“Okitobwa 18–24. Reirei ao Berita aika Tabu 121–123: ‘O te Atua, Ko Mena Iaa?’” Nakomai, Iriirai—Ibukin te Moanrinan: Reirei ao Berita aika Tabu 2021 (2020)
“Okitobwa 18–24. Reirei ao Berita aika Tabu 121–123,” Nakomai, Iriirai—Ibukin te Moanrinan: 2021
Karabuti ae Liberty n te Tiburing, iroun Al Rounds
Okitobwa 18–24
Reirei ao Berita aika Tabu 121–123
“O te Atua, Ko Mena Iaa?”
Ngkai ko kamatebwaia Reirei ao Berita aika Tabu 121–23, iangoia bwa tera ae a tia n ataia ataein am kiraati. Tataro bwa ko na ataia bwa ko na kanga ni karikirakeia man te bwai are a ataia.
Korei Am Namakin
Kaungaa te Tibwatibwa
Ngkana ko kaungaiia ataei bwa a na tibwa te bwai are a tia n reiakinna n am kiraati n te wiiki ae nako ma aia utu, anganiia te tai n tibwa are a tia n rinanona.
Reirei te Reirei: Ataei aika a Uarereke
Reirei ao Berita aika Tabu 121:7–8; 122:7
Taai aika kaangaanga e kona n riki ibukin ae raoiroi ibukira.
Ana taeka te Uea nakon Iotebwa Timiti n te Karabuti ae Liberty e anga te tai ni buokiia ataei bwa a na ataia bwa n tabetai e kaangaanga te maiu, ma Tamara are i Karawa ao Iesu Kristo a kona ni buokiira.
Waaki ni Kakukurei aika a Kona ni Karaoaki
-
Kaoia ataei bwa a na kakauongo nakon te taeka “rau” ngkai ko tibwaia ma ngaiia “Mwakoro 46: Iotebwa Timiti n te Karabuti ae Liberty” (Karaki n Reirei ao Berita aika Tabu, 172–74) ke Reirei ao Berita aika Tabu 121:7–8. Buokiia ataei bwa a na iangoi kawai ake a kona iai n onimakina te Uea n aron are e karaoia Iotebwa bwa ti aonga n namakina te rau. Kabwarabwara bwa e ngae ngke e rinanon bwaai aika a matoatoa Iotebwa, te Uea e raonna.
-
Ni buokakiia ataei n ataia bwa ara kaangaanga “bon ibukin kabwaia [ra] (Reirei ao Berita aika Tabu 122:7), taetae ma ngaiia iaon aron ara mwatireti n rikirake ngkana ti uota te bwai ae tinebu. Anganiia bwa aongkoa a tabeka te bwai ae tinebu ke te mwakuri ae kaangaanga. Kabwarabwara bwa rinanoan te tai ae kaangaanga e kona ni buokii tamneira bwa a na rikirake—ngkana ti rairaki nakon te Uea ibukin ana ibuobuoki. Tibwai tabeua katooto are a kona ni karekerekei ataei ake ko reireiniia. Kaoia bwa a na kaokiokia ma ngkoe te kibu n taeka “Bwaai aikai ni kabane … bon ibukin kabwaia [ra].”
Reirei ao Berita aika Tabu 122:8
Iesu Kristo e ata aron au namakin.
N te karabuuti i Liberty Iesu Kristo e tuanga Iotebwa Timiti bwa Ena karuoi rikaaki bwaai ni kabane (taraa Reirei ao Berita aika Tabu 122:8). Nanon aei bwa E ataia bwa tera are ti a rinanona ao ti kona n rairaki nakoIna.
Waaki ni Kakukurei aika a Kona ni Karaoaki
-
Ni buokiia ataei n ataa aroia n rairaki nakon Kristo ngkana a rinanon bwaai aika kaangaanga, tuangiia bwa a na kaotia nakoim aron taraakin moaia ngkana a nanokawaki ke ni maraki ke ni maaku. Antai ae e kona ni buokiira ngkana ti namakina te aro aei? Wareka Reirei ao Berita aika Tabu 122:8, ao kabwarabwara bwa Iesu Kristo e atai aron ara namakin, ao E kona ni buokiira.
