“Tebetembwa 27–Okitobwa 3. Reirei ao Berita aika Tabu 109–110: ‘Bon Am Auti, Nem ae Tabu,’” Nakomai, Iriirai—Ibukiia Aomata n Tatabemaniia ao Utu: Reirei ao Berita aika Tabu 2021 (2020)
“Tebetembwa 27–Okitobwa 3. Reirei ao Berita aika Tabu 109–110,” Nakomai, Iriirai—Ibukiia Aomata n Tatabemaniia ao Utu: 2021
Te Tembora are i Kirtland, iroun Jon McNaughton
Tebetembwa 27–Okitobwa 3
Reirei ao Berita aika Tabu 109–110
“Bon Am Auti, Nem ae Tabu”
Ni kaineti ma Reirei ao Berita aika Tabu 109:24–28, E taku Beretitenti David A. Bednar, “I kaoi ngkami bwa kam na kamatebwaia ni kaokiokia ao n iangoia n tataroakina kaoti ni koroboki aika tabu aikai inanon maium ao n am utu” (“Honorably Hold a Name and Standing,” Ensign ke Liahona, Meei 2009, 99). Iangoa te kakao aei ngkai ko kamatebwai.
Korea Am Namakin
Mataroa nakon te Kirtland Tembora a na aki uki ni karokoa te aoa 8:00 n te moaningabong ni Maati 27, 1836. Ma Aika Itiaki ake a kantaningaia bwa a na kaea te mwakuri ni katabu a moanna ni kateirain imwain te aoa 7:00. Ngke kaintekateka ao kawai n rin a waekoa n on irouia taan taromauri aika a ingainga nanoia, Iotebwa Timiti e tuatua te tabo teuana ae a na kona n rin iai naake aikoa kona n rin n te tembora. Ngke e a onrake anne, e a manga baireaki te kauoua n tetere. Ao tiaki ti ake a maiu aika a ingainga nanoia ni kan rin. A mwaiti taan kakoaua aika a noori anera, inanon te tembora ao riki i taubukina, n tain ao imwiin te katabu. E bon taraa n ae “ana taanga ni buaka karawa” a roko n “anene ao [n] takarua” ma Aika Itiaki ni Boong Aika Kaitira (“Tamnein te Atua,” Boki n Anene, nambwa 2).
Bukin tera e a rangin n rawata te ingainga n nano—iaon te aba ao i karawa? Te berita ae Aika Itiaki a na “anganaki te mwaaka mai ieta” bon anne bukina teuana ae a bootaki i Ohio n te moan n tai (Reirei ao Berita aika Tabu 38:32). Ao iai bwaai riki tabeua aika beritanaki ibukin taai aika a na roko. “Aio,” e taekinna te Uea, “bon moan te kakabwaia are e bwaro nako aon atuuia au aomata” (Reirei ao Berita aika Tabu 110:10). Te tai ae ti maiu iai ngkai—ma te mwakuri n te tembora ao otenanti aika a moanna n rikirake a tauraoi nakoia mirion aika maiu ao aika mate—e moanaki i Kirtland, ngke “te rabuna iaon te aba [e] moanna n uruaki” (“Tamnein te Atua”).
Taraa naba Aika Itiaki, 1:232–41; “A House for Our God,” Revelations in Context, 169–72.
Iango ibukin te Kamatebwai i bon Iroum ni Koroboki aika Tabu
Reirei ao Berita aika Tabu 109
E tangirai te Uea ni kakabwaiaai n Ana auti ae tabu.
Ni kawai tabeua, e kaokoro te Kirtland Tembora ma tembora aika ti atai n te bong aei. Akea te te bao ni karea akea te nei ni bwabetito, ao otenanti n aron te bwabetito ibukiia maate ao te kabaebae e tuai kaokaki. Ma kakabwaia aika kabwarabwaraaki inanon te mwakoro 109, te tataro ni katabu ibukin te Kirtland Tembora, bon kakabwaia aika ti karekei n ana auti te Uea ae tabu n te bong aei. Rinanoi kiibu aikai ni kakaai mai iai tabeua kakabwaia aikai. Ngkae ko wareki taekaia, iangoia bwa bukin tera a kakawaki nakoim ao nakoia am utu.
Kiibu 5, 12–13 (taraa naba Reirei ao Berita aika Tabu 110:6–8): Inanon te tembora e kona te Uea ni Kaotia nakoira ao ti kona n namakina Mwaakana.
Kiibu 9, 17–19, 26, 78–79: Inanon te tembora ao ti katoka iaora aran te Uea.
Kiibu 22–23: Ngkana ti karaoi ao ni karinei berita n te tembora, e anganiira te mwaaka te Uea ni karaoa Ana mwakuri.
Kiibu 24–33: Ngkana ti tau n rin n te tembora, ti kona ni karekea a na kamanomano te Uea.
