e kia otaantai rinanon te nang

Tebetembwa 20–26

Reirei ao Berita aika Tabu 106–108

“Bwa e na Kaukaki Karawa”

Iangoia raoi tera am atatai ibukiia ataei ake ko reireiniia. Tera aekan waaki ni kakukurei are a na uotaki ni kaaniaki riki nakon te Tia Kamaiu? Uringnga bwa waaki ni kakukurei ibukiia ataei ake a uarereke inanon te kamataata aei e kona ni karaoaki ibukiia ataei ake a ikawai riki ao ni kaibibiti.

Korei Am Namakin

te aikaon ibukin te tibwatibwa

Kaungaa te Tibwatibwa

Kaota tamneia mataniwiin te Ekaretia nakoia ataei, n aron te burabeti, taian Abotoro, Beretitenti ni Kabuta n te Moanrinan, ao tabeman Mataniwi ni Kabuta ao Aobitia. Kaoiia ataei bwa a na maroroakinna tera ae a karaoia mataniwi aikai ao bukin tera ngkai a kakaitau ibukiia.

te aikaon ibukin te anga reirei

Reirei te Reirei: Ataei aika a Uarereke

Reirei Ao Berita aika Tabu 107:18–20, 42–56

I kakabwaiaaki ibukin te nakoanibonga.

A kona natin Tamara are i Karawa ni kabane ni karekei kakabwaia ake a roko man te nakoanibonga. Iangoi kawai ake ko na kona ni buokiia ataei ake ko reireiniia n namakina te kakaitau ibukin kakabwai akanne.

Waaki ni Kakukurei aika a Kona ni Karaoaki

• Korea te tamnei iaon te burakibooti are e tei ibukin “karawa [bwa e] kaukaki [nakoira]” (Reirei ao Berita aika Tabu 107:19) ibukin te nakoanibonga (n aron kiakian te oota rinanon te nang). Anganiia ataei tamnei ake a tei ibukin kakabwaia ake a roko man te nakoanibonga, n aron te bwabetitio, te toa, ao te tembora. Kaoiia bwa a na tibwaua bukin tera ngkai a kakaitau ibukin kakabwaia ake inanon aia tamnei, ao tuangiia bwa a na kaaki aia tamnei n te tabo are e kiakia te oota iaon te burakibooti. Kaota am koaua bwa ti kona ni karekei kakabwaia aikai ibukina bwa Tamara are i Karawa e a tia ni kaoka te nakoanibonga.

• Karaoa te kawai iaon te burooa, ao anganiia ataei tamnein taian otenanti n te nakoanibonga ake a kainnanoi bwa a aonga toua mwiin te kawai n oki nakon Tamara are i Karawa (taraa Bokin Tamnein te Euangkerio, nambwa 103–8, 119–20). Buokiia ataei bwa a na katikui otenanti ni bairei raoi ni nneia iaon te kawai.

• Kaota tamnein Atam ao Ewa ma aia utu (taraa te iteraniba ni waaki ni kakukurei n te wiiki aei ke Bokin Tamnein te Euangkerio, nambwa. 5). Ngkai a taraa te tamnei ataei, titirakiniia bwa tera aia namakin Atam ao Ewa ibukiia aia utu. Kabongana Reirei ao Berita aika Tabu 107:53–56 n tibwauaia ma ataei tera are e a tia ni karaoia Atam ni kaotia bwa e tangira ana utu. Kaota am koaua ibukin te nakoanbonga ae e riki bwa te kakabwaia nakoim ao am utu.

• Antai araia kaain te utu ake e katabuia Atam nakon te nakoanibonga, ni kaineti ma Reirei ao Berita aika Tabu 107:42–50, ao tuangiia ataei bwa a na wareka mwaitiia aomata ake e a tia ni katabuia. Buokiia ni kamataataia bwa bukin tera ngkai Atam e tangiriia kaain ana utu bwa a na karekea te nakoanibonga. Kaoiia ataei bwa a na maroroakin taai are ngke aia utu ke ngaiia a tia ni karekei kakabwaia rinanon te nakoanibonga.

