C. C. A. Christensen (1831–1912), Saints Driven from Jackson County Missouri, c. 1878, tempera on muslin, 77 ¼ × 113 inches. Brigham Young University Museum of Art, bwaintangira irouia tibura C. C. A. Christensen, 1970

Tebetembwa 6–12

Reirei ao Berita aika Tabu 98–101

“Tiiku n Rau ao n Ataia Bwa Ngai te Atua”

Tera te rongorongo ae a kainnanoia ataein am kiraati bwa a na ongo n te wiiki aei? E na kanga ni kona te reirei inanon Reirei ao Berita aika Tabu 98:-101 ni buokiia n riki bwa ana reirei aika tamaroa riki Iesu Kristo?

Korei Am Namakin

Kaungaa te Tibwatibwa

Kaungaia ataei bwa a na tibwaua te bwai are a tia n reiakinna man Reirei ao Berita aika Tabu ni mweengaia ke n te Moanrinan. Tuangiia bwa tera ae a tatangiria riki n reiakinna man Reirei ao Berita aika Tabu.

Reirei te Reirei: Ataei aika a Uarereke

Reirei ao Berita aika Tabu 98:39–40

I kona ni kabwara aia bure naake a ribuaka nakoiu.

Te Uea e a tuangiia Aika Itiaki ake a bwainikirinaki i Jackson County, Missouri, bwa a na kabwarai aia bure naake a tia ni kaikoakiia. Ngkai ko reireiniia ataei kakaawakin te kabwarabure, kakoaua bwa a ota naba bwa ngkana iai temanna ae kaikoakiia, a riai n tainako n tuanga te ikawai ae onimakinaki.

Waaki ni Kakukurei aika a Kona ni Karaoaki

• Ni buokiia ataei bwa a na ota ni kaangaanga ake a kaitarai Aika itiaki i Tion, tibwaia ma ngaiia “Mwakoro 34: Te Atua e Kauringiia ana Aomata i Tion” (Karaki man Reirei ao Berita aika Tabu, 128–31, ke te witeo ae irekereke ma ngaia iaon ChurchofJesusChrist.org). Wareka Reirei ao Berita aika Tabu 98:39–40, ao tuangiia ataei bwa a na ongora nakon te bwai are e tuangiia aika Itiaki te Uea bwa a na karaoi ngkana a kabwara aia bure aia kairiribai. Bukin tera Iesu e tangiriira bwa ti na kabwarai aia bure aomata, riki naake a aki raoiroi nakoira?

• Katoka tamnein te ubu ae kukurei iaon teuana te oo ao te ubu ae nanokawaki iaon te oo are e kaitara. Tibwaia ma ataei aro aika a kakaokoro are iai temanna ae e aki akoi (ko kona ni kakaai tabeua karaki n te Rao ke Riaona). Iangoi kawai ake ti kona ni kaeka iai nakon te mwakuri ae aki raoiroi, ao buokiia ataei ni baireia bwa ngkana a kaeka nakon akanne a na kukurei iai ke a na nanokawaki. Kaoiia ataei bwa a na kotei ngkai a kaeka nakon ubu ake iaon te oo.

Reirei ao Berita aika Tabu 101:16

Iesu Kristo e kona n anganai te rau.

Ngke a kaitara ma te bwainikiriinaki Aika Itiaki, te Uea e karaui nanoia ngke e kangai, “Tiiku n rau ao n ataia bwa Ngai te Atua.” Iangoia e kanga te reirei aei ni kona ni buokiia ataei aika ko reireiniia.

