“Aokati 30–Tebetembwa 5. Reirei ao Berita aika Tabu 94-97: ‘‘Ibukin Kamaiuan Tion,’” Nakomai, Iriirai—Ibukin te Moanrinan: Reirei ao Berita aika Tabu 2021 (2020)
“Aokati 30–Tebetembwa 5. Reirei ao Berita aika Tabu 94–97,” Nakomai, Iriirai—Ibukin te Moanrinan: 2021
Te Tembora are i Kirtland, iroun Al Rounds
Aokati 30–Tebetembwa 5
Reirei ao Berita aika Tabu 94–97
“Ibukin Kamaiuan Tion”
Ukoukora te kairi bwa ko na ataia tera reirei man mwakoro 94–97 ni katereterea are ko anga reirei iai. Ko kona ni biti iango ni waaki ni kakukurei ibukiia ataei aika a uarereke ngkai ko reireiniia ataei aika a ikawai, ao ni kaibibiti.
Korei Am Namakin
Kaungaa te Tibwatibwa
Kaota nakoia ataei tamenin te tembora, ao kaoiia bwa a na tibwaua aia atatai ibukin te tembora. A kona naba ni maroroakinna bwa e kanga aia namakin ngkana a noora te tembora.
Reirei te Reirei: Ataei aika a Uarereke
Reirei ao Berita aika Tabu 95:8; 97:15–16
Te tembora bon ana auti te Uea.
Ataein naba Kirtland a ibuobuoki, ni kawai aika a uarereke ma ni uaana, ni katea te Tembora are i Kirtland. Buokiia ataei ake ko reireiniia ni kakorakora aia tangira ibukin ana auti te Uea ae tabu.
Waaki ni Kakukurei aika a Konaa ni Karaoaki
-
Kaota tamnein te Tembora are i Kirtland (taraa kabwarabwara n te wiiki aei i nanon Nakomai Iriirai—Ibukia Aomata n Tatabemania ao Utu). Kabonganai kibuntaeka man Reirei ao Berita aika Tabu 95:8 n reireiniia ataei taekan ana tua te Uea ibukin katean ana tembora. Anganiia ataei bwa a na ikaruoruo n taua te tamnei ao n atonga “Te tembora bon ana auti te Uea.”
TamneiTe Tembora are i KirtlandAika Itiaki a katea te tembora n namakina ae a kaaniaki riki ma te Atua.
-
Tuangiia ataei bwa iaon tembora ni kabane e koreaki “E Tabu Bwa Ana Bwai te Uea. Ana Auti te Uea.” Ngkana e kona, kaota nakoia tamnein taeka aikai ake iaon te tembora. Bukin tera ngkai te tembora te tabo ae onoti? Wareki kibuntaeka man Reirei ao Berita aika Tabu 97:15–16 are e reirei taekan te tembora ae ana auti te Uea, ao tibwaua am namakin ibukin te tembora.
-
Kaoiia ataei bwa ai aongkoa are a ibuobuoki ni katea te tembora (a korea te kai, a oroi neera n te aama, a beniia te oo, ao a mwaiti riki). Kabwarabwara aron kakawakin aron te tembora iroun te Uea, matoatoara aron aia beku Aika Itiaki ibukin katean te Tembora are Kirtland, ao mwaitira aron aia anga karea ibukina (taraa Aika Itiaki, 1:210).
-
Ikotaki n anenea te kuna are e na buokiia ataei n namakina te karinerine ibukin ana auti te Uea, n aron “I Love to See the Temple” (Aia Boki n Anene Ataei, 95). Anganiia ataei bwa a na tibwaua aia namakin ibukin te tembora.
Reirei ao Berita aika Tabu 97;8
I kona ni bwaina te kokoaua.
N Reirei ao Berita aika Tabu 97:8, te Uea e kaota te kokoaua bwa teuana anuaia naake a “butimwaeaki irou.”
Waaki ni Kakukurei aika a Konaa ni Karaoaki
-
Kabwarabwara nakoia ataei bwa e taekinna te Atua bwa ngkana ti kokoaua, E butimwaira (taraa Reirei ao Berita aika Tabu 97:8). Tibwaua nakoia tabeua karaki aika uarereke are e na buokiia ni kamataataia tera ae nanonaki n te kokoaua. Karaki aikai a kona n roko man oin maium, man maiun temanna are ko ataia, ke man te Rao ke Riaona. Buokiia ataei ni manga moan karakina te karaki nakoim ke n tibwauai baike a tia n rinanona ma te kokoaua man maiuia.
-
Buokiia ataei n reiakina te moan kibuntaeka man te kateniua n taekan te onimaki: “Ti kakoaua ae ti riai ni kokoaua.” Buokiia ataei ni karaoa te kaotioti iaon ae ti riai ni kokoaua ao te aki kokoaua. N aron te katooto, ataei a kona ni karaoa te kaotioti ae iai te bwai ae anaia mairoun tariia ke mwaneia ao a tuangiia aia karo bwa aki anaia. Ngkanne buokiia ataei bwa a na karaoa te kaotioti iaon naba te bwai are e riki are a kaota iai te koaua nakoia aia karo. Kabwarabwara bwa aio bon te kokoaua.
Reirei te Reirei: Ataei aika a Ikawai Riki
Reirei ao Berita aika Tabu 95:1–3, 8, 11–17; 97:10–17
Te tembora bon Ana auti te Uea.
Iangoia ko na kanga ni kabonganai kiibu aikai ni buokiia ataei ni mataata n aron kakawakin te tembora iroun te Uea—ao aron kakawakina nakoira ni kabane.