Kakabwaia Tabeua:
Tera te bwai ae kaungako iai te Tamnei bwa ko na karaoia ni karekei kakabwaia aikai?
Reirei ao Berita aika Tabu 109
Te tataro ni katabu n te Kirtland Tembora e kona n reireinai te tataro.
Mwakoro 109 bon te taataro ni katabu are e anganaki Iotebwa Timiti n te kaotioti (taraa atuun te mwakoro). Tera ae ko reiakinna ibukin te tataro n te mwakoro aei? Ngkana ko warekia, ko na iangoi taekan am tataro. Tera namakin aika ko karekei ake a na kona ni buokiko ni katamaroa am reitaki ma Tamara are i Karawa? Te katooto, tera ae tataro ibukina te Burabetin n te tataro aei?
Reirei ao Berita aika Tabu 110:1-10
E kona te Uea ni Kaotia nakoiu inanon te tembora.
Tera ae ko namakinna ibukin te Tia Kamaiu imwiin warekan Reirei ao Berita aika Tabu 110:1–10? E kanga ni Kaotia nakoim inanon te tembora? Kawai ra ae E buokiko n ataia bwa E butimwai am mwakuri ao am anganano?
N tabon te Tembora are Kirtland n tatabeua iai taabo n taetae ibukiia taan kairiiri n te nakoanibonga.
Reirei ao Berita aika Tabu 110:11–16
Kingin te nakoanibonga aika kainnanoaki ni kakoroa nanon ana mwakuri te Atua a mena n te Ekaretia n te bong aei.
N te aro bwa ko na atai kiing n te nakoanibonga are a anga Mote, Eriati, ao Eria nakon Iotebwa Timiti ao Oliver Cowdery inanon te Kirtland Tembora, ko na bae ni kainnanoa ana rongorongo Beretitenti Quentin L. Cook “” (Ensign ke Riaona, Meei 2018, 114–17). E kabwarabwara Beretitenti Cook aron irekereken kiing aikai ma ana mwakuri te Ekaretia n te bong aei. Ko na iangoia naba n reirei taekaia burabeti ngkoa man kamatebwaiakan “Mote,” “Eriati,” ao “Eria” inanon te Kairi nakon Koroboki aika Tabu (scriptures.ChurchofJesusChrist.org). Iangoa te bwai ae ko kona ni karaoia ni buoka te mwakuri ae irekereke ma kiing.
Taraa naba “Priesthood Keys,” True to the Faith, 126–27; Henry B. Eyring, “He Goes before Us,” Ensign ke Riaona, Meei 2020, 66–69.
Iango ibukin Kamatebwai ni Koroboki aika Tabu n te Utu ao te Bootaki n te Tairiki
-
Reirei ao Berita aika Tabu 109.N te utu, kakaei tabeua kiibu inanon mwakoro 109 are e kaungako ni kabanea riki am tai inanon te tembora (te katooto, tarai kiibu aika koreaki n “Iango ibukin te Kamatebwai i bon Iroum ni Koroboki aika a Tabu”). Taetae iaon arom ni karaoa te bwai ae tangiria Beretitenti Russell M. Nelson: “Kakaea te kawai ni karaoa te reitaki ma te Uea n tainako—n rin inanon Ana auti ae tabu—ao kawakina te motinnano anne ma te koaua ao te kimwareirei” (“Becoming Exemplary Latter-day Aika Itiaki,” Ensign ke Riaona, Nobembwa. 2018, 114). Ngkana ngkoe ke am utu a tuai n rin n te tembora, ko kona n nakon temples.ChurchofJesusChrist.org ni buokiko ni katauraoiko n nako.
-
Reirei ao Berita aika Tabu 109:78–80.Te anene “Tamnein te Atua” (Boki n Anene, nambwa. 2) e koreaki ibukin katabuan te Kirtland Tembora—ao e a tia n aneneaki n taian katabu ni kabane n te tembora ake a tia ni karaoaki. Kam na bae ni botaki n anenea te anene aei ao kakaai kibuntaeka ake a na karikirakea am kakaitau ibukin tembora ni boong aika kaitira. E kanga te anene ni kaineti nakon te rongorongo n Reirei ao Berita aika Tabu 109:78–80?
Ko kona ni kunea te tataro ni katabu ibukin te tembora ae kaan ma ngkoe n te temples.ChurchofJesusChrist.org.
-
Reirei ao Berita aika Tabu 110.Ngkana kaain am utu a wareka mwakoro 110 ao n tara te tamnei n tokin te kamataata aio, kaoia bwa a na iangoa aron aia namakin ngke arona bwa a mena n te tai anne n te Kirtland Tembora ma Iotebwa Timiti ao Oliver Cowdery. Anganiia am utu aia tai n tibwaua aia namakin iroun te Tia Kamaiu.
