“Okitobwa 4–10. Reirei ao Berita aika Tabu 111–114: ‘N na Bairei Bwaai ni Kabane ibukin Kabwaiami,’” Nakomai, Iriirai—Ibukin te Moanrinan: Reirei ao Berita aika Tabu 2021 (2020)
“Okitobwa 4–10. Reirei ao Berita aika Tabu 111–114,” Nakomai, Iriirai—Ibukin te Moanrinan: 2021
Okitobwa 4–10
Reirei ao Berita aika Tabu 111–114
“N na Bairei Bwaai ni Kabane ibukin Kabwaiami”
Titita Cheryl A. Esplin, te kauntira mai imwaina n te Beretitentii ni Kabuta n te Moanrinan, e taku bwa ti riai ni “[buokiia] natira ni karekea te reirei inanoia n te kawai are … e na bon oti n anuaia ao ni kateiia n rinanon maiuiia” (“Teaching Our Children to Understand,” Ensign ke Riaona, Meei 2012, 10).
Korei Am Namakin
Kaunga te Tibwatibwa
Ibukin kaungaakia ataei n tibwatibwa, uoti tabeua bwaai ake a irekereke ma te bwai inanon te reirei are mai imwaina. Anganiia bwa a na maroroakinna tera ae a kauringaaki iai ni bwaai aikai n tatabeua.
Reirei te Reirei: Ataei aika a Uarereke
Reirei ao Berita aika Tabu 111:2, 10–11
Ana bwai te Atua a riki bwa kaubwaiu.
Ataei ngke a iangoa te taeka ae kaubwai, a na bae ni katamnei bwaai ake a kaokoro man kaubwai ake a taekinaki n Reirei ao Berita aika Tabu 111:2, 10. Ko na kanga ni buokiia n reireiniia bwa a na kawakin ana bwai te Uea?
Waaki ni Kakukurei aika a Kona ni Karaoaki
-
Kaoiia ataei bwa a na korea tamnei te bwai are e roko n aia iango ngke a ongo te taeka ae kaubwai. Kabotaui bwaai are e taraia te aonaaba bwa te kaubwai ma kaubwain te Uea (taraa Reirei ao Berita aika Tabu 111:2, 10–11), n aroia Ana aomata, wanawanaia ao tamaroaia, ao karaoan rinerine aika raoiroi.
-
Buokiia ataei bwa a na katiai iteranibaan te waaki ni kakukurei n te wiiki aei. Tera ae ti reiakinna ibukin Iesu man bwaai aika kakawaki Irouna? Ti na kangaa n riki n ai Arona?
Reirei ao Berita aika Tabu 112:10
Te Uea e na kairai ni baina ao e kaekai au tataro.
Reirei ao Berita aika Tabu 112:10 e kona ni buokiia ataei ake ko reireiniia ni karikirakea aia onimaki bwa Iesu Kristo e na kairiiria ao ni kawakiniia rinanon maiuia.
Waaki ni Kakukurei aika a Kona ni Karaoaki
-
Buokiia ataei bwa a na iangoi kaangaanga ngke e kakawaki bwa ko na taua baia kaain am utu, n aron are ngke ko a rinuukan te kawai ke n anga te karaunano. A na rangi ni kukurei ni karaoa te kaotioti iaon tabeua katooto ake a tibwauai. Wareka Reirei ao Berita aika Tabu 112:10. Bukin tera ngkai ti tangira te Uea bwa “e na [kairiira] ni baina”?
-
Kabaea matam temanna te ataei, ao titirakinna teuanne ke neienne bwa e na nakonako n rinuukan te ruu ma temanna te ataei ae e kairiiri ni baina. Karakina te bwai ae ko a tia n rinanon ngke ko namakinna bwa e kairiiriko te Uea ni baina.
TamneiIesu ma te ataeinimwaane ao tinanaTeirake ao Nakonako, iroun Simon Dewey
Reirei ao Berita aika Tabu 112:11
E tangirai Iesu bwa N na tangiriia aomata nako.