Waaki ni Kakukurei aika a Kona ni Karaoaki

• Kaoiia ataei bwa a na kakamwakuri iaon aia kaintekateka. Ngkanne tuangiia bwa a na aki kakamwakuri ngkana ko tabeka rake tamnein te Tia Kamaiu ao n taekina te kibu “Tiiku n rau ao n ataia bwa Ngai te Atua” (Reirei ao Berita aika Tabu 101:16). Kaokioka te waaki ni kakukurei aei tabeua te tai. Kabwarabwara bwa ngkana e a matoatoa te maiu irouia Aika Itiaki n ana tai Iotebwa Timiti, Iesu e tangiriia bwa a na tiku n rau ao n onimakinna nakon ae a na raraoma. E na kanga ni buokiira Iesu ngkana ti a rinanon te tai ni kaangaanga?

• Ikotaki anenea te kuna ae taekan te karinerine, n aron “Reverently, Quietly” ke “To Think about Jesus” (Aia Boki n Anene Ataei, 26, 71). Buokiia ataei ni kinaa te namakina ae rau are e roko ngkana ti tiku n rau ao n iangoa taekan Iesu—te katooto, ngkana ti tataro ke n anaa te toa.

• Buokiia ataei bwa a na mwakuri iaon iteranibaan te waaki n te wiiki aei. Ngkana a karani tamnei, tuangiia bwa e kanga iangoan Iesu Kristo ni buokiia n namakina te rau, riki inanon taai aika a kaangaanga.

  

  Kabwarabwara man Kristo ao te Ataeinimwaane ae Kaubwai, iroun Heinrich Hofmann

Reirei te Reirei: Ataei aika a Ikawai Riki

Reirei ao Berita aika Tabu 98:1–3, 11–14; 101:16

Kataakiu e kona ni buokai n riki n aron riki Iesu Kristo.

Ngkai a kaitarai kaangaanga ataei rinanon maiuia, a na bon kainnanoa te onimaki are te Tia Kamaiu e kona ni buokiia inanon kataakiia akanne ao kataaki akanne a kona “ni bane ni mwakuri ibukin ae raoiroi [ibukiia]” (Reirei ao Berita aika Tabu 98:3).

Waaki ni Kakukurei aika a Kona ni Karaoaki

• Tuangiia ataei bwa a na buokiko ni karaoa te rinan iaon te burakibooti iaon tabeua kaangaanga are a kaitara ataei n aia roro. Tuangiia ataei taekan tabeua aia kaangaanga Aika a Itiaki ake a maeka i Jackson County, Missouri, inanon 1833 (taraa mwakoro 34 ao 35 n Karaki n Reirei ao Berita aika Tabu, 128–34). Tera te reirei ae a na angan te ataei ae rinanon kaangaanga aikai? Tuangiia ataei bwa a na wareka Reirei ao Berita aika Tabu 98:1–3, 11–14, n taratarai kairiiri ake e anga te Uea. A kanga n ira te reirei aei ngkai a kaitarai kakaewenako n aron teuana are e koreaki iaon te burakibooti?

• Kaoiia ataei bwa a na tiku n rau ao n aki karongoa n aron are a kona ibukin tabeua te miniti ngkai ko kakaea tamnein te Tia Kamaiu ke ni kakauongo nakon te anene Ibukina. Ngkanne kaoia bwa a na tibwaua te bwai are a namakinna ao n rinanona inanon aia tai n rau. Wareka Reirei ao Berita aika Tabu 101:16. E kanga aron te tiku n rau ao iangoan Iesu ni buokiira? Buokiia ataei n ota n te reitaki imarenan te karinerine n tiku n rau ao te konabwai n namakin te Tamnei ao n iangoa taekan Iesu.

Reirei ao Berita aika Tabu 98:23, 39–40

Iesu e tangirai bwa N na kabwarai aia bure naake a ribuaka nakoiu.

Ti tuangaki bwa ti na itangitangiri imarenara, ao n ikabwarabure imarenara “itingaun itiua,” ao n anga tabara are teuana (taraa Mataio 5:39, 43–44; 18:21–22). Ko na kanga ni kona ni kabonganai kiibu aikai n reireiniia ataei koaua aikai?

