Ara Mare n te Tembora E Materaoi Karekeana
E aki maan imwiin aki koron nanon au moan bitineti ao au kauoua ngke e buee rabwatana nako aontano n te aro are I iangoia ngkana I kona ni kaira au kabae te aine, Beny, nakon te tembora. Ti ongo bwa kaeakin ikekei bon kataakin te onimaki ae korakora, ma ngkana ti karaoa te mare n te tembora bwa ara kouru, akea ara kantaninga bwa bwaninra ara onimaki ae e na kataaki.
Ngai ao Beny ti kaitibo n abara ae Panama imwiin bwanen ara mwakuri ni mitinare. Ibukin taian tua i Panama, taanga are a tangiria ni moana maiuia ni mare n te tembora ana mareaki n te tua imwaain mwanangaia nakon te tembora ae uakaan, te Guatemala City Guatemala Tembora. Bon te mwananga ae boobuaka ao e kanganga, ma te kabaeaki bon te kakabwaia ae tiaki tangiria bwa ti na maiu ao e na aki reke iroura.
Imwiin te bong are I kabutiman iai, I a kabuaa au mwakuri. N aki ongei taian kanganga, I baaireia bwa n na kareke mwane man te kaneweaba n te bwati. E uruaki au bwati n te moan tairiki anne. I raraoma ma te kantaninga ae matoa, imwiina I a baaireia bwa n na kabooi nako taian karinano aika iai baia. Te moaningabong are N na nako iai n anai taian karinano mairoun te kambwana are e karaoi, I a kunea bwa te kateitei e bane rabwatana ni buee nako aontano n te tairiki are mai imwaaina. E taraa n ae au kantaninga a bane n aki koro naba nanoia.
Bon tii inanon tabeua namakaina imwaain te mwananga are imwiina are e a tia ni baaireaki nakon te tembora, nakon te iango aei, te korakora ni kabane are I a tia ni karaoia ibukin au kareke mwane e a bon roko n tokina bwa e aki koro nanona n te tai ae waekoa. I kitana te kateitei ae buee rabwatana ao I a nako ni kakaea Beny.
“Ai bon akea arou,” I tuanga neiere raou. “Tao koa bon riai n aki mare ma ngai.”
“Ngke arona bwa I mare tii ibukin te mwane, N na kaman riai n tia ni mare,” e taku neierei. “Ma I aki mare ibukin te mwane. I kani mare ma ngkoe ibukina bwa I tangiriko.”
Anne bon te iango ae karaunano. Ti namakinna bwa ti tokanikai iaon te kataaki ae kakaawaki. Ngke ti waaki nako n ara katauraoi iaon ara onimaki, a moanna n roko kakabwaia. I a karekea au mwakuri ni karaoakin bwain nanon te auti, e ngae ngke e aki tau te boo are e na kona ni kaaitara iai kainnanora. Ngkanne te bitiobi ae e nanoanga e anga nanona bwa e na buokiira ni karekei kantokara n te bwati. Ngkai kakukurein ana anga nano ni ibuobuoki e bon, aki eti karaoana. Ti kabanei nanora bwa ti na riki n toronibwai. Ma n taraakina ngkai e anga nanona ni kan ibuobuoki, ti bubutia ngkana e kona ni karekea ana mwakuri Beny n oneamwiin ana ibuobuoki.
Imwiin karekean te mwane ae tau ibukin te mwananga nakon te tembora, ti mareaki n te tua ao rimwii ti mwananga ni kawaira nako Guatemala ma 10 riki tabeman kaain te Ekaretia. Ma kataakira e bon tuai n toki.
Te taowae ae riki ni bao ni mwamwananga e kateira n tian Costa Rica. Imwiin tataningaara n te tia inanon uabong te bong, e a baaireia ara turaiwa bwa e na oki. Ma ngai ao Beny, ni ikotaki ma taari mwaane aika uoman ao temanna te taanga, ti baaireia bwa ti na aki kabwarai nanora. Imwiin taraakin ara bwati ngke e raibwake n oki ao ni kitaniira, tia nakonako inanon Costa Rica. Ti waaki nako n nakonako, ti matu n taabo ni katantan irarikin te kawai, ni karokoa ae ti roko n tian Nicaragua. Mai ikanne ao ti kataia n toka n te taekitii nakon kautuun te aba, ike ti kabooi ara tiketi nakon tian Hondura. Uabong te bong—ao uowaa riki taian bwati—imwiina ao tia roko n te tembora. Ti bon baareka ao ti kua, ao ti kabanea ae e riaon are tia tia ni baaireia, ma ti bon kukurei.
N te bong are imwiina, imwiin kataakira aika mwaiti ma arora n tataninga, ao n tokina tia bon kabaeaki bwa te buu te mwaane ao te buu te aine ibukin ngkai ao n aki toki. Kimwareireira—e uaana mwakuriana, te tataninga, ao te raraoma—e bon bwanin!
Tiaki aomata n tatabemaniia aika a mareaki n te tembora a na kaaitarai kakaewenako aikai, ma ibukiu ao Beny (ao tabeman are a rin n te tembora ma ngaira), baika ti rinanona aikai bon reireiara ao karikirakeara. Bon teuana mai ibuakon bwaai aika a korakora aika I a tia n rinanona inanon maiu.
Ngkana ara kouru ni mare n te tembora bwa e karaoaki tii ibukin tangiran te aonaaba, ti na bon aki kona ni kakoroa nanona. Ma ibukin ae ti kakoaua mwaakan te kabaeaki n te nakoanibonga are e kaokaki ibukin ara bong, ti aki kabwarai nanora, n ataakin ara mare n te tembora—ibukin ngkai ao n aki toki—e bon uaana e ngae ngke tera te karea are tia tia ni karaoi.