Waaki ni Kakukurei aika a Kona ni Karaoaki
-
Tuangiia ataei bwa a na maroroakini taai are ngke iai te bwai ae a na riai ni karaoia ma aki karaoia naba ngkekei. Buokiia ataei ni wareka Reirei ao Berita aika Tabu 95:3, 8, ao titirakiniia ataei tera tuua ake e taku te Uea bwa a aki kawakin Aika Itiaki. Ikotaki wareka te kibu 11. Tera ae a riai ni karaoia Aika Itiaki bwa aonga ni katea te tembora? Tera ae ti kona n reiakinna man ana berita te Uea nakoia?
-
Iaon taian kaati, korei reirei ibukin taekan te tembora are a kuneaki n Reirei ao Berita aika Tabu 95 ao 97, n raonaki ma taekan kiibu ake a irekereke mangaia, ao karin taian kaati inanon te baeki. N aron te katooto: Katean te tembora e kainnanoa te anganano (Reirei ao Berita aika Tabu 97:11–12) ao Ti riai ni kororaoi n rin n te tembora (Berita aika Tabu 97:15–17). Kamaenakoia ataei ni katoatoaia. Anganiia ake kakauoman bwa a na buuta te kaati man te baeki ao ngkanne a na kaai ni mwakuri ni wareka te kibu te boki ae tabu are e mwakoro iaon te kaati ao ni maroroakinna tera nanon te reirei nakoia. Buokiia ataei ni kamataataia bwa bwaai ake a wareki a bon kainnanoaki.
-
Kaoa te kairake man am uoote ke am mwaanga are e a tia n rin n te tembora bwa e na tibwaua te bwai are e rinanona teuanne ke neienne ao n tuangiia ataei tera ae a kona ni karaoia ni katauraoiia ibukin te tembora.
-
Kabongana te rongorongo “Your Path to the Temple” (inanon Ana Tembora ana Ekaretia Iesu Kristo ibukiia Aika Itiaki ni Boong aika Kaitira [te rongorongo ae onoti man te Ensign ke Riaona, Okitobwa. 2010], 72–75) ni buokiia ataei ni kamataataia tera ae riki inanon taian tembora ao a na kanga ni katauraoiia. Iangoia n angan kaka temanna te ataei mwakoron te rongorongo bwa e na warekia ao n tibwaua te bwai are a reiakinna.
-
Tibwaua te witeo “Two Apostles Lead a Virtual Tour of the Rome Italy Temple” (ChurchofJesusChrist.org), ao kaoiia ataei bwa a na tibwauaia e kanga aia namakin ibukin nakoia nakon te tembora n te bong teuana.
-
Ikotaki anenea kunan te tembora, n aron ae “I Love to See the Temple” (Aia Boki n Anene Ataei,95). Tera kibuntaeka n te anene aei ae reireiniira tera bukina ngkai e tabu te tembora?
Reirei ao Berita aika Tabu 97:1–2, 8–9, 21
Tion bon “ake a itiaki nanoia.”
Buokiia ataei ni kamataataia bwa Tion tiaki tii te tabo, ma “ake a itiaki nanoia” (Reirei ao Berita aika Tabu 97:21).
Waaki ni Kakukurei aika a Kona ni Karaoaki
-
Kaoiia ataei bwa a na wareka Reirei ao Berita aika Tabu 97:21, ao titirakiniia tera nanon te taeka ae “itiaki”. Ni kamataata, kaota nakoia te kiraati n ran ae e itiaki, ao maroroakinna bukin tera ngkai e kakawaki karekean te ran ae itiaki. Rengana te bwai teuana ma te ran are e na karaoia ni kabarekaa ( n aron te bareka ke te pepper). Kaoiia ataei bwa a na manga wareka riki Reirei ao Berita aika Tabu 97:21 ao ni katokaa baia iaon te taeka ae “itiaki.” Tera nanon ae a riai n itiaki nanora? Buokiia ataei ni kamataataia bwa te itiaki n nano tiaki nanona bwa a na akea te kairua ae ti karaoia. Tera ae ti kona ni karaoia bwa a na itiaki riki nanora? E kanga te Tia Kamaiu ni buokiira ni karaoa aei?
-
Buokiia ataei ni kakaea Reirei ao Berita aika Tabu 97:1–2, 8–9, 21, ni kakaei taeka ke kibuntaeka are a kabwarabwara bwa a na kanga n itiaki nanora. Tuangiia bwa a na rinea te taeka ke te kibuntaeka, koreia iaon te mwakoro ni beeba, ao karinna inanon te konteina. Buuta teuana te mwakoro ni beeba n teuana te tai, ao tuangiia ataei n iangoi bwaai ake a kona ni karaoi ni kabongana te iango anne inanon maiuia. N aron te katooto, tera ae ti kona ni karaoia ni “kunea te koaua” (te kibu 1) ke n rangi ni “kokoaua” (te kibu 8)?
Kaungaa te Kamatebwai n te Mweenga
Kaungaiia ataei bwa a na kabongana iteranibaan te waaki n te wiiki aei n tibwauaia ma aia utu bwa tera ae a reiakinna n te bong aei ibukin te tembora.
Kanakoraoan Ara Anga reirei
Kaungaia ataei bwa a na titiraki. “Kataia n taraa aia titiraki [ataei] bwa te tibwanga, tiaki te kakeru ke te kamangaongao nakon am reirei. … Titiraki akanne a na anganiko iango aika kakaawaki n te bwai are a iangoia ataei, tera aia tabeaianga, ao a na kanga ni kaeka nakon bwaai ake a reiakinii. Buokiia n taraia bwa kaekaan aia titiraki a kona ni kuneaki inanon booki aika tabu ao n aia taeka burabeti aika maiu” (Reirei n ana Kawai te Tia Kamaiu, 25–26).