Waaki ni Kakukurei aika a Kona ni Karaoaki

• Tuangiia ataei taekan te bwainikiriinaki are e riki i Jackson County, Missouri, n 1833 (taraa mwakoro 34 ao 35 n Karaki man Reirei ao Berita aika Tabu, 128–34). Titirakiniia ataei bwa tera aron aia namakin ngke arona bwa ngaiia membwa n te Ekaretia n te tai anne. Kaoiia bwa a na wareka Reirei ao Berita aika Tabu 98:23, 39–40 ni kakaea bwa tera ae e tangiriia te Uea bwa a na karaoia Aika Itiaki. Bukin tera e kona ni kaangaanga bwa ti na kabwarai aia bure naake a bure nakoira? Ti kanga ni kakabwaiaaki ngkana ti karaoia?

• Tuangiia ataei ngkana a kona n iangoa te tai ngke Iesu Kristo ke temanna riki man koroboki aika Tabu ae a karaoa te bwai are n Reirei ao Berita aika Tabu 98:23 ae reireia. N anganiia teuana te katooto, kaota tamnein Taurakin Iesu n te Kaibangaki (n aron Tamnei ni Bokin te Euangkerio, nambwa 57). Tuangiia ataei bwa a na tibwa te bwai are a ataia ibukin Taurakin te Tia Kamaiu iaon te Kaibangaki (taraa Ruka 23). Kaoia bwa a na wareka Ruka 23:34. Ti na kanga n ira ana katooto Iesu Kristo?

Reirei ao Berita aika Tabu 101:23–32, 36, 38

Rinanon Iesu Kristo I kona ni kunea te kimwareirei.

Te maiu e aki nanonaki bwa e na kainaomataaki man kaangaanga, ma e kona ni buokiia ataei n ataia bwa a na kona naba ni karekea te kimwareirei ae bwanin rinanon Iesu Kristo.

Waaki ni Kakukurei aika a Kona ni Karaoaki

• Kabwaroa te ran inanon te mwangko. Tuangiia ataei bwa a na taekini bwaai ake e a tia ni karaoi te Tia Kamaiu ibukira bwa ti aonga ni karekea te kimwareirei, ao ni kaoia bwa a na kabwakai atiibu aika uarereke inanon te mwangko ibukin bwaai nako ake a taekin ni karokoa e onrake te mwangko. Warekia ma ataei Reire ao Berita aika Tabu 101:36, ao tuangiia bwa a na tarataraia bwa ti na kanga ni karekea te kimwareirei ae bwanin. Tera bwaai tabeua aika ti kona ni karaoi n “ukoukora … te Uea” (kibu 38) bwa ti aonga ni karekea te kimwareirei are E tangiria n anganiira?

• Kabwarabwara bwa Reirei ao Berita aika Tabu 101:23–32 e reirei bwa tera aekakin te maiu ngkana e a manga oki Iesu Kristo. Ngkai kam uaia ni wareki kiibu aikai, maroroakin bwaai ake a kunei ataei ake a na uota te kimwareirei ngkana E roko. Bukin tera e ibuobuoki ataakin bwaai aikai ngkana ti rinanon te tai ni kaangaanga?

Kaungaa te Kamatebwai n te Mweenga

Buokiia ataei bwa a na rinea te kibu man Reirei ao Berita aika Tabu 98–101 are a tangiria n tibwauaia ma aia utu. Kaungaia bwa a na bairea aron tibwauakin te bwai are a tangiria man te kibu anne.

Kanakoraoan Ara Anga reirei

Kanakoraoa arom n riki bwa te tia reirei ae aekakin Kristo. Iangoi raoi kawai are ko kona iai n riki riki bwa te tia reirei ae ai aron Kristo. Iangoa kabonganaan titiraki ibukin taraam i bon iroum iaon te iteraniba 37 n Reirei n ana Kawai te Tia Kamaiu ni kaungaa nanom bwa kona katamaroa riki.