Kawaim nakon te Tembora
Ibukiia Ataei
Ko ataia bwa te tembora raa ae uakaan nakoim? Korea tamnein te tembora anne, ao katinea n te tabo are ko kona n nooria iai ni katoa bong.
Te tembora bon ana auti te Uea. Bon te tabo are ti reiakinaki iai taekan Tamara are i Karawa, ti karaoi berita aika a tabu (ke taian berita) ma Ngaia, ao ni karekei kakabwaia aika a korakora. Inanon te tembora, ti karaoa te mwakuri ae kakaawaki ibukira ao ibukiia kaain ara utu ake a tia ni mate. Te mwakuri are e a tia ni karaoaki inanon te tembora ni ikotaki ma te bwabetito ibukiia maate, taian entaumente, ao te kabaeaki. Aranaki baikai bwa otenanti n te tembora.
Terana ae riki inanon te tembora
Bwabetito ibukiia Maate
Ngkana e a koro waniua am ririki, ko kona ni bwabetito ao ni kamatoaaki bwa te membwa n ana Ekaretia Iesu Kristo ibukiia aika Itiaki ni boong aika Kaitira. Angiia am bakatibu a tia ni mate n aki bwabetitoaki ao ni kamatooaki. E ngae ngke a mate rabwataia, tamneia a bon teimatoa ni maiu n te aonaaba n tamnei, ike a kona n reiakina ana euangkerio Iesu Kristo.
Ngkana e a koro 12 am ririki, ko kona n nako nakon te tembora ao ni buokiia aomata aikai man bwabetito ao ni kamatooaki n araia. A kona ngkanne n rineia bwa a na ke a na aki butimwaea te bwabetito ao te kamatooaki. Kona kunnikainiko ni kabane n te mainaina ngkana ko bwabetitoaki ibukiia maate, n aron are koa tia ni karaoia ngke ko bwabetito ibon ibukim.
Tuangiia am karo bwa a na buokiko ni karaoi am karinan n ara ibukiia kaain am utu ake a tia ni mate ao aaki bwabetitoaki n Ana Ekaretia Iesu Kristo ibukiia aika a Itiaki ni boong aika Kaitira. Kakaea ngkana iai temanna ae e a tia n rin n te tembora ni bwabetito ibukiia.
Te Entaumente
Teuana mai ibuakon taian kakabwaia man te tembora ae korakora bon te entaumente. Entaumente nanonaki “bwaintangira.” Ngkana koa karekea am entaumente kona konaa riki n reiakina taekan te babaire ni kamaiu ao ni karaoi berita. Kawananti bon taian berita ake ti karaoi ma Tamara are i Karawa. Ngkana ko kaawakin taian berita aika a tabu aikai, koa tauraoi ni maeka ma Tamara are i Karawa ao Iesu Kristo n te bong teuana.
Inanon te tembora bon te tabo ae tamaroa, te ruu ae rau ae aranaki bwa te ruu ae te tiretio. Inanon te ruu ae te tiretio ti namakina ae tia kaan riki nakon Tamara are i Karawa ao Iesu Kristo, ao ti namakina te bae uarereke bwa aekakira aron te maeka mangaiia n te abanuea are tiretio.
Te Kabaeaki ibukin Ngkai ao n aki Toki
Ngkana a mare n te tembora te aine ao te mwaane, a katorobubua n te baonikarea ao a kabaeaki ibukin ngkai ao n aki toki. E nanonaki aei bwa ngaiia ao natiia a kona ni bane n ikotaki bwa te utu ae akea tokina. Baaireia bwa kona mareaki n te tembora n te bong teuana. Aio bon te kakabwaia man tembora ae rangin korakora.
Kariaiakam nakon te Tembora
Te tembora bon te tabo ae tabu. Taian bitiobi ao beretitenti n te mwaanga a na kakoaua raoi bwa te koraki ake a rin n te tembora a tauraoi ao n tau. Imwaain nakom nakon te tembora, e na iai am intawiu ae onoti ma am bitiobi ke te beretitenti n te mwaanga. E na titirakiniko ngkana iai am koaua n te Ekaretia, ko kaawakin tuua, ko boutokaia taan kairiri n te Ekaretia, ongeaba nakon Tuan te Mauri, ko kakabwakaa am kabwianibwai, ao ni kokoaua ni bwaai ni kabane are ko karaoi ao taekin. E na buokiko n ataa te bwai ae kona karaoia bwa kona n tau n rin n te tembora.
Tauraoi Ngkai n Rin n te Tembora
Tamara are i Karawa e anga kakabwaia aika a mwaiti nakoia ake a maeka ma te raoiroi ao a na nako nakon te tembora. E rangin kakaawaki te katauraoi n rin n te tembora ngkai ko kairake.
Tamara are i Karawa e tangiriko ao e tangiria bwa kona karekei kakabwaia man te tembora. E na kakabwaiako ibukin karaoakin taian otenanti n te tembora ibon ibukim ao tabeman. E ngae ngke kona aki kona n rin n te tembora ngkae, ngkana iai te tembora ae uakaan, ko kona ni kawara tinanikun te tembora ao n namakina te tamnei are e mena ikekei. Ko kona naba ni kaawakina tamnein te tembora ni mweengam bwa e na kauringko aron kakaawakin te tembora. Maiuakina te raoiroi bwa ko aonga n tau n rin n ana auti te Uea.
Taraa te kiraati n te tamnei aei. Tabeua ruu ni kabaeaki iai kiratiia n aron aei. Ibukin te kabaeaki n te tembora, ara utu, bon aekakin ootan te kiraati aei, e kona n reiti nako n akea tokina.
Taraa te ruu ae te tiretio n te tamnei aei ao inanon te tamnei iaon iteraniba 64. Tera am namakin ngkai ko noora te ruu ae te tiretio?
Boston Massachusetts Tembora. Katabuaki Okitobwa. 1, 2000.
Te ruu ni Kabaeaki, Aba Nigeria Tembora.
Te ruu ae Tiretio, Nuku’alofa Tonga Tembora.