-
Reirei ao Berita aika Tabu 110:15.Tera ae e na buokiia n “rairi nanoia” am ataei nakoia aia bakatibu? Kam kona ni karekei iango aika kaunga n te FamilySearch.org/discovery. Kam kona ni bootaki ni mwakuri ni kinaia ami bakatibu aika a kainnanoi otenanti n te tembora ao bairea ami tai ni karaoi otenanti aikanne n te tembora. Kam kona naba ni maroroakina aron te mwakuri are e kaokaki iroun Eria inanon te Kirtland Tembora ni kakorakora am tangira ibukiia am bakatibu.
Ibukin iango riki tabeua ibukin reiakinaia ataei, taraa te kamataata n te wiiki aei inanon Nakomai, Iriirai—Ibukin te Moanrinan.
Anene aika katauaki: “Tamnein te Atua,” Boki n Anene, no. 2.
Bwanaa man Kaokan Bwaai
Kaotan te Tamnei ao te Kirtland Tembora
Like a Fire Is Burning, iroun Glen S. Hopkinson
Aika oti inano aia taeka Aika Itiaki ni Boong Aika Kaitira n tain katabuana ao bootaki ake imwiina. A mwaiti aika kabotaua aia taneiai nakon te bwai ae a tia Aika Itiaki n taai akekei n rinanona ngke “anganaki te mwaaka mai ieta” ni bongin te Bentekota (Ruka 24:49; taraa naba Mwakuri 2:1–4; Reirei ao Berita aika Tabu 109:36–37).
Eliza R. Snow
“Te nebonebo ibukin te katabu anne e kona ni manga warekaki, ma akea taeka mai iaon te aba ae a kona ni kabwarabwarai kaotioti mai i karawa n te bong ae kauringaaba anne. A kaoti anera nakoia tabeman, ngkai namakinan te roko mai karawa e nooraki irouia ni kabane ake a roko, ao a kaonaki naano n te kimwareirei ao te mimitong ae bwanin.’”1
Sylvia Cutler Webb
“Teuana mai ibuakon au ururing bon katabuan te Tembora. E tauiira au karo iaon boton waena ao n tuangiira bukina ngkai ti nako ao tera ae nanonaki ni katabuan ana auti te Atua. Ao e ngae ngke I rangi n uarereke n te tai anne, I uringa raoi te bwai ae riki. I kona n tanrikaaki n tarai bwaai aika riki n taai aika nako ao n noria ngke I nora Iotebwa te Burabeti, n tei ma baina aika tei nako karawa, moana e rangi ni mainarake, ran ni matana a bwaro rikaaki nako tabana ngke e taetae n te bong ae kauringaaba anne. E taraa n ae a bane n tang. E rangi n ibetutu te aomata n te tembora ngaia ae ataei a tekateka iaon bwanibwaniia aomata ake a kara, mwaneu e tekateka iaon tamau. Ngai iaon bwanibwanin tinau. I kona naba n uring kunikai aika ti bwain. E rangin n uarereke au iango n te tai anne n tau mwiin bwaai aika kakawaki, ma ngke e waki nako te tai I a ataa kakawakina ma rikiraken mataatana, ao I rangi ni kakaitau bwa e reke au tai ni mena ikekei.”2
Oliver Cowdery
“N te tairiki are I kaitibo ma aobitia n te ekaretia inanon ana tembora te Uea. Te Tamnei e karuoaki—I nora mimitongin te Atua, kanga te nang ae bubura, n ruo rikaaki ao n tiku iaon te tembora, ao ni kaona te tembora ae ai aron karen te ang ae korakora. I nori naba neewe aika kirimangamanga, n ai aron te ai ni bwaro nakoia aika mwaiti, … ngke a taetae n neewe riki tabeua ao taeka ni burabeti.”3
Benjamin Brown
“A mwaiti mii [aika] noraki. Temanna e nora te uninga ke te nang ae toka iaon te tembora, n takiakia otana ae kanga e a oti taai iaon te nang n aron te koora. Iai uoman aomata uoman a noriia teniman aomata n ririaki inanon te ruu ma aia kiing aika raneanea inanon baia, ao te tiein ae raneanea inanon baia.”4
Orson Pratt
“Te Atua e mena ikekei, ana anera a mena ikekei, te Tamnei ae Raoiroi e mena ibuakoia aomata … ao a kanoaki mai ietan atuia nakon waeia ni mwaakan ao ana kairi te Tamnei ae Raoiroi.”5
Nancy Naomi Alexander Tracy
“[Ngke] e a tia te tembora ao ni katabuaki … aikai bon uoua boong aika te kabanea ni kakukurei man bongin maiu. Te anene ae rangi n riai are e oteaki ibukin te waaki anne ‘Tamnein te Atua ai Aron te Ai Inanora.’ E bon rangin ni koaua bwa korakoran Karawa e mena inanon te tembora. … I namakinna bwa te tembora bon karawa iaon te aba.”6
Mote, Eriati, ao Eria A Kaoti inanon te Kirtland Tembora, iroun Gary E. Smith