Tera Bukin Tembora Aikai?
Tembora n Ana Ekaretia Iesu Kiristo Ibukiia Aika Itiaki Ni Boong Aika Kaitira bon kateitei aika tabu ake a kona ni kaekaaki iai titiraki aika akea tokiia.
Tembora bon taabo ake ara titiraki ibukin te maiu ana karekea kaekaia n te tai are akea tokina
Iai te mwaane ke te aine ae, a tia n aki iangoi bwain te maiu aei aika raba, n ana tai n rau n iango?
E a tia teuanne ke neienne n aki titiraki, “I nako ma ia? Bukin tera I mena ikai? N na nakea? Tera au reitaki nakon te uare e Karikai? E kona te mate ni karaureira ma raora aika tangiraki n te maiu aei? A kanga aroia au utu? E na iai riki te maiu imwiin aei, ao ngkana iai, ti kona ni kinaira n tatabemaniira ikekei?”
Kaeka nakon titiraki aikai aki kona ni kuneaki ni wanawanan te aonaaba. A ti kona ni kuneaki ti man ana taeka te Atua ae kaokaki. Ana Tembora Ana Ekaretia Iesu Kiristo Ibukiia Aika Itiaki Ni Boong Aika Kaitira kateitei aika tabu are a kona ni kaekaaki iai titiraki aika akea tokiia. Ni kabane a katabuaki bwa ana auti te Uea, te tabo ae mimitong ao n rau aika kaokoroaki ma bwain te aonaaba. Inanon te tembora a reireiaki ao otenanti a karaoaki are a uota ataakin bwaai aika akea tokiia ao ni kaunga nanon te tia iria bwa e na maiu ma atakin rikira mai ieta bwa ngaira bon natin te Atua ao atakina bwa ngaira bon aomata aika akea tokiia.
Tembora a onoti ma bukiia ao aron kabonganakiia man ana kateitei te aro riki ake tabeua
Kateitei aikai, a kakokoro ma ana auti n nebonebo te Ekaretia aika kona ni kuneaki ni kabuta te aonaaba, a onoti ma bukiia ao n aron kabonganakiia ni kabotauaki ma ana kateitei te aro riki ake tabeua. Tiaki buburan kateitei aikai ke tikiraoia ae karikia n onoti. Bon te mwakuri ae waakinaki inanon oon taian tembora.
Aron katean kateitei aikai ibukin otenanti aika onoti, ni kaokoroaki ma taabo n nebonebo tabeua, bon tiaki te bwai ae boou. Aio bon te bwai ae kakaraoaki iaon Iteraera n taai akekei, ike aomata a kakaraoa aia taromauri ni katoa tai inanon taian tinekaoki. Aia tabo ae moan te tabu bon, teuana, te tabaenako n te buakonikai ae Tabu man Tabu, ao imwiina karinanin tembora aika mwaiti, ike a karaoaki inanona otenanti aika onoti ao ike ti aomata aika a reke irouia bwaai aika a kainnanoaki aika a kona ni karaoi otenanti aikai.
Bon ti tebo ma ngkai. Imwain katabuan te tembora, ao e kaoia aomata Ana Ekaretia Iesu Kiristo Ibukiia Aika Itiaki Ni Boong Aika Kaitira bwa ana rin ni mataku n te kateitei ao n noori bwaina aika kakaokoro. Ma ngkana e a tia ni katabuaki e a riki bwa ana auti te Uea, n anganaki arona ae moan te tabu ae ti kaain te Ekaretia aika a tau aika kariaiakaki n rin. Tiaki ibukin arona ae tabu taekinakin mwakuri inanona. Bon ibukin mimitongina ke tabuna.
Mwakuri n te tembora bon ibukira n tatabemaniira nako ngkai ngaira bon kaain ana utu te Atua ae akea tokina
Te mwkauri ae wakinako inanon te kateitei aei e kaota ana kantaninga te Atua ae akea tokina ni kaineti riki nakon te aomata, ae natin te Atua ao Ana karikibwai. N angiin mwakorona, mwakuri n te tembora e tabe riki ma te utu, ma ngaira n tatabemaniira nako ngkai ngaira ana utu te Atua ae akea tokina ao ngkai ngaira kaain te utu n te aonaaba. E tabe ma tabun ao taekan te berita n te mare ae akea tokina ao reitakiia utu.
