“Aokati 23–29. Reirei ao Berita aika Tabu 93: ‘Karekea Bwanininna,’” Nakomai, Irirai—Ibukin te Moanrinan: Reirei ao Berita aika Tabu 2021 (2020)
“Aokati 23–29. Reirei ao Berita aika Tabu 93,” Nakomai, Iriirai—Ibukin te Moanrinan
I Noora Natin te Aomata n Tei i Angatain te Atua, iroun Walter Rane
Aokati 23–29
Reirei ao Berita aika Tabu 93
“Karekea Bwaninna”
Ataei ake ko reireiniia bon natiia Karo ake i Karawa aika tamnei aika a kakaawaki ao ti maiu ma Ngaia imwain rokora iaon te aba. Imwiin kamatebwaian Reirei ao Berita aika Tabu 93, tera ae ko namakinna ni kaungaaki bwa kona karaoia ni buokiia ataei aikai n rikirake “inanon te ota ao te koaua”? (kibu 40).
Korei Am Namakin
Kaungaa te Tibwatibwa
Kaota tamnein te Tia Kamaiu (n aron ake n te Boki n Tamnei n te Euangkerio ke ana maekatiin te Ekaretia), ao tuangiia ataei bwa a na tibwa te bwai are a ataia ibukina. Ataei ake a ikawai a kona n tibwai kibu man Reirei ao Berita aika Tabu 93 are e buokiia n reiakina taekan Iesu Kristo.
Reirei te Reirei: Ataei aika a Uarereke
Reirei ao Berita aika Tabu 93:2–21
Iesu Kristo bon Natin te Atua.
E kakaawaki bwa ataei ake ko reireiniia a na reiakinna bwa antai Iesu Kristo ao bukin tera a riai n iriiria. Te koaua n taekan Iesu Kristo e kuneaki ni mwakoro 93 e kona n ibuobuoki.
Ti karekea otan Iesu Kristo ngkana ti kawakin Ana tua.
Waaki ni Kakukurei aika a Kona ni Karaoaki
-
Rinei tabeua koaua ake ko reiakinna n taekan te Tia Kamaiu inanon mwakoro 93 aika a kaunganano nakoim. Ibukin koaua nako ake ko rinei, warekia nakoia ataei te kibu are e kuneaki iai, ao anganiia kingin te taeka ae a na kakauongo nako iai ngkai ko warekia. Tibwa te kakoaua ae kimototo iaon te Tia Kamaiu, ao kariaia ataei bwa a na tibwaia ma ake irouia. Rinanin koaua aikai a kona n anganiko iangoana:
Iesu Kristo e karaoa ana mwakuri te Karo (kibu 5).
Iesu Kristo bon Otan te Aonaaba (kibu 9).
Iesu Kristo bon te Tia Karika te aonaaba (kibu 10).
Iesu Kristo e karekei mwaakan karawa ni kabane ao iaon te aba (kibu 17).
Iesu Kristo e mena irarikin te Atua mai moan te tai (kibu 21).
-
Tuangiia ataei bwa a na kakauongo nakon te bwai are a reiakinna n taekan te Tia Kamaiu ngkai ko kauarerekea am taeka iaon koaua ake a reiakinaki inanon mwakoro 93. (Ko kona naba ni kabongana “mwakoro 33: Te Kaotioti iaon taekan Iesu Kristo” [Karakinan Reirei ao Berita aika Tabu, 126–27].)
Reirei ao Berita aika Tabu 93:23, 29
I maeka i karawa ma Tamara are i Karawa imwain rokou n te aonaaba.
Bukin tera e kona ni kakaawaki buokaia ataei ake ko reireiniia bwa a na ataia bwa a maeka ma Tamara are i Kaawa imwain ae a bungiaki? E kanga te atatai n te koaua aei ni kakabwaiako?
Waaki ni Kakukurei aika a Kona ni Karaoaki
-
Ikotaki ni kaokioka te taeka ma ataei “Kam bon mena mai moana ma te Tama” (Reirei ao Berita aika Tabu 93:23). Kabwarabwara bwa imwain ae ti bungiaki nako aon te aba, ti maeka ma Tamara i karawa. Ikotaki anenea “Ngai Natin te Atua” ke “I Lived in Heaven” (Aia Boki n Anene Ataei, 2–3, 4).
-
Kaoia ataei bwa a na karana te iteraniba are karanaki ao korea tamneia ma Tamara are i Karawa ao Iesu Kristo n te maiu are imwain te maiu aei. Kaota am koaua bwa te Atua e tangiriira ni kabane ao ngaira natina ni kabane.
Reirei te Reirei: Ataei aika a Ikawai Riki
Reirei ao Berita aika Tabu 93:2–21
Iesu Kristo bon Natin te Atua.
Mwaitin are ti ataia n taekan Iesu Kristo, mwaitin riki nanora ao ara karinerine n tangiria n taromauriia ao ni kan nakon te Tama n rinanona (taraa Reirei ao Berita aika Tabu 93:19).
