“Aokati 2–8. Reirei ao Berita aika Tabu 85–87: ‘Teei n Taabo Aika Tabu,’” Nakomai, Iriirai—Ibukin te Moanrinan: Reirei ao Berita aika Tabu 2021 (2020)
“Aokati 2–8. Reirei ao Berita aika Tabu 85–87,” Nakomai, Iriirai—Ibukin te Moanrinan: 2021
Aokati 2–8
Reirei ao Berita aika Tabu 85-87
“Teei n Taabo Aika Tabu.”
Bukina bwa am tai ma ataei e tianaki, ukoukori kairi n tamnei bwa ko na atai reirei man koroboki aika tabu aika ko riai ni kamataatai raoi. Onimakin wirikiriki aika ko karekei.
Korei Am Namakin
Kaungaa te Tibwatibwa
Kaotia nakoia ataei tamnei tabeua ke iteraniba ni kakukurei aika ko a tia ni kabonganai n reirei aika tibwa nako, ao kaoiia ataei bwa a na tibwaua te bwai ae a uringnga ae a tia n reireinaki taekaia, tao n te kiraati ke n te mweenga.
Reirei te Reirei: Ataei aika a Uarereke
Reirei ao Berita aika Tabu 85:6
Te tamnei e taetae n te “ bwanaa ae maraara.”
E taku Unimwaane Richard G. Scott, “Ngkana akea te bwai ae ko a tia ni kakoroa bukina ma am reitaki ma ataein am reirei irarikin are ko na buokiia ni kinaa ao n ira ana wirikiriki te Tamnei, ko na kakabwaiai maiuia n ae korakora ao n akea tokina” (“To Learn and to Teach More Effectively” [Brigham Young University Education Week devotional, Aokati 21, 2007], 5, speeches.byu.edu).
Waaki ni Kakukurei aika a Kona ni Karaoaki
-
Warekia nakoia ataei aron ana kabwarabwara Iotebwa Timiti iaon te Tamnei: “Eng, e taku te bwana ae maraara n rau” (Reirei ao Berita aika Tabu 85:6). Tuangiia ataei bwa a na aran tabeua bwaai aika a uarereke (kaoti tamnei ngkana a kainnanoa te ibuobuoki). Tuangiia bwa a na bobaraki iaon tano n te aro ae uarereke ao n rau nakon ae a kona. Buokiia n iangoia bwa e kanga te bwanaa ni kona ni maraara, ao tuangiia bwa ana kataneiaia ni kakauongo nakon ao n taetae n te bwanaa ae maraara. Taekin taai ngke e taetae te Tamnei nakoim n te bwanaa ae maraara n rau.
-
Reireiniia ataei te anene iaon te Tamnei, n aron “The Holy Ghost” (Aia Boki n Anene Ataei, 105). Kaoiia bwa a na aneneia ma ngkoe n te bwanaa ae maraara. Tera ae reirei te anene aei iaon taekan te Tamnei ae Raoiroi? Buokiia ataei bwa a na ataa te tai are ana kona n namakina iai Ana kairoro (n aron ae ngkana ko tataro, anenei anene n taromauri, ke ni buokiia tabeman).
Reirei ao Berita aika Tabu 86:11
I Kona n riki bwa te ota nakoia tabemwang.
Tiekition 86 e kabwarabwara te mwakuri ae kakawaki ae tangiria te Uea bwa a na karaoia Ana toro ni boong aika kaitira. Teuana te kawai ae a kona ataei n ibuobuoki n te mwakuri aei bon man rikiia bwa te ota nakoia aomata ake irarikiia.
Waaki ni Kakukurei aika a Kona ni Karaoaki
-
Warekia nakoia ataei kibu n taeka aikai man Reirei ao Berita aika Tabu 86:11: “Kam kakabwaiaaki ngkana kam reitinako i nanon raoiroiu, te oota nakoia Tientaire [ke aomata aika akea irouia te euangkerio].” E kanga te oota ni kakabwaiaira? E na kanga arora ngkana akea te oota iroura? Ti na kanga n riki bwa te oota nakoia aomata tabeman aika aki ata taekan te euangkerio? Buokiia ataei n iangoi kawai ake ti kona n tibwauai iai roiroin Iesu ma tabeman.
