maeka iai bwa “aban Tion nakoim.”? (Reirei ao Berita aika Tabu 119:6).

• Tera ae kakaawaki iroum n te taeka ae “man oin bwanaau nakoia” n Reirei ao Berita aika Tabu 120?

Tara naba Maraki 3:8–12; David A. Bednar, “Wintoon Karawa,” Ensign ke Riaona, Nobembwa. 2013, 17–20; “Aia Kabwianibwai Au Aomata,” Revelations in Context, 250–55.

Iango ibukin Kamatebwai ni Koroboki aika Tabu n te Utu ao te Bootaki n Utu n te Tairiki

Reirei ao Berita aika Tabu 115:4–6.Kam kona ni karaoia n ami utu are kam wareki kiibu aikai ao n taraa otin taai? E kona n ibuobuoki n maroorakinan nanon te “teirake ao oota nako” (kibu 5). Ke ko kona naba n marooroakinna bwa tera aron kakaean te auti ni kamanomano n tain te angibuaka. E na kanga te waaki anne n titebo ma kakaean te “kamanoaki” n te Ekaretia? (kibu 6). Ngkanne kam kona n marooro iaon kawai are am utu a kona n buokiia tabeman n kimwareirei n te kamanomano are e anga te Ekaretia.

Reirei ao Berita aika Tabu 117:1–11.Ko kona n kabotaua ae “tii te timna” ma te bwai ae “tinebu” (verse 8), n aron te tiaki n ran. Aei e kona ni kaira te marooro iaon bwaai aika a aki bati ni kakaawaki inanon maiura are a kona n tukiira man karekean ana kakabwaia ae bati te Atua.

Reirei ao Berita aika Tabu 119.Kam kona n anaa te anene n aron “I Want to Give the Lord My Tenth” (Children’s Songbook, 150). Tera ae reirei te anene anne ao mwakoro 119 n oin bukin kabwakaan ara kabwianibwai? E tamaroa ibukiia ataei aika uarereke te reirei ma bwaai ni kabotau: ko kona n angania bwaai aika uarereke, buokiia bwa a na tareea kabwiana, ao tuangiia bukin kabwakaan am kabwianibwai. (Tara naba Koaua nakon te Onimaki, 180–82.)

Ibukin iango riki tabeua ibukin reiakinaia ataei, taraa te kamataata n te wiiki aei inanon Nakomai, Iriirai—Ibukin te Moanrinan.

Te anene ae tamaroa: “I Want to Give the Lord My Tenth,” Children’s Songbook, 150.

Kanakoraoan Ara Anga reirei

Kaunga te rikintoronibwai. “Ngkana iai aia titiraki [kaain te utu] , n tabetai e raoiroi riki reireinakiia aron kakaean te reke ibon irouiia, irarikin are kaekaan aia titiraki ngkekei naba” (Reirei n Ana Kawai te Tia Kamaiu, 28).

Ara anga 10 te betiente nakon te Uea bwa te kabwianibwai e buoka rikiraken ana mwakuri.