E kakoauaki raoi bwa mwaane ao aine n tatabemaniia ake a bungiaki nakon te aonaaba bon natin te Atua, a tia ni karekei Anuana. Kaokiokan reirei aikai iai mwiina ae uaana nakoia naake a karekei, bukina bwa moantua a kabwarabwaraaki raoi n taetae aika tikiraoi ao n anainano, taan ongora a kona n ataia bwa ngkai te mwaane ao te aine bon natin Tamara are i Karawa, ngaira n tatabemanira nako bon kaain te utu ma ieta, ngaia ae, aomata n tatabemaniia bon taari ao titita.
Ngakna e titirakinaki iroun te tia koroboki, “Tera te moan tua ma ibuakon tuua ni kabane?” e kaeka te Tia Kamaiu, “Ko na tangira te Uea ae Atuam n nanom ni kabanea, ao n tamneim ni kabanea, ao ni wanawanam ni kabanea, ao n korakoram ni kabanea: aio te moan tua.
“Ao aio te kauoua, e kangai, Ko na tangira raom n ai aron tangiram bon iroum” (Mareko 12:28, 30–31).
Reirei ake a taekinaki n tembora n taai aikai e anga te kabwarabwara ae moan te mwaaka nakon ara tia Karikibwai ao nakoia raora. Otenanti aika tabu e karikirakea aia ataibwai ana utu te Atua. Otenanti aika tabu a reireiniira bwa te tamnei inanora n tatabemaniia nako bon akea tokina, ni kaota kaokorona ma te rabwata, ae mamate. Aki ti anga kamatataan koaua aika tamaroa aikai ma a karikirakea naba aia tangira taan iri nakon te Atua ao e kaungaa ni kaota riki te tangira nakoia tabeman natin Tamara.
Kariaiakakin te iango ae ngaira ni kabane natin te Atua e buokiira ni kakoaua bwa iai te kantaninga ibukin te maiu ae mamate. Ikai naba, ae a reiakinaki koaua aika kaokaki n ana auti te Uea. Te maiu n te aba bon mwakoron te mwananga ae akea tokina. Ti maeka bwa naati n tamnei imwaain ae ti roko ikai. Booki aika tabu a kaota kakoauaan te bwai aei. E kakoaua n ana taeka te Uea nakon Ieremia: “Ngke I tuai karikiko inanon te birito ao I ataiko; ao ngke ko tuai n otinako mai inanon te birito ao I tabuiko, I motika bukim bwa te burabeti nakoia botanaomata” (Ieremia 1:5).
Kakawakin te reitaki ni maiun te utu e kona n reitinako n te aonaaba ae na roko
Ti roko nakon te maiu aei bwa naati irouia kaaro aika mamate ao bwa kaanga membwa n te utu. Kaaro bon taan ni bwabwai ma te Atua ni kakoroa nanon Ana kantaninga ae akea tokina n reitaki ma Natina. Ma ngaia ae, te utu, bon te bootaki ma ieta, ae moan te kakawaki n te maiu ae mamate ao n te maiu ae akea tokina.
Angiin te mwakuri ae reitinako inanon tembora e kaineti riki ma te utu. Irarikin are ataakin nanona bon ataakin te koaua are e ngae ngke ngaira bon natin te Atua imwaain ae ti bungiaki nakon te aonaaba aei, ti na bon teimatoa naba ni maiu imwiin te mate, ao te reitaki ae kakawaki man kororaoi n te maiu aei, nanona ae moan te tamaroa ao ni uaana ae a kona ni kuneaki n te utu, e na reitinako n te aonaaba ae na roko.
Ngkana te mwaane ao te aine a mareaki n ana auti te Uea, a reitaki tiaki ti n te tai are a maiu iai ma ibukin te maiu ae akea tokina. A uaia ni kabaeaki iaan te kariaiakaki tiaki ti n tuan te aba are e kabaeia ni karokoa te mate ma rinanon naba ana nakoanibonga te Atua ae akea tokina, ao ane ko kabaea i karawa ao e na kabaeaki naba i aon te aba. Te taanga are a mareaki n te tembora iai irouia te koaua ibukin kaotioti ma ieta bwa aia reitaki ma aia ataei e na aki toki n te mate ma e na teimatoa n aki toki, ti ngkana a maiuakina te maiu ae tau ibukin te kakabwaia anne.