-
Tuangiia ataei bwa a na iangoia ae raoraoia e kataia n nakonako n te roo (kamatea te oota ngkana e na ibuobuoki). Bukin tera e matoatoa te nakonako n te roo? Tera ae ti kona ni karaoia ni buokiia raoraora? Kabwarabwara bwa ngkana ti iriira te Tia Kamaiu, ti tebo ma kauraan te taura are e kona ni buokiia tabeman bwa a na iriiria naba.
-
Maekatiin aika te Riaona ao Te Rao iai n taainako inanoia karaki ibukiia ataei aika banna ni katooto aika raraoi. Kakaea teuana te katooto ae ko na tibwauaia ma ataei ae na kaungaiia bwa a na riki bwa banna ni katooto naba aika raraoi.
E kona n riki mweengara bwa “taabo aika tabu.”
Akea te mweenga ae kororaoi, ma iai bwaai aika ti kona ni bane ni karaoi bwa aonga n riki mweengara bwa taabo aika tabu man rau.
Waaki ni Kakukurei aika a Kona ni Karaoaki
-
Kabwarabwara nakoia ataei bwa e raraoma Iotebwa Timiti ibukin bwaai aika riki n te aonaaba. Kakimototoi atuun rongorongo n tiekition 87, ke wareka “Mwakoro 30: A Revelation about War” (Karaki man Reirei ao Berita aika Tabu, 117–18; taraa naba te witeo iaon ChurchofJesusChrist.org). Tuangiia ataei bwa a na kakauongo ibukin bwaai aika a tia ni karika Iotebwa bwa e na raraoma iai. N reirei te bwai ae taekinna Iotebwa ti riai ni kakaei angan kaangaanga aikanne, wareka Reirei ao Berita aika Tabu 87:8.
-
Kaota tamnein te tembora, ao tibwauaia bwa bukintera te tembora te tabo ae tabu. Kaota tamnein te mweenga, ao buokiia ataei n iangoi kawai aika a kona ni karaoa iai mweengaia bwa te tabo ae tabu n aron te tembora (taraa te iteraniba n te waaki ni kakukurei n te wiiki aei). Bukin tera ti tangiria ni maeka n te tabo ae tabu?
Reirei te Reirei: Ataei aika a Ikawai Riki
Reirei ao Berita aika Tabu 85:6
E taetae te tamnei n te bwanaa, “ae rau ma ni maraaraa.”
E rangin n rawata ana kabwakabwaka te aonaaba aika a kona ni karika te kaangaanga n ongora te Tamnei. Ko na kanga ni buokiia ataei ni kakauongo ibukin bwanaan te Tamnei?
Waaki ni Kakukurei aika a Kona ni Karaoaki
-
Tuangiia ataei bwa tera ae a na taekinna ngkana iai temanna ae titirakiniia bwa a kanga n ataia ngkana te Tamnei are Raoiroi e taetae nakoia. Kaoiia bwa a na wareka taekan te kawai teuana ngke Iotebwa Timiti e kabwarabwara iai bwanaan te Tamnei inanon Reirei ao Berita aika Tabu 85:6.
-
Katanga te anene n taromauri ke aia anene ataei ni karaurau, ao tuanga temanna te ataei bwa e na ketinna bwa tera te anene anne ngkai ake tabeman a karaoi mwakuri ni kamangaongao, n aron te uboubo ke kabukibukan waeia iaon tano. Ngkanne tuangiia ataei ake tabeman bwa ana katokia, ao maroroakinna bwa e kanga aei n titebo ma ongoraeakin te Tamnei ae Raoiroi ngkana ti kanakoi mwakuri ni kamangaongao man maiura. Buokiia ataei n iangoi mwakuri ni kamangaongao aika a kona ni kanakoi bwa aonga n namakina te Tamnei n tainako.
