Te Tembora are i Kirtland, iroun Jon McNaughton

Tebetembwa 27–Okitobwa 3

Reirei ao Berita aika Tabu 109–110

“Bon Am Auti, Nnem ae Tabu”

Ni karekean taneiai n te tamnei ni kamatebwaian Reirei ao Berita aika Tabu 109–10 ma ataei n am kiraati, ukora moa karekean am taneiai n tamnei i bon iroum ni kamatebwaian booki aika tabu aikai.

Korei Am Namakin

Kaungaa te Tibwatibwa

Kaotii tamnei are e na buokiia ataei n uringa ao n tibwaua te bwai are a tia n reiakinna ibukin reirei ke bwaai aika a riki inanon Reirei ao Berita aika Tabu 109–10. N aron te katooto, ko kona ni kaota te tamnei man te kabwarabwara n te wiiki aei inanon Nakomai, Iriirai—Ibukiia Aomata n Tatabemaniia ao Utu.

Reirei te Reirei: Ataei aika a Uarereke

Reirei ao Berita aika Tabu 109:12–13; 110:1–7

Te tembora bon Ana auti te Uea.

Iangoia ko na kanga ni buokiia ataei n namakina te karinerine ibukin ana auti te Uea ao ni kakariariaa te bong are a kona iai n rin ni “[Nnena] ae tabu” (Reirei ao Berita aika Tabu 109:13).

Waaki ni Kakukurei aika a Kona ni Karaoaki

• Tuangiia ataei bwa a na tuangko bwa tera te bwai ae a tangira iai mweengaia. Kaotia nakoia ataei tamnein te Tembora are i Kirtland, ao kabongana Reirei ao Berita aika Tabu 109:12–13; 110:1–7 n tuangiia te bong are e katabuaki iai te tembora ao n riki bwa ana auti te Uea (taraa naba “Mwakoro 39: The Kirtland Temple Is Dedicated,” Karaki man Reirei ao Berita aika Tabu, 154). Ni kaotia bwa te tembora bon ana auti te Uea, wareka te tataro ni katabu ae imwiina are e anga Iotebwa Timiti: “Bon am auti, nnem ae tabu” (Reirei ao Berita aika Tabu 109:13). Tuangiia ataei bwa a na tuangko bwa tera te bwai ae a tangira iai mweengaia.

• Katoaia ataei n anganiia tamnein te tembora, ke kaoiia bwa a na korea tamnein teuana. Ikotaki anenea kunan te tembora, n aron “I Love to See the Temple” (Aia Boki n Anene Ataei,95). Kaoiia ataei bwa a na taui ieta aia tamnei ni katoa tai are a anenea iai te taeka ae “tembora.” Kotei tabeua taeka nakoia inanon te anene n te bwai ae ti reireinaki iai ibukin kakawakin te tembora. Tuangiia ataei aron am namakin ibukin te tembora ao ko kanga n ataia ae ana auti te Uea.

Reirei ao Berita aika Tabu 110

Kainnanoakin kiingin te nakoanibonga ibukin kakoroan bukin ana mwakuri te Atua a mena n te Ekaretia n te bong aei.

Te Tembora are Kirtland e kakawakin n rongorongon te Ekaretia. E a tia ni kaoti te Iesu Kristo ikekei, n raonaki ma burabeti ake ngkoa. Burabeti aikai a anga kiingin te nakoanibonga nakon Iotebwa Timiti are a kainnanoaki ibukin ana mwakuri te Atua ni boong aika kaitira.

Waaki ni Kakukurei aika a Kona ni Karaoaki

• Kabongana te iteraniba n te waaki ni kukurei n te wiiki aei ke “Mwakoro 40: Visions in the Kirtland Temple” (Karaki man Reirei ao Berita aika Tabu, 155–57) n tuangiia ataei taekaia kaain karawa ake a roko nakon te tembora. Tibwauai kiibu man Reirei ao Berita aika Tabu 110 are a buokiko ao ataei n ataa aron tabun bwaai aika riki aikai.

• Kaotii tabeua kiing nakoia ataei, ao maroroakinna tera ae a karaoia kiing aikai. Anganiia ataei bwa a na ikaruoruo n taui taian kiing ao aongkoa are e a kauka te mataroa ae rokanaki. Ngkai a karaoia, kabwarabwara ae Iotebwa Timiti e karekei kiingin te nakoanibonga n te Tembora are Kirtland. Kiing aikai a karekea te korakora ao kakabwaia bwa ti aonga ni kona ni karaoa ana mwakuri te Atua n Ana Ekaretia, n aron tibwauakiin te euangkerio ao karaoan te mwakuri n te tembora.

• Ni buokiia ataei ni kamataataia n taian kiing are e anga Eria nakon Iotebwa Timiti, ikotaki anenea te kuna ae taekan Eria ke rongorongon te utu, n aron “Truth from Elijah” (Aia Boki n Anene Ataei, 90–91). Karakina te bwai are ko rinanona are e buoka n raira nanom nakoia am bakatibu. Tuangiia ataei bwa a na tibwaua aia atatai ibukiia tibuia ke tabeman aia bakatibu.

Reirei te Reirei: Ataei aika a Ikawai Riki

Reirei ao Berita aika Tabu 109; 110:1–10

Te tembora bon Ana auti te Uea.

Ko na kanga n tibwauaia ma ataei am tangira ibukin ana auti te Uea? Iangoia ko na kanga n anainanoia ni butimwaea ana kakaewenako Unimwaane Quentin L. Cook “ibukira n tatabemaniira, n te tabo are ti mena iai, n noriira inanon te tembora” (“See Yourself in the Temple,” Ensign ke Riaona, Meei 2016, 98).