-
Ikotaki anenea “Jesus Once Was a Little Child” (Aia Boki n Anene Ataei, 55), ao kakoaua bwa Iesu Kristo e kona ni buokiira ibukina bwa E atai aron ara namakin.
TamneiIesu iaon n tano i KetetemwaneIesu e atai korakaira. Ma Akea Au Taeka Ma E Na Tauaki Am Taeka, iroun Walter Rane.
Reirei ao Berita aika Tabu 123:17
Te Atua e tangirai bwa N na kukurei ni karaoi bwaai ake I konai.
E ngae ngke e mena n te karabuuti Iotebwa Timiti ao aika Itiaki a tia ni kakioaki nako man mweengaia, e kaungaia aika Itiaki bwa a na “kukurei ni karaoi bwaai ni kabane ake a mena ni mwaakara.”
Waaki ni Kakukurei aika a Kona ni Karaoaki
-
Warekia nakoia ataei Reirei ao Berita aika Tabu 123:17, ao kaoia bwa a na teiraki ao n takarua ngkana a ongo te taeka “kukurei.” Kaoia bwa ai aongkoa a karaoi mwakuri n ibuobuoki aika a kakaokoro n te aro ae kakukurei.
-
Anenea ni kabane te kuna iaon te ibuobuoki, n aron “When We’re Helping” (Aia Boki n Anene Ataei, 198). Buokiia ataei n iangoi kawai ake a kona iai ni beku ibukin aia utu ao raraoia.
Reirei te Reirei: Ataei aika a Ikawai Riki
Reirei ao Berita aika Tabu 121:7–9; 122:7–9
Au kaangaanga a kona n riki bwa kabwaiau.
Teuana te kawai are te Tia Kamaiu e karaua iai nanon Iotebwa Timiti ngke e korakai n te Karabuti ae Liberty bon reireiana “bwa ni kabane bwaai aikai a na anganiko te kataneiai, ao bon ibukin kabwaiam” (Reirei ao Berita aika Tabu 122:7). Te koaua aei e kona ni kakabwaiaiia ataei ngkana a kaitarai oin aia kaangaanga.
Waaki ni Kakukurei aika a Kona ni Karaoaki
-
Kaoia ataei bwa a na tibwa te bwai are a ataia n ana taneiai Iotebwa Timiti n te karabuti ao Aika Itiaki ngke e kakioaki nako mai Missouri (taraa mwakoro 45–47 man Karaki man Reirei ao Berita aika Tabu, 167–75). Titirakiniia ataei bwa tera aron aia namakin ngke arona bwa raoia Iotebwa Timiti ke temanna Aika Itiaki n te tai aei. Warekia ma ataei Reirei ao Berita aika Tabu 121:7–9; 122:7–9, ao kaoiia bwa a na kakaea te bwai are e taekinna te Uea are e na uota te rau nakoia. E kanga ara taneiai aika a kaangaanga n “riki bon ibukin kabwaia [ra]”?
-
Tuangiia uoman ataei bwa a na taua tabon te kora are e tau abwakina ni katikia rinuukan te ruu. Tuanga te ataei temanna bwa e na kinika te tabo teuana iaon te kora. Wareka Reirei ao Berita aika Tabu 121:7–8, ao kabwarabwara bwa te kora e tei ibukin te ririki ae akea tokina ao te tabo are e uarereke are e kinikaki ai aron ara ririki iaon te aba. Tera ae e nanonaki bwa kataakira iaon te aba bon “te tai ae uarereke”?
