Titiraki aika Okioki Taekinaia

Tera ae a karaoia aomata inanon te tembora?

Inanon te tembora ti reireinaki, ti karaoi berita aika a tabu, ao ti beritanaki n taian kakabwaia. Ti karekei taian otenanti are e kona ni kariaira ni maeka ni mweengan te Atua.

Teuana te otenanti are ti karekea n te tembora bon te entaumente. Te taeka entaumente e nanonaki “bwaintangira” ke “anganako.” Ngkai iteran te otenanti aei, ti reireinaki oin bukin te maiu aei, ana mition ao ana mwakuri ni Kamaiu Iesu Kristo, ao ana babaire Tamara are i Karawa ibukiia Natina. Ti karekea te iango bwa e na aekakira te maeka ni Mweengana ngkai ti namakina te namakin ae rau man te tembora.

Teuana naba te otenanti n te tembora bon te otenanti ibukin te kabaeaki, ike te buu te mwaane ao te buu te aine a kabaeaki imarenaia ao naati a kabaeaki nakoia kaaro inanon utuu ae akea tokina. E nanonaki n aei bwa ngkana ti kakaonimaki nakon ara berita aika a tabu, ara reitaki n te utu e na reiti nako n aki toki.

N ikotaki ma karekean taian otenanti aikai ibukira, ti kona ni karekei ibukiia ara bakatibu ake a tia ni mate. N te anga aei, aomata ake a tia ni mate n aki karekei otenanti aika a kakaawaki aikai ibukin te bwabetito ao te kamatoaaki, te entaumente, ao te kabaeaki e reke aia tai ni butimwaai taian otenanti aikai.

Aekakira nanon te tembora?

Te tembora bon te tabo ae rau, ae tabu, kaokoroaki ma raraoman ao tabetaben te aonaaba. Taabo nako n te tembora a kateimatooaki ao n tararuaaki ibukin kaawakinan raun te tamnei. Ibukina ngkai bon ana auti te Uea, ao ibukina ngkai e karaoaki te mwakuri ae tabu ikekei, n te tembora ti kona n namakina te Tamnei ae rangi n korakora ao n namakina kaaniara ma te Uea. Ikanne are ti kona ni karekea te kaotioti ae onoti ao te korakora n namakinan te tamnei ni buokiira n tokanikai iaon kataakira. Aio iteran bukin ae ti kaungaaki bwa ti na nakon te tembora ni katoa tai.

N na Kanga ni kunnikainai ngkana I nako nakon te tembora?

Kabonganai kunnikain te Taabati aika taraa raoi ngkana ko nako n te tembora. Totokoi kabonganaan kunnikai aika a taraabuaka ao aki itiaki, n aiaron naba are ko kabongana n bootakin te toa. Ko kaota te rau ao te karinerine ibukin te Uea ao Ana auti ao ni kaoa te Tamnei n man taraakin itiakim ao ae e butimwaeaki.

N te tembora iai ruu n onono aika a onoti ike ko kona n onea kunnikaim n te Taabati ao ni karina te kunnikai ae mainaina. Te bitaki n te kunnikai aei e karaoaki bwa te kauring bwa koa kiitana te aonaaba ni kararoaa n te tai ae kimototo ao n rin n te tabo ae tabu. Te kunnikai ae mainaina e kanikinaea te itiaki, ao te kantaninga are ni kabane a kunnikainiia n ti tetikina n te tembora e karika te katiteuanaaki ao te kabooraoaki.

Nningai ae N na karekea au entaumente?

Ni koauana ao ko na bae ni karekea am entaumente teutana te tai imwaain ae ko karaoa am mwakuri ni mitinare ae bwanin ke imwaain mareakim n te tembora. Taian membwa aika a tuai n iein inanon kabanean aia ririki aika tebwi tabun ke ni moan aia kauabwi tabun ake a tuai ni karekea te wewete nakon te mwakuri ni mitinare ao aika a tuai tau ni kona ni mareaki n te tembora a bon aki kariaiakaki bwa a na karekei oin aia entaumente.

Taian membwa aika boou a tataninga inanon teuana te ririki imwiin aia bwabetito ao te kamatoaaki imwaain karekean aia entaumente.

Karekean oin am entaumente bon te bwai ae kakaawaki. Maroroakinna ma am bitiobi. Tataro ao iangoia raoi bwa kona ataia ngkana koa tauraoi.

Tera ae I kona n taekinna nakoia tabeman ibukin te bwai are I a tia n rinanoi n te tembora?