Waaki ni Kakukurei aika a Kona ni Karaoaki
-
Kaota tamnein te Tia Kamiu, ao tuangiia ataei bwa bukin tera e kakaawaki bwa ti na ata taekan Iesu Kristo. Kaoia bwa a na tarai reitan kaeka inanon Reirei ao Berita aika Tabu 93:19. Kaoia bwa a na iangoa te kawai teuana are a kona n reiakina iai riki taekan Iesu ni wiiki aika a na roko, ao anganiia aia tai n tibwa aia iango.
-
Iangoi kawai ni kareke iango ni kaungaia ataei bwa a na wareka taekan te Tia Kamaiu inanon mwakoro 93. Ko kona ni koroi iaon mwakoro ni beeba tabeua nen koroboki nakon kibu man mwakoro 93 are e reirei koaua iaon Iesu Kristo (te katooto, taraa kibu 5, 9–10, 17, 21). Katuka te mwakoro ni beeba inanon te kaonteina, ao tuangiia ataei bwa a na ikaruoruo n rinea teuana ao ni wareka te kibu man koroboki aika a tabu nakoia kain te kiraati. Tera ae ti reiakinna man kiibu aikai ibukin Iesu Kristo?
Reirei ao Berita aika Tabu 93:23, 29, 38
I maeka ma Tamara are i Karawa imwain rokou n te aonaaba.
Te Tia Kamaiu e katuruturua teniua te tai inanon mwakoro 93 bwa ti maeka ma te Atua “mai moana ” (kibu 23, 29, 38). Bukin tera E na kona n tangiriira bwa ti na ata aei? E kanga ataakin aei ni kakabwaiaia ataei ake ko reireiniia?
Waaki ni Kakukurei aika a Kona ni Karaoaki
-
Wareka Reirei ao Berita aika Tabu 93:23, 29, 38 n ikotaki, ao kaoia ataei bwa a na taratarai koaua i bon ibukiia ake a kaokiokaki inanon kiibu aikai. Tuangiia ataei bwa a na tibwai bwaai nako n taekan aia atatai ibukin maiura ma Tamara are i Karawa imwain ae ti bungiaki. Katoaia n anganiia ataei teuana man kiibu aikai, ao buokiia bwa a na kakaea te bwai are e reirei iaona kiibu aikai n te maiu imwain rokora iaon te aba: Ieremia 1:5; Reirei ao Berita aika Tabu 138:53–56; Mote 3:5; Aberaam 3:22–26.
-
Ikotaki anenea “Ngai Natin te Atua” ke “I Lived in Heaven” (Aia Boki n Anene Ataei, 2–3, 4). Tera taian koaua aika ko reiakin man te anene aei ibukin te kantaninga ibukin rokora n te aonaaba?
Reirei ao Berita aika Tabu 93:24
Te koaua bon ataakin bwaai man taai ake rimoa, ngkai, ao n taai aika a na roko.
Te aonaaba e mwaiti ana taratara aika kakaokoro iaon te koaua ao n aron kakaeana. Ko na kanga ni buokiia ataei ake ko reireiniia bwa a na ota bwa te koaua e bon koaua n aki taraia bwa tera ae a kona n taekinna tabeman ao bwa Tamara are i Karawa e atai koaua ni kabane?
Waaki ni Kakukurei aika a Kona ni Karaoaki
-
Korea te taeka koaua iaon te burakibooti, ao tuangiia ataei bwa a na korea kabwarabwaraana irarikina. Ikotaki warekia bwa e kanga te Uea ni kabwarabwara te koaua inanon Reirei ao Berita aika Tabu 93:24. Anenea te kuna iaon te koaua, n aron “Oh Say, What Is Truth?” (Kuna n Taromauri, nambwa. 272), ao kaoia ataei bwa a na kakaea te kuna ni kawai tabeua aika a na kbwarabwara te koaua.
-
Ni buokiia ataei bwa a na karaoi koaua inanon Reirei ao Berita aika Tabu 93, korei tabeua taekan kibu man koroboki aika a tabu man te mwakoro aei iaon mwakoro ni beeba. Iaon te mwakoro ni beeba ake tabeua, korei koaua ake a reirei iaon kiibu aikai n tatabeua. Kaoiia ataei bwa a na ikotaki ni mwakuri ao ni wareki kiibu ao ni katoatoai koaua nakon kiibu ake a wareki. Bukin tera ti kakaitau ni karekean te atatai iaon te koaua?
Kaungaa te Kamatebwai n te Mweenga
Kaoia ataei bwa a na korea ke ni korea tamnein te bwai are a tia n reiakinna man te kiraati ao n tibwaia ma aia utu ngkana a okira mweengaia.
Kanakoraoan Ara Anga Reirei
Buokiia ataei bwa a na kina te Tamnei. Ngkai ko karekei aia taneiai ataei n te maiu n tamnei (te katooto, ngkai ko wareki koroboki aika a tabu ma ngaiia, ongora n aia koaua, ke n anene n ikotaki), buokiia ni kinaa ana wirikiriki te Tamnei ae Raoiroi.