-
Buokiia ataei bwa a na iangoia bwa aekakira aron kabanean aua namwakaina n te tabo ae ai aron te karabuti ae Liberty. Tera ae ti na rang n tangiria riki? Ti na kanga ni kabongana ara tai? Tera ae e reiakinna Iotebwa Timiti inanon Reirei ao Berita aika Tabu 121:7–9; 122:7–9 are e buokia n rinanon te bwai ae riki aei? Kaungaia ataei bwa a na korea te reta nakon temanna ae e rinanon te kaangaanga, ao ni kaotia bwa a kona ni kabongana te bwai are man Reirei ao Berita aika Tabu 121:7–9; 122:7–9 inanon aia reta.
Reirei ao Berita aika Tabu 121:34–46
Ti riai ni bwaina te raoiroi bwa ti na karekea “mwaakan karawa.”
Buokiia ataei ake ko reireiniia bwa a na ataia bwa ti kona ni karekea mwaakan te Atua inanon maiura tii ngkana ti maiuakina ae raoiroi.
Waaki ni Kakukurei aika a Kona ni Karaoaki
-
Korea te rain ma te taeka mwaaka ae rietaata i tabona teuana ao mwaaka ae rinano n are teuana. Korea tamnein te kainikoto ae kotea nuukan te rain. Rinei tabeua taeka ke kibuntaeka man Reirei ao Berita aika Tabu 121:34–46 are e reirei aron are ti kauarerekea ke ni kakorakora mwaakan karawa inanon maiura (n aron ae “karabai ara bure,” “kamoamoa,” “nimamannei,” ao “te tangira”). Kaoia ataei bwa a na ikaruoruo n anaa te taeka, ni baireia ngkana te taeka e kairi nakon kauarerekean ke karikirakean te mwaaka, ao ni kamwainga te kainikoto nakon are e na koteia. Taetae ma ataei ibukiia aomata ake a ataia aika a tia n rinanon bwaai aika tamaroa iaoia tabeman ibukina bwa a ira ana reirei te Uea inanon kiibu aikai.
-
Wareka Reirei ao Berita aika Tabu 121:41–42, 45, ao tuangiia ataei bwa a na korei rinanin tamaroan kiibu aikai are e tangiriira te Uea bwa ti na karekei. Buokiia ni kabwarabwarai taeka ake aki ota iai. Katoaia ataei ma anua, ao buokiia n iangoa te kawai are a kona ni kaotia iai. N te tai are a tibwai iai ni kabane, tuangiia bwa a na wareka kibu 45–46 ao ni karinani kakabwaia ake a na karekei ngkana a karikirakei anua akanne.
-
Ikotaki wareka te moan rain man Reirei ao Berita aika Tabu 121:46. E na kanga te Tamnei ae Raoiroi n “riki bwa raora n tainako”? Ikotaki anenea “The Holy Ghost” (N aia Boki n Anene Ataei, 105) ke te kuna teuana iaon ana bwaintangira te Tamnei ae Tabu. Tera te bwai ae e reireiniira te kuna ibukin ngkai ti tangira te Tamnei ae Raoiroi bwa e na riki bwa raora n tainako?
Kaungaa te Kamatebwai n te Mweenga
Kaoia ataei bwa a na iangoa temanna ae e rinanon te tai ae rangi ni kaangaanga. Buokiia n ataa te bwai are e reiakinna Iotebwa Timiti n te karabuuti ae Liberty are a kona n tibwaia ma te aomata anne.
Kanakoraoan Ara Anga reirei
Boutoka te Kamatebwai n te mweenga. “A bon rangi ni kakawaki kaaro bwa taan reireia te euangkerio nakoia natiia—iai irouia te mwiokoaki ao te korakora ni kairoroia natiia (taraa Te Tua Kaua 6:6-7). N am tai n reireiniia ataei n tain te taromauri, tataromwaaka bwa a na reke kawai ake ko kona ni boutokaia iai aia karo n tibwangaia ae kakaawaki” (Reirei n Ana Kawai te Tia Kamaiu, 25).