Iai te mwaane ae tangira raoi te aine, ke te aine ae tangira raoi te mwaane, ae aki tataro bwa aia reitaki e na kona n reitnako imwiin te mate? Iai te ataei ae a tia n taunaki irouia ana karo ae aki ata te koaua are natiia ae a tangiria e na manga bon riki naba bwa natiia n te aonaaba are imwiina? Iai ae kakoaua te maiu are akea tokina n nanououa bwa Atuan karawa e na anganiia Natina mwaane ao aine te kabanea ni kakawaki ni bwain te maiu, te tangira are e kabwarabwara nanon te reitaki n te utu ae uaana? Akea, bukina bwa e na reitinako te utu imwiin te mate. Nanon te aomata bwa e na reitinako, ao Atuan karawa e a tia ni kaoka te kawai are e na kona ni kaawakinaki iai. Otenanti aika tabu n ana auti te Uea e katauraoi.
Kakabwaia n te tembora a bane n tauraoi ibukira ni kabanel
Ma bwaai aikai ni kabane ana bon aki raoiroi ngkana kakabwaiakan otenanti aikai a tauraoi ti nakoia naake a kaaina ngkai Ana Ekaretia Iesu Kiristo Ibukiia Aika Itiaki Ni Boong Aika Kaitira. Te koaua bwa te tai n nakon te tembora ao ni karekei kakabwaia ma iai e uki nakoia ni kabane ake a na butimwaea te euangkerio ao ni bwabetitoaki nakon te Ekaretia. Ibukin aei, te Ekaretia e reita nako aia buroukuraem mitinare n angiin te aba n te aonaaba ao e na teimatoa ni karaabaaba te buroukuraem aei n aron are a kona, bukina bwa iai katabeana, iaan kaotioti ma ieta, n reirei taekan te euangkerio n aaba, reeti, neewe, ma aomata ni kabane.
Ma iai mirion te aomata aika tuai warekaki ae a tia ni maeka iaon te aba ao man tuai n reke aia tai n ongora taekan te euangkerio. Ana kona n aki anganaki kakabwaia ae a karekeaki n ana tembora te Uea?
Rinanoia taan onomwi aika maiu aika a tei ibukiia maate, te otenanti naba anne ae a tauraoi nakoia naake a tia ni kitana te maiu ae mamate aei. N te aonaaba n tamnei aomata naba aikai a kainaomataaki ni butimwaea ke n totokoi otenanti n te aonaaba aika a karaoaki ibukiia, n raonaki ma te bwabetito, te mare, ao kabaeakiia kaain te utu. Akea te kairoro n ana mwakuri te Uea, ma e na iai reken te tai.
Te mwakuri n te tembora bon te beku ibukin te tangira n aia itera ake a maiu ibukiia ake a tia ni mate
Te mwakuri n anganano aei iai inanona te mwakuri n tangira ae akea kabotauana n aia itera aika maiu ibukiia ake a tia ni mate. E karekea te mwakuri korakora ibukin te kakaae n rongorongon te utu n ukoukoriia ao ni kinaia naake a maeka imwaira. Te ibuobuoki n te mwakuri ni kakaae aei, te Ekaretia e tararua te buroukuraem ibukin rongorongon te utu ao ni kateimatoai bwaai ni mwakuri aika akea katotongaia ni kabuta te aonaaba. A uki ana tabo ni boki nakon te botanaomata ao n tia ni kabonganaaki irouia aika mwaiti aika tiaki kaain te Ekaretia ni ukoukorii aia bakatibu. E a tia ni kamoamoaki te buroukuraem aei irouia taan kamatebwaia rongorongon te utu ni kabuta te aonaaba ao n tia ni kabonganaaki irouia aaba aika kakaokoro bwa ibukin kawakinan oin aia rekooti. Ma oin raoi bukina bwa e na katauraoia kaain te Ekaretia ma bwaai n ibuobuoki aika kainnanoaki ni kinaia aia bakatibu ake a na kona ni kaota nakoia taian kakabwaia ake a tia ngaia ni karekei. Ti tebo ma a taekinna nakoia, “Ngkana e korakora au tangira nakon buu ao natiu ngaia are I tangiriia naba bwa ana karekea te maiu are akea tokina, ngkanne tiaki tibu te unimwaane ae a tia ni mate ao tibutoru ao au bakatibu riki ake tabeman e reke aia tai ni karekea naba te kakabwaia ae akea tokina?”