Buokiia ataei n ataia bwa e tangiria te Tia Kamaiu bwa ti na tangiriia aomata nako, riki naake aki karaoa ae raoiroi nakoira.
Waaki ni Kakukurei aika a Kona ni Karaoaki
-
Ngkai ko tibwaua “Mwakoro 41: Te Kaangaanga i Kirtland” (Karaki man Reirei ao Berita aika Tabu, 158–60), tuangiia ataei bwa a na karaoa te aati ni baia ngke a ongo taekan temanna bwa e karaoa ae raoiroi. Buokiia ni kamataataia bwa e tangiriira te Uea bwa ti na tangiriia aomata nako, ao riki naake a karaoi rinerine aika a kairua.
-
Korea tamnein te ubu ae nanokawaki iaon te burakibooti, ao titirakiniia ataei ti na kanga ni kaota ara tangiria ibukiia tabeman ake aki kukurei (taraa Reirei ao Berita aika Tabu 112:11). Ngkai a tibwauai iango ataei, manga korea riki tamnei te ubu ae nanokawaki ni karaoia bwa te ubu ae kukurei. Tibwaua am koaua ibukin te korakora are e roko man tangirakiia tabeman. Ikotaki anenea kunan te tangira, n aron “Jesus Said Love Everyone” (Aia Boki n Anene Ataei,61).
Reirei te Reirei: Ataei aika a Ikawai Riki
Reirei ao Berita aika Tabu 112:10
I kona n nanorinano ao ni ukora ana kairiiri te Atua.
E tangiriira Tamara are i Karawa bwa ti na nanorinano bwa E aonga ni kairiira. Buokiia ataei ni kamataataia bwa a na kanga ni kananorinaoia imatan te Atua man karaoan bwaai n aron te tataro Nakoina ao ao ni butimwaai Ana reirei.
Waaki ni Kakukurei aika a Kona ni Karaoaki
-
Titirakiniia ataei ngkana a ataia bwa tera ae nanonaki n te nanorinano. (A kona ni wareka “Nanorinano” inanon Koaua nakon te Onimaki [iteraniba 86–87] ngkana e kainnanoaki). Buokiia n iangoi taeka ke kibuntaeka ake a irekereke ma te “nanorinano,” ao kaoiia bwa a na wareka Reirei ao Berita aika Tabu 112:10, n oneamwiin teuana mai buakon taeka aikai ke kibuntaeka ibukin “nanorinano” inanon te kibu. Bukin tera ngkai Tamara are i Karawa e tangiriira bwa ti na nanorinano? N reiakinaki riki, a kona ataei ni wareki rakan koroboki aika tabu ake a karinanaki iaan “Humble, Humility” inanon Kairi nakon Booki aika Tabu (scriptures.ChurchofJesusChrist.org).
-
Korei taeka man Reirei ao Berita aika Tabu 112:10 iaon te burakibooti, ao tuangiia ataei bwa a na warekia ni kabaibati. Kaoa te ataei bwa e na kanikinaea aan te taeka ae kakabwaia ibukiia naake a nanorinano are e taekinaki n te kibu aei. Kaungaia ataei bwa a na tibwauai taai are ngke a nanorinano n ukora ana ibuobuoki te Uea ao a kairiiraki Irouna, n aron are ngke a kaekaaki aia tataro.
Reirei ao Berita aika Tabu 112:11
Tamara are i Karawa e tangirai bwa N na tangiriia aomata nako.
Iesu Kristo bon te banna ni katooto ae kororaoi n tatangiraia aomata nako, ao riki naake a bwainikirinna. Iotebwa Timiti e rinanon te bwainikirinaki naba irouia naake bon raoraona. Buokiia ataei bwa a na ataia ae ti kona n tangiriia tabeman n aron are e karaoia te Tia Kamaiu ao Iotebwa Timiti.