Reirei ao Berita aika Tabu 108:7

I kona ni kakorakoraia tabeman.

E ngae ngke ataei aika uarereke a kona n toua mwiin te reirei ni kakorakoraia tabeman “n am kakaraki ni kabane, n am tataro ni kabane, … ao n am mwakuri ni kabane.”

Waaki ni Kakukurei aika a Kona ni Karaoaki

• Korea tamnein te aomata iaon te burakibooti, ao tuangiia ataei bwa a na atongi aran bwaai are a kona ni karaoi aomata bwa a na kona ni kakorakorai rabwataia. (Kona bae ni korea tamnein mwatireti aika a bubura riki iaon te aomata ngkai a tabe ataei n atong aran bwaai). Wareka Reirei ao Berita aika Tabu 108:7, ao tuangiia ataei bwa a na kakauongo ibukin kawai ake ti na kona ni “kakorakoraia [taari] [ao aine].” Kabwarabwarai taeka nako ake a taraa ni kaangaanga.

• Buokiia ataei bwa a na iangoia aomata ake a kinaia ake ana kainnanoa te kakorakoraaki. Tera ae ti na kona n taekinna nakoia ke ni karaoia ibukiia? Kaai ni mwakuri ni karaoi kaati ibukiia aomata aikai, ke kaungaia ataei bwa a na uringiia inanon aia tataro ae onoti ao n aia tataro n utu.

te aikaon ibukin te anga reirei

Reirei te Reirei: Ataei aika a Ikawai Riki

Reirei ao Berita aika Tabu 107:1–8, 13–14, 18–20

Te nakoanibonga e na buoka okiu nakon Tamau are i Karawa.

Nakoanibonga aika te Merekitereka ao te Aaron a tia ni kaokaki ibukin buokan kaokaia natin te Atua nakoina. Buokiia ataei ake ko reireiniia bwa a na mataata n te kaokoro imarenan te beku n te nakoanibonga ao a na kanga ni buokaki n oki nakon te Atua.

Waaki ni Kakukurei aika a Kona ni Karaoaki

• Kaoiia ataei bwa a na kakaea Reirei ao Berita aika Tabu 107:1–8, 13–14, 18–20 ibukin taeka aika kakawaki ao kibuntaeka are a reiakinaki iai taekan te nakoanibonga. Tera katabeaki are a karekea kain te nakoanibonga? E kanga te nakoanibonga ni buokiira n okira te Atua?

• Korei titiraki ake a kona ni kaekaaki inanon Reirei ao Berita aika Tabu 107:1–8, 13–14, 18–20, n aron “Tera riki aran teuana te Nakoanibonga ae te Merekitereka?” Anganiia ataei tabeua te miniti bwa a na kakaei aia reke inanon taian kibu nakon mwaitin titiraki ngkana a konaa. Tibwauaia ma ataei kakabwaia ake ko a tia ni karekei rinanon te nakoanibonga.

• Wareware ma ataei n taekan te Merekitereka inanon Bible Dictionary ke Guide to the Scriptures (scriptures.ChurchofJesusChrist.org). Tera ae ti reiakinna man maiuna n taekana are e nanonaki ni kamwakuran te kariaia ibukin te nakoanibonga?

Reirei ao Berita aika Tabu 107:21–26, 33–35, 65–66

Te Uea e rineia ana toro ibukin kairan Ana Ekaretia.

Tera taneiai are a tia ni karikirakea am koaua ibukiia mataniwi n te Ekaretia? Ko na kanga ni buokiia ataei ni karikirakea oin aia koaua?

Beretitenti ao Titita Nelson ma te ataei

E reireiniira te burabeti te bwai are tangiria te Atua bwa ti na ataia.