Tembora a karekea te tai n reirei ibukin bwaai aika iai nanoia n te maiu aei
Ma ngaia ae kateitei aika tabu aikai bon tamnein waaki aika tamaroa, n reitaki nako n te aro ae rau man iai te tamnei iai. A kauringiira ni mwakoron ana mii ni burabeti Ioane te tia Kaotioti are a tauaki iai mwiin te titiraki aei ao te kaeka aei: “Antai aika a kunnikaia n ninira aika mainaina? ao a nako mai ia? …
“Bon aikai aika nako mai buakon te rawawata ae korakora, ao a teboki niniraia, ao a kamainainai n raraan te Tibutetei.
“Ma ngaia ae a memena I nanoaan ana kaintokanuea te Atua, ao a toro irouna ni ngaina ao ni bong ni maneabana” (Kaotioti 7:13–15).
Naake a nakon auti aika tabu aikai a bwaini kunnikai aika mainaina ngkana a ibuobuoki inanona. A roko ti man aia kariaia aia mataniwi n te ekaretia, ake a tia ni kakoauaaki man tauia. A kantaningaaki bwa ana roko n itiaki n aia iango, itiaki n rabwataia, ao n itiaki n aia kunnikai n rin n ana tembora te Atua. Ngkana a rin a kantaningaaki bwa ana katikui bwain te aonaaba ao n ti iangoi bwaai aika ma ieta.
Te waaki aei, ngkana e kona n atongaki bwa, iai oin ana kaniwanga, bwa antai n taai n rawawata aikai ae na bon aki butimwaea te tai ni kanakoa bwain te aonaaba ao n rin nakon ana auti te Uea, ikekei are ko na iangoia ma te karaurau taekan te Atua aika akea tokiia? Tembora aikai a karekea te tai, ae akea te tabo ae kona n reke iai, n reirei iai ao n ti iangoa koauan nanon bwain te maiu—ara reitaki nakon Deity ao mwanangara nakon te maiu are akea tokina man te maiu imwaain te maiu ae mamate nakon te maiu aei ao nakon te maiu ae na roko are ti na ataia ao ni kinaira temanna ma temanna, n raonaki ma raora ake ti tangiriia ao ara bakatibu ake a kaman kitaniira ao mairouia ara bakatibu ae ti karekei ma iai bwain rabwatara, ara iango, ao tamneira.
N te tembora ao ti anganaki berita n ana kakabwaia te Atua ae akea tokina
Ni koauana tembora aikai akea kabotauaia ma aekan katetei riki tabeua. Auti ibukin kaetieti. Taabo ibukin reirei ao berita aika tabu. N aia bao ni karea ti katorobubua imatan te Atua, ara Tia Karikibwai, ao n anganiia berita n Ana kakabwaia aika akea tokiia. N taabo aika tabu inanon tembora ti reitaki ma Ngaia ao ni kabanea nanora nakon Natina te Mwaane, ara Tia Kamaiu ao te Tia Kaboi Maiura, te Uea Iesu Kristo, are e tei bwa te tia oneanimwi ibukira ni kabane n te mwakuri n anganano ibukira. Ikai are ti na mwaninga iai taekara ao ti na beku ibukiia ake aki kona n beku bon ibukiia. Ikai, iaan mwaakan ana nakoanibonga te Atua ae koaua, ti uaia ni kabaeaki n te reitaki iroun te aomata ae moan te tabu— bwa bumwaane ao buaine, bwa naati ao kaaro, bwa utu iaan te kabaebae ae aki kona n uruaki ao e aki kona n urua te mate.
Kateitei aika tabu aikai a kateaki n ririki aika e korakora iai te kangaanga ngke a teimatoa Aika Itiaki ni Boong Aika Kaitira ni kanakoaki ao n tiringaki. A tia ni kateaki ao ni karaoaki n tain te kainnano ao te kabwaia. A roko man taian koaua aika matoatoa ma mwaitin kaaina ae rikirake ae a kaota koaun te Atua ae maiu, taekan te Uea ae manga uti, ao burabeti ao kaotioti ma ieta, ao te rau ao kakoauaan kakabwaia aika akea tokiia ae a kona n reke ti man ana auti te Uea.
Nei ni bwabetito, Papeete Tahiti Tembora.
Stockholm Sweden Tembora. Katabuaki Turai 2, 1985.
Manti Utah Tembora. Katabuaki Meei 21, 1888. Mangakatabuaki Tuun 14, 1985.