Waaki ni Kakukurei aika a Kona ni Karaoaki

• Rinei kiibu man mwakoro 109 ke 110 are ko namakinna bwa a kaotii kakabwaia man te tembora (tabeua a tia ni baireaki inanon te kamataata n te wiiki aei inanon Nakomai, Iriirai—Ibukiia Aomata n Tatabemaniia ao Utu). Korei ni karinani kakabwaia aikai iaon te burakibooti, ao kaoiia ataei bwa a na ukori kiibu ni kakaei kakabwaia akanne. E na kanga aron ara kabwarabwara nakon temanna bwa bukin tera ngkai e rangi ni kakawaki te tembora iroura?

• Tuangiia ataei bwa a na karaurau ni wareka Reirei ao Berita aika Tabu 110:1–10, ao kaoiia bwa a na tibwaua te bwai are a reiakinna ibukin Iesu Kristo ke te tembora man kiibu aikai. Kaoiia ataei bwa a na korea tamneiia ao te Tia Kamaiu inanon te tembora.

• Tuangiia ataei bwa a na iangoia bwa ao ngkoa iai raoraoia ae kataia ni kakaea aia auti. Ti na kanga ni buokiia raoraora n ataia bwa e ngaa iai ara auti? Ti kanga n ataia ae te tembora bon ana auti te Uea? Wareka Reirei ao Berita aika Tabu 109:12–13 ma ataei, ao tuangiia bwa ko kanga n ataia ae te tembora bon ana auti te Uea. Kaoti tamnein te tembora, ao anganiia ataei bwa a na tibwauai aia namakin ibukin ana auti te Uea.

• Anene ma ataei “Tamnein te Atua” (Anene n Taromauri, nambwa 2), ao tuangiia bwa e aneneaki ni katabuan te Tembora are i Kirtland—ao ni katabuan tembora ni boong aikai. Bukin tera ngkai aei bon te anene ae tamaroa ibukin katabuan te Tembora are Kirtland?

  

  N tabon te Tembora are Kirtland n tatabeua iai taabo n taetae ibukiia taan kairiiri n te nakoanibonga.

Reirei ao Berita aika Tabu 110:11–16

Kainnanoakin kiingin te nakoanibonga ibukin kakoroan bukin ana mwakuri te Atua a mena n te Ekaretia n te bong aei.

E taku Unimwaane Gary E. Stevenson, “Ni kabane natin Tamara are i Karawa a [tia] ni kararoaaki man ana otenanti ni kamaiu ana euangkerio Iesu Kristo—ni karokoa are e koro bukina irouia [Mote, Eriati, ao Eria]” (“Where Are the Keys and Authority of the Priesthood?” Ensign ke Riaona, Meei. 2016,30).

Waaki ni Kakukurei aika a Kona ni Karaoaki

• Kaoiia bwa a na kakaea Reirei ao Berita aika Tabu 110:11–16 ni kakaei araia teniman burabeti ake ngkoa ake a kaoti n te Tembora are Kirtland. Ngkanne buokiia ni kakaei taeka inanon kiibu aikai ae a kabwarabwara tera ae a “karaoia,” ke angan, Iotebwa Timiti ao Oliver Cowdery. Ko kona ni kunea te kabwarabwara ae ae rangi n ibuobuoki inanon “Mwakoro 40: Visions in the Kirtland Temple” (Karaki man Berita ao Reirei aika Tabu, 156–57).

• Tibwaua te kabwarabwara aei ibukin kiingin te nakoanibonga mairoun Beretitenti Russell M. Nelson: “Inanon am buua ao e na bae n iai inanona kiingin mweengam ke am kaa. Kiingin te nakoanibonga, n te itera teuana, a aki kona n riingaki ke n nooraki. A ‘kamaiua’ ana kariaia te nakoanibonga” (“Personal Priesthood Responsibility,” Ensign ke Riaona, Nobembwa. 2003, 45–46). Ni kamataata kakawakin kiingin te nakoanibonga, maroroakinna ma ataei te kaangaanga ngke e bua kiingin te auti ke kiingin te kaa. E kanga n ti te arona ma te kaangaanga ngkana e bua kiingin te nakoanibonga? Buokiia ataei ni kamataataia antai are a taui kiingin te nakoanibonga n te bong aei ao a kanga kiing aikai ni kauki kakabwaia ibukiia natin te Atua ni kabane (taraa “Kiingin te Nakoanibonga,” Koaua nakon te Onimaki, 126–27).

• Ni moantaai ni kabwarabwarai taian kiing ake a kaokaki nakon te Tembora are Kirtland, kaota te witeo “Man Bain Eria te Burabeti” (ChurchofJesusChrist.org). Maroroakinna tera ae ti kona ni karaoia ni ira karaoana are e angaraoi karaoana man ana kiing Eria. Ke kaota te witeo “Gatherers in the Kingdom” (ChurchofJesusChrist.org) ao maroroakinna ti na kanga n ibuobuoki n ikotiia natin Tamara are i Karawa bwa a na oki Nakoina.

Kaungaa te Kamatebwai n te Mweenga

Kaoiia ataei bwa a na kabongana te iteraniba n te waaki ni kakukurei n te wiiki aei ke aia korotamnei n tain te kiraati n reireiniia aia utu te bwai are a reiakinna n te bong aei ibukin te tembora ao kiingin te nakoanibonga.

Kanakoraoan Ara Anga reirei

Karaoa te tabo ae na tangiraki, ao iai te karinerine iai. “Am katooto e korakora ana anainano iaon anuaia [ataei]. … Man am taeka ao am mwakuri, kaotia nakoia bwa ko tangira te euangkerio ao ko tabeakina rikiraken maiun tamneia” (Reirei n ana Kawai te Tia Kamaiu, 15).