Okitobwa 4–10

Reirei ao Berita aika Tabu 111–114

“N na Bairei Bwaai ni Kabane Ibukin Kabwaiami”

Tataromwaaka ni bubuti ibukin ana kairi te Tamnei ngkae ko wareka Reirei ao Berita aika Tabu 111–14, ao korei am namakin. Ngkanne iangoi kawai aika ko kona ni mwakurii taian namakin aikanne.

Korea Am Namakin

Iai te tai ae ko a tia ni karekea te taneiai n tamnei are ko namakina iai te koaua ao te kamanoaki n am onimaki—ma karawawata n te maiu aei a kata am onimaki, ao ko kunea bwa e rawawata iroum manga karekean te rau are ko namakinna mai imwaina? Te bwai ae ti tebo ma are e riki nakoia Aika Itiaki i Kirtland. E ke iaan teuana te ririki imwiin korakoran te tamnei are e reitaki ma katabuan te Kirtland Tembora, a rio kaangaanga. Te kaangaanga n te mwane, man akean te katiteuanaaki n te Kooram n te Tengaun ma Uoman, ao kataaki ake tabeua a karika te nanokokoraki n aia onimaki.

Ti aki kona n totokoi kataaki, ngaia are ti na kanga ni kararoaaia man kamamaraeakin ara onimaki ao ara koaua? Tao mwakoron te kaeka e kona ni kuneaki n ana reirei te Uea inanon Reirei ao Berita aika Tabu 112, ae anganaki ngke e a rikirake te kakaitara i Kirtland. E taku te Uea, “Kaitiaki nanomi i matau” (kibu 28), “Tai kaitara” (kibu 15), “Kabaea nukam ibukin te mwakuri” (kibu 7), ao “Ko na nanorinano” (kibu 10). Ngkae ti ira te reirei, te Uea e na “kairiira [ni] baina” rinanon te kakaitara ao inanon te kamaiuaki ao te rau (taraa kiibu 10, 13).

Iango ibukin te Kamatebwai i bon Iroum ni Koroboki aika a Tabu

Reirei ao Berita aika Tabu 111

E kona te Uea n “bairei bwaai ni kabane ibukin [au] raoiroi.”

N te 1836, e a tia te Ekaretia ni kabatia ana tarau ni karaoan ana mwakuri te Uea. Ngkai Iotebwa Timiti ao tabeman a raraoma ibukin taarau aikanne ao n iangoi kawai ni kaitiaki, a mwananga nako Salem, Massachusetts, tao bukina ngke iai te rongorongo bwa iai tabeua mwaane aika a tia ni katukaki n te auti ikekei (taraa atuun te mwakoro n Reirei ao Berita aika Tabu 111). Imwiin rokoia i Salem, e katanoata te Uea, “A mwaiti riki nakon teuana bwaai aika kakaawaki ibukimi n te kaawa aei” (kibu 10)—bwaai aika kakawaki n aron te aomata are E na “bobotia ni kaotinakoia n te tai ae riai ibukin kabwaian Tion” (kibu 2; taraa naba Te Otinako 19:5). E boni ngae ngke akea te mwane ae reke i Salem, nake a rairaki ake a roko man aia kekeiaki mitinare ake imwiina bon ngaia taan ibuobuoki ni kakoroan nanon a na berita te Uea.

Ngkae ko wareka mwakoro 111, iangoi bwaai aika ko raraomaeakin. Iangoia bwa e kanga ana taeka te Uea nakon Iotebwa ni kaineti nakoim. E kanga te Uea n tia ni buokiko ni kakaai “bwaai aika kakawaki”? (kibu 10). Iangoa te bwai ae E a tia ni karaoia ni “bairei bwaai ni kabane ibukin kabwaiami” (kibu 11). Tera ae reireiniko te kibuntaeka “n te tai ae tawe n aron ae kam kona ni karekei” n taekan Tamara are i Karawa?

Taraa naba Mataio 6:19–21, 33; “More Treasures Than One,” Revelations in Context, 229–34.

Reirei ao Berita aika Tabu 112:3–15

Te Uea e na kairiia naake a nanorinano n ukoukora Ana kantaninga.

Te katiteuanaki n te Kooram n te Tengaun ma Uoman e mamaara n tain te kabuebue n te 1837. Iai te aki boraoi n iango n taabe, ao tabeman membwa a taekin bwaai ni kaitaraa te Burabeti Iotebwa Timiti. Thomas B. Marsh, are bon te Beretitenti n te Kooram n te Tengaun ma Uoman n te tai anne, e tabeaianga, ao e roko mai Missouri nako Ohio, n ukoukori reirei mairoun te Burabeti. Te Tari Marsh e karekea rinanon te kaotioti inanon te mwakoro 112. E kanga ana reirei te Uea ni kona ni buokia ao ana kooram? Tera taian reirei ibukim ngkana ko ukoukoria n tokanikai iaon te itabarara ao naano aika matoatoa?