I kona ni bobotiia ana aomata te Atua.
Te taetae ni kaikonaki i aon te wiita ao te titania bon iaon “boong aika kaitira, riki ngkai” (Reirei ao Berita aika Tabu 86:4). Kabongana te taeka ni kaikonaki aei ni buokiia ataei n namakina te kaungaaki n “ira ikotakin te wiita” (te kibu 7).
Waaki ni Kakukurei aika a Kona ni Karaoaki
-
Tuangiia ataei taeka ni kaikonaki ibukin te wiita ao te titania, ke kaoa te ataei bwa e na taekinna (taraa Mataio 13:24–30). Kaoiia ataei bwa a na korea tamnein te bwai teuana man te taeka ni kaikonaki. Bootaki ni wareka Reirei ao Berita aika Tabu 86:1–7, ao kaoiia ataei bwa a na koroia iaon aia tamnei te bwai ae tei ibukina.
-
Katauraoi tamnei tabeua aika uarereke ke tamnein te wiita, ao karabai inanon te ruu. Kaoiia ataei n tatabemaniia nako ni buoka ikotakin wiita ao korea aran temanna iaona ae a kona ni “ikotiia” nakon Iesu Kristo. Tera ae nanonaki n ikotakiia aomata nakon Iesu Kristo? Tera tabeua kawai aika ti kona ni karaoa iai te bwai aei? Tera ae nanonaki n “reitinako n raoiroin [te Tia Kamaiu],” ao e kanga anne ni buokiira n ikotiia aomata Nakoina(Reirei ao Berita aika Tabu 86:11).
I kona n “tei … n taabo aika tabu.”
Ataei ake ko reireiniia a na rinanon kaangaanga n te tamnei ao n te rabwata inanon maiuia. Ko kona ni buokiia ni katauraoia ni kaitarai kaangaanga aikanne n reireiniia bwa a na kakaea ao n tei n taabo aika tabu.
Te mwakuri n te tembora bon te kawai teuana ae ti kona ni buokiia n ikotiia ana aomata te Atua.
Waaki ni Kakukurei aika a Kona ni Karaoaki
-
Bootaki ni wareka Reirei ao Berita aika Tabu 87:6 n reiakin iai bwaai aika e taekin te Uea bwa ana riki ni boong aika kaitira. Tuangiia ataei bwa a na maroroakin taekan kakaewenako ake a rinanoi n tabetai ataei aika aia roro. Kaoiia bwa a na kakaea inanon te kibu 8 te bwai ae taekinna te Uea bwa ti riai ni karaoia n taai aika a kaangaanga. Tuangiia ataei taekan taabo aika tabu inanon maium.
-
Buokiia ataei bwa a na koroi aran taabo aika tabu, iango aika tabu, ao mwakuri aika tabu aika a kona ni buokiia ni kaitarai kaangaanga ma te tamnei (ibukin iango, taraa te witeo aei “Standing in Holy Places” ao “Stand Ye in Holy Places—Bloom Where You’re Planted,” ChurchofJesusChrist.org). Kaoiia bwa a na kawakin aran bwaai aikai ma ngaia bwa ana okiria imwiina ngkana e kainnanoaki.
Kaungaa te Kamatebwai n te Mweenga
Kaoiia ataei bwa a na rinea te bwai ae a na karaoia ni karaoa mweengaia ke maiuia bwa te “tabo ae tabu.”
Kanakoraoan Ara Anga Reirei
Kabongana am iango. Tai tiatianiko nakon iango ni waaki ni kakukurei n te kamataata aei. Kariai iango aikai bwa a na kaunga oin am konabwai. Iangoa te bwai ae a na kukurei iai kaain am kiraati ao te bwai ae na buokiia n reiakinna.