Waaki ni Kakukurei aika a Kona ni Karaoaki

• Kaotia iaon te burakibooti tamneia Mataniwi ni Kabuta ao Aobitia man te maungatabu ae ai tibwa ngkai man are e a tia ni boretiaki n te Ensign ke Riaona. Ngkai a wareware ataei n Reirei ao Berita aika Tabu 107:21–26, 33–35, 65–66, kaoia bwa a na korei iaon te burakibooti baike a tia n reiakin ibukin tabeia mataniwi tabeman aikai. Bukin tera ngkai ti kakaitau ibukin aia kairiiri? Tibwatibwa imarenami bwa kam kanga ni karekea ami koaua irouia burabeti ao abotoro.

• Korea te taeka ae mwioko, onimaki, ao tataro iaon te burakibooti. Titirakiniia ataei bwa ti na kanga ni kamatoa te Moan Beretitentii n te Ekaretia ma nanon, ara onimaki, ao ara tataro (taraa Reirei ao Berita aika Tabu 107:22). Bukin tera ngkai e kakawaki kamatoakiia ana toro te Uea ake e a tia n rineiia?

Reirei ao Berita aika Tabu 108:3

Maiuakinan au berita aika tabu ma te iango raoi e uoti kakabwaia.

Iangoia raoi bwa ko na kanga ni buokiia ataei ake ko reireiniia n “tarataraia raoi ma ngkai … ni kawakinan [aia] tuea,” ke aia berita aika tabu. E na kanga karaoan aei ni kona ni kakabwaiaiia ngkai ao n taai aika a na roko?

Waaki ni Kakukurei aika a Kona ni Karaoaki

• Kaoiia ataei bwa a na karaoa te bwai are e na kainnanoa te taratara raoi bwa e na nakoraoi, n aron kataakin kanoaan te mwangko n te ran n akea naba teutana ae na bwaro. Tera ae e na riki ngkana ti tarataraira raoi? Kaoiia bwa a na wareka Reirei ao Berita aika Tabu 108:3 ao ni kunea bwa tera ae tuangaki Lyman Sherman bwa e na karaoia ma te taratara raoi. Korei karinani ma ataei berita ake a karaoi ma Tamaia are i Karawa ngke a tia ni bwabetitoaki ao ni kana te toa. Buokiia iangoi kawai ake a kona iai n taratara raoi ni kawakin berita aikai.

• Anenea te anene ma ataei ibukin kawakinan berita aika tabu, n aron “I Will Be Valiant” (Aia Boki n Anene Ataei, 162). Buokiia ni karaoa te kanikina man kibuntaekan te anene are e kauringiia bwa a na kawakin aia berita, ao kaungaia bwa a na kaota aia kanikina ni mweengaia.

• Anganiia ataei mwakoron ana marooro Titita Becky Craven “Careful versus Casual” (Ensign ke Riaona, Meei 2019, 9–11), ao tuangiia bwa a na tibwaua te bwai are e anaaki iai nanoia bwa a na taratara raoi riki ibukin kawakinan aia berita aika tabu.

te aikaon ibukin te kamatebwai

Kaungaa te Kamatebwai n te Mweenga

N tabetai ao reitaki ma aia karo ataei ake ko reireiniia ni kaungaia inanon aia kekeiaki ibukin reiakinan te euangkerio inanon mweengaia. Ko na bae n tuangiia ibukin bwaai ake a tia n tibwauai natiia n te Moanrinan ake a reiakinaki iai inanon mweengaia.

Kanakoraoan Ara Anga reirei

Karaoi waaki ni kakukurei ake a na katoki kainnano. Tai tarai kamataata aikai bwa kaetieti ake ko na riai n irii. Ma, kabonganai bwa bwaai ni kareke iango ni kona ni kaungaa kairakim n iangoi kainnanoia ataei ake ko reireiniia. Ni keiti tabeua, ko kona n namakina te kaungaaki ni karaoa te waaki ni kakukurei ke atuun te reirei ibukiia ataei ake a uarereke riki n reireiniia ataei ake a ikawai riki, ke ni kaibibiti.

iteraniba ni waaki ni kakukurei: te nakoanibonga e kakabwaia maiu