Irarikin anne, ko na kona n iangoa kibu 10. Tera ae nanonaki n ae te Uea e na kairiko “ni baina”? Bukin tera te nanorinano e kainnanoaki ibukin te aeka ni kairi aei?

Taraa naba Ulisses Soares, “Be Meek and Lowly of Heart,” Ensign ke Riaona, Nobembwa 2013, 9–11; “The Faith and Fall of Thomas Marsh,” Revelations in Context, 54–60.

Ngkana ti nanorinano, te Uea e na kairiira ao ni kaekai ara tataro.

Reirei ao Berita aika Tabu 113

Iotebwa Timiti bon “te tia mwakuri ni bain Kristo.”

Itaia e tara temanna ana kariki Iete bwa te “kai” ao te “wakaa” (Itaia 11:1, 10). Inanon mwakoro 113, e kabwarabwara te Uea bwa te kanoa aei, a na toro Kristo, a na riki bwa bwaai ni mwakuri n ikotakin ana aomata te Uea ni boong aika kaitira (taraa Reirei ao Berita aika Tabu 113:4, 6)—te taetae ni burabeti are e kabwarabwara raoi te Burabeti Iotebwa Timiti. E kanga aei ao koaua ake tabeua inanon mwakoro 113 ni kaunganano nakoia Aika Itiaki n tain te kaangaanga ae a rinanona i Kirtland? Antai ae ko kunea inanon te kaotioti aei ae kaungako bwa ko na ira ana mwakuri te Uea n te bong aei?

Taraa naba Kairi nakon Koroboki aika Tabu, “Iete,” scriptures.ChurchofJesusChrist.org; 2 Nibwaai 21:10–12; Iotebwa Timiti—Rongorongo 1:40.

Iango ibukin Kamatebwai ni Koroboki aika Tabu n te Utu ao te Bootaki n Utu n te Tairiki

Reirei ao Berita aika Tabu 111:2, 9–11.A kona kiibu aikai ni kaunga te marooro iaon te bwai ae kakawaki nakoia kaain am utu bwa “bwaai aika kakawaki” aika akea tokiia.” Ko kona ni karaoa karabaakin bwaai aika kakawaki man karabaakin bwain te auti aika a tei ibukin bwaai aika a kakawaki ao ni bongana iroun te Uea. Ngkana a kunei bwaai aikanne kaain te utu, maroroakinna bwa tera ae kam kona ni karaoia ni kaotia bwa e kakawaki iroum.

Reirei ao Berita aika Tabu 112:10.Beretitenti Ulisses Soares e kabwarabwaraia aomata aika nanorinano n te kawai aei: “Aomata aika nanorinano a kai reireinaki, ni kinai aroia n onimaki iroun te Atua ao n tangiria ni booraoi nakon Ana kantaninga. Aomata aika nanorinano a nimamannei ao iai aia konabwai n anai nanoia tabeman bwa aonga n riki naba n aiaroia” (“Be Meek and Lowly of Heart,” Ensign ke Riaona, Nobembwa 2013, 10). Iangoi kawai aika a na buokiia kaain am utu n ataa nanon te nanorinano. Ko kona n anenea te anene iaon taekan te nanorinano, n aron “Ko Na Nanorinano” (Boki n Anene, nambwa 130), ngkai temanna kaain te utu e anaa temanna “ni baina” ao ni kairiia ni katobibia mwengam. Ke tibwaua te taneiai ngke e a tia te Uea ni kairiia kaain am utu “ni baina” ao n anganaiia te “kaeka nakon [aia] tataro.”

Reirei ao Berita aika Tabu 112:11–14, 26.Tera te kaokoro imarenan atakin aran temanna ao ni kinakina? Tera ae ti reiakinna man kiibu 11–14 iaon nanon atakin te Uea?

Reirei ao Berita aika Tabu 112:15.Tera ae nanonaki bwa ko na “kaitara” te burabeti? Tera ae ti kunea n te kibu aei are e buokira bwa ti na boutoka te burabeti?

Reirei ao Berita aika Tabu 113:7–8.Tera ae ti reiakinna man te kibu 8 are e na ibuobuoki ni “manga kaoka Tion” ao ni kamaiua Iteraera?

Ibukin iango riki tabeua n reiakinaia ataei, taraa te kamataata n te wiiki aei inanon Nakomai, Iriirai—Ibukin te Moanrinan.

Anene aika katauaki: “Ko Na Nanorinano,” Boki n Anene, nambwa. 130.

Kanakoraoan Ara Anga reirei

Tibwaua am kakoaua. “‘Ko reirei baike ko kakaraoi,’ e reirei Beretitenti Neal A. Maxwell. ‘Ana ururingaki riki am mwakuri … nakon te koaua ae onoti n te reirei ae onoti’” (Te Angareirei n Ana Kawai te Tia Kamaiu, 13).

Thomas B. Marsh e korea taekan te kaotioti are e anganaki rinanon Iotebwa Timiti. Ko Na Nanorinano, iroun Julie Rogers.