Waaki ni Kakukurei aika a Kona ni Karaoaki
-
Kaoiia ataei bwa a na ikaruoruo ni wareware man “Mwakoro 41: Te Kaangaanga i Kirtland” (Karaki man Reirei ao Berita aika Tabu, 158–60). Antai inanon te karaki ae karika te kaangaanga i Kirtland? Antai ae kataia ni kanakoraoiia? Kaoiia ataei bwa a na wareka Reirei ao Berita aika Tabu 112:11 ao maroroakinna bukin tera ngkai e kakawaki bwa ti na tangiriia aomata nako.
-
Bukin tera ngkai e kakawaki bwa ti na tangiriia aomata ake a kaokoro ma ngaira? Bukin tera ngkai Tamara are i Karawa e anganiira kakaokorora? Ti na kanga ni “kariaia [ara] tangira bwa e na korakora nakoia aomata ni kabane,” nakoia naba ake a kaokoro ma ngaira? Anene ma ataei n taekan tangirakiia tabeman, n aron,“I’ll Walk with You” (Aia Boki n Anene Ataei, 140–41).
-
Buokiia ataei bwa a na iangoi ana katooto te Tia Kamaiu ngke e tangiriia naake a bwainikirnna (n aron te katooto, taraa Ruka 23:34).
Reirei ao Berita aika Tabu 112:12–15, 26
Naake a rairaki ni koaua a karekea riki ataakin Iesu Kristo.
Ngkana ko a rairaki raoi nakon Iesu Kristo bon te waaki ae reitinako n tokin maium, ao e irekereke n ae e riaon riki ae ti “[taku] bwa ataa [Arana]” (Reirei ao Berita aika Tabu 112:26). Buokiia ataei bwa a na mataata raoi tera nanon ae ko na ataa rao te Tia Kamaiu.
Waaki ni Kakukurei aika a Kona ni Karaoaki
-
Tibwauaia nakoia ataei bwa n 1837, tabeman Abotoro a kaitara te Burabeti Iotebwa Timiti. Bukin tera e kakawaki bwa ti na ira te burabeti? (taraa te kibu 15). Buokiia ataei bwa a na korei ni karinani bwaai are e tua te Uea nakon Thomas B. Marsh, te Beretitenti n te Kooram n Abotoro n te Tengaun ma Uoman, bwa a na karaoi (taraa Reirei ao Berita aika Tabu 112:12–15). Kabonganai bwaai akana a karinanaki ni maroroakinna bwa ti na kanga n rairaki nakon Iesu Kristo.
-
Titirakiniia ataei bwa tera aia iango are a taku bwa ataa Iesu Kristo ma a bon aki Ataia raoi (taraa Reirei ao Berita aika Tabu 112:26). Tera ae reiakinaki n te kibu 14 ae ti kona ni karaoia bwa ti na ataia raoi? Buokiia ataei ni kamataataia tera nanon ae “uouota [ara] kaibangaki” (Ana Rairairi Iotebwa Timiti, Mataio 16:25–26 [in the Bible appendix]) ke ni “kamwarakeia [Ana] tiibu.”
Kaungaa te Kamatebwai n te Mweenga
Kaoiia ataei bwa a na kakimototoa bwa tera are a tia n reiakinna inanon te kiraati n te bong aei. Buokiia ni karaoa rongorongon ke korea te tamnei are e na kauringiia ni bwaai ake a tia n reiakin bwa aonga ni tibwauaia ma aia utu.
Kanakoraoan Ara Anga reirei
Ataei a rangi n reberake ni kan atatai ao n reirei ni kawai aika bati. Ataei a kukurei n reireinaki ni kawai aika boou man kakaokoro. Kabonganai waaki ni kakukurei are e na buokiia ni kakamwakuri, ni kabonganai aia namakin, ao ni katai bwaai aika a boou. (Taraa Reirei n ana Kawai te Tia Kamaiu, 25–26.)