Ko kona ni maroroakinna bwa aekakira taraakin nanon te tembora, ao ko inaomata n tibwaua te namakin are ko karekea n te tembora. Ngaia are, berita aika a tabu n te tembora ao otenanti, ni ikotaki ma taian taeka ake a kabonganaaki, a bon rangin tabu maroroakinaia itinanikun te tembora. Man totokoakin maroroakinan bwaai aika a tabu itinanikun te tembora, ti kamanoi man bwainingareakiia, kaenaenakiia, ke akean karineakiia. Ko na aki tabe ngkana ko taekina rongorongon te bwai are koa tia n rinanona n te tembora.

Bukin tera ngkai e kabonganaaki te kanikina n te tembora?

Inanon Ana mwakuri ni mitinare iaon te aba, te Tia Kamaiu e aki toki n reirei n taian taetae ni kaikonaki n tei ibukin te koaua ae akea tokina ae kanikinaeaki. E baaireia bwa ti na reireinaki n te kawai naba are ti tebo ma are e karaoaki n te tembora. Iai te kanikina n taian otenanti n te tembora ao berita aika a tabu, kabwarabwaraana, taraakina ma rabwatana, ao kabonganaan te kunnikai. Ngkana ko iangoi raoi taian kanikina aikai ma ana kairiri te Tamnei ae Raoiroi, a kona ni buokiko ni kinaa te koaua, ae reiakinaki ibukin Tamara are i Karawa ao Iesu Kristo, ao n rikirake n te maiu n tamnei.

Iai kaain au utu aika aki kona n nakon te tembora. Tera ae N na karaoia ni buokiia n namakina karinakiia n au mare n te tembora?

Aio te bwai ae kona n rootiia aomata ni korakora. Ngkai te tembora bon ana auti te Uea, e katauaki ti Ibukina, te koraki ake a rin ana riai ni karekea te beeba ni kariaia nakon tembora ae tuai bane taina, are e kamatoa n taekinna bwa a maiuakina taian kainibaire are E a tia ni katauraoi. Ngaia are, te koraki are e tuai reke aia beeba ni kariaia nakon te tembora ae tuai bane taina a butimwaeaki nako tinanikun te tembora, ao angiia tembora iai ruuia ike a kona n tataninga iai ngkana a kabaeaki aia utu. Te taanga ma kaain ana utu aika aki kona n rin n te tembora a kona ni kaoa te bitiobi ke temanna kaain te Ekaretia n tiku mangaia n te ruu n tataninga.

Te taanga a kona naba ni baaireia ma te bitiobi ni karaoa te bowii ae onoti imwiina ibukiia utu ao taian rao are akea aia beeba ni kariaiakaki. Te bowii aei e karekea te tai ibukiia n namakina karinakiia ao n reiakina taekan te mare ae akea tokina. E ngae ngke akea te bootaki ae karaoaki ao akea berita aika kaaibibitaki, a kona taian mwamwa ni kaaibibitaki n tain te bowi.

Tera ae N na karaoia bwa n na tauraoi ni karekei taian otenanti n te tembora?

Ko kona n tauraoi man kakawaran te tembora ni katoa tai ni karaoi mwakuri ni bwabetito ibukiia maate, man irakin te tieminaa ni katauraoi n nakon te tembora are e barongaaki iroun am bitiobi, ao man kamatebwaiakan koroboki aika a tabu ao taian koroboki n te boki ae uarereke aei.

Ko kona naba ni katauraoi man maiuakinan ana kainibaire te Uea ibukin taum n te tembora. Nabea raoi am koaua iroun te Atua te Tama ao iroun Iesu Kristo ao Ana euangkerio are e a tia ni kaokaki. Ongeaaba nakon Tuan te Mauri ao tuan te itiaki. Boutokaiia am tia kairirii n te Ekaretia, kabwakaa am kabwianibwai ae bwanin, ao kakaea am bootaki n te Ekaretia. Bwaiana te kokoaua ma tabeman, ao kakoaua bwa maiun am utu e mena n raun ana reirei te Ekaretia. Kaawakin am berita n te bwabetito bwa ko aonga n tauraoi ni karekei berita aika a rietata man te tembora.

Te ruu ae te Tiretio, Mount Timpanogos Utah Tembora.

Jordan River Utah Tembora. E Katabuaki n Nobembwa. 16, 1981.

Nauvoo Illinois Tembora. E Katabuaki n